Maũndũ ma Matukũ ma Tene wa Mbere 29:1-30
29 Na rĩrĩ, Mũthamaki Daudi akĩra kĩũngano kĩu gĩothe ũũ: “Mũrũ wakwa Suleimani, ũrĩa Ngai athuurĩte,+ nĩ mũnini na ndarĩ na ũmenyeru,*+ na wĩra ũyũ nĩ mũnene, nĩ gũkorũo ti hekarũ* ya mũndũ ĩgwakwo no nĩ ya Jehova Ngai.+
2 Na nĩ hũthĩrĩte hinya wakwa wothe kũhaarĩria mwako wa nyũmba ya Ngai wakwa, ngaruta thahabu ya gũthondeka indo cia thahabu, betha ya gũthondeka indo cia betha, gĩcango gĩa gũthondeka indo cia gĩcango, kĩgera gĩa gũthondeka indo cia kĩgera,+ mbaũ+ cia gũthondeka indo cia mbaũ, mahiga ma onigithi, na mahiga ma kũbangwo manyitithanĩtio na thimiti, tũhiga twa kũgemia, mũthemba o wothe wa mahiga ma goro, na mahiga ma alabasta na gĩkĩro kĩnene.
3 Makĩria ma ũguo, tondũ wa ũrĩa ngeneire nyũmba ĩyo ya Ngai wakwa,+ nĩ ngũheana nginya mũthithũ wakwa mwene+ wa thahabu na betha nĩ ũndũ wa nyũmba ya Ngai wakwa, hatatarĩtwo kĩrĩa gĩothe haarĩrĩirie nĩ ũndũ wa nyũmba ĩyo nyamũre,
4 hamwe na taranda* 3,000 cia thahabu kuuma Ofiri+ na taranda 7,000 cia betha therie, cia kũhumbĩra thingo cia nyũmba icio,
5 thahabu ya gũthondeka indo cia thahabu, na betha ya gũthondeka indo cia betha, na nĩ ũndũ wa wĩra wothe wa kũrutwo nĩ mabundi. Rĩu-rĩ, nũũ ũkwĩrutĩra ũmũthĩ oimĩre na kĩheo kĩa Jehova anyitĩte na guoko?”+
6 Nĩ ũndũ ũcio anene a nyũmba cia maithe mao, anene a mĩhĩrĩga ya Isiraeli, anene a andũ ngiri na a andũ igana,+ na anene a mawĩra ma mũthamaki+ makiumĩra meyendeire.
7 Na makĩheana indo ici nĩ ũndũ wa ũtungata wa nyũmba ya Ngai ũrĩa wa ma: taranda 5,000 cia thahabu, dariki* 10,000, taranda 10,000 cia betha, taranda 18,000 cia gĩcango, na taranda 100,000 cia kĩgera.
8 Mũndũ ũrĩa wothe warĩ na mahiga ma goro aamaneanire kĩgĩna-inĩ kĩa nyũmba ya Jehova, rungu rwa ũmenyereri wa Jehieli+ Mũgerishoni.+
9 Andũ magĩkena nĩ ũndũ wa kũruta magongona macio ma kwĩyendera, nĩ gũkorũo maarutĩire Jehova magongona macio ma kwĩyendera na ngoro yothe,+ na Mũthamaki Daudi o nake agĩkena mũno.
10 Daudi agĩcoka akĩgooca Jehova arĩ mbere ya maitho ma kĩũngano kĩu gĩothe. Daudi akiuga atĩrĩ: “Ũrogoocwo, wee Jehova Ngai wa Isiraeli ithe witũ, tene na tene.*
11 Wee Jehova, wĩ mũnene,+ na hinya+ na ũthaka na ũkaru na ũnene*+ nĩ ciaku, nĩ gũkorũo kĩndũ gĩothe kũrĩa igũrũ na gũkũ thĩ nĩ gĩaku.+ Ũthamaki nĩ waku, wee Jehova.+ Wee nĩwe Ũrĩa wĩtũũgĩrĩtie ũgakorũo ũrĩ mũnene igũrũ rĩa arĩa angĩ othe.
12 Ũtonga na riri ciumaga kũrĩ wee,+ na wathaga indo ciothe,+ na guoko-inĩ gwaku harĩ na ũhoti+ na hinya,+ na guoko gwaku gũtũũgĩragia+ na gũgekĩra othe hinya.+
13 Na rĩu wee Ngai witũ, nĩ twagũcokeria ngatho na twagooca rĩĩtwa rĩaku rĩrĩ riri.*
14 “No rĩrĩ, niĩ ndĩ ũ na andũ akwa nĩa atĩ nĩguo tũhote kũruta magongona maya ma kwĩyendera? Nĩ gũkorũo indo ciothe ciumaga kũrĩ wee, na twakũhe indo ciumĩte guoko-inĩ gwaku.
15 Nĩ gũkorũo tũrĩ andũ a kũngĩ maitho-inĩ maku na aikari a kuuma kũngĩ, o ta maithe maitũ mothe ma tene.+ Nĩ gũkorũo matukũ maitũ gũkũ thĩ mahaana ta kĩĩruru+—tũtirĩ mwĩhoko.
16 Atĩrĩrĩ wee Jehova Ngai witũ, ũtonga ũyũ wothe tũhaarĩrĩirie wa gũgwakĩra nyũmba nĩ ũndũ wa rĩĩtwa rĩaku itheru uumĩte guoko-inĩ gwaku, na wothe nĩ waku.
17 Nĩ njũĩ wega, wee Ngai wakwa, atĩ nĩ ũthuthuragia ngoro+ na atĩ nĩ ũkenagio nĩ wĩkindĩru.*+ Ndutĩte indo ici ciothe na ũrũngĩrĩru wa ngoro yakwa,* ndĩyendeire, na nĩ njiyũirũo nĩ gĩkeno kuona andũ aku aya marĩ haha magĩkũrutĩra magongona ma kwĩyendera.
18 Wee Jehova Ngai wa Iburahimu, Isaaka, na Isiraeli, maithe maitũ ma tene, iga methugunda na meciria maya ngoro-inĩ cia andũ aku tene na tene, na werekerie ngoro ciao na kũrĩ wee.+
19 Na ũhe mũrũ wakwa Suleimani ngoro nginyanĩru,*+ nĩguo arũmagĩrĩre maathani maku,+ iririkania ciaku, na mawatho maku na eke maũndũ maya mothe na aake hekarũ* ĩrĩa haarĩrĩirie mwako wayo.”+
20 Daudi agĩcoka akĩra kĩũngano kĩu gĩothe ũũ: “Rĩu goocai Jehova Ngai wanyu.” Na kĩũngano gĩothe gĩkĩgooca Jehova Ngai wa maithe mao ma tene na gĩkĩinamĩrĩra gĩgĩturumithia mĩtwe thĩ mbere ya Jehova na mbere ya mũthamaki.
21 Na magĩthiĩ na mbere kũrutĩra Jehova magongona na kũrutĩra Jehova magongona ma njino+ mũthenya ũrĩa warũmĩrĩire, tũtegwa 1,000, ndũrũme 1,000, tũtũrũme 1,000, na magongona ma cio ma ndibei;+ maarutire magongona maingĩ mũno nĩ ũndũ wa andũ othe a Isiraeli.+
22 Magĩthiĩ na mbere kũrĩa na kũnyua marĩ mbere ya Jehova mũthenya ũcio makenete mũno,+ na magĩtua Suleimani mũrũ wa Daudi mũthamaki riita rĩa kerĩ na makĩmũitĩrĩria maguta mbere ya Jehova nĩguo atuĩke mũtongoria,+ o na Zadoku nĩguo atuĩke mũthĩnjĩri-Ngai.+
23 Suleimani agĩgĩikarĩra gĩtĩ kĩa ũnene kĩa Jehova+ arĩ mũthamaki ithenya rĩa ithe Daudi, na akĩgaacĩra, na andũ othe a Isiraeli nĩ maamwathĩkagĩra.
24 Anene othe,+ njamba cia ita irĩ hinya,+ o hamwe na ariũ othe a Mũthamaki Daudi+ nĩ meenyihagĩria mũthamaki Suleimani.
25 Na Jehova agĩtũũgĩria Suleimani na gĩkĩro kĩnene mũno maitho-inĩ ma andũ othe a Isiraeli na akĩmũhe ũnene ũkĩrĩte wa mũthamaki ũngĩ o wothe wanathamakĩra Isiraeli mbere ĩyo.+
26 Nĩ ũndũ ũcio Daudi mũrũ wa Jesii aathamakĩire andũ othe a Isiraeli,
27 na ihinda rĩrĩa* aathamakĩire Isiraeli rĩarĩ mĩaka 40. Arĩ Hebironi agĩthamaka mĩaka 7,+ na arĩ Jerusalemu agĩthamaka mĩaka 33.+
28 Agĩkua arĩ na ũkũrũ mwega,+ aiganĩire nĩ ũndũ wa gũtũũra ihinda iraya,* arĩ na ũtonga, na riri; na mũrũwe Suleimani agĩtuĩka mũthamaki ithenya rĩake.+
29 Ha ũhoro wa maũndũ megiĩ Mũthamaki Daudi, kuuma kĩambĩrĩria nginya mũthia, nĩ maandĩke thĩinĩ wa maandĩko ma Samueli muoni maũndũ, mũnabii Nathani,+ na Gadi+ muoni cioneki,
30 hamwe na ũhoro wothe wĩgiĩ ũthamaki wake, hinya wake, na maũndũ marĩa meekĩkire mahinda-inĩ macio mamwĩgiĩ na megiĩ Isiraeli na mothamaki marĩa mothe maamathiũrũrũkĩirie.
Tũũhoro twa magũrũ-inĩ
^ Kana “nyũmba ya mũthamaki.”
^ Kana “ũhoti.”
^ Taranda ĩmwe yaiganaine na kilo 34.2. Rora Ũhoro Muongerere B14.
^ Dariki yarĩ mbeca ya Perisia ya thahabu. Rora Ũhoro Muongerere B14.
^ Kana “kuuma tene nginya tene.”
^ Kana “gĩtĩo.”
^ Ũkk., “ithaka.”
^ Kana “ũrũngĩrĩru.”
^ Kana “ngoro ĩtarĩ na ũhinga.”
^ Kana “nyũmba ya mũthamaki.”
^ Kana “ngoro ĩĩrutĩire biũ.”
^ Ũkk., “matukũ marĩa.”
^ Ũkk., “nĩ matukũ.”
