Biblia Ke Sobaka Luzingu ya Bantu

INKI sadisaka muntu mosi ya nku, ya mubulu mpi yina vandaka ve kukipe bantu ya nkaka na kukuma kuzola bo mpi kusadisa bo? Inki sadisaka bakala mosi na insi Mexique na kuyambula kikalulu na yandi ya mbi ya kuvukisa nitu babakala ti babakala? Sambu na nki muntu mosi ya lukumu ya insi Japon, yina vandaka kusala nsaka ya kubaka ntinu na velo, yambulaka nsaka yai sambu na kusadila Nzambi? Beto wa mambu yina bantu yai ke tuba.

“Mono Vandaka Ve Luzitu, Mono Vandaka Lulendo, Nku mpi Mubulu.”—DENNIS O’BEIRNE

MVULA YINA YANDI BUTUKAKA: 1958

INSI YINA YANDI BUTUKAKA: ANGLETERRE

LUZINGU NA YANDI YA NTAMA: YANDI VANDAKA NKU, MUBULU MPI YANDI VANDAKA VE KUKIPE BANTU YA NKAKA

MUTINDU MONO VANDAKA: Beto kele bantu ya Irlande. Papa na mono vandaka kulonga mono malongi ya Katolika ya Irlande. Mbala mingi, yo vandaka kulomba nde mono kwenda na eglize mono mosi, kansi mono vandaka ve kuzola kukwenda. Ata mpidina, mono vandaka kusepela kibeni ti mambu ya Nzambi. Mono vandaka kusala Kisambu ya Mfumu mpi kuvutukila yo mbala na mbala. Kilumbu mosi na nkokila ntangu mono vandaka na zulu ya mbeto, mono yantikaka kuyindula ntendula ya kisambu yina. Mono vandaka kuyindula konso kitini ya kisambu yai.

Ntangu mono kumaka ti bamvula 16, mono kotaka na kimvuka mosi ya barasta. Na nima, mono kotaka mpi na kimvuka mosi ya politiki yina bo vandaka kubinga Ligue anti-nazie. Kansi mono kudipesaka kibeni na kimvuka mosi (rock punk) yina vandaka kupusa mpenza bantu na kukolama. Mono kumaka kusadila bima ya ke lawusaka (drogue), mingi-mingi makaya ya bo ke bingaka marijuana. Mono vandaka kunwa yo konso kilumbu. Ata kima mosi ve vandaka kusepedisa mono. Mono vandaka kunwa malafu mingi, mono vandaka kusala mambu yina vandaka kutula luzingu na mono na kigonsa, mono vandaka kukipe ve bantu. Mono kumaka mubulu mpi nku mpi mono vandaka ve kutubisa bantu mpamba-mpamba katula kaka kana mono me mona nde mambu ya bo ke tubila kele mfunu. Mono vandaka kuzola nkutu ve nde bantu kukanga mono foto. Ntangu mono ke yindulaka mutindu mono vandaka, mono ke bakisaka nde mono vandaka ve luzitu, mono vandaka lulendo, nku mpi mubulu. Mono vandaka mawete kaka ti bantu yina mono vandaka kukangama ti bo mpi mono vandaka kusadisa kaka bo.

Ntangu mono kumaka ti bamvula 20, mono kumaka kusepela ti mambu ya Biblia. Nduku na mono mosi ya vandaka kuteka bima ya ke lawusaka vandaka kutanga Biblia ntangu yandi vandaka na boloko, mpi beto tubilaka mingi mambu ya me tala dibundu, Eglize mpi kiyeka yina Satana ke vandaka ti yo na ntoto yai. Mono sumbaka Biblia mpi mono yantikaka kulonguka yo mono mosi. Mono ti nduku na mono, beto vandaka kutanga baverse mingi mpi na nima beto vandaka kukutana sambu na kutubila mambu ya beto me longuka, mpi na nsuka beto vandaka kutuba mambu ya beto me bakisa. Beto salaka buna bangonda mingi.

Yai mwa mambu ya beto bakisaka: Beto ke zinga na bilumbu ya nsuka ya nsi-ntoto yai; Bakristu fwete longa nsangu ya mbote ya Kimfumu ya Nzambi; bo fwete kota ve na mambu ya nsi-ntoto yai, mu mbandu na mambu ya politiki; mpi nde Biblia ke pesaka lutwadisu ya mbote. Beto bakisaka nde Biblia ke tubaka mambu ya kieleka mpi nde dibundu ya kieleka fwete vanda kaka mosi. Kansi nki yo? Beto yindulaka mabundu ya nene yina bo me tungaka ti banzo ya kitoko mpenza mpi yina vandaka kusala bankinsi mpi kudikotisa na mambu ya politiki. Na Nima, beto bakisaka nde Yezu vandaka ve ata fioti kusala mambu mutindu yina. Beto zabaka nde Nzambi vandaka ve kusadila mabundu yina. Yo yina, beto yantikaka kusosa kuzaba mambu yina bo vandaka kulonga na mabundu yina me zabanaka ve mingi.

Beto vandaka kuvukana ti bantu ya mabundu yango mpi beto vandaka kuyula bo bangiufula mingi. Beto vandaka kuzaba mvutu ya Biblia na konso ngiufula, yo vandaka kusadisa beto na kubakisa mbote kana bamvutu ya bo vandaka kupesa vandaka kukatuka na Ndinga ya Nzambi Biblia to ve. Na nima ya kuvukana ti bantu ya konso dibundu yina, mono vandaka kusamba Nzambi mingi mpi kusonga yandi nde: ‘Kana bantu yai kele na dibundu ya kieleka, pardo pesa mono diaka nzala ya kukutana diaka ti bo.’ Kansi na nima ya bangonda mingi, mono zwaka ve tii pana kimvuka mosi yina lendaka kusadila Biblia sambu na kupesa bamvutu na bangiufula na beto mpi nzala ya kukwenda kukutana ti bimvuka yina yonso manaka mono.

Nsuka-nsuka mono ti nduku na mono, beto solulaka ti Bambangi ya Yehowa. Beto yulaka bo kaka bangiufula ya mutindu mosi mpi bo pesaka beto bamvutu na Biblia. Mambu ya bo tubaka vandaka kibeni kiteso mosi ti yina beto longukaka dezia. Yo yina beto kwendaka kuyula bo bangiufula sambu na mambu yina beto zwaka ntete ve bamvutu na yo na Biblia, mu mbandu mambu yina Nzambi ke yindulaka sambu na makaya mpi bima ya ke lawusaka. Ture yai mpi, bo sadilaka Ndinga ya Nzambi Biblia sambu na kupesa beto bamvutu. Beto ndimaka kukwenda na balukutakanu na Nzo ya Kimfumu.

Kukwenda na balukutakanu vandaka kima ya mpasi mingi sambu na mono. Mono vandaka ve kukipe bantu, yo yina mono zolaka ve kusolula ti bantu yina ya mawete, ya ntima-mbote mpi yina lwataka mbote. Mono bakilaka nkutu ba-nkaka na kati na bo bangindu ya mbi. Mono zolaka diaka ve kukwenda na balukutakanu na bo ya nkaka. Kansi kaka mutindu mono vandaka kusala yo, mono sambaka Nzambi sambu yandi pesa mono nzala ya kukutana diaka ti bantu yina kana dibundu na bo kele dibundu ya kieleka, mpi na nima mono waka nzala ya ngolo kibeni ya kulonguka Biblia ti Bambangi ya Yehowa.

MUTINDU BIBLIA SOBAKA LUZINGU NA MONO: Mono zabaka nde mono fwete yambula kusadila bima ya ke lawusaka mpi mono yambulaka yo kukonda mpasi. Kansi yo vandaka mpasi sambu mono yambula kunwa makaya. Mono mekaka kuyambula yo mbala mingi kansi mono kukaka ve. Ntangu mono waka nde bantu ya nkaka mpi yambulaka kunwa makaya, mono songaka Yehowa diambu yango ya makaya sambu yo vandaka mpasi sambu na mono. Yo yina ntangu fioti na nima, Yehowa sadisaka mono na kuyambula kunwa makaya. Mono bakisaka mfunu ya kusamba Yehowa na masonga yonso mpi ya kukangudila yandi ntima na kisambu.

Kima ya nkaka ya nene yina mono sobaka vandaka mutindu na mono ya kulwata mpi ya kuyidika nsuki. Ntangu mono kwendaka na mbala ya ntete na lukutakanu na Nzo ya Kimfumu, nsuki na mono vandaka ti tentire (teinture) ya kulere ya ble mpi ya vere (bleu vert). Na nima, mono tulaka yo tentire ya kulere ya orange ya ngolo. Mono vandaka kulwata pantalo mosi ya dine mpi lele mosi ya zulu yina vandaka ti bisono. Bambangi ya Yehowa vandaka kuyindula ti mono na mawete ata mpidina, mono vandaka kibeni ve kumona mfunu ya kusoba. Kansi kilumbu mosi, mono yindulaka mambu yai ya kele na 1 Yoane 2:15-17: “Beno zola ve nsi-ntoto mpi bima yina kele na nsi-ntoto. Kana muntu ke zola nsi-ntoto, zola ya Tata kele ve na kati na yandi.” Mono bakisaka nde mutindu na mono ya kulwata mpi ya kuyidika nitu vandaka kumonisa nde mono vandaka kuzola nsi-ntoto yai mpi nde, mono fwete soba sambu na kumonisa nde mono ke zolaka Nzambi. Yina mambu ya mono salaka.

Na nima mono bakisaka mpi nde, Bambangi ya Yehowa mpamba ve bantu vandaka kulomba mono na kukwenda na balukutakanu ya dibundu. Baebreo 10:24, 25 sadisaka mono na kubakisa nde Nzambi muntu vandaka kuzola nde mono kwenda na balukutakanu. Ntangu mono bakaka lukanu ya kubanda kukwenda na balukutakanu yonso mpi mono zabanaka mbote-mbote ti bantu na balukutakanu yango, mono bakaka lukanu ya kupesa luzingu na mono na Yehowa mpi kubaka mbotika.

MAMBOTE YA MONO ME BAKAKA: Kuzaba nde Yehowa ke zolaka nde beto kuma banduku na yandi ya ngolo simbaka kibeni ntima na mono. Mawa mpi zola na yandi ya mingi me pusaka mono na kulanda mbandu na yandi mpi ya Mwana na yandi Yezu Kristu na luzingu na mono. (1 Piere 2:21) Mono me bakisaka nde ata mono ke sala bikesa ya kukuma ti bikalulu yina Bakristu fwete vanda ti yo, bikalulu na mono ya ntama lenda vutukila mono diaka. Yo yina mono ke salaka bikesa ya kukuma kibeni kuzola bantu, mpi ya kulanda mbandu ya Yezu na mutindu mono ke sadilaka nkento mpi mwana na beto ya bakala mambu. Mono me kumaka kudiyangisa mingi mpenza sambu na bampangi na mono Bakristu. Kulanda mbandu ya Yezu me sadisaka mono na kukuma muntu yina bantu lenda zitisa mpi na kukuma kuzola bantu ya nkaka.

“Bo Sadilaka Mono Mambu ti Luzitu.”—GUADALUPE VILLARREAL

MVULA YINA YANDI BUTUKAKA: 1964

INSI YINA YANDI BUTUKAKA: MEXIQUE

LUZINGU NA YANDI YA NTAMA: YANDI VANDAKA KUVUKISA NITU TI BABAKALA YA NKAKA

MUTINDU MONO VANDAKA: Na divumu na beto, beto butukaka bana nsambwadi. Mono yelaka na mbanza Hermosillo na provense ya Sonora. Yo kele provense yina kinsukami ke vandaka mingi, na Mexique. Papa na mono fwaka ntangu mono vandaka mwana-fioti. Yo yina mama vandaka kusala ngolo sambu na kusansa beto. Beto vandaka ve ti mbongo ya kusumba basapatu. Yo yina mbala mingi, mono vandaka kutambula makulu-ngulu. Mono yantikaka kusala kisalu ntangu mono vandaka ntete leke. Mono vandaka kusala sambu na kuzwa mbongo yina lenda sadisa dibuta na beto na kusumba bima. Beto vandaka kuzinga bantu mingi kisika mosi, mutindu mabuta mingi ya nkaka ke zingaka.

Mbala mingi, mama vandaka kuvanda ve na nzo sambu na kutanina beto. Ntangu mono lungisaka bamvula sambanu, mwana-bakala mosi ya bamvula 15 yantikaka kuvukisa nitu ti mono. Mambu yai salamaka ntangu ya nda. Mono kumaka kuzaba diaka ve kana mono kele bakala to nkento. Mono kumaka kumona nde yo kele ve mbi kana bakala ti bakala ke vukisa nitu. Mono kwendaka kusosa lusadisu na minganga mpi na bamfumu ya mabundu. Kansi bo songaka mono nde mono kudiyangisa ve mpi nde mutindu mono vandaka kudiwa vandaka ve mbi.

Ntangu mono lungisaka bamvula 14, mono bakaka lukanu ya kukuma kulwata mpi ya kusala mambu mutindu babakala yina ke vukisaka nitu ti babala ya nkaka ke salaka. Mono salaka mpidina bamvula 11 ya mvimba. Nkutu mono vandaka kuvukisa nitu ti babakala mingi na ntangu yina. Na nima, mono bakaka formasio ya kuzenga nsuki mpi mono kangulaka salon mosi sambu na kuyidikaka bantu mpi kuzenga bo nsuki. Kansi, mono vandaka ve na kiese. Luzingu ya mono vandaka ti yo vandaka kupesa mono mpasi mingi mpi yo vandaka kuyangisa mono mingi. Mono bakisaka nde mambu ya mono vandaka kusala vandaka ve mbote. Mono yantikaka kudiyula nde: ‘Keti bantu ya mbote mpi ya beto fwete tudila ntima kele?’

Mono yindulaka yaya na mono ya nkento. Yandi yantikaka kulonguka Biblia ti Bambangi ya Yehowa mpi na nima, yandi bakaka mbotika. Yandi vandaka kusonga mono mambu yina yandi vandaka kulonguka, kansi mono vandaka kutula mpenza ve dikebi. Ata mpidina, mono vandaka kusepela mingi ti makwela na yandi mpi luzingu yina yandi kumaka ti yo. Mono vandaka kumona mutindu bo vandaka kuzolana mpenza mpi kumonisilana luzitu, yandi ti bakala na yandi. Bo vandaka kusadilana mambu ti mawete. Na nima, Mbangi ya Yehowa mosi ya nkento yantikaka kulonguka Biblia ti mono. Ntete mono vandaka kulonguka kaka bika mono longuka. Kansi na nima mambu sobaka.

MUTINDU BIBLIA SOBAKA LUZINGU NA MONO: Bambangi ya Yehowa bingisaka mono na balukutakanu na bo mpi mono kwendaka. Mambu yina mono monaka kuna vandaka ya mpa sambu na mono. Mbala mingi bantu vandaka kuseka mono, kansi Bambangi ya Yehowa ve. Bo pesaka mono mbote na mawete mpi na zola, mpi bo sadilaka mono mambu ti luzitu. Yo simbaka kibeni ntima na mono.

Mono monaka diaka nde Bambangi ya Yehowa kele bantu ntangu mono kwendaka na lukutakanu na bo mosi ya nziunga. Mono monaka nde yo vanda bo kele mingi kisika mosi, bo kele bonso yaya na mono ya nkento: bo vandaka bantu ya kutudila ntima mpi ya masonga. Mono kuditubilaka nde yai kele kimvuka ya bantu ya mbote mpi ya me fwana na kutudila ntima yina mono vandaka kusosa banda ntama. Zola mpi bumosi yina mono monaka na kati na bo mpi mutindu bo vandaka kusadila Biblia sambu na kupesa bamvutu na bangiufula yonso yitukisaka mono mingi. Mono bakisaka nde kima ya vandaka kusadisa bo na kuvanda mutindu yina vandaka Biblia. Mono bakisaka mpi nde, mono fwete yambula mambu yonso ya mbi sambu na kukuma bonso bo.

Ya kieleka, mono kumaka kibeni mutindu ya nkaka sambu na ntwala, mono vandaka kuzinga mpi kusala mambu yonso bonso bankento. Yo vandaka kulomba nde mono soba mutindu na mono ya kutuba, ya kusala mambu, ya kulwata, ya kuyidika nsuki mpi kupona banduku ya nkaka. Banduku na mono ya ntama yantikaka kuseka mono mpi kutuba nde: “Sambu na nki nge ke sala mambu yai? Nge vandaka mbote mutindu nge vandaka ntete. Kulonguka ve Biblia. Nge kele ti bima yonso ya nge kele na yo mfunu.” Yo vandaka mpasi mingi kibeni sambu mono yambula luzingu na mono yina ya nsoni.

Ata mpidina mono zabaka nde, mono ta kuka kusala bansoba yai ya nene sambu mambu yai ya Biblia ke tubaka na 1 Bakorinto 6:9-11 simbaka kibeni ntima na mono: “Keti beno ke zaba ve nde bantu ya kukonda lunungu ta baka ve Kimfumu ya Nzambi? Beno kudikusa ve. Bantu ya ke salaka pite, bantu ya ke sambilaka biteki, bantu ya ke salaka bizumba, babakala yina ke pesaka nzila nde bo vukisa nitu ti bo na mutindu yina me fwana ve, babakala yina ke ladisaka babakala ya nkaka . . . ta baka ve Kimfumu ya Nzambi. Bantu ya nkaka na kati na beno vandaka mutindu yina. Kansi bo me yobisaka beno.” Yehowa sadisaka bantu na ntangu yina na kuyambula bikalulu ya mbi. Yandi me sadisaka mono mpi. Yo lombaka bamvula mingi sambu mono nunga bitumba yina. Kansi bandongisila ya Bambangi ya Yehowa, mambu ya bo vandaka kusonga mono na kusala mpi zola yina bo vandaka kumonisila mono sadisaka mono mingi kibeni.

MAMBOTE YA MONO ME BAKAKA: Bubu yai, mono me kumaka ti luzingu ya mbote. Mono me kwelaka mpi mono ti nkento na mono, beto ke longaka mwana na beto ya bakala na kuzitisa bansiku ya kele na Biblia. Mono ke zingaka diaka ve ata fioti mutindu mono vandaka kuzinga ntete. Mono me kumaka ti mikumba mingi mpi me bakaka mambote mingi ya kimpeve. Mono me kumaka nkuluntu na dibundu mpi mono ke sadisaka bantu ya nkaka na kuzaba malongi ya kieleka ya kele na Ndinga ya Nzambi. Mama waka kiese mingi ntangu yandi monaka mutindu mono yambulaka mambu yonso ya mbi. Yo yina yandi ndimaka kulonguka Biblia mpi yandi bakaka mbotika. Leki na mono mosi ya nkento yina vandaka kusala kindumba kumaka mpi Mbangi ya Yehowa.

Nkutu bantu ya nkaka yina zabaka mono na ntwala ke tubaka nde mono me kumaka mbote mpenza. Mono ke zabaka nani me sadisaka mono na kuyambula luzingu yina ya ntama. Na ntangu ya ntama mono kwendaka kusosa lusadisu na minganga mpi bantwadisi ya mabundu, kansi bo pesaka mono bandongisila ya mbi. Ata mpidina, Yehowa me sadisaka mono mingi kibeni. Ata mono vandaka kudimona kukonda mfunu, yandi monaka mono mpi yandi sadilaka mono mambu ti zola mpi ntima-nda. Lukanu na mono ya kuyambula mambu yonso ya mbi kumaka kibeni ngolo ntangu mono zabaka nde Nzambi mosi ya mbote kibeni, ya mayele mpi ya ntima-mbote monaka mono mpi vandaka kuzola nde mono kuma ti luzingu ya mbote mpenza.

“Mono Vandaka Ve na Kiese, Mono Vandaka Kudiwa Mono Mosi mpi Mono Vandaka Kusepela Ve ti Bima ya Mono Vandaka na Yo.”—KAZUHIRO KUNIMOCHI

MVULA YINA YANDI BUTUKAKA: 1951

INSI YINA YANDI BUTUKAKA: JAPON

LUZINGU NA YANDI YA NTAMA: YANDI VANDAKA KUSALA NSAKA YA KUBAKA NTINU NA VELO

MUTINDU MONO VANDAKA: Mono yelaka na mbanza mosi ya vandaka ti dibungu mosi ya nene na provense ya Shizuoka na insi Japon. Beto vandaka bantu nana na dibuta na beto mpi beto vandaka kuzinga na nzo mosi ya fioti. Papa vandaka ti magaze mosi ya bo vandaka kuteka bavelo mpi kuyidika yo. Banda mono vandaka mwana-fioti, yandi vandaka kunata mono na bisika yina bantu vandaka kusala nsaka ya kubaka ntinu na bavelo, mpi yo pesaka mono nzala ya kusala mpi nsaka yango. Yandi yantikaka kuyidika mambu sambu mono kuma muntu ya nene yina ke bakaka ntinu na bavelo. Ntangu mono vandaka na ekole sekondere, yandi yantikaka mpenza kupesa mono formasio ya ngolo yina ta sadisa mono na kununga. Ntangu mono mataka fioti klase, mono nungaka mbala tatu na mvula mosi na nsaka ya kubaka ntinu na velo. Bo lombaka mono na kukota na iniversite, kansi mono bakaka lukanu ya kukwenda mbala mosi na nzo-nkanda yina bo vandaka kulonga nsaka ya kubaka ntinu na bavelo. Ntangu mono kumaka ti bamvula 19, mono kumaka muntu ya nene na nsaka ya kubaka ntinu na velo.

Banda pana, mono kumaka ti lukanu ya kukuma muntu ya ntete na nsaka yai ya kubaka ntinu na bavelo na Japon ya mvimba. Mono vandaka ti lukanu ya kununga sambu na kuzwa mbongo mingi sambu mono sadisa dibuta na beto na kuvanda ti luzingu ya mbote mpi ya kiese. Mono kudipesaka mpenza na kusala ba entraînement. Konso ntangu ya beto vandaka kusala entraînement to kubaka ntinu, kana mono me lemba to kana mono me mona nde yo kele mpasi, mono vandaka kuditubila nde mono butukaka sambu na kusala nsaka yai mpi nde mono fwete yambula ve ata nki mutindu! Mono landaka kukanga ntima. Kisalu na mono yai ya ngolo yantikaka kukotisila mono mbongo. Na mvula ya ntete, mono basikaka muntu ya ntete na nsaka ya kubaka ntinu na bavelo na kati ya baleke yonso yina mono salaka ti bo. Na mvula yina landaka, mono nungaka mpi bo ndimaka nde mono sala nsaka ya kubaka ntinu na bavelo yina bo sadisaka sambu na kuzaba nani kele muntu ya ntete na nsaka yai na Japon ya mvimba. Mbala sambanu ya mvimba, mono vandaka kubasika muntu ya zole.

Mutindu mono vandaka kaka na kati ya bantu ya ntete, bo pesaka mono zina yai: “Makulu ya bibende ya Tokai.” Tokai kele mbanza mosi na Japon. Mono vandaka kibeni ti mpeve ya kutesana na nsaka yai. Mono vandaka ve kuwila bantu mawa ata fioti. Yo yina bantu ya mono vandaka kusala ti bo nsaka yai kumaka kuwa mono boma. Mono kumaka diaka kuzwa mbongo mingi mpi mono kumaka ti mbongo ya kusumba konso kima yina mono vandaka kusepela ti yo. Mono sumbaka nzo yina vandaka ti kisika mosi ya kusala bansaka mpi baapareyi ya kitoko mpenza. Mono sumbaka vwatire mosi yina ntalu na yo vandaka kiteso mosi ti nzo. Sambu na kutanina mbongo na mono, mono kangulaka konti na banki mpi mono yantikaka kubumba yo kuna.

Ata mpidina, mono vandaka ve na kiese, mono vandaka kudiwa mono mosi mpi mono vandaka kusepela ve ti bima ya mono vandaka na yo. Na ntangu yina, mono kwelaka dezia mpi mono kumaka dezia ti bana tatu ya babakala. Kansi mono vandaka kuwila nkento mpi bana na mono makasi mpamba-mpamba ata na mambu ya fioti-fioti. Bo kumaka boma-boma kana bo me bakisa nde mono kele ve na kiese.

Kilumbu mosi, nkento na mono yantikaka kulonguka Biblia ti Bambangi ya Yehowa. Yo sobaka mambu mingi. Yandi tubaka nde yandi ke zola kukwenda na balukutakanu ya Bambangi ya Yehowa, yo yina mono tubaka nde beto ta kwenda dibuta ya mvimba. Mono ke yibuka diaka kilumbu mosi na mpimpa yina nkuluntu mosi kwisaka na nzo na beto mpi yandi yantikaka kulonguka Biblia ti mono. Mambu ya mono longukaka simbaka kibeni ntima na mono.

MUTINDU BIBLIA SOBAKA LUZINGU NA MONO: Mono ta vila ve ata fioti mutindu mambu ya mono tangaka na Baefezo 5:5 sadisaka mono mingi. Yo ke tuba nde: “Ata muntu mosi ve ya ke salaka pite to ya ke salaka mambu ya mvindu to muntu ya lukasi, disongidila muntu ya ke sambilaka biteki, ta baka dikabu na Kimfumu ya Kristu mpi ya Nzambi.” Ya kieleka nsaka ya kubaka ntinu na bavelo kele ti kuwakana ya ngolo ti bansaka ya mbongo. Yo yina mono bakisaka nde, yo vandaka kupusa mono na kuvanda muntu ya lukasi. Yo vandaka kuyangisa kansansa na mono. Mono vandaka kutuba nde kana mono ke zola kupesa Yehowa Nzambi kiese, mono fwete baka lukanu ya kubika nsaka yai. Kansi yo vandaka ve pete sambu mono baka lukanu yina.

Mono katukaka kumanisa mvula na mono ya kuluta mbote na nsaka yina mpi mono vandaka kaka ti nzala ya kukwenda na ntwala. Mono bakisaka nde kulonguka Biblia vandaka kusadisa mono na kukuma muntu ya mawete mpi ya ngemba, kansi nsaka yina ya kubaka ntinu na bavelo vandaka kusala nde, mono kuma kibeni ti mpeve ya kutesana sambu na kulanda kununga na nsaka yango! Mono bakaka ntinu mbala tatu mpamba na ntwala nde mono banda kulonguka Biblia. Ata mpidina, mono vandaka kaka ti nzala ya kusala nsaka yai na ntima na mono. Diaka, mono vandaka kudiyangisa sambu mono vandaka kudiyula na wapi mono ta zwa mbongo ya kusadisa dibuta na mono. Mono vandaka kuzaba diaka ve nki mono fwete sala: Mono yambula nsaka yina to mono landa kusala yo. Diaka bampangi ya dibuta na mono kumaka kuyangisa mono sambu na lukanu ya mono bakaka ya kulonguka Biblia. Papa waka mpasi mingi mpenza. Yo pesaka mono susi mpi mpasi mingi kibeni, yo yina mono kumaka kubela maladi ya gastrite.

Kulanda kulonguka Biblia mpi kukwenda na balukutakanu ya Bambangi ya Yehowa kele mambu ya sadisaka mono na bantangu yai ya mpasi. Malembe-malembe, lukwikilu na mono vandaka kukuma ngolo. Mono sambaka Yehowa sambu yandi wa bisambu na mono mpi sambu yandi sadisa mono na kubakisa bamvutu na bisambu yango. Basusi na mono vandaka diaka ve mingi ntangu nkento na mono songaka mono nde sambu na kuvanda na kiese, yandi vandaka ve na mfunu ya kuzinga na nzo mosi ya nene. Malembe-malembe, mono vandaka kuyela na kimpeve.

MAMBOTE YA MONO ME BAKAKA: Mono longukaka nde mambu yai ya Yezu tubaka na Matayo 6:33 kele mpenza ya kieleka: “Yo yina, beno landa kusosa ntete Kimfumu ti lunungu na yandi, ebuna yandi ta yika beno bima yina yonso ya nkaka.” Beto ke kondaka ve ata fioti “bima yina yonso ya nkaka” yina Yezu tubilaka, disongidila bima yina kele mfunu na luzingu. Mono ke zwaka diaka ve mbongo mingi bonso yina mono vandaka kuzwa na nsaka ya kubaka ntinu na bavelo. Ata mpidina, dibuta na mono kondaka ve ata kima mosi ya mfunu na bamvula 20 ya me katuka kuluta.

Kima ya kuluta mfunu kele nde, ntangu mono ke sambilaka Yehowa ti bampangi na mono Bakristu, mono ke waka kiese mingi mpenza, kiese yina mono vandaka ntete ve ti yo. Luzingu ya dibuta na mono me kumaka kitoko mingi mpenza. Bana na beto tatu ya babakala ti bankento na bo ke sambilaka Yehowa na ntima na bo ya mvimba.