Bakristu ya nkaka ke sadilaka ba application ya kutindila bantu ba message sambu na kusolula ti bantu ya mabuta na bo mpi ti bampangi na bo Bakristu. Kansi Mukristu ya kuyela na kimpeve ke vilaka ve ndongisila yai: “Muntu ya mayele ke monaka kigonsa mpi ke bumbanaka, kansi bantu yina me konda mayele ke kwendaka kaka na ntwala mpi bo ke kutanaka ti bampasi.”—Bing. 27:12.

Beto ke zabaka nde Yehowa ke zolaka kutanina beto. Yo yina, beto ke salaka ve kinduku ti bantu yina ke kabulaka bantu ya nkaka, bantu yina bo me basisaka na dibundu mpi bantu yina ke longaka malongi ya luvunu. (Bar. 16:17; 1 Bak. 5:11; 2 Yoa. 10, 11) Yo lenda vanda nde bampangi ya nkaka na dibundu ke lemfukila ve bansiku ya Biblia. (2 Tim. 2:20, 21) Yo yina, beto fwete vila ve mambu yai ntangu beto ke pona banduku. Yo lenda vanda mpasi na kupona banduku ya mbote na nzila ya ba application ya kutindila bantu ba message.

Yo kele mfunu mingi na kupona banduku ya mbote mingi-mingi kana bo kele na kimvuka ya nene ya ke tindilanaka ba message na nzila ya ba application ya kutindila bantu ba message. Bakristu ya nkaka me kotaka na bimvuka ya nene mpi yo me natilaka bo bampasi. Inki mutindu Mukristu fwete keba kana yandi kele na kimvuka ya bantu 100 to 1000? Yo ta vanda mpasi sambu yandi zaba konso muntu mpi kimpeve ya konso muntu na kimvuka yina. Nkunga 26:4 ke tuba nde: “Mono ke taka ve kinduku ti bantu ya luvunu, mpi mono ke buyaka bantu yina ke bumbaka kimuntu na bo.” Yo yina, yo ta vanda mbote kibeni na kusonikila kaka bantu yina nge me zaba mbote.

Ata Mukristu kele na kimvuka ya fioti, yandi fwete tadila mbote-mbote ntangu yina yandi ke lutisa sambu na kusonikila bantu mpi mambu yina bantu ya kimvuka yina ke tubaka. Beto fwete yindula ve nde beto fwete pesa mvutu na ba message yonso ata yo ke baka beto ntangu fioti to mingi. Polo songaka Timoteo na kukeba na ‘bantu yina ke tongaka mpi ke kudikotisaka na mambu ya bantu ya nkaka.’ (1 Tim. 5:13) Bubu yai, yo kele pete na kusala diambu ya mutindu yai na nzila ya Internet.

Mukristu ya kuyela na kimpeve ke sonikaka ve mambu ya mbi sambu na bampangi ya nkaka mpi ke waka yo ve. Yandi ke basisaka mpi ve bansangu ya kinsweki ya bampangi ya nkaka. (Nk. 15:3; Bing. 20:19) Yandi ke tubaka mpi ve mambu yina ke pesa bantu ya nkaka mpasi to mambu ya luvunu. (Baef. 4:25) Kansi, sambu na beto Bambangi ya Yehowa, beto ke bakaka madia mingi ya kimpeve mpi bansangu ya kieleka na nzila ya site Internet na beto jw.org mpi na nzila ya manaka ya JW Télédiffusion yina ke basikaka konso ngonda.

Bakristu ya nkaka ke tindilaka bantu ba message na Internet sambu na kuteka bima, sambu na kusumba mpi sambu na kusala bapiblisite ya bima na bo to sambu na kupesa bantu bisalu. Mambu yai kele mambu ya mumbongo kansi yo kele ve mambu ya kimpeve. Bakristu yina ke ‘zolaka ve mbongo’ ke sadilaka ve bampangi na bo sambu na kusala mumbongo.—Baeb. 13:5.

Keti beto fwete tindila bantu ba message na Internet sambu na kulomba mbongo sambu na kusadisa bampangi na beto yina ke niokwama to bayina me bwila bisumbula ya lugangu? Beto ke zolaka bampangi na beto mpi ke tudilaka bo dikebi. Yo yina, mbala mingi beto ke sadisaka bo mpi ke pesaka bo kikesa. (Yak. 2:15, 16) Kansi kana beto ke zola kusadisa bo na kimvuka mosi ya nene ya bantu yina ke tindilanaka ba message na nzila ya ba application ya kutindila bantu ba message, yo lenda vanda mpasi kibeni sambu Betele to dibundu kusadisa bo. (1 Tim. 5:3, 4, 9, 10, 16) Ya kieleka, beto fwete pusa ve bantu na kuyindula nde bo me pesaka beto mukumba mosi ya mfunu sambu na kusadisa bampangi ya nkaka.

Beto ke zolaka kusala mambu yina ta pesa Nzambi lukumu. (1 Bak. 10:31) Yo yina, ntangu beto ke sadila application mosi sambu na kutindila bantu ba message na nzila ya Internet to application ya nkaka, beto fwete keba mpi beto fwete tadila bigonsa yina beto lenda kutana ti yo.