1-2. Sambu na nki Yehowa me ndimaka beto na dibuta na yandi mpi nki mutindu yandi salaka yo?

YEHOWA me kotisaka beto na dibuta ya bansadi na yandi. Yo kele dibaku ya nene kibeni! Bantu ya kele na dibuta yai me kudipesaka na Nzambi mpi ke monisaka lukwikilu na kimenga ya Mwana na yandi. Dibuta na beto kele dibuta ya kiese. Beto kele ti luzingu ya mbote bubu yai mpi na bilumbu ke kwisa beto ta vanda ti luzingu ya kukonda nsuka; bankaka na ntoto mpi bankaka na zulu.

² Zola ya Yehowa me pusaka yandi na kundima beto na dibuta na yandi. Yandi salaka kibansa ya nene sambu beto baka dibaku yai. (Yoa. 3:16) Yandi ‘sumbaka beto na ntalu.’ (1 Bak. 6:20) Na nsadisa ya kimenga ya Yezu, Yehowa me pesaka beto dibaku ya kukuma banduku na yandi. Beto kele ti dibaku ya kubinga Muntu ya kuluta nene na ntoto mpi na zulu nde Tata. Mutindu beto monaka yo na disolo yina me luta, Yehowa kele Tata ya kuluta mbote.

3. Inki bangiufula beto lenda kudiyula? (Tala mpi lupangu “ Keti Yehowa Ke Tudilaka Mono Dikebi?”)

³ Bonso muyimbi-bankunga, beto lenda kudiyula nde: “Inki mono ta pesa Yehowa sambu na mambu yonso ya mbote ya yandi me sadilaka mono?” (Nk. 116:12) Mvutu kele nde beto kele ve ti kima ya kupesa Tata na beto ya zulu. Ata mpidina, beto ke zolaka yandi mingi. Ntumwa Yoane tubaka nde: “Beto ke zolaka, sambu yandi zolaka beto ntete.” (1 Yoa. 4:19) Inki mutindu beto lenda monisa Tata na beto ya zulu nde beto ke zolaka yandi?

4. Mutindu Yakobo 4:8 ke monisa yo, sambu na nki beto fwete sala bikesa ya kukuma banduku ya Yehowa?

⁴ Yehowa ke zolaka nde beto kuma banduku na yandi mpi beto solula ti yandi. (Tanga Yakobo 4:8.) Yandi ke lomba beto na ‘kukwamina na kisambu’ mpi yandi ke waka bisambu na beto konso ntangu yina beto ke sambaka yandi. (Bar. 12:12) Yandi ke vandaka ve ti mambu yina ke kangaka yandi nzila ya kuwa bisambu na beto mpi yandi ke lembaka ve na kuwa bisambu. Beto ke widikilaka yandi ntangu beto ke tangaka Biblia mpi mikanda yina ke sadisaka beto na kubakisa Biblia. Beto ke widikilaka yandi mpi ntangu beto ke landaka balukutakanu na dikebi yonso. Bana ke kangamaka ngolo ti bibuti na bo kana bo ke solula mbote, mutindu mosi kusolula mbala na mbala ti Yehowa ta sadisa beto na kukangama ngolo ti yandi.

5. Inki mutindu beto lenda tomisa mutindu na beto ya kusamba?

⁵ Yindula mutindu nge ke salaka kisambu. Yehowa ke lombaka beto na kusonga yandi mambu yonso yina kele na ntima na beto. (Nk. 62:8) Yo yina beto fwete kudiyula nde: ‘Keti bisambu na mono ke vandaka ya zulu-zulu, keti mono ke vutukilaka mbala na mbala mambu ya mutindu mosi to mono ke basisaka mambu yina ke katuka na ntima na mono?’ Yo kele kieleka nde nge ke zolaka Yehowa mingi mpi nge ke zolaka nde kinduku na nge ti yandi kuvanda kaka ngolo. Yo yina nge fwete sambaka Yehowa mbala na mbala. Songa yandi mambu yonso yina kele na ntima na nge yo vanda ya kiese to yina ke pesa nge mpasi. Kana nge lomba yandi lusadisu, ndima nde yandi ta sadisa nge.

6. Inki beto fwete sala sambu na kulanda kuvanda banduku ya Tata na beto ya zulu?

⁶ Sambu na kulanda kuvanda nduku ya Tata na beto ya zulu, beto fwete vanda ti kikalulu ya kumonisa ntonda. Beto ke ndima mambu yai ya muyimbi-bankunga sonikaka nde: “Nge me salaka mambu mingi, O Yehowa Nzambi na mono, bisalu na nge ya kuyituka mpi mabanza na nge sambu na beto. Muntu mosi ve me fwanana ti nge; kana yo lombaka nde mono meka kuzabisa mpi kutubila yo, yo zolaka kuvanda mingi kuluta yina mono lenda tubila!” (Nk. 40:5) Beto ke sukaka ve kaka na kusepela na nsi ya ntima na mambu yina Yehowa ke sadilaka beto kansi beto ke monisilaka Yehowa ntonda na bangogo mpi na bisalu. Yo ke sadisaka beto na kuvanda ya kuswaswana ti bantu mingi ya bilumbu na beto. Beto ke zinga na nsi-ntoto yina bantu mingi ke monisaka ve ntonda na mambu yonso yina Nzambi ke sadilaka bo. Yo kele kaka kidimbu ya ke monisa nde beto ke zinga na “bilumbu ya nsuka.” (2 Tim. 3:1, 2) Beto fwete landa ve mbandu ya mbi ya bantu yai.

7. Yehowa ke zolaka nde beto zinga nki mutindu mpi sambu na nki?

⁷ Bibuti ke zolaka ve nde bana na bo kuswana-swana kansi bo ke zolaka nde bana kuvanda banduku. Mutindu mosi mpi Yehowa ke zolaka nde bana na yandi kuzinga mbote bo na bo. Ya kieleka, zola yina beto ke monisilaka bampangi ke sadisaka bantu na kubakisa nde beto kele Bakristu ya kieleka. (Yoa. 13:35) Beto ke ndima mambu yina muyimbi-bankunga sonikaka nde: “Tala! Yo kele mbote kibeni mpi kiese mingi nde bampangi kuzinga kumosi na bumosi!” (Nk. 133:1) Kana beto ke zola bampangi, pana beto ke ndimisa Yehowa nde beto ke zolaka yandi. (1 Yoa. 4:20) Beto kele na kiese mingi na kuvanda na dibuta yina bantu na yo ke monisaka ‘ntima ya mbote bo na bo mpi ke wilaka bantu ya nkaka mawa.’—Baef. 4:32.

8. Mukanda ya 1 Yoane 5:3 ke monisa nde beto ke lemfukilaka Yehowa ntete-ntete sambu na nki?

⁸ Yehowa ke lombaka bana na kulemfukila bibuti na bo, yandi ke zolaka mpi nde beto  lemfukila yandi. (Baef. 6:1) Beto fwete lemfukila yandi sambu yandi gangaka beto, yandi ke taninaka beto mpi yandi kele Tata yina me luta batata yonso na mayele. Kansi beto ke lemfukilaka Yehowa ntete-ntete sambu beto ke zolaka yandi. (Tanga 1 Yoane 5:3.) Ata beto kele ti bikuma mingi ya ke pusa beto na kulemfukila Yehowa, yandi mosi ke pusaka beto ve na ngolo na kulemfukila yandi. Yehowa me pesaka beto kimpwanza, yandi ke vandaka na kiese kana beto me pona na kulemfukila yandi sambu beto ke zolaka yandi.

9-10. Sambu na nki yo kele mfunu na kuzaba bansiku ya Yehowa mpi kuzitisa yo?

⁹ Bibuti ke zolaka nde bana na bo kuzinga na lutaninu. Yo yina bo ke tudilaka bo bansiku sambu na mambote na bo. Kana bana ke lemfuka na bansiku ya bibuti, bo ke monisaka nde bo ke tudila bibuti ntima mpi ke zitisa bo. Mbandu yai ke monisa nde yo kele mfunu mingi na kuzaba bansiku ya Tata na beto ya zulu mpi kuzitisa yo. Kana beto sala mpidina, beto ta monisa yandi nde beto ke zolaka yandi, ke zitisaka yandi mpi beto ta bakila yo mambote. (Yez. 48:17, 18) Kansi bantu yina ke buyaka Yehowa mpi ke zitisaka ve bansiku na yandi ke kutanaka ti bampasi.—Bag. 6:7, 8.

¹⁰ Kana beto ke zinga na mutindu yina ke sepedisaka Yehowa, beto ta kuditanina na mambu yina lenda bebisa nitu na beto, kimpeve mpi mabanza na beto. Yehowa me zaba mambu yina kele mfunu sambu na beto. Aurora na États-Unis ke tuba nde: “Mono ke zaba nde kulemfukila Yehowa ntangu yonso ke nataka mambote.”  Beto yonso ke ndima kieleka yai. Keti kuzitisa bansiku ya Yehowa me natilaka nge mambote?

11. Inki mutindu kisambu ke sadisaka beto?

¹¹ Kisambu ke sadisaka beto na kuvanda bantu ya bulemfu ata ntangu yo kele mpasi na kulemfuka. Bantangu ya nkaka, yo ke vandaka mpasi na kulemfukila Yehowa kansi beto fwete sala bikesa ya mingi sambu na kunwanisa mpusa na beto ya kusala masumu. Muyimbi-bankunga bondilaka Nzambi nde: “Tedimisa na kati na mono luzolo ya kulemfukila nge.” (Nk. 51:12) Denise yina kele mupasudi-nzila tubaka nde: “Mono vandaka kukuka ve kulemfuka na nsiku mosi ya Yehowa. Mono sambaka Yehowa sambu yandi pesa mono ngolo ya kusala mambu ya mbote.” Beto ke ndima nde ntangu yonso Yehowa ke pesaka mvutu na bisambu ya mutindu yai.—Luka 11:9-13.

12. Mukanda ya Baefezo 5:1 ke lomba beto na kusala nki?

¹² Tanga Baefezo 5:1. Beto ‘bana yina Yehowa ke zolaka mingi,’ beto ke salaka bikesa sambu na kulanda mbandu na yandi. Beto ke landaka mbandu ya bikalulu na yandi ntangu beto ke monisaka zola, ntima-mbote mpi ke lolulaka bantu. Kana bantu yina ke zabaka ve Nzambi kumona bikalulu na beto ya mbote, bo lenda kuma ti mpusa ya kuzaba mambu mingi ya Nzambi. (1 Pie. 2:12) Bibuti fwete landa mbandu ya Yehowa na mutindu na bo ya kusadila bana mambu. Kana bo sala mpidina,  bana na bo lenda sepela kukuma banduku ya Tata na beto ya zola.

13. Beto fwete tula dikebi na nki mambu?

¹³ Mwana-fioti ke sepelaka mingi ti tata na yandi mpi ke zolaka kusolula ti yandi. Beto mpi ke zolaka mingi Yehowa Tata na beto ya zulu mpi beto ke zolaka nde bantu ya nkaka kuzaba yandi. Beto ke kudiwaka bonso ntotila Davidi, yina sonikaka nde: “Mono ta kudikumisa na Yehowa.” (Nk. 34:2) Inki beto ta sala kana beto ke vandaka nsoni-nsoni? Inki lenda sadisa beto na kukuma bantu ya kikesa? Beto ke bakaka kikesa kana beto ke kudipesa mingi na mambu yina ke pesaka Yehowa kiese mpi ke tula dikebi na mambote yina bantu ya nkaka lenda baka kana bo me zaba Yehowa. Yehowa ta pesa beto kikesa. Yandi sadisaka Bakristu ya mvu-nkama ya ntete na kukuma bantu ya kikesa, yandi ta sadisa beto mpi.—1 Bate. 2:2.

14. Inki ke pusaka beto na kusala kisalu ya kukumisa bantu balongoki?

¹⁴ Yehowa ke pona-ponaka ve, yandi ke sepelaka mingi ntangu yandi ke monaka nde beto ke zola bankaka, ata bo katukaka na bisika ya nkaka. (Bis. 10:34, 35) Kulonga bantu ya bisika ya nkaka nsangu ya mbote kele mutindu mosi ya kumonisila bo zola. (Mat. 28:19, 20) Inki mbuma kisalu na beto lenda buta? Bantu yina ke widikila beto lenda soba bikalulu na bo mpi kukuma ti kivuvu ya kuzinga mvula na mvula.—1 Tim. 4:16.

15-16. Sambu na nki beto fwete vanda na kiese?

¹⁵ Yehowa kele Tata ya zola, yo yina yandi ke zolaka nde bantu ya dibuta na yandi kuzinga na kiese. (Yez. 65:14) Ata beto ke kutana ti bampasi, beto kele ti bikuma mingi ya kuvanda na kiese banda bubu yai. Mu mbandu, beto ke bakisa nde Tata na beto ke zolaka beto mingi. Beto me zabaka kieleka ya Biblia, Ndinga ya Nzambi. (Yer. 15:16) Beto kele na dibuta mosi mpamba yina bantu na yo ke zolaka Yehowa, ke zolaka bansiku na yandi ya bikalulu ya mbote mpi ke zolanaka.—Nk. 106:4, 5.

¹⁶ Beto lenda tanina kiese na beto sambu beto me zaba nde na bilumbu ke kwisa, luzingu ta vanda mbote kuluta. Ntama mingi ve Yehowa ta katula mambu yonso ya mbi mpi Kimfumu na yandi ta sala nde ntoto kukuma diaka Paladisu. Beto kele mpi ti kivuvu ya kuluta mbote nde bafwa ta futumuka mpi ta zinga diaka ti bantu yina bo vandaka kuzola mingi. (Yoa. 5:28, 29) Yo ta vanda kiese mingi kibeni! Diambu ya mfunu kuluta kele nde konso muntu na zulu to na ntoto ta pesaka Tata na beto ya zola lukumu, nkembo mpi ta sambilaka yandi na mutindu ya mbote kibeni.