Saʼ li 23 re Marzo naqoybʼeni naq teʼkʼulunq 12 miyon tana ebʼ li qas qiitzʼin chi rabʼinkil li seeraqʼ chirix li xnimankil li xkamik li Kriist. Laj kʼehol seeraqʼ tixchʼolobʼ naq li Jehobʼa kixkʼe qe jun li nimla maatan naq kixyeechiʼi chaq li ralal choʼq mayej ut rikʼin aʼin chiqajunilo tooruuq xtawbʼal rusilal (Isa 11:6-9; 35:5, 6; 65:21-23; Jn 3:16). Abʼan moko kaʼaj tawiʼ laj kʼehol seeraqʼ ttzʼaqonq saʼ li nimla kutan aʼin. Laaʼo wanq ajwiʼ qahoonal chi xkʼulbʼalebʼ chiʼus ebʼ li ulaʼ (Ro 15:7). Qilaq wiibʼ oxibʼ li naʼlebʼ chirix chanru tqabʼaanu.

• Matkanaak chi chunchu chi roybʼeninkil joqʼe ttiklaaq li seeraqʼ, kʼe aachʼool chi xkʼulbʼal chiʼus ebʼ li ulaʼ ut ebʼ li keʼxkanabʼ kʼulunk saʼ qayanq. Seʼseʼaq laawu ut tuulanaqat rikʼinebʼ.

• Kʼe aachʼool chi xkʼulbʼalebʼ laawulaʼ, ut qʼesaq aawu chi xkʼulbʼal ebʼ li qas qiitzʼin li xeʼxkʼul chaq xbʼoqbʼalebʼ rikʼin li hu li xyeechiʼimank saʼ li nimla kʼanjel. Bʼoq aawikʼin chi chunlaak ut taawotz rikʼin Laasantil Hu ut laabʼichlebʼaal.

• Naq traqeʼq li chʼutam, taapatzʼ re ma wank junaq xpatzʼom. Wi aajel ru naq laachʼuut t-elq saʼ junpaat re naq t-oq li jun chik chʼuut, taakʼe aawibʼ saʼ aatin rikʼin li qas qiitzʼin re naq tatruuq rulaʼaninkil. Naru nakaaye re: «Chanru xaawil li seeraqʼ? Chanru tinruuq chi aatinak aawikʼin?».