2 Bansangu 16:1-14
16 Na mvula ya 36 ya luyalu ya Aza, Basha+ ntotila ya Izraele kwisaka kunwanisa Yuda mpi yantikaka kutunga* Rama+ sambu na kukanga bantu yonso nzila ya kubasika to ya kukota na teritware ya Aza ntotila ya Yuda.+
2 Yo yina Aza basisaka arza ti wolo na bisika ya kubumba bimvwama ya nzo ya Yehowa+ mpi ya nzo ya ntotila ebuna yandi tindilaka yo Bene-adadi, ntotila ya Siria,+ yina vandaka kuzinga na Damasi, mpi yandi tubaka nde:
3 Kuwakana kele na kati na mono ti nge mpi na kati ya tata na mono ti tata na nge. Mono ke tindila nge arza mpi wolo. Kwisa mpi fwa kuwakana na nge ti Basha ntotila ya Izraele, ebuna yandi ta katuka na ntoto na mono.”
4 Bene-adadi wilaka ntotila Aza mpi yandi tindaka bamfumu ya basoda na yandi sambu na kunwanisa bambanza ya Izraele, ebuna bo fwaka Iyoni,+ Dani,+ Abele-maimi, mpi bisika yonso ya kubumba bima ya bambanza ya Naftali.+
5 Ntangu Basha waka yo, na mbala mosi yandi bikisaka kutunga* Rama mpi yandi yambulaka kisalu yina yandi vandaka kusala kuna.
6 Ebuna ntotila Aza bakaka Yuda ya mvimba, mpi bo nataka matadi ti banti ya Rama+ yina Basha vandaka kutungila,+ ebuna yandi sadilaka yo sambu na kutunga* Geba+ mpi Mispa.+
7 Na ntangu yina, Hanani+ muntu ya ke monaka mambu kwisaka kusonga Aza ntotila ya Yuda nde: “Sambu nge tulaka ntima* na ntotila ya Siria kansi nge tulaka ve ntima* na Yehowa Nzambi na nge, basoda ya ntotila ya Siria me tina na maboko na nge.+
8 Keti bantu ya Etiopia mpi bantu ya Libia vandaka ve na basoda mingi kibeni, ti bapusu-pusu mingi mpi bantu mingi yina ke tambusaka bampunda? Kansi sambu nge tulaka ntima na Yehowa, yandi pesaka bo na maboko na nge.+
9 Sambu meso ya Yehowa ke tambula-tambulaka na ntoto ya mvimba+ sambu na kusonga ngolo* na yandi sambu na bantu yina ntima na bo kele ya mvimba* na yandi.+ Nge me sala mambu na buzoba na diambu yai; katuka ntangu yai bo ta nwanisaka nge.”+
10 Kansi, Aza wilaka muntu yina ke monaka mambu makasi ya ngolo mpi yandi tulaka yandi na boloko* sambu yandi wilaka yandi makasi na diambu yai. Ebuna kaka na ntangu yina, Aza yantikaka kuniokula bantu ya nkaka.
11 Disolo ya luzingu ya Aza, katuka na luyantiku tii na nsuka, bo me sonikaka yo na Mukanda ya Bantotila ya Yuda mpi ya Izraele.+
12 Na mvula ya 39 ya luyalu na yandi, Aza belaka maladi ya makulu tii kuna maladi kumaka ngolo; kansi ata ntangu yandi vandaka ti maladi yina, yandi sosaka ve lusadisu ya Yehowa, kansi yandi sosaka lusadisu ya bantu yina ke belulaka bantu.
13 Ebuna Aza lalaka sambu na kupema ti ba-nkaka na yandi;+ yandi fwaka na mvula ya 41 ya luyalu na yandi.
14 Ebuna bo zikaka yandi na maziamu ya nene yina yandi timunaka sambu na yandi mosi na Mbanza ya Davidi,+ mpi bo tulaka yandi na mbeto ya bo ke tulaka mvumbi yina bo fulusaka mafuta ya balsami mpi bima ya mutindu na mutindu yina bo vukisaka sambu na kusala mafuta ya nsudi ya kitoko.+ Diaka, bo tulaka tiya ya nene kibeni sambu na yandi.*
Banoti na nsi ya lutiti
^ To “kukumisa ngolo; kutunga diaka.”
^ To “kukumisa ngolo; kutunga diaka.”
^ To “kukumisa ngolo; kutunga diaka.”
^ Na kisina, “yekamaka ve.”
^ Na kisina, “yekamaka.”
^ To “lusadisu.”
^ To “ya kudipesa ya mvimba.”
^ Na kisina, “na nzo ya mabaya yina kele ti matobo.”
^ Yo ke monana nde bo yokaka ve Asa, kansi bo yokaka bima ya nsudi ya kitoko.
