Marũa Kũrĩ Aefeso 1:1-23
1 Nĩ niĩ Paulo, mũtũmwo wa Kristo Jesu kũgerera wendi wa Ngai, kũrĩ arĩa aamũre thĩinĩ wa Efeso,+ o acio ehokeku marĩ na ũiguano na Kristo Jesu:
2 Mũrogĩa na ũtugi mũnene na thayũ kuuma kũrĩ Ngai Ithe witũ, na Mwathani Jesu Kristo.
3 Ngai na Ithe wa Mwathani witũ Jesu Kristo arogoocwo, nĩ gũkorũo nĩ atũrathimĩte na kĩrathimo gĩothe gĩa kĩĩroho kũrĩa igũrũ tũrĩ na ũiguano na Kristo,+
4 ta ũrĩa aatũthuurire tũkoragwo na ũiguano hamwe nake* mbere ya kĩambĩrĩria gĩa thĩ, nĩguo tũtuĩke atheru na tũikarage tũtarĩ na kameni+ mbere yake thĩinĩ wa wendo.
5 Nĩ gũkorũo nĩ aatuĩte o mbere+ tũtuwo ariũ ake mwene+ kũgerera Jesu Kristo, kũringana na ũrĩa oonire arĩ wega na kũringana na wendi wake,+
6 nĩgetha ũtugi wake mũnene+ ũrĩa ũrĩ riri ũgoocagwo, o ũcio aatũheire na ũtugi kũgerera mũrũ wake ũrĩa endete.+
7 Kũgerera harĩ we nĩ tũrekagĩrĩrio na njĩra ya ũkũũri kũgerera thakame yake,+ tũkoherũo mehia maitũ,+ kũringana na ũtonga wa ũtugi wake mũnene.
8 Aatũmire ũtugi ũcio mũnene ũingĩhe harĩ ithuĩ ũhoro-inĩ wĩgiĩ ũũgĩ wothe na ũtaũku*
9 na njĩra ya gũtũmenyithia hitho ĩrĩa theru+ ĩgiĩ wendi wake. Kũringana na ũrĩa oonire arĩ wega, we mwene nĩ aatuire
10 kũgĩe na ũrũgamĩrĩri* mũthia-inĩ wa mahinda marĩa matuĩtwo, nĩguo acokanĩrĩrie indo ciothe thĩinĩ wa Kristo, indo iria irĩ igũrũ na iria irĩ gũkũ thĩ.+ Thĩinĩ wake,
11 o we tũrĩ na ũiguano na tũgatuwo agai hamwe nake,+ tũthuurĩtwo o mbere kũringana na muoroto wa ũrĩa ũhingagia maũndũ mothe o ta ũrĩa atuaga kũringana na wendi wake,
12 nĩgetha ithuĩ arĩa a mbere kũgĩa na kĩĩrĩgĩrĩro thĩinĩ wa Kristo tũtũmage riri wake ũgoocagwo.
13 No o na inyuĩ nĩ mwagĩire na kĩĩrĩgĩrĩro harĩ we thutha wa kũigua kiugo kĩa ũhoro wa ma, ũhoro ũrĩa mwega wa ũhonokio wanyu. Rĩrĩa mwetĩkirie, nĩ mwekĩrirũo mũhũũri+ kũgerera we na roho mũtheru ũrĩa mwerĩirũo,
14 ũrĩa ũtũheaga ũũma o mbere wĩgiĩ* igai ritũ,+ nĩ ũndũ wa kũrekereria kĩndũ kĩa Ngai we mwene+ kũgerera ũkũũri,+ nĩgetha agĩe rũgooco rũrĩ na riri.
15 Na nĩkĩo o na niĩ, tondũ nĩ njiguĩte ũhoro wĩgiĩ wĩtĩkio ũrĩa mũkoragwo naguo harĩ Mwathani Jesu na wendo ũrĩa muonagia arĩa othe aamũre,
16 itatigaga gũcokia ngatho nĩ ũndũ wanyu. Nĩ thiaga na mbere kũmũgweta mahoya-inĩ makwa,
17 atĩ Ngai wa Mwathani witũ Jesu Kristo, o we Ithe mwene riri, amũhe roho wa ũũgĩ, na wa ũguũrio ũhoro-inĩ wĩgiĩ ũmenyo ũrĩa wa ma ũmwĩgiĩ.+
18 Nĩ atũmĩte maitho ma ngoro cianyu magĩe ũtheri, nĩguo mũmenye kĩĩrĩgĩrĩro kĩrĩa aamwĩtĩire, ũtonga ũrĩ na riri ũrĩa aigĩte ũrĩ igai rĩa andũ arĩa aamũre,+
19 na ũrĩa hinya wake ũnenehete mũno harĩ ithuĩ arĩa twĩtĩkĩtie.+ Nĩ kũringana na wĩra wa ũhoti wa hinya wake,
20 ũrĩa aahũthĩrire harĩ Kristo rĩrĩa aamũriũkirie kuuma kũrĩ arĩa akuũ na akĩmũikaria thĩ guoko-inĩ gwake kwa ũrĩo+ kũrĩa igũrũ,
21 akĩmũtũũgĩria mũno gũkĩra thirikari ciothe na wathani na hinya na ũnene na rĩĩtwa o rĩothe rĩĩtanagwo,+ na to mũtabarĩre-inĩ ũyũ wa maũndũ* no nĩ nginya ũrĩa ũgooka.
22 Ningĩ nĩ aaigire indo ciothe rungu rwa makinya make+ na akĩmũtua mũtwe igũrũ rĩa maũndũ mothe megiĩ kĩũngano,+
23 o kĩo mwĩrĩ wake,+ ũiyũru wa ũcio ũiyũragia maũndũ mothe na njĩra ciothe.
Tũũhoro twa magũrũ-inĩ
^ Ũguo nĩ kuuga, hamwe na Kristo.
^ Kana “meciria mega.”
^ Kana “kũrũgamĩrĩra maũndũ.”
^ Kana “marĩhi ma mbere ma.”
^ Kana “mahinda-inĩ maya.” Rora Ũthathaũri wa Ciugo.
