Biblia Ke Sobaka Luzingu ya Bantu

INKI sadisaka nkento mosi ya kutanaka ti bampasi na kileke na kukuma kuzinga na kiese? Inki sadisaka muntu mosi ya vandaka kusosa nde mambu ya politiki kusoba na kukuma longi ya ngemba ya nsangu ya mbote? Beto ke lomba nge na kutanga masolo na bo sambu na kubaka bamvutu.

“Mono vandaka kibeni na mfunu nde bantu kuzola mono mpi bo monisila mono zola.”—INNA LEZHNINA

MVULA YINA YANDI BUTUKAKA: 1981

INSI YINA YANDI BUTUKAKA: RUSSIE

LUZINGU NA YANDI YA NTAMA: YANDI KUTANAKA TI BAMPASI NA KILEKE

MUTINDU MONO VANDAKA: Mono butukaka kifwa-makutu. Bibuti na mono mpi vandaka bifwa-makutu. Banda mono butukaka tii ntangu mono lungisaka bamvula sambanu, mambu yonso vandaka kutambula mbote na luzingu na mono. Kansi na nima bibuti na mono fwaka makwela. Ata mono vandaka mwana-fioti mpenza, mono zabaka mbote nde kufwa makwela kele diambu ya mpasi, mpi yo pesaka mono mpasi mingi kibeni. Na nima papa ti yaya na mono ya bakala bikalaka na mbanza Troitsk, kansi mama bakaka mono mpi beto kwendaka kuzinga na mbanza Chelyabinsk. Mwa bamvula na nima, mama kwelanaka diaka ti muntu ya nkaka. Papa yai ya mama kwelanaka ti yandi vandaka kunwa malafu mingi, mpi mbala mingi yandi vandaka kubula mono ti mama.

Na 1993, yaya na mono ya bakala yina mono vandaka kuzola mingi fwaka na masa. Mambu yina pesaka dibuta na beto mpasi mingi mpenza. Mama na mono mpi kumaka kunwa malafu sambu na kuvila mambu yina. Yandi kumaka mpi kuniokula mono kaka bonso bakala yina yandi kwelaka. Mono yantikaka kusosa mutindu mono lenda vanda ti luzingu ya mbote mpenza. Mono vandaka kibeni na mfunu nde bantu kuzola mono mpi bo monisila mono zola. Yo yina mono yantikaka kukwenda na ba-eglize mingi sambu na kuzwa kiese, kansi ata eglize mosi ve sadisaka mono na kuzwa kiese yango.

MUTINDU BIBLIA SOBAKA LUZINGU NA MONO: Ntangu mono lungisaka bamvula 13, mwana mosi ya nzo-nkanda na beto ya nkento yina vandaka Mbangi ya Yehowa, budilaka mono mwa masolo ya Biblia. Mono waka kiese mingi ntangu mono zabaka masolo ya bantu yina Biblia ke tubilaka, mu mbandu Noa mpi Yobi. Bantu yai vandaka kusadila Nzambi ata bo vandaka kukutana ti bampasi. Yo yina na mbala mosi, mono yantikaka kulonguka Biblia ti Bambangi ya Yehowa mpi kukwenda na balukutakanu na bo.

Kulonguka Biblia sadisaka mono na kuzaba mambu mingi ya mbote mpi ya kieleka. Mono yitukaka mingi na kuzaba nde Nzambi kele ti zina. (Nkunga 83:18) Mono yitukaka na kumona mutindu Biblia tubilaka mbote-mbote na ntwala mambu ya ke salama “na bilumbu ya nsuka.” (2 Timoteo 3:1-5) Diaka mono waka kiese mingi ntangu mono zabaka nde kilumbu kele bantu yina me fwaka ta vutuka na luzingu. Beno me zaba: mono ta vanda na kiese mingi ya kumona diaka yaya na mono!—Yoane 5:28, 29.

Ata mpidina, bantu yonso ve sepelaka ti mambu yai ya mono zabaka ya vandaka kupesa mono kiese. Mama ti papa yai ya yandi kwelanaka ti yandi, vandaka kuzola ve ata fioti Bambangi ya Yehowa. Bo vandaka kupusa mono na kuyambula kulonguka Biblia. Kansi mono yambulaka ve kulonguka Biblia sambu mono vandaka kusepela ti mambu yina mono vandaka kulonguka.

Yo vandaka ve pete na kukanga ntima mutindu bantu ya dibuta vandaka kutelemina mono. Beto kutanaka diaka ti diambu ya nkaka ya mpasi: leke na mono ya bakala yina vandaka kufidisa mono na balukutakanu ya Bambangi ya Yehowa mpi yina mama butaka ti papa yai ya nkaka, fwaka mpi na masa. Ata mpidina, Bambangi ya Yehowa vandaka kusadisa mono konso ntangu. Bo vandaka kuzola mono mpi kumonisila mono zola yina mono vandaka kusosa luzingu na mono ya mvimba. Mono zabaka nde yai kele dibundu ya kieleka. Yo yina na 1996, mono bakaka mbotika mpi kumaka Mbangi ya Yehowa.

MAMBOTE YA MONO ME BAKAKA: Mono me lungisa bamvula sambanu dezia na makwela. Mono me kwelanaka ti Dmitry. Yandi kele bakala mosi ya mbote kibeni. Beto zole, beto ke sadilaka Yehowa na Betele ya Bambangi ya Yehowa yina kele na mbanza Saint-Pétersbourg. Na nima ya bamvula, bibuti na mono vandaka diaka ve kutelemina ngolo mambu yina mono kumaka kundima.

Mono ke pesa Yehowa mersi mingi sambu mono me zabaka yandi. Kusadila yandi me salaka nde mono kuma kuzinga na kiese!

“Bangiufula mingi ya mono vandaka kudiyula vandaka kuyangisa mono.”—RAUDEL RODRÍGUEZ RODRÍGUEZ

MVULA YINA YANDI BUTUKAKA: 1959

INSI YINA YANDI BUTUKAKA: CUBA

LUZINGU NA YANDI YA NTAMA: YANDI VANDAKA KUSOSA NDE MAMBU YA POLITIKI KUSOBA

MUTINDU MONO VANDAKA: Mono butukaka na mbanza La Havane na insi Cuba mpi mono yelaka na kartie mosi ya bantu vandaka kunwana mingi na babala-bala. Ntangu mono vandaka kuyela, mono kumaka kusepela mingi ti judo (nsaka mosi ya makofi) mpi bansaka ya nkaka ya kunwana.

Mono vandaka mwana ya nzo-nkanda mosi ya mbote. Yo yina bibuti na mono vandaka kusonga mono na kukwenda na iniversite. Na ntangu yina, mono kumaka ti nzala ya kusoba mambu ya politiki ya insi na beto. Yo yina mono kumaka rebele. Mono ti nduku na mono mosi ya nzo-nkanda, beto nwanisaka polisie mosi mpi beto yindulaka nde beto ta botula yandi munduki. Polisie yina lwalaka ngolo na ntu. Yo yina bo kangaka mono ti nduku na mono yina mpi bo tulaka beto na boloko. Bo zengaka nkanu ya kufwa beto na masasi. Mono vandaka kaka ti bamvula 20 mpi yo lombaka nde bo fwa mono!

Ntangu mono vandaka mono mosi na boloko, mono vandaka kudibongisa sambu na mambu yina mono ta sala na ntwala nde bo bula mono masasi. Mono vandaka ve kuzola nde bantu kuzaba nde mono ke wa boma. Kansi bangiufula ya mono vandaka kudiyula vandaka kuyangisa mono. Mono kudiyulaka nde: ‘Sambu na nki mambu ya mbi me kuma mingi mutindu yai na nsi-ntoto yai? Keti mambu yonso me suka kaka na luzingu yai?’

MUTINDU BIBLIA SOBAKA LUZINGU NA MONO: Na nima bo bakaka lukanu nde na kisika ya kufwa beto, beto fwete sala bamvula 30 na boloko. Na ntangu yina, mono zabanaka ti Bambangi ya Yehowa yina bo tulaka na boloko sambu na lukwikilu na bo. Bo vandaka kikesa mpi bantu ya ngemba.Yo vandaka kuyitukisa mono mingi. Ata bo salaka ve kima mosi ya mbi sambu bo tula bo na boloko, bo vandaka ve kudasuka to kubasisa mavwanga.

Bambangi yina ya Yehowa songaka mono nde Nzambi ke kana kusala mambu ya mbote sambu na bantu. Bo tangilaka mono na Biblia nde yandi ta kumisa ntoto Paladisu mpi yandi ta manisa mubulu mpi mambu ya mbi na ntoto. Bo longaka mono nde bantu ya mbote mpamba ta zinga na ntoto mpi nde bo ta zinga mvula na mvula ti sante ya mbote kibeni.—Nkunga 37:29.

Mono sepelaka ti mambu yina Bambangi yina ya Yehowa longaka mono. Kansi mono vandaka kundima ve nde mono ta kuka kukuma ti bikalulu ya mbote bonso bo. Mono tubaka nde mono ta kuka ve ata fioti kuzinga kukonda kukota na mambu ya politiki mpi kusala ve ata kima kana bantu ke niokula mono. Yo yina, mono bakaka lukanu ya kutanga Biblia mono mosi. Ntangu mono manisaka kutanga yo, mono bakisaka nde Bambangi ya Yehowa mpamba bantu ke salaka mambu mutindu Bakristu ya ntete vandaka kusala.

Kulonguka ya Biblia me sadisaka mono na kubakisa nde mono fwete yambula kibeni mambu mingi ya mbi na luzingu na mono. Mu mbandu, yo lombaka nde mono soba mutindu na mono ya kutuba sambu mono vandaka ti kifu ya kudia ndefi mbala na mbala.Yo lombaka mpi nde mono yambula kunwa makaya mpi kukota na mambu ya politiki. Kuyambula mambu yai vandaka ve pete. Kansi Yehowa sadisaka mono na kuyambula yo malembe-malembe.

Yo vandaka mpasi kibeni sambu mono kuma ti kikalulu ya kudiyala. Nkutu mono ke sambaka kaka Yehowa sambu yandi sadisa mono na kukuma kibeni ti kikalulu yai. Baverse mingi ya Biblia me sadisaka mono mingi, mu mbandu Bingana 16:32, yina ke tuba nde: “Muntu yina ke waka makasi nswalu ve kele mbote kuluta muntu ya ngolo, mpi muntu yina ke yalaka makasi na yandi kele mbote kuluta muntu yina me botula mbanza.”

Mono bakaka mbotika mpi mono kumaka Mbangi ya Yehowa na 1991. Bo pesaka mono mbotika na kati ya tono mosi yina vandaka ya kufuluka ti masa na boloko. Na mvula yina landaka, bo basisaka mono ti bantu ya nkaka na boloko mpi bo tindaka beto na Espagne kisika yina bantu ya mabuta na beto vandaka kuzinga. Ntangu mono kumaka na Espagne, na mbala mosi mono kwendaka na balukutakanu ya Bambangi ya Yehowa. Bambangi ya Yehowa yina kuna yambaka mono bonso nde mono vandaka dezia kuzinga ti bo banda bamvula mingi, mpi bo sadisaka mono na kuzwa kisalu yina vandaka kusadisa mono na kuzwa bima ya kuzingila.

MAMBOTE YA MONO ME BAKAKA: Mono kele na kiese mpi mono ke sadilaka Nzambi ti nkento na mono mpi bana na beto zole ya bankento. Mono ke vandaka na kiese ya kulutisa ntangu mingi na kusadisa bantu na kulonguka Biblia. Bantangu ya nkaka, ntangu mono ke yindulaka mpila bo zolaka kufwa mono na kileke, mono ke vandaka na kiese mingi sambu na mambote mingi ya mono me bakaka banda pana. Mu mbandu, mono kele kaka na luzingu mpi mono me kumaka ti kivuvu.Mono ke vingila ti kiese ya mingi Paladisu yina Nzambi me songaka beto. Na ntangu yina, mambu ya mbote mpamba ta salamaka awa na ntoto mpi “lufwa ta vandaka diaka ve.”—Kusonga 21:3, 4.

 [Bangogo sambu na kubenda dikebi]

“Mono yitukaka mingi na kuzaba nde Nzambi kele ti zina”

 [Kifwanisu]

Mono ti bakala na mono, beto ke vandaka na kiese ya kusadila mikanda ya ndinga-bidimbu sambu na kulonga bifwa-makutu