Ma tento naq tkubʼeeq inhaʼ?
TZOLOM 37
Ma tento naq tkubʼeeq inhaʼ?
Juchʼ ma yaal malaj tikʼtiʼ:
Chixjunilebʼ laj paabʼanel tento teʼkubʼeeq xhaʼ.
□ Yaal
□ Tikʼtiʼ
Li kubʼihaʼ tatxtenqʼa re naq inkʼaʼ tatmaakobʼq.
□ Yaal
□ Tikʼtiʼ
Li kubʼihaʼ tatxtenqʼa re naq tatkoleʼq.
□ Yaal
□ Tikʼtiʼ
Wi inkʼaʼ tkubʼeeq inhaʼ, li Yos moko traqoq ta aatin saʼ inbʼeen.
□ Yaal
□ Tikʼtiʼ
Xbʼaan naq ebʼ li wamiiw yookebʼ chi kubʼeek xhaʼ, ma tento ajwiʼ tkubʼeeq inhaʼ?
□ Yaal
□ Tikʼtiʼ
MA nakaayuʼami li naʼlebʼ li naxkʼe li Santil Hu? Ma nakaakʼe aachʼool wank saʼ amiiwil rikʼin li Yos? Ma nakaawotz li yaal li yookat xtzolbʼal saʼ li Santil Hu re jalan chik li qas qiitzʼin? Wi yookat xbʼaanunkil li naxye ebʼ li patzʼom aʼin ut toj maajiʼ nakubʼeek aahaʼ, maare ak yookat xkʼoxlankil. Abʼan, oybʼeni wank junpaataq. Tento taatzʼil rix ma ak kawresinbʼilat. Jun li naʼlebʼ li ttenqʼanq aawe aʼan rilbʼal chanru xaasume ebʼ li patzʼom saʼ xtiklajik.
● Chixjunilebʼ laj paabʼanel tento naq teʼkubʼeeq xhaʼ.
Yaal. Aʼan li kixye li Jesús rehebʼ li xtzolom naq teʼxbʼaanu (Mateo 28:19, 20). Li Jesús ajwiʼ kikubʼeek xhaʼ. Joʼkan naq re xtaqenkil li Jesús aajel ru naq tkubʼeeq aahaʼ abʼan tento naq chʼolchʼooq chaawu li taabʼaanu.
● Li kubʼihaʼ tatxtenqʼa re naq inkʼaʼ tatmaakobʼq.
Tikʼtiʼ. Li kubʼihaʼ nakʼanjelak re xkʼutbʼesinkil chiruhebʼ li qas qiitzʼin naq xaaqʼaxtesi chik laayuʼam chiru li Yos. Naq junaq naxqʼaxtesi li xyuʼam chiru li Jehobʼa naxbʼaanu saʼ xkʼabʼaʼ naq naraj wank joʼ li Jehobʼa, moko saʼ xkʼabʼaʼ ta naq aʼin tramoq chiru xbʼaanunkil junaq li naʼlebʼ li toj naʼalaak saʼ xchʼool.
● Li kubʼihaʼ tatxtenqʼa re naq tatkoleʼq.
Yaal. Joʼ naxye li Santil Hu, aajel ru li kubʼihaʼ re naq tookoleʼq (1 Pedro 3:21). Abʼanan, moko nakubʼeek ta aahaʼ saʼ xkʼabʼaʼ naq yal nakaawaj xtawbʼal li kolbʼa ibʼ. Nakubʼeek bʼan aahaʼ saʼ xkʼabʼaʼ naq nakaara li Jehobʼa ut nakaawaj kʼanjelak chiru chi junelik (Marcos 12:29, 30).
● Wi inkʼaʼ tkubʼeeq inhaʼ, li Yos moko traqoq ta aatin saʼ inbʼeen.
Tikʼtiʼ. Aʼ yaal ma kubʼenaq aahaʼ malaj inkʼaʼ saʼ Santiago 4:17, SBG, naxye: «Ani naxnaw xbʼaanunkil li us ut inkʼaʼ naxbʼaanu, aʼan wank xmaak». Joʼkan naq, wi nakaanaw kʼaru li us ut li inkʼaʼ us ut chʼolchʼo chaawu li kʼaru taawaj saʼ laayuʼam, us raj naq tat-aatinaq rikʼin laanaʼ laayuwaʼ malaj rikʼin junaq chik li hermaan xbʼaan naq aʼanebʼ tateʼxtenqʼa re naq tkubʼeeq aahaʼ.
● Xbʼaan naq ebʼ li wamiiw yookebʼ chi kubʼeek xhaʼ, ma tento ajwiʼ tkubʼeeq inhaʼ?
Tikʼtiʼ. Naq tkubʼeeq aahaʼ tento naq t-alaaq chaq saʼ aachʼool (Salmo 110:3, Li Santil Hu, Wycliffe Bible Translators). Kaʼajwiʼ tkubʼeeq aahaʼ naq chʼolchʼooq chaawu kʼaru naraj xyeebʼal wank joʼ aj testiiw re li Jehobʼa ut naq taabʼaanu chiʼus laakʼanjel li tenebʼanbʼil saʼ aabʼeen (Eclesiastés 5:4, 5).
Li kubʼihaʼ naxjal laayuʼam
Li kubʼihaʼ naxkʼam chaq naabʼal li osobʼtesihom saʼ laayuʼam. Abʼanan, naʼajmank naq taabʼaanu chiʼus laakʼanjel li tenebʼanbʼil saʼ aabʼeen. Bʼar wank? Xbʼaanunkil chixjunil li xaayeechiʼi re li Jehobʼa naq xaaqʼaxtesi laayuʼam chiru.
Ma ak kawresinbʼilat re naq tkubʼeeq aahaʼ? Wi joʼkan, chʼolchʼo naq sa laachʼool xbʼaan naq nakaara li Jehobʼa ut nakaawaj xbʼaanunkil li rajom chi anchal laachʼool (Mateo 22:36, 37).
Kʼe reetal chanru taawoksi chiʼus laayuʼam.
LI RAQAL LI WANK XWANKIL
«Cheqʼaxtesi leeyuʼam joʼ yoʼyookil mayej, sant, joʼ nawulak chiru li Yos. Aʼan aʼin li tzʼaqal mayejak qʼaxal xkʼulubʼ» (Romanos 12:1, SBG).
LI TATRUUQ XBʼAANUNKIL
Patzʼ rehebʼ laanaʼ laayuwaʼ ma nekeʼxnaw ru junaq li hermaan li truuq aatenqʼankil chi kʼiik saʼ laapaabʼal (Hechos 16:1-3).
MA NAKAANAW?
Li «reetalil» li naʼajmank re naq tatkoleʼq, aʼan li kubʼihaʼ (Ezequiel 9:4-6, SBG).
BʼAANU LI NAKAAYE
Li naʼlebʼ li wank saʼ li Santil Hu li tento tintaw ru chiʼus re naq tkubʼeeq inhaʼ: ․․․․․
Kʼaru twulaq raj chiwu xpatzʼbʼal re linnaʼ linyuwaʼ chirix li naʼlebʼ aʼin? ․․․․․
UT LAAʼAT, KʼARU NAKAAKʼOXLA?
● Kʼaʼut naq qʼaxal wank xwankil saʼ laayuʼam naq tkubʼeeq aahaʼ?
● Kʼaʼut wiibʼ oxibʼ li saaj nekeʼkubʼeek xhaʼ naq toj maajiʼ nawulak xhoonalil?
● Kʼaʼut wankatqebʼ li saaj li toj maajiʼ nekeʼraj xqʼaxtesinkil li xyuʼam re li Jehobʼa ut teʼkubʼeeq xhaʼ?
[Naxye]
«Xjultikankil naq kubʼenaq inhaʼ nikinxtenqʼa re naq inkʼaʼ tinbʼaanu junaq li naʼlebʼ li tinxchʼik saʼ chʼaʼajkilal» (Li xNoemí).
[Kaaxukuut ut li jalam u]
Li napatzʼmank rajlal chirix li kubʼihaʼ
Kʼaru xyaalal li kubʼihaʼ? Naq nakatsubʼeʼk saʼ haʼ chanchan tawiʼ naq xatkamk, xaakanabʼ chiʼixbʼej chixjunil li nawulak chaawu xbʼaanunkil. Naq nakat-elk chaq saʼ haʼ chanchan naq xatyoʼlaak wiʼ chik, abʼanan anaqwan re xbʼaanunkil li rajom li Jehobʼa.
Kʼaru naraj xyeebʼal xqʼaxtesinkil laayuʼam chiru li Jehobʼa? Naraj xyeebʼal naq xaayeechiʼi re naq moko aawe ta chik laayuʼam re bʼan chik li Jehobʼa (Mateo 16:24). Joʼkan naq, naq toj maajiʼ nakubʼeek aahaʼ tento tattijoq chiru li Jehobʼa ut taaye re naq chalen aran taatikibʼ kʼanjelak chiru.
Chanru yookat xbʼeresinkil laayuʼam naq toj maajiʼ nakubʼeek aahaʼ? Tento naq chaabʼilaq laayuʼam joʼ naxye li Santil Hu ut taawotz li yaal rikʼinebʼ li kristiʼaan. Tento ajwiʼ naq wanqat saʼ amiiwil rikʼin li Jehobʼa, li naraj xyeebʼal naq taatzol li Santil Hu rajlal kutan ut tattijoq. Aajel ru naq tatkʼanjelaq chiru li Jehobʼa xbʼaan naq naʼalaak saʼ aachʼool ut moko saʼ xkʼabʼaʼ ta naq minbʼil aawu.
Jarubʼ chihabʼ tento wanq we re naq tkubʼeeq inhaʼ? Maakʼaʼ naxye jarubʼ chihabʼ wank aawe. Li qʼaxal wank xwankil aʼan naq chʼolchʼooq chaawu kʼaru naraj xyeebʼal xqʼaxtesinkil laayuʼam chiru li Jehobʼa.
Kʼaru taabʼaanu wi nakaawaj naq tkubʼeeq aahaʼ abʼan laanaʼ laayuwaʼ nekeʼxye naq toj maajiʼ kawresinbʼilat? Paabʼ li nekeʼxye ut oksi li hoonal aʼan re xkawubʼresinkil laaʼamiiwil rikʼin li Jehobʼa (1 Samuel 2:26).
[Kaaxukuut]
Li naʼlebʼ li tatxtenqʼa
ma yookat xkʼoxlankil xsubʼal aawibʼ saʼ haʼ?
Ebʼ li patzʼom aʼin tateʼxtenqʼa re rilbʼal ma ak kawresinbʼilat chik re naq tkubʼeeq aahaʼ. Misach saʼ laachʼool rilbʼal li junjunq chi raqal li naxkʼam chaq!
Ma nakaakʼojobʼ aachʼool rikʼin li Jehobʼa? Chanru nakaakʼutbʼesi? (Salmo 71:5). ․․․․․
Ma nakaanaw xkʼebʼal reetal bʼar wank li us ut li inkʼaʼ us? Saʼ kʼaru li naʼlebʼ xaakʼutbʼesi? (Hebreos 5:14). ․․․․․
Rajlal joqʼe nakattijok? ․․․․․
Chirix kʼaru nakattijok? Ma naxkʼutbʼesi laatij naq nakaara li Jehobʼa? (Salmo 17:6). ․․․․․
Kʼaru naʼlebʼ naru tchaabʼilobʼresi saʼ laatij? ․․․․․
Rajlal joqʼe nakaatzol li Santil Hu? (Josué 1:8). ․․․․․
Naq nakattzolok saʼ junesal, kʼaru li naʼlebʼ nakaatzʼil rix? ․․․․․
Kʼaru li naʼlebʼ twulaq raj chaawu xtzʼilbʼal rix naq nakattzolok saʼ junesal? ․․․․․
Ma taaye raj naq chaabʼil nakaabʼaanu laakʼanjel saʼ li puktesink? (Jun eetalil: Ma nakaanaw xchʼolobʼankil chiʼus li naxye li Santil Hu? Ma nakaayal aaqʼe chi xsikʼbʼal wiʼ chik ebʼ li xeʼrabʼi chiʼus li esil? Ma yookat xyalbʼal aaqʼe re xsikʼbʼal jun li poyanam li twulaq raj chiru xtzolbʼal li Santil Hu?)
□ Heeheʼ □ Inkʼaʼ
Ma nakat-elk saʼ li puktesink usta inkʼaʼ nekeʼelk laanaʼ laayuwaʼ? (Hechos 5:42).
□ Heeheʼ □ Inkʼaʼ
Kʼaru li naʼlebʼ tatruuq raj xchaabʼilobʼresinkil saʼ li puktesink? (2 Timoteo 2:15). ․․․․․
Ma nakatwulak saʼ chixjunil li chʼutam malaj nakaakol junaq? (Hebreos 10:25). ․․․․․
Chanru nakattzʼaqonk saʼ li chʼutam?
Wi nekeʼxkʼe aaleseens, ma nakatwulak saʼ li chʼutam usta laanaʼ laayuwaʼ inkʼaʼ nekeʼwulak? ․․․․․
□ Heeheʼ □ Inkʼaʼ
Ma taaye raj naq jwal nawulak chaawu xbʼaanunkil li rajom li Jehobʼa? (Salmo 40:9).
□ Heeheʼ □ Inkʼaʼ
Ma jultik aawe naq ebʼ laawechtzolom keʼxmin aawu re naq taabʼaanu junaq li yibʼru aj naʼlebʼ ut xaaye naq inkʼaʼ? (Romanos 12:2). ․․․․․
Kʼaru naru taabʼaanu re naq junelik taara li Jehobʼa? (Judas 20, 21). ․․․․․
Wi laanaʼ laayuwaʼ malaj ebʼ laawamiiw teʼxkanabʼ raj li yaal, ma taakanabʼ raj ajwiʼ laaʼat? (Mateo 10:36, 37).
□ Heeheʼ □ Inkʼaʼ
[Jalam u]
Li kubʼihaʼ aʼan jun li naʼlebʼ li qʼaxal wank xwankil li tento taakʼoxla rix chiʼus
Maare twulaq ajwiʼ chaawu
LI YOOKEBʼ CHI ELK SAʼ XKACHʼINAL UT EBʼ LI SAAJ LI XEʼTZʼAQLOK XCHIHABʼ
Li nekeʼxpatzʼ ebʼ li saaj
Ebʼ li saaj nekeʼxbʼaanu ebʼ li patzʼom li nawno chiʼus chirix li wank saʼ wiibʼal, ebʼ li amiiw, ebʼ li naʼbʼej yuwaʼbʼej, li tzolebʼaal ut naabʼal chik.
