Yezu songaka balongoki na yandi nde: “Beno ta vanda bambangi na mono . . . tii na kisika ya kuluta ntama ya ntoto.” (Bisalu 1:8) Bubu yai, Bambangi ya Yehowa ke sala na kikesa yonso kisalu yango. Kansi na kati ya bisika ya kuluta ntama ya ntoto, beto lenda tanga bisika yina bantu kele mingi kansi ya beto me longaka ve mingi nsangu ya mbote. Na bansi ya nkaka mpi Bambangi ya Yehowa kele ve mingi. (Matayo 9:37, 38) Inki beto ke salaka sambu na kuzabisa bantu mingi nsangu ya mbote?

 Sambu na kuzitisa nsiku yina Yezu pesaka, Komite ya Kisalu ya Nto-Kimvuka ya Bambangi ya Yehowa ke tindaka bamisionere na bisika yina mpusa kele mingi. Bubu bamisionere kele 3090 na ntoto ya mvimba. a Bamingi bakaka formasio na nzo-nkanda mosi ya kele na kati ya banzo-nkanda ya bo ke longaka Biblia, mu mbandu Nzo-Nkanda ya Bansamuni ya Kimfumu. Bamisionere ke ndimaka na luzolo yonso kuyambula banzo na bo sambu na kukwenda na bansi ya nkaka. Bo kele bantu ya kuyela na kimpeve, bo me bakaka formasio mpi bo kele ti eksperiansi mingi. Yo yina, bampangi yai ya me kangamaka na Yehowa ke sadisaka sambu na kumwanga nsangu ya mbote mpi bo ke pesaka mbandu ya mbote sambu na bantu yina ke kuma balongoki ya Yezu.

 Na konso Betele, Biro ya Ke Talaka Bampangi Yina Ke Salaka Kisalu ya Ntangu Yonso na Teritware ya Departema ya Kisalu ke salaka diboko na diboko ti Komite ya Filiale sambu na kulungisa bampusa ya bamisionere, mu mbandu kusosila bo banzo ya mbote, kutula dikebi na sante na bo mpi kusadisa bo na mwa mbongo sambu bo sala badepanse yina ke vandaka mfunu sambu muntu kuzinga. Na mvula ya kisalu 2020, Bambangi ya Yehowa basisaka mbongo ya badolare kiteso ya bamilio 27 sambu na kulungisa bampusa ya bamisionere. Mutindu bo me yidikaka mambu mpidiyai ke sadisaka bamisionere na kutula dikebi mpi ngolo na bo ya mvimba na kisalu ya kulonga nsangu ya mbote mpi kusala nde mabundu yina bo kele kuvanda ngolo.

 Inki mambote kisalu yina bamisionere ke salaka na teritware me nataka na kisalu ya kulonga nsangu ya mbote? Frank Madsen ke sadilaka Yehowa na Malawi. Yandi kele na Komite ya Filiale ya Malawi. Yandi ke tuba nde: “Bamisionere kele kikesa mpi bo kele ti makuki mingi. Bo me sadisaka mabundu na kuyantika kulonga mbote-mbote na bateritware yina ke vandaka mpasi, mu mbandu na bakartie yina bantu ke kotaka ve mpi na bisika yina bantu ke tubaka ndinga ya nkaka. Katula yo, bo ke salaka ngolo sambu na kulonguka ndinga yina bantu ke tubaka na kisika yina bo me tinda bo mpi mutindu bantu ya bisika yango ke zingaka. Kusala mpidina me sadisaka bampangi ya nkaka na kulanda mbandu na bo mpi bo ke sadisaka batoko na kutadila mambu ya luzingu na bo sambu bo sala kisalu ya ntangu yonso. Beto ke pesa Yehowa mersi sambu na bamisionere.”

 Mpangi mosi ya Komite ya Filiale ya insi ya nkaka ke tuba nde: “Bamisionere ke monisaka kibeni nde bansadi ya Yehowa kele na bumosi na nsi-ntoto ya mvimba. Yo vanda bantu yina ke sambilaka ve Yehowa ke monaka na pwelele yonso nde beto kele ve ya kukabula na kulanda mutindu ya kuzinga ya babwala na beto, kansi nde malongi ya Biblia me sadisaka beto na kuvanda na bumosi na kati ya dibuta na beto.”

 Inki mutindu bamisionere ya kele na bateritware ke sadisaka Bambangi ya Yehowa yina ke longaka nsangu ya mbote na babwala yina bo ke zingaka? Paulo ke zingaka na Timor-Leste. Yandi ke monisaka ntonda mingi sambu na bamisionere yina kele na dibundu na bo. Yandi ke tuba nde: “Na bwala na beto, ntangu ke vandaka ngolo, ngolo kibeni. Kansi bamisionere ke katukaka na babwala yina ke vandaka madidi, ata mpidina bo ke bikaka ve nde mutindu ntangu kele mingi kukanga bo nzila ya kulonga nsangu ya mbote. Bo ke vandaka ntangu yonso na suka na lukutakanu yina ke salamaka na ntwala ya kukwenda kulonga nsangu ya mbote. Mono ke monaka bo mbala na mbala mutindu bo ke kwendaka kuvutukila bantu na kati-kati ya kilumbu, na ntangu yina ntangu ke vandaka ngolo, mpi diaka na nkokila. Bo me sadisaka bantu mingi na kuzaba kieleka, mu kele na kati ya bantu yango. Bo kele kikesa mpi bo ke sadilaka luzingu na bo ya mvimba na kisalu ya Yehowa. Kusala mutindu yina ke pusaka dibundu ya mvimba na kusadila diaka Yehowa mingi.”

 Ketti ke zingaka na Malawi. Yandi ke longaka mingi nsangu ya mbote (mupasudi-nzila ya ntangu yonso). Yandi ke tubila mutindu mpangi-bakala mosi ti nkento na yandi yina vandaka bamisionere sadisaka dibuta na yandi. Yandi ke tuba nde: “Ntangu bo tindaka bakala mosi ti nkento na yandi ya kele bamisionere na dibundu na beto, mono vandaka Mbangi ya Yehowa kaka mono mosi na dibuta na mono. Kansi mpangi-bakala yina ti nkento na yandi sadisaka mono, mpi bo kumaka kibeni banduku ya dibuta na beto. Mbandu na bo ya mbote sadisaka bana na mono na kumona nde kusadila Yehowa ke nataka kiese mpi mambote mingi na luzingu. Mutindu bamisionere yina vandaka kupesa mbandu ya mbote, bana na mono tatu ya bankento ke sadila Yehowa. Bo ke longaka mingi nsangu ya mbote (bapasudi-nzila ya ntangu yonso) mpi bakala na mono me banda kukwenda na balukutakanu.”

 Mbongo yina bo ke sadilaka sambu na kusadisa bamisionere ya kele na bateritware na kulungisa bampusa na bo ke katukaka na wapi? Yo ke katukaka na makabu yina bampangi ke pesaka na ntoto ya mvimba. Bampangi mingi ke pesaka makabu yango na nzila ya bametode yina bo ke tubila na donate.pr418.com. Beto ke sepelaka mingi sambu na makabu yai ya ke monisaka kikalulu ya kukaba ya bampangi.