Ezekieli 4:1-17
4 “Nawe mũrũ wa mũndũ-rĩ, oya iturubarĩ ũrĩige mbere yaku. Ũconge itũũra rĩa Jerusalemu igũrũ rĩarĩo.
2 Na ũrĩrigicĩrie,+ wake rũthingo rwa kũrĩrigicĩria,+ ũthondeke hĩba ya kũrĩrigicĩria,+ wake kambĩ irĩthiũrũrũkĩirie, na ũrĩthiũrũrũkĩrie na mĩgogo mĩtungu ya kũrĩmomora.+
3 Ningĩ woe rũgĩo rwa kĩgera na ũrũige rũtuĩke rũthingo rwa kĩgera gatagatĩ gaku na itũũra rĩu. Ũcoke werekerie ũthiũ waku harĩ rĩo, na nĩ rĩkũrigicĩrio; nawe ũrĩrigicĩrie. Ũndũ ũcio ũgũtuĩka kĩmenyithia harĩ nyũmba ya Isiraeli.+
4 “Ningĩ ũkome na mwena waku wa ũmotho na wĩigĩrĩre mahĩtia ma nyũmba ya Isiraeli.+ Ũgũkuua mahĩtia mao ihinda rĩa thikũ iria ũgũkorũo ũkomete na mwena.
5 Na nĩ ngũgũtuĩra thikũ 390, iria iringaine na mĩaka ya mahĩtia mao,+ na nĩ ũgũkuua mahĩtia ma nyũmba ya Isiraeli.
6 Na no mũhaka ũrĩkie thikũ icio.
“Ũcoke ũkome riita rĩa kerĩ, ũkome na mwena waku wa ũrĩo, na ũgũkuua mahĩtia ma nyũmba ya Juda+ ihinda rĩa thikũ 40. O thikũ ĩkĩrũgamĩrĩra mwaka ũmwe, o thikũ mwaka ũmwe, na rĩu nĩrĩo ihinda rĩrĩa ngũheete.
7 Na werekerie ũthiũ waku harĩ itũũra rĩu rĩrigicĩrie rĩa Jerusalemu+ guoko gwaku gũtarĩ kũhumbĩre, na no mũhaka ũrathe ũhoro ũrĩgiĩ.
8 “Na rĩrĩ, nĩ ngũkuoha na mĩkwa nĩgetha ndũkahote kwĩgarũra kuuma mwena ũmwe gũthiĩ ũcio ũngĩ, o nginya rĩrĩa ũgaakorũo ũrĩkĩtie thikũ ciaku cia kũrĩrigicĩria.
9 “Na woe ngano, cairi, noe, ndengũ, mwere, na guthemethu* ũciĩkĩre mbakũri-inĩ ĩmwe wĩthondekere mũgate nacio. Ũkũrĩa mũgate ũcio ihinda rĩa thikũ 390 iria ũgũkoma na mwena.+
10 Ũrĩthimaga na ũkarĩa cekeri 20* cia irio o mũthenya. Na ũrĩcirĩaga mahinda marĩa matuĩtwo.
11 “Namo maĩ marĩa ũrĩnyuaga nĩ gũthimwo marĩthimagwo, gĩcunjĩ kĩmwe harĩ ithathatũ kĩa hini.* Ũrĩmanyuaga mahinda marĩa matuĩtwo.
12 “Ũrĩrĩaga mũgate ũcio o ta ũrĩa ũngĩrĩa mũgate wa gĩthiũrũrĩ wa cairi; ũkũũruga makĩĩyonagĩra ũkĩhũthĩra mwaki wakĩtio na mai momũ ma andũ.”
13 Jehova agĩcoka akiuga atĩrĩ: “Ũguo nĩguo Aisiraeli makaarĩaga mũgate wao ũrĩ na thahu, marĩ gatagatĩ-inĩ ka ndũrĩrĩ kũrĩa ngaamahurunja.”+
14 Na niĩ ngiuga atĩrĩ: “Aca, Jehova Mwathani Ũrĩa Mũnene! Kuuma ndĩ mũnyinyi nginya rĩu, ndirĩ ndethahia na njĩra ya kũrĩa nyama cia nyamũ yonetwo ĩrĩ nguũ kana ĩtamburĩtwo,+ na gũtirĩ nyama ĩrĩ thahu* ĩrĩ yaingĩra kanua gakwa.”+
15 Nĩ ũndũ ũcio akĩnjĩra ũũ: “Atĩrĩrĩ, nĩ ngũgwĩtĩkĩria ũhũthĩre mai ma ng’ombe handũ ha ma andũ, na nĩmo ũgwakia namo mwaki wa kũruga mũgate waku.”
16 Agĩcoka akĩnjĩra atĩrĩ: “Mũrũ wa mũndũ, nĩ ngũniina irio* kũu Jerusalemu,+ na makaarĩaga mũgate wao na gĩthimi+ matangĩkĩte mũno, na makanyua maĩ na gĩthimi marĩ na kĩeha kĩnene.+
17 Ũndũ ũcio ũgeekĩka nĩgetha maga mũgate na maĩ, makarorana marĩ na kĩmako na mahinyĩrĩrĩke nĩ ũndũ wa mehia mao.
Tũũhoro twa magũrũ-inĩ
^ Rora Ũthathaũri wa Ciugo.
^ Ta ngiramu 230. Rora Ũhoro Muongerere B14.
^ Ta lita 0.6. Rora Ũhoro Muongerere B14.
^ Kana “mũgiro.”
^ Ũkk., “nguunanga mĩtĩ ya mĩgate.” No kũhoteke nĩ mĩtĩ ĩrĩa yahũthagĩrũo gũcuuria mĩgate.
