Babombe ke landa kubwa na insi Ukraine. Mambu ke landa kukuma kaka mpasi sambu na bampangi na beto ya babakala mpi ya bankento ya ke zingaka na Marioupol, na Kharkiv, na Hostomel mpi na bambanza ya nkaka. Bampangi ya nkaka me sala kiteso ya mposo mosi ya kukangama na nsi ya ntoto ya banzo na bo to na bisika ya nkaka ya kubumbana. Bima ya kudia me banda kumana. Mutindu kura ke zengana-zengana, Internet kele ve, yo me kuma mpasi sambu na kusolula ti bampangi ya babakala mpi ya bankento.

Diambu ya mawa kele nde, na mbanza Myrnohrad, mpangi-bakala mosi na zina ya Dmytro Rozdorsky yina vandaka nkuluntu, me fwa. Yandi vandaka ti bamvula 28. Yandi niataka mutambu mosi (mine) ya basoda tulaka. Beto ke samba sambu na bampangi na beto ya babakala mpi ya bankento yina bampangi na bo ya mabuta me fwa. Beto ke samba mpi sambu na bayina ke zinga na babwala yina basoda ke landa kulosa babombe.—2 Batesalonika 3:1.

Bantalu ya kele awa na nsi kele bantalu yina beto tangaka na Kintete 7 mars 2022:

• Bansamuni 2 me fwa

• Bansamuni 8 me lwala

• Bansamuni 20 617 me yambula banzo na bo mpi me kwenda na bisika yina bitumba kele ve

• Banzo 25 ya bampangi me bukana

• Banzo 29 ya bampangi me beba ngolo

• Banzo 173 ya bampangi me beba ve ngolo

• Banzo ya Kimfumu 5 me beba ngolo

• 27 Komite ya Ke Sadisaka Bantu Yina Me Bwila Mpasi ke sadisa bampangi na Ukraine

• Bansamuni 6 548 me baka lusadisu ya Bakomite yina sambu na kuzwa bisika ya kuvanda na bisika yina bitumba kele ve

• Bansamuni 7 008 me tina na bansi ya nkaka. Bampangi na bo Bambangi ya Yehowa ke sadisa bo kuna

• Bampangi me yidika Nzo 1 ya Balukutakanu ya Nene mpi kiteso ya Banzo ya Kimfumu 30 ya ke vandaka na ndambu ya westi ya Ukraine sambu na kuyamba bamapngi yina ke tina bitumba (mingi-mingi na mbanza Tchernivtsi, Ivano-Frankivsk, Lviv mpi Transcarpatie)