Li Yos naraj naq chixjunilebʼ li qas qiitzʼin teʼtijoq chiru re naq teʼjiloq chixkʼatq (Salmo 65:3 [65:2, Wy]). Abʼan aʼin moko naraj ta xyeebʼal naq narabʼi malaj naxkʼulubʼa chixjunilebʼ li tij. Li Santil Hu naxkʼut naq inkʼaʼ kʼulbʼilaq li xtij li winq wi inkʼaʼ saʼ naril li rixaqil (1 Pedro 3:7). Ut joʼkan keʼxkʼul ebʼ laj Israel, naq inkʼaʼ keʼxkanabʼ maakobʼk chiru li Yos inkʼaʼ chik keʼabʼiik li xtij, joʼkan naq oxloqʼ ru li tijok. Usta yaal aʼin, li Yos narabʼihebʼ li nekeʼmaakobʼk chiru wi nekeʼxyotʼ xchʼool ut nekeʼxjal xnaʼlebʼ. Chaawil Isaias 1:15 ut 55:7.

Chaawil li bʼideo Ma narabʼi li Yos chixjunilebʼ li tij?

Rikʼin li qatij naqaloqʼoni ajwiʼ ru li Jehobʼa, joʼkan naq kaʼajwiʼ chiru tootijoq (Mateo 4:10; 6:9). Chiqajunilo aj maak joʼkan naq tento tootijoq saʼ xkʼabʼaʼ li Jesus xbʼaan naq kikamk re qakolbʼal (Juan 14:6). Li Jehobʼa naraj naq saʼ li qachʼool t-elq chaq li tqaye naq tootijoq chiru ut inkʼaʼ yal tqatzol chiru hu li tqaye re. Chaawil Mateo 6:7 ut Filipenses 4:6, 7.

Li Jehobʼa narabʼi naq nokootijok saʼ li qachʼool (1 Samuel 1:12, 13). Ut naraj ajwiʼ naq tootijoq yalaq joqʼe, saʼ xtiklajik ut saʼ raqik li kutan, naq nokoowaʼak malaj naq wanko saʼ chʼaʼajkilal. Chaawil Salmo 55:22 ut Mateo 15:36.

Maare chʼaʼajkaq chiqu jilok chixkʼatq li Yos xbʼaan naq naabʼalebʼ inkʼaʼ nekeʼxpaabʼ li Yos ut nekeʼseʼek chi rabʼinkil naq li Yos tixkʼam chaq li tuqtuukilal saʼ li Ruuchichʼochʼ (2 Timoteo 3:1, 4; 2 Pedro 3:3, 13). Joʼkan naq, joʼ aj paabʼanel tento naq toochʼutlaaq re xwaklesinkil qachʼool chiqibʼil qibʼ. Chaawil Hebreos 10:24, 25.

 Tqeekʼa naq wanko chixkʼatq li Yos wi tqachʼutubʼ qibʼ rikʼinebʼ li nekeʼxra li Yos. Li chʼutam li nekeʼxbʼaanu ebʼ laj Testiiw re li Jehobʼa nokooʼeʼxtenqʼa chi xkʼambʼal qe rikʼinebʼ li kawebʼ xpaabʼal. Chaawil Romanos 1:11, 12.

Tatruuq chi wank chixkʼatq li Jehobʼa wi nakaakʼe aachʼool chi xkʼoxlankil li xaatzol saʼ li Santil Hu chirix li Yos. Joʼkan naq, kʼoxla rix li xbʼaanuhom, li xnaʼlebʼ ut li xyeechiʼom. Li kʼoxlak ut li tijok tooxtenqʼa chi xtawbʼal ru xnimal ru li xrahom ut xchoxahil naʼlebʼ li Yos. Chaawil Josue 1:8 ut Salmo 1:1-3.

Tatruuq chi wank chixkʼatq li Yos wi kaw laapaabʼal ut wi kʼojkʼo aachʼool chirix li Yos. Li paabʼal chanchan li awimq xbʼaan naq naraj naq wulaj wulaj taakʼe xhaʼel. Joʼkan ajwiʼ, aajel ru naq taakawresi laapaabʼal. Chaawil Mateo 4:4 ut Hebreos 11:1, 6.

Li Jehobʼa naxkʼe xchʼool chirixebʼ li nekeʼrahok re. Ut naru naxkolebʼ chirix junaq li chʼaʼajkilal li tsachoq re li xpaabʼalebʼ ut re naq teʼruuq xtawbʼal li junelik yuʼam (Salmo 91:1, 2, 7-10). Naxkʼe qanaʼlebʼ re naq inkʼaʼ tooyajerq ut naxkʼut chiqu chanru toowanq chiʼus re naq junelik sahaq saʼ qachʼool. Chaawil Salmo 73:27, 28 ut Santiago 4:4, 8.