24 JANVIER 2022
RUSSIE
Yehowa Ke Sadisa Bampangi-Bankento Zole ya Ke Belaka na Kukanga Ntima na Boloko ya Bangonda Sambanu
Kubika fioti, Tribinale ya Distrike ya Leninski na Mbanza Smolensk ta zenga dikambu ya mpangi-nkento Tatiana Galkevitch mpi mpangi-nkento Valentina Vladmirova. Zuzi ya nene (procureur) me tubila ntete ve ndola yina yina yandi ke zola nde bo pesa bo.
Mutindu Mambu Salamaka
14 mai 2019
Bamfumu yantikaka kusala anketi (enquête) sambu na mpangi-nkento Tatiana mpi mpangi-nkento Valentina. Bapolisi salaka anketi na banzo ya bampangi-bankento yai zole. Na nima, bo kangaka bo mpi bo yulaka bo bangiufula bangunga kuluta 48. Ata bampangi-bankento yai zole ke belaka maladi ya ngolo ya ke manaka ve, bo tulaka bo sambu na mwa ntangu na boloko mosi
22 novembre 2019
Na nima ya kutula Tatiana ti Valentina sambu na mwa ntangu na boloko bangonda kuluta sambanu, bo basisaka bo mpi bo tulaka bo na nzo mosi ya bo vandaka kukengila
31 décembre 2019
Maladi ya mpangi Valentina kumaka diaka ngolo, yo yina bo nataka yandi na lupitalu
6 août 2020
Na nima ya bangonda nana, bo basisaka mpangi Tatiana na nzo yina bo vandaka kukengila kansi bo buyisaka yandi na kusala bavwayaze na nganda ya mbanza na bo. Valentina bikalaka na nzo yina mpi bo pesaka yandi nswa ya kusolula kaka ti muntu mosi ya dibuta na yandi mpi avocat na yandi
2 octobre 2020
Bamfumu sonikaka mukanda mosi ya balutiti 400 sambu na kufunda mpangi Tatiana ti mpangi Valentina. Bo fundaka bo nde “bo vandaka kubumba mambu yina ke pusaka bantu na kuvanda ntu-ngolo yina organizasio na bo ke salaka”
14 octobre 2020
Na mbala ya ntete ya bo yantikaka kusambisa bo, zuzi mosi lombaka nde bo vutula makambu na bo na biro ya zuzi ya nene mpi nde bo sala diaka anketi ya nkaka sambu yandi monaka ve ata mbi mosi yina bo fundilaka bampangi-bankento yai. Ata Valentina vandaka kukuka ve kutelama ntangu bo vandaka kusambisa yandi sambu yandi vandaka kubela ngolo, tribinale buyaka na kubasisa yandi na nzo yina bo vandaka kukengila bo
25 février 2021
Tribinale ya zulu (cour d’appel) buyaka lukanu ya kuvutula makambu yina na biro ya zuzi ya nene mpi bo pesaka tribinale nswa ya kulanda kusambisa makambu yango
Bansangu ya Luzingu na Bo
Beto ke samba sambu Yehowa kulanda kuvanda ‘ngolo mpi kitaninu’ sambu na bampangi-bankento Valentina, Tatiana mpi sambu na bampangi na beto yonso ya babakala ti ya bankento yina bo ke niokula na Russie mpi na Crimée.—Nkunga 28:7.