Inki Mambu Biblia Ke Tubaka?
Keti Nzambi ke pesaka mvutu na bisambu yonso?
NGE TA TUBA NDE YANDI KE PESAKA MVUTU NA BISAMBU YA . . .
Konso muntu
Bantu ya nkaka
Muntu ve
MAMBU YINA BIBLIA KE TUBAKA
“Yehowa kele pene-pene ya bantu yonso . . . yina ke bingaka yandi na kieleka.”—Nkunga 145:18.
INKI MAMBU YA NKAKA BETO LENDA LONGUKA NA BIBLIA?
Nzambi ke waka ve bisambu ya bantu yina ke kolamaka na yandi. (Yezaya 1:15) Kansi, bo lenda soba bikalulu na bo sambu na ‘kutula mambu na ndonga’ ti Nzambi.—Yezaya 1:18.
Sambu Nzambi kupesa mvutu na kisambu mosi, yo fwete wakana ti mambu yina yandi ke lombaka ya kele na Biblia.—1 Yoane 5:14.
Keti beto fwete vanda na mutindu mosi buna sambu na kusamba?
BANTU YA NKAKA KE TUBAKA nde bo fwete fukama, kuniekisa ntu, to kukanga maboko sambu na kusamba. Inki kele dibanza na nge?
MAMBU YINA BIBLIA KE TUBAKA
Nzambi me ndimaka bisambu ya bantu yina “vandaka” to “telamaka” mpi ya bantu yina vandaka “kulala luse na ntoto” to bayina “fukamaka.” (1 Bansangu 17:16; 2 Bansangu 30:27; Esdrasi 10:1; Bisalu 9:40) Yandi ke lombaka ve nde beto vanda na mutindu mosi buna kana beto ke samba.
INKI MAMBU YA NKAKA BETO LENDA LONGUKA NA BIBLIA?
Nzambi ke waka bisambu ya bantu ya kudikulumusa.—Nkunga 138:6.
Nge lenda samba na konso ndinga, to nkutu na nsi ya ntima.—2 Bansangu 6:32, 33; Nehemia 2:1-6.
