Ruthu 3:1-18
3 Na rĩrĩ, Naomi ũcio nyaciarawe akĩmwĩra atĩrĩ: “Mwarĩ wakwa, githĩ ndiagĩrĩirũo gũgũcarĩria mũciĩ,*+ nĩguo maũndũ maku mathiĩ wega?
2 Na githĩ Boazu ti wa mbarĩ citũ?+ Airĩtu arĩa mũkoretwo nao nĩ ake. Hwaĩ-inĩ wa ũmũthĩ egũkorũo akĩhuuha cairi kĩhuuhĩro-inĩ.
3 Nĩ ũndũ ũcio wĩthambe na wĩhake maguta maranunga wega; ũcoke wĩhumbe* ũthiĩ kĩhuuhĩro-inĩ. Ndũkareke mũndũ ũcio amenye wĩ kuo nginya arĩrĩkia kũrĩa na kũnyua.
4 Rĩrĩa arĩkoma, ũrore harĩa egũkoma; ũthiĩ nginya ho ũmũhumbũrie magũrũ na ũkome hau thĩ. Nĩ egũkwĩra ũrĩa wagĩrĩirũo nĩ gwĩka.”
5 Erũo ũguo akiuga atĩrĩ: “Ũrĩa wothe wanjĩĩra nĩ ngwĩka.”
6 Kwoguo agĩthiĩ nginya kĩhuuhĩro-inĩ na agĩka ũrĩa wothe nyaciarawe aamũtaarĩte eke.
7 Na rĩrĩ, Boazu akĩrĩa na akĩnyua na nĩ aaiguaga wega ngoro. Agĩcoka agĩthiĩ gũkoma hakuhĩ na hĩba ya cairi. Thutha ũcio Ruthu agĩthiĩ aceemete na akĩmũhumbũria magũrũ na agĩkoma hau thĩ.
8 Ũtukũ gatagatĩ mũndũ ũcio akĩambĩrĩria kũinaina, na agĩikara thĩ na akĩona mũtumia ũkomete magũrũ-inĩ make.
9 Akĩũria ũũ: “Nĩ wee ũ?” Nake Ruthu agĩcokia: “Nĩ Ruthu, ndungata yaku. Tambũrũkia nguo yaku* ũhumbĩre ndungata yaku, nĩ gũkorũo ũrĩ mũkũũri.”*+
10 Akĩmũcokeria ũũ: “Jehova arokũrathima mwarĩ wakwa. Nĩ wonania wendo waku mwĩhokeku makĩria ihinda rĩrĩ rĩa mũthia gũkĩra ihinda rĩa mbere,+ na njĩra ya kwaga gũthiĩ kũrĩ anake, o na marĩ athĩni kana marĩ atongu.
11 Na rĩu mwarĩ wakwa-rĩ, ndũgetigĩre. Nĩ ngũgwĩkĩra ũrĩa wothe ũkũnjĩra,+ nĩ gũkorũo andũ othe itũũra-inĩ* nĩ moĩ atĩ wee ũrĩ mũtumia mwega mũno.
12 O na gũtuĩka nĩ ma atĩ niĩ ndĩ mũkũũri-rĩ,+ nĩ harĩ mũkũũri ũngĩ wa mbarĩ cianyu cia hakuhĩ mũno kũngĩra.+
13 Ikara haha ũtukũ ũyũ, na angĩgaagũkũũra rũcinĩ, nĩ wega! Nĩ agũkũũre.+ No angĩkorũo atekwenda gũgũkũũra-rĩ, niĩ mwene nĩ ngaagũkũũra, o ta ũrĩa Jehova atũũraga muoyo. Koma haha nginya gũkĩe.”
14 Kwoguo Ruthu agĩkoma hau magũrũ-inĩ make nginya rũcinĩ agĩcoka agĩũkĩra gũtanathererũka nĩguo hatikagĩe mũndũ ũkũmuona. Boazu agĩcoka akiuga ũũ: “Hatikagĩe mũndũ ũkũmenya atĩ harĩ mũtumia uuma gũkũ kĩhuuhĩro-inĩ.”
15 Ningĩ akĩmwĩra atĩrĩ: “Rehe kabuuti kau wĩkĩrĩte, na ũkanyite.” Kwoguo akĩnyita kabuuti kau, nake akĩmwĩkĩrĩra ithimi ithathatũ* cia cairi hau na akĩmũigĩrĩra, nake Boazu agĩcoka itũũra-inĩ.
16 Ruthu agĩgĩthiĩ kũrĩ nyaciarawe, nake akĩmũũria: “Gũthiire atĩa harĩ wee,* mwarĩ wakwa?” Nake akĩmwĩra ũrĩa wothe Boazu aamwĩkĩire.
17 Ningĩ akĩmwĩra ũũ: “Aheire ithimi ici ithathatũ cia cairi na anjĩra atĩrĩ, ‘Ndũgũthiĩ moko matheri kũrĩ nyaciaraguo.’”
18 Naomi akĩmũcokeria ũũ: “Ikara haha mwarĩ wakwa, nginya ũmenye ũrĩa ũhoro ũcio ũgũthiĩ, tondũ mũndũ ũcio ndekũhurũka nginya atigĩrĩre nĩ arũmbũiya ũhoro ũcio ũmũthĩ.”
Tũũhoro twa magũrũ-inĩ
^ Ũkk., “ũhurũko.”
^ Kana “wĩkĩre nguo ciaku cia igũrũ.”
^ Kana “gĩcũrĩ kĩa nguo yaku.”
^ Rora Ruthu 2:20.
^ Ũkk., “kĩhingo gĩothe kĩa andũ aitũ.”
^ No kũhoteke nĩ ithimi ithathatũ cia sea, kana lita ta 44. Rora Ũhoro Muongerere B14.
^ Ũkk., “Nĩwe ũ?”