Li hu The Watch Tower (La Torre del Vigía) 1 re junio 1912 kixye: «Maare naabʼal rehebʼ li nekeʼilok re li qahu nekeʼxnaw ruhebʼ li poyanam li mutzʼebʼ». Li hu aʼin naxye ajwiʼ naq wank ebʼ li tasal hu chi sibʼil choʼq rehebʼ. Ut naxye ajwiʼ: «Li tasal hu aʼin choʼq rehebʼ li poyanam li mutzʼebʼ naʼisimank chi huhil rikʼin ebʼ li kokʼ tzʼuq li naʼilmank chiʼus re naq teʼruuq xyaabʼasinkil. Naabʼalebʼ li kristiʼaan li mutzʼebʼ kʼajoʼ nekeʼxbʼanyoxi xnawbʼal naq twulaq li kutan naq li ruuchichʼochʼ tnujaq chi osobʼtesihom».

 Naq kitzʼiibʼamank chaq ebʼ li aatin aʼin, ebʼ laj testiiw re li Jehobʼa ak nekeʼrisi chi huhil ebʼ li tasal hu «rikʼin ebʼ li kokʼ tzʼuq li naʼilmank chiʼus» usta toj maakʼaʼ junaq li kʼanjelobʼaal re braille saʼ inglés li truuq t-oksimanq saʼ chixjunil li ruuchichʼochʼ. Saʼebʼ li qakutan toj naʼisimank ebʼ li qatasal hu chi huhil choʼq rehebʼ li mutzʼebʼ. Ut naʼisimank saʼ numenaq 50 chi aatinobʼaal! Chanru nakʼubʼamank?

 Li nabʼaanumank xbʼeenwa aʼan xjalbʼal ebʼ li aatin joʼ chanru wank saʼebʼ li kokʼ tzʼuq re braille. Laj Michael Millen, li nakʼanjelak rikʼinebʼ li nekeʼxkʼubʼ ebʼ li tasal hu re naq t-elq aran Patterson (Nueva York), naxye: «Junxil naqoksi chaq li software comercial re xnumsinkil ebʼ li aatin saʼ li kokʼ tzʼuq re braille, abʼan moko nakʼanjelak ta choʼq re chixjunil li aatinobʼaal. Anaqwan naqoksi li kʼanjelobʼaal Watchtower Translation System, li naxkanabʼ naq tqanumsi ebʼ li aatin saʼ li kokʼ tzʼuq re braille kachʼin chik ma saʼ chixjunil li aatinobʼaal re chixjunil li ruuchichʼochʼ. Maakʼaʼ chik junaq li kʼanjelobʼaal joʼ aʼin saʼ jalan chik naʼajej».

 Saʼebʼ li tasal hu saʼ braille moko kaʼaj tawiʼ natawmank ebʼ li naʼlebʼ, natawmank ajwiʼ li xchʼolobʼankil li jalam u. Jun eetalil, saʼ braille joʼweʼ natawmank li xchʼolobʼankil li eetalil li wank chiru li tasal hu Sahaq laachʼool chi junelik!: «Jun li winq naxtikibʼ bʼeek saʼ jun li bʼe li naxqʼoti ribʼ, nujenaq chi uutzʼuʼuj, bʼool ut tzuul». Laj Jamshed, jun li natenqʼank rehebʼ li cheekel winq ut aj kʼamolbʼe saʼ li puktesink li mutzʼ, naxye: «Jwal oxloqʼ chiwu li xchʼolobʼankil ebʼ li jalam u».

 Naq ak xeʼxnumsi li aatin saʼebʼ li kokʼ tzʼuq saʼ braille, li kʼanjel nataqlamank saʼebʼ li qamolam bʼarwiʼ nekeʼrisi chi huhil. Re xbʼaanunkil, naʼoksimank jun li hu li inkʼaʼ napejeʼk naq nekeʼxnumsi chiru ebʼ li kokʼ tzʼuq li naʼilmank chiʼus chi moko naxjotʼ ribʼ naq naʼoksimank naabʼal sut. Chirix chik aʼan, natusmank ebʼ li perel ut nachapmank rikʼin jun li espiral. Moqon nataqlamank rikʼinebʼ li junchʼol chik chi tasal hu li nekeʼxkʼul ebʼ li chʼuut malaj nataqlamank chi sibʼil choʼq rehebʼ li mutzʼ wi saʼ xnaʼaj li korreo naru xbʼaanunkil. Naq naʼajmank, ebʼ li qamolam saʼ junpaat nekeʼxtaqla choʼq rehebʼ li hermaan li mutzʼebʼ malaj li nekeʼchʼaʼajkoʼk chiru ilok ebʼ li tasal hu li t-oksimaq saʼ li chʼutam.

 Naxkʼam naabʼal hoonal ut tumin xbʼaanunkil chixjunil aʼin. Aran Wallkill (Nueva York), li naʼaj bʼarwiʼ naʼisimank chi huhil ebʼ li qatasal hu juntaqʼeet li hoonal li naʼoksimank re xyiibʼankil 2 li Santil Hu saʼ braille chiru xyiibʼankil 50,000 rehebʼ li junchʼol chik chi Santil Hu. Joʼkan ajwiʼ, jun li Santil Hu saʼ braille grado 2 saʼ inglés wank 25 li tasal chisaʼ. a Ebʼ li kʼaʼaq re ru li naʼoksimank re xyiibʼankil jun li Santil Hu saʼ braille 123 sut qʼaxal terto xtzʼaq chiru li naʼoksimank re xyiibʼankil jun li Santil Hu. Li xtzʼaq li rix jun li Santil Hu saʼ braille li wank 25 tasal chisaʼ aʼan 150 dólar.

 Chanru nekeʼrekʼa ribʼ li nekeʼtenqʼank chi xkʼubʼankil ebʼ li tasal hu aʼin? Li xNadia, li wank saʼ li qamolam re Sudáfrica, naxye: «Chʼaʼaj li xwanjikebʼ li hermaan li mutzʼebʼ malaj li nekeʼchʼaʼajkoʼk chiru ilok. Joʼkan naq choʼq we jun loqʼlaj maatan xtenqʼankilebʼ. Chʼolchʼo chiwu naq li Jehobʼa naxrahebʼ».

 Ut wi junaq li kristiʼaan li mutzʼ moko naxnaw ta ilok ru hu saʼ braille, kʼaru naru tixbʼaanu? Wiibʼ oxibʼ chihabʼ anaqwan kiʼisimank jun li hu li naxkʼabʼaʼi Aprenda a leer braille. Saʼ li hu aʼin wankebʼ li aatin chi tzʼiibʼanbʼil ut ebʼ li tzʼuq saʼ braille. Ut kʼubʼanbʼil re naq ebʼ li kristiʼaan li mutzʼebʼ ut ebʼ li nekeʼruuk chi ilok teʼruuq roksinkil. Saʼ li hu aʼin wank ebʼ li kʼanjelobʼaal li naru nekeʼroksi ebʼ li mutzʼ re tzʼiibʼak saʼ braille. Li poyanam li yook xtzolbʼal braille truuq roksinkil aʼin re tzʼiibʼak. Aweʼ ttenqʼanq re, re naq truuq kanaak saʼ xchʼool ebʼ li kokʼ tzʼuq saʼ braille ut xtawbʼal ru kaʼajwiʼ rikʼin xchʼeʼbʼal rikʼin ruʼuj ruqʼ.

 Chanru ebʼ li tasal hu saʼ braille naxtenqʼahebʼ li hermaan li mutzʼebʼ malaj li nekeʼchʼaʼajkoʼk chiru ilok? Qilaq li kixkʼul laj Ernst, li wank Haití. Aʼan nawulak saʼebʼ li chʼutam saʼ li Chʼutlebʼaal Kabʼl, abʼan maakʼaʼ junaq li xtasal hu saʼ braille. Joʼkan naq naxxok chixjunil li naʼlebʼ saʼ li xkʼaʼuxl naq tixbʼaanu junaq li kʼanjel malaj naq traj sumenk. Aʼan naxye: «Anaqwan chixjunil xjalaak, joqʼe nawaj naru chik tintaqsi li wuqʼ re sumenk. Qʼaxal nachʼ chik nawekʼa wibʼ rikʼinebʼ li hermaan. Anaqwan chiqajunilo juntaqʼeet chik li naʼlebʼ li naqakʼul re xkawresinkil li qapaabʼal».

 Laj Jan aʼan jun li cheekel winq li wank aran Austria ut nachʼaʼajkoʼk chiru ilok. Usta joʼkan, aʼan naxbʼeresi li tzolok chirix li hu Laj Kʼaakʼalehom ut xtzolbʼal li Santil Hu saʼ li chʼuut. Aʼan naxye: «Ebʼ li qatasal hu saʼ braille tzʼaqal re ru tzʼiibʼanbʼilebʼ. Jun eetalil, saʼebʼ li junjunq chi perel wankebʼ li ajl, moko chʼaʼaj ta xtawbʼal xtzʼaqobʼ li naʼlebʼ ut li xchʼolobʼankil li jalam u natenqʼank chiʼus».

 Li xSeon-ok, jun laj kʼamolbʼe saʼ li puktesink, li wank Corea del Sur. Mutzʼ ut tzʼapxik. Junxil, naʼajmank chiru naq rikʼin li ruqʼ teʼxchʼolobʼ chixjunil li nayeemank saʼ li chʼutam. Abʼan, anaqwan naru chik rilbʼal xjunes ebʼ li tasal hu saʼ braille. Aʼan naxye: «Jwal chʼaʼaj xyaabʼasinkil jalan chik li tasal hu saʼ braille xbʼaan naq moko tzʼaqal ta ebʼ li kokʼ tzʼuq, moko tiik ta ru wank malaj jay ru li hu. Abʼan jwal sa xyaabʼasinkil ebʼ li tasal hu rehebʼ laj testiiw re li Jehobʼa xbʼaan naq jwal chaabʼil li hu nekeʼroksi ut ebʼ li kokʼ tzʼuq naʼilmank chiʼus. Junxil, rikʼin li xtenqʼ junaq ninruuk xtzolbʼal ebʼ li tasal hu. Abʼan anaqwan ninruuk chik xbʼaanunkil injunes. Kʼajoʼ nawulak chiwu xkawresinkil wibʼ ut tzʼaqonk saʼebʼ li chʼutam. Laaʼin nawil chixjunil ebʼ li tasal hu saʼ braille. Relik chi yaal, junelik nawaj xyaabʼasinkil!».

 Saʼebʼ li tasal hu saʼ braille ut saʼebʼ li junchʼol, naxye aʼin: «Li hu aʼin nakʼanjelak re xtawbʼal ru chiʼus li Santil Hu ut napuktesimank saʼ chixjunil li Ruuchichʼochʼ. Li kʼanjel aʼin nabʼeresimank rikʼin joʼnimal nekeʼraj tenqʼank ebʼ li poyanam». Saʼ xkʼabʼaʼ li tenqʼ tumin li nakʼemank saʼ li kʼanjel re chixjunil li ruuchichʼochʼ rikʼin li jalan jalanq chi naʼlebʼ li natawmank saʼ donate.pr418.com, chixjunilebʼ nekeʼruuk xtawbʼal li naʼlebʼ li naxkawresi li qapaabʼal, joʼ li kristiʼaan li mutzʼebʼ ut li nekeʼchʼaʼajkoʼk chiru ilok. Qʼaxal naqabʼanyoxi naq nekeʼxkʼehok chi anchal eechʼool.