Zaba mambu ya kuluta mfunu. Biblia ke pesaka ndongisila yai: “Beno zikisa mambu ya kuluta mfunu.” (Bafilipi 1:10) Yidika listi mosi ya mambu ya mfunu yina nge fwete sala to ya mambu yina yo ke lomba nde nge sala yo nswalu. Kansi kuvila ve mambu ya mfunu, mu mbandu kukwenda kusala zandu lenda lomba ve nde nge sala yo nswalu. Diaka, mambu yina nge lenda mona nde nge fwete sala yo nswalu, mu mbandu kutala banda na luyantiku programme mosi ya televizio ya nge ke zolaka mingi, lenda vanda mpenza ve mfunu.

Yindula na ntwala. Longi 10:10 ke tuba nde: “Kana kisadilu mosi ya kibende kele na makasi ve mpi muntu kutula yo ve makasi, yo ta lomba nde yandi sadila ngolo mingi.” Mpi yo ke yika nde: “Kansi mayele ke sadisaka na kununga.” Verse yai ke longa beto nki? Kana nge ke tula kisadilu na nge makasi disongidila kana nge ke yidika mambu na ntwala, yo ta sadisa nge na kusadila mbote ntangu. Nge lenda pona kusala na nima to nkutu kukatula bisalu yina ke mpenza ve mfunu sambu yo ke diaka ntangu mpi ke lembisaka. Kana nge me zwa ntangu sambu nge me manisa kisalu mosi nswalu, nge lenda sala kisalu yina nge tubaka nde nge ta sala yo na nima. Kuyindula na ntwala ta sala nde nge kuma kusala mingi bonso muntu ya mayele ya ke salaka bisalu ya maboko, yina ke tula kisadilu na yandi makasi.

Kumisa luzingu na nge pete. Buya kusala mambu yina ke vandaka ve mfunu to yina ke diaka ntangu mingi. Kana nge kele ti bisalu mpi mambu mingi ya kusala, yo lenda yika nge basusi ya kukonda mfunu mpi kumanisa nge kiese.

Kuvutula mambu na nima mpi kukonda kubaka lukanu. Biblia ke tuba nde: “Muntu yina ke tala mupepe ta kuna ve nkeni, mpi muntu yina ke tala matuti ta katula ve mbuma.” (Longi 11:4) Verse yai ke longa beto nki? Kuvutula mambu na nima ke diaka ntangu mpi ke kangaka beto nzila ya kusala mingi. Kana muntu yina ke salaka bilanga ke vingila tii ntangu mambu ta bonga, yandi ta kuna ve mpi ta katula ve mbuma. Mutindu mosi mpi, kana beto ke kudiyangisa sambu beto ke zaba ve mambu yina ta kumina beto na luzingu, yo lenda sala nde beto kuka ve kubaka lukanu. To beto lenda yindula nde beto fwete vingila tii ntangu beto ta zaba mambu yonso na ntwala ya kubaka lukanu. Ya kieleka, sambu na kubaka balukanu ya mfunu, yo ke lombaka kuzikisa mambu mpi kutadila yo mbote. Bingana 14:15 ke tuba nde: “Muntu ya mayele ke tadilaka konso kitambi na yandi.” Kansi kieleka kele nde, ntangu beto ke bakaka balukanu mingi, bantangu ya nkaka beto ke zabaka ve nki ta kumina beto na nima.​—Longi 11:6.

Kusosa kusala mambu na mutindu ya kukuka. Yakobo 3:17 ke tuba nde: “Mayele yina ke katukaka na zulu [to ya Nzambi] ke vandaka . . . makambu ngolo ve.” Ya kieleka, yo kele mbi ve na kuvanda ti nzala ya kusala mambu mbote-mbote! Kansi bantangu ya nkaka, beto lenda sosa kusala mambu na mutindu ya kukuka mpi yo lenda sala nde beto lemba nitu mpi nkutu beto kuka ve kusala yo. Mu mbandu, muntu yina ke longuka ndinga mosi ya mpa fwete zaba nde yandi ta salaka bifu mingi mpi nde yo ta sadisa yandi na kuzaba ndinga yango mbote. Kansi muntu yina ke sosaka kusala mambu na mutindu ya kukuka lenda banga kutuba bangogo ti kifu mpi kikalulu yai lenda kanga yandi nzila ya kuzaba ndinga yango mbote. Yo kele kibeni mbote na kuzaba nde beto lenda sala ve mambu yonso na mutindu ya kukuka! Bingana 11:⁠2 ke tuba nde: “Mayele ke vandaka ti bantu ya kudikulumusa.” Diaka, bantu ya kudikulumusa mpi bayina ke zabaka bandilu na bo ke yindulaka ve nde bo kele mfunu mingi mpi bo ke ndimaka bifu na bo.

Tula kisalu mpi kupema na kisika na yo. Biblia ke tuba nde: “Kupema mwa fioti kele mbote kuluta kisalu ya ngolo mpi kulanda mupepe.” (Longi 4:6) Mbala mingi, bantu yina ke fwaka nitu na kisalu ke bakaka ve mambote ya ‘kisalu na bo ya ngolo.’ Bo ke vandaka diaka ve ti ntangu mpi ngolo ya kusala yo. Kansi bamolo ke zolaka kupema mingi mpi bo ke bebisaka ntangu mpamba. Biblia ke lombaka beto na kuvanda ti bukati-kati, disongidila kusala ngolo mpi kusepela ti mambote na yo. Kiese ya mutindu yai kele “dikabu ya Nzambi.”​—Longi 5:19.

Lalaka mbote. Biblia ke tubaka nde: “Mono ta kuditandula mpi ta lala mpongi na ngemba.” (Nkunga 4:8) Yo ke lombaka nde bambuta kulala bangunga kiteso ya nana konso mpimpa sambu bo vanda ngolo na nitu, bo yindula mbote mpi bo vanda mayele. Kulala mpongi ke sadisaka muntu na kusadila mbote ntangu sambu yo ke sadisaka yandi na kutula dikebi ya mingi na mambu yina yandi ke longuka mpi na kukanga yo kukonda mpasi. Kansi kukonda kulala mpongi ke salaka nde muntu kukuka ve kukanga mambu yina yandi ke longuka, yandi sala bisumbula, bifu mpi yandi kuma makasi-makasi.

Kuditudila balukanu yina nge lenda lungisa. Biblia ke tubaka nde: “Kusepela na bima yina meso ke mona kele mbote kuluta kulanda banzala na nge.” (Longi 6:9) Verse yai ke longa beto nki? Muntu ya mayele ke bikaka ve nde banzala na yandi kuyala luzingu na yandi, mingi-mingi banzala yina yandi lenda kuka ve kulungisa. Diaka, yandi ke bwaka ve na mutambu ya bapiblisite yina ke bendaka bantu mpi ya kubaka bamfuka. Kansi, yandi ke sepelaka ti bima yina yandi ke zwaka, disongidila ‘bima yina meso na yandi ke mona.’

Tadila bikalulu na nge. Bikalulu na nge ta sadisa nge na kuzaba mambu ya mbote, ya mfunu mpi yina nge fwete tudila dikebi. Kana luzingu na nge vandaka bonso tolo-tolo, bikalulu na nge ya mbote zolaka kutwadisa yo. Bikalulu ya mbote ke sadisaka nge na kutula mambu ya mfunu na kisika ya ntete mpi na kusadila ntangu na nge, disongidila konso ngunga mpi konso kilumbu na mutindu ya mbote kibeni. Na wapi nge lenda zwa bikalulu yai? Bantu mingi ke sosaka yo na Biblia sambu bo ke zabaka nde yo kele ti mayele ya kuluta mingi.—Bingana 2:6, 7.

Sala nde zola kuvanda kikalulu na nge ya kuluta mfunu. Bakolosai 3:14 ke tuba nde zola “ke vukisaka beto na mutindu ya kukuka.” Beto lenda vanda ve na kiese ya kieleka mpi kudiwa na lutaninu kana zola kele ve, mingi-mingi na kati ya dibuta. Bantu yina ke ndimaka ve kieleka yai, ke vandaka ve na kiese ata fioti ziku sambu bo ke kudipesaka na kusosa bimvwama mpi na bisalu. Yo yina Biblia ke tubaka nde zola kele kikalulu ya mfunu mingi mpi yo ke tubilaka yo mbala mingi kibeni.— 1 Bakorinto 13:1-3; 1 Yoane 4:8.

Bumba ntangu ya kulonguka mambu ya Nzambi. Geoff vandaka ti nkento ya mbote, bana zole yina vandaka na kiese mpi banduku ya mbote. Yandi vandaka munganga yina vandaka kukwenda kubaka bantu ya ke bela ngolo mpi kunata bo nswalu na hôpital mpi bo vandaka kufuta yandi mbote. Kansi, ntangu yandi vandaka kusala kisalu na yandi, mbala mingi yandi vandaka kumona mutindu bantu vandaka kuniokwama mpi kufwa. Yandi vandaka kudiyula nde: “Keti luzingu fwete vanda kaka mutindu yai?” Kilumbu mosi, yandi tangaka mikanda ya Bambangi ya Yehowa mpi yandi zwaka bamvutu ya mbote.

Geoff songaka nkento mpi bana na yandi mambu yina yandi vandaka kulonguka. Bo mpi sepelaka ti yo. Dibuta na bo yantikaka kulonguka Biblia mpi yo salaka nde bo kuma kuzinga na kiese mpi bo kuma kusadila ntangu na mutindu ya mbote kibeni. Diaka, kulonguka na bo ya Biblia pesaka bo kivuvu ya kitoko ya kuzinga mvula na mvula na ntoto kukonda kumona mpasi.​—Kusonga 21:3, 4.

Disolo ya Geoff ke yibusa beto mambu yai ya Yezu Kristu tubaka: “Kiese na bantu yina ke bakisaka mbote nde bo kele ti nzala ya mambu ya kimpeve.” (Matayo 5:3) Keti nge ke zolaka kubumba mwa ntangu sambu na kulonguka mambu ya Nzambi? Kusala mambu yai mpamba kele mutindu ya kuluta mbote ya kusadila ntangu na mayele yonso konso kilumbu mpi luzingu ya mvimba.