Ruti 3:1-18
3 Ntangu yai, bokilo na yandi Naomi tubilaka yandi nde: “Mwana na mono, keti mono fwete sosila nge ve nzo,*+ na mpila nde mambu kukwendila mbote sambu na nge?
2 Keti Boazi kele ve mpangi na beto?+ Baleke ya bankento yina nge vandaka ti bo kele bansadi na yandi. Na mpimpa ya bubu, yandi ke katula bampusu ya orze na kisika ya bo ke tutaka bambuma sambu na kukatula yo bampusu.
3 Yobila mpi pakula mafuta ya nsudi ya kitoko; ebuna lwata bilele* mpi kulumuka na kisika ya bo ke tutaka bambuma sambu na kukatula yo bampusu. Sala na mpila nde yandi mona nge ve tii kuna yandi ta manisa kudia mpi kunwa.
4 Ntangu yandi ta lala, tala kisika yina yandi ta lala; ebuna kwenda mpi katula yandi lele na makulu mpi lala. Yandi ta songa nge mambu ya nge fwete sala.”
5 Ebuna Ruti vutulaka nde: “Mono ta sala mambu yonso ya nge me songa mono.”
6 Yandi kulumukaka na kisika ya bo ke tutaka bambuma sambu na kukatula yo bampusu mpi yandi salaka mambu yonso yina bokilo na yandi songaka yandi na kusala.
7 Na ntangu yina, Boazi diaka mpi nwaka mpi yandi vandaka kuyangalala na ntima. Ebuna yandi kwendaka kulala na nsuka ya kita ya bambuma. Na nima, Ruti kwisaka malembe-malembe, katulaka yandi lele na makulu, mpi yandi lalaka.
8 Na midi ya mpimpa Boazi yantikaka kutekita, ebuna yandi balukaka mpi yandi monaka nkento mosi me lala na makulu na yandi.
9 Yandi tubaka nde: “Nge nani?” Ruti vutulaka nde: “Mono nsadi na nge Ruti. Tandula lele* na nge na zulu ya nsadi na nge, sambu nge kele muntu yina lenda sumba mono diaka.”+
10 Ebuna Boazi tubaka nde: “Bika nde Yehowa kusakumuna nge, mwana na mono. Nge me monisa zola na nge ya kwikama na mbala yai kuluta na mbala ya ntete,+ na mutindu nge me landa ve baleke ya babakala, ata bansukami ata bamvwama.
11 Mpi ntangu yai, mwana na mono, kuwa boma ve. Mono ta sadila nge mambu yonso ya nge me tuba,+ sambu bantu yonso na mbanza* me zaba nde nge kele nkento ya mbote kibeni.
12 Ata yo kele kieleka nde mono kele muntu yina lenda sumba nge diaka,+ kele ti muntu yina lenda sumba nge diaka yina kele mpangi ya pene-pene kuluta mono.+
13 Bikala awa na mpimpa yai, mpi kana yandi ta sumba nge diaka na suka, yo kele mbote! Bika yandi sumba nge diaka.+ Kansi kana yandi buya kusumba nge diaka, mono mosi ta sumba nge diaka, mutindu Yehowa kele na luzingu. Lala awa tii na suka.”
14 Yo yina, Ruti lalaka na makulu ya Boazi tii na suka mpi telamaka na ntwala nde nsemo kukuma mingi sambu muntu kuzaba muntu ya nkaka. Ebuna Boazi tubaka nde: “Sala na mpila nde bantu kuzaba ve nde nkento mosi kwisaka na kisika ya bo ke tutaka bambuma sambu na kukatula yo bampusu.”
15 Yandi tubaka diaka nde: “Nata kazaka yina nge me lwata, mpi tandula yo.” Ruti tandulaka yo, ebuna Boazi tulaka bitesilu sambanu* ya orze na kati na yo mpi tulaka yo na ntu ya Ruti, na nima Boazi kwendaka na mbanza.
16 Ruti vutukaka na bokilo na yandi, ebuna bokilo na yandi tubaka nde: “Mwana na mono, mambu lutaka inki mutindu sambu na nge?”* Ruti zabisaka yandi mambu yonso yina Boazi sadilaka yandi.
17 Ruti yikaka nde: “Yandi pesaka mono bitesilu sambanu yai ya orze mpi songaka mono nde, ‘Kukwenda ve maboko-mpamba na bokilo na nge.’”
18 Ebuna Naomi tubaka nde: “Vanda awa, mwana na mono, tii kuna nge ta zaba mutindu mambu ta suka, sambu yandi ta pema ve kana yandi me yidika ntete ve diambu yai bubu.”
Banoti na nsi ya lutiti
^ Na kisina, “kisika ya kupema.”
^ To “lwata bilele na nge ya zulu.”
^ To “nsongi ya lele.”
^ Na kisina, “bakielo yonso ya bantu na mono.”
^ Ziku baseya sambanu, to kiteso ya balitre 44. Tala Bangindu ya Ngika B14.
^ Na kisina, “nge kele nani?”
