Santiago 4:1-17
4 Kʼaʼut nekexpleetik ut nekeechoqi eeribʼ? Ma inkʼaʼ tabʼiʼ chalenaq aʼin rikʼin li naxrahi ru leetibʼel li yookebʼ chi yalok re eerechaninkil?
2 Aʼin xyaalal naq inkʼaʼ nekeekʼul li yookex xrahinkil ru. Inkʼaʼ nekeekanabʼ xkaqalinkil eeribʼ ut xrahinkil ru li kʼaru rehebʼ li junchʼol, abʼan inkʼaʼ nekeetaw. Laaʼex junelik yookex chi pleetik chanchan tawiʼ wankex saʼ jun li yalok. Maakʼaʼ wank eere xbʼaan naq inkʼaʼ nekexpatzʼok.
3 Naq nekexpatzʼok inkʼaʼ nekeekʼul xbʼaan naq nekexpatzʼok re xbʼaanunkil li maaʼusilal ut re xbʼaanunkil li naraj leetibʼel.
4 Ex aj tzʼeqtaanahom re li Yos, ma inkʼaʼ nekeenaw naq wank choʼq ramiiw li ruuchichʼochʼ aʼan xtzʼeqtaanankil li Yos? Joʼkan bʼiʼ, li naraj wank choʼq ramiiw li ruuchichʼochʼ yook xtzʼeqtaanankil li Yos.
5 Malaj nekeekʼoxla naq maakʼaʼ xyaalal naq li Raatin li Yos naxye: «Li qachʼool* li nokoorekʼasi chi kaqalink naxbʼaanu naq qʼaxal tqarahi ru jalan jalanq li kʼaʼaq re ru»?
6 Abʼan, li nimla usilal li naxkʼutbʼesi aʼan, qʼaxal nim. Joʼkan naq li Raatin li Yos naxye: «Li Yos inkʼaʼ naxkʼulubʼaʼebʼ li nekeʼxnima ribʼ, abʼan naxkʼutbʼesi li xnimal rusilal rehebʼ li nekeʼxkubʼsi ribʼ».
7 Joʼkan bʼiʼ, kʼehomaq eeribʼ rubʼel xwankil li Yos, abʼan kawaqex chiru li Diʼaabʼ* ut aʼan t-eleliq cheeru.
8 Jilonqex chixkʼatq li Yos ut aʼan tjiloq cheekʼatq. Chʼajomaq leeruqʼ ex aj maak ut chʼajomaq leechʼool laaʼex li nawiibʼank ru leechʼool.
9 Qʼaxal rahaq leechʼool ut texyaabʼaq. Moko us ta naq yooqex chi seʼek, yooqex bʼan chi yaabʼak. Moko us ta naq sahaq leechʼool, rahaq bʼan leechʼool.
10 Kubʼsihomaq eewankil chiru li Jehobʼa* ut aʼan tixnima eeru.
11 Kanabʼomaq aatinak chirix xjolom ebʼ li junchʼol ex wechpaabʼanel. Li naʼaatinak chirix xjolom li rechpaabʼanel malaj naraqok aatin chirix li rechpaabʼanel inkʼaʼ us naʼaatinak chirix li chaqʼrabʼ ut naraqok aatin saʼ xbʼeen li chaqʼrabʼ. Joʼkan bʼiʼ, wi nakatraqok aatin saʼ xbʼeen li chaqʼrabʼ moko laaʼat ta jun rehebʼ li naxpaabʼ li chaqʼrabʼ, laaʼat bʼan aj raqol aatin.
12 Jun ajwiʼ laj Kʼehol Chaqʼrabʼ ut laj Raqol Aatin, aʼan naru chi kolok ut chi sachok. Abʼan laaʼat, anihat re naq tatraqoq aatin saʼ xbʼeen laawas aawiitzʼin?
13 Anaqwan abʼihomaq, laaʼex li nekeeye «Anaqwan malaj wulaj tooxik saʼ li tenamit aʼin ut toowanq aran jun chihabʼ, tooyakoq ut tqataw qatumin»
14 abʼan inkʼaʼ nekeenaw kʼaru tkʼulmanq rikʼin leeyuʼam wulaj. Xbʼaan naq laaʼex chanchanex jun li choql li nawank chiru jun kʼamok ut chirix chik aʼan nasach.
15 Inkʼaʼ raj teeye aʼin, tento bʼan raj teeye «Wi li Jehobʼa* naraj, yoʼyoqo ut tqabʼaanu aʼin malaj aʼin».
16 Abʼanan, anaqwan qʼetqʼetex ut eejunes nekeenima eeribʼ. Moko us ta naq nekeenima eeribʼ chi joʼkaʼin.
17 Joʼkan bʼiʼ, wi junaq li qas qiitzʼin naxnaw xbʼaanunkil li us abʼan inkʼaʼ naxbʼaanu, yook chi maakobʼk.
Xtzʼaqobʼ ebʼ li naʼlebʼ
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Taawil xchʼolobʼankil li aatin, Diʼaabʼ.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
