Thama 28:1-43
28 “Na rĩrĩ, ĩta Haruni mũrũ wa nyũkwa, o hamwe na ariũ ake, ũmwamũre kuuma harĩ Aisiraeli, nĩguo andungatagĩre arĩ mũthĩnjĩri-Ngai+—Haruni+ o hamwe na ariũ ake+ Nadabu, Abihu,+ Eliazaru, na Ithamaru.+
2 Na ũtumĩre Haruni mũrũ wa nyũkwa nguo nyamũre nĩguo agĩage na riri na akagema.+
3 Warie na andũ arĩa othe marĩ na ũũgĩ,* arĩa njiyũrĩtie roho wa ũũgĩ,+ nao matumĩre Haruni nguo nĩguo aamũrũo, andungatagĩre arĩ mũthĩnjĩri-Ngai.
4 “Ici nĩcio nguo iria megũtuma: gakuo ga gĩthũri,+ ebodi,+ kagooti gatarĩ moko,+ kanjũ ya mathandũkũ, kĩremba,+ na mũcibi;+ megũtumĩra Haruni mũrũ wa nyũkwa nguo icio nyamũre o hamwe na ariũ ake, nĩguo andungatagĩre arĩ mũthĩnjĩri-Ngai.
5 Andũ acio marĩ na ũũgĩ wa kũruta wĩra mekũhũthĩra thahabu, ndigi cia rangi wa mburuu, cia rangi wa papũ, cia rangi mũtune, na gatani ĩrĩa njega.
6 “Magĩrĩirũo gũthondeka ebodi makĩhũthĩra thahabu, ndigi cia rangi wa mburuu, cia rangi wa papũ, cia rangi mũtune, na gatani yogothetwo wega, na ebodi ĩyo nĩ yagĩrĩire kũgemio.+
7 Yagĩrĩire gũkorũo na tũcunjĩ twĩrĩ twa ciande-inĩ tũnyitithanĩtio nayo mĩthia-inĩ yayo yerĩ.
8 Mũcibi* wa gũtumwo,+ ũrĩa ũnyitithanĩtio na ebodi wa kũmĩrũmagia wega, wagĩrĩire gũtumwo na indo o ta icio: thahabu, ndigi cia rangi wa mburuu, cia rangi wa papũ, cia rangi mũtune, na gatani yogothetwo wega.
9 “Ningĩ woe tũhiga twĩrĩ twa onigithi+ na ũconge marĩĩtwa ma ariũ a Isiraeli+ igũrũ rĩatuo,
10 marĩĩtwa matandatũ kahiga-inĩ kamwe na macio mangĩ matandatũ kahiga-inĩ kau kangĩ, na ũmaconge marũmanĩrĩire kũringana na ũrĩa maaciarirũo.
11 Mũndũ ũcongaga mahiga aconge marĩĩtwa ma ariũ a Isiraeli tũhiga-inĩ tũu twerĩ o ta ũrĩa angĩconga mũhũũri.+ Ũcoke wĩkĩre tũhiga tũu tũnyamũ-inĩ twa thahabu.
12 Tũhiga tũu twerĩ ũtwĩkĩre igũrũ rĩa tũcunjĩ twa ciande-inĩ twa ebodi, tũtuĩke tũhiga twa kĩririkano nĩ ũndũ wa ariũ a Isiraeli,+ nake Haruni no mũhaka akuuage marĩĩtwa mao tũcunjĩ-inĩ tũu twĩrĩ tũrĩ ciande-inĩ ciake agĩthiĩ mbere ya Jehova tũrĩ twa kĩririkano.
13 Ũthondeke tũnyamũ twa thahabu twa kũnyita tũhiga
14 na tũmĩnyororo twĩrĩ twa thahabu therie tuogothetwo ta mũkanda,+ na ũtũnyitithanie na tũnyamũ tũu twa kũnyita tũhiga.+
15 “Ningĩ mũtumi athondeke gakuo ga gĩthũri ga gũtua ciira.+ Kagĩrĩire gũthondekwo o ta ebodi, gathondekwo na thahabu, ndigi cia rangi wa mburuu, cia rangi wa papũ, cia rangi mũtune, na gatani yogothetwo wega.+
16 Kagĩrĩire gũkorũo kaiganaine mĩena yothe koinanĩrũo maita merĩ, ũraihu wa irata rĩmwe* na wariĩ wa irata rĩmwe.
17 Na ũgekĩre tũhiga mĩhari ĩna. Mũhari wa mbere ũkorũo na kahiga ka rubi, ga topazi, na ka emeradi.
18 Mũhari wa kerĩ ũkorũo na kahiga ga takuisi, ga safia, na ka njathibi.
19 Mũhari wa gatatũ ũkorũo na kahiga ka leshʼem,* ka angate, na ka amethuthito.
20 Mũhari wa kana ũkorũo na kahiga ga krisolito, ka onigithi, na ka jadi. Twagĩrĩire gwĩkĩrũo tũnyamũ-inĩ twa thahabu twa kũnyita tũhiga.
21 Tũhiga tũu twagĩrĩire kũringana na marĩĩtwa ma ariũ 12 a Isiraeli. O kahiga kagĩrĩire gũcongwo ta mũhũũri, o rĩĩtwa rĩkĩrũgamĩrĩra mũhĩrĩga ũmwe harĩ ĩrĩa 12.
22 “Ningĩ ũthondeke tũmĩnyororo gakuo-inĩ kau ga gĩthũri, tuogothetwo ta tũmĩkanda twa thahabu therie.+
23 Na ũthondekere gakuo kau ga gĩthũri tũcũhĩ twĩrĩ twa thahabu na ũtwĩkĩre mĩthia-inĩ yako ĩĩrĩ.
24 Natuo tũmĩkanda tũu twĩrĩ twa thahabu ũtũtonyie tũcũhĩ-inĩ tũu twĩrĩ mĩthia-inĩ ya gakuo ga gĩthũri.
25 Na ũtonyie mĩthia ya tũmĩkanda tũu twerĩ tũnyamũ-inĩ tũu twĩrĩ twa kũnyita tũhiga, na ũtũnyitithanie na tũcunjĩ twa ciande-inĩ twa ebodi, mwena wa mbere.
26 Ningĩ ũthondeke tũcũhĩ twĩrĩ twa thahabu na ũtwĩkĩre mĩthia-inĩ ĩyo ĩngĩ ĩĩrĩ ya gakuo ga gĩthũri mwena wa na thĩinĩ, tũrorete ebodi.+
27 Ũcoke ũthondeke tũcũhĩ tũngĩ twĩrĩ twa thahabu mwena wa mbere wa ebodi, mũhuro wa tũcunjĩ tũu twĩrĩ twa ciande-inĩ, hakuhĩ na harĩa inyitithanĩirio, rũgongo rwa mũcibi* wa gũtumwo wa ebodi.+
28 Gakuo kau ga gĩthũri kagĩrĩire kũrũmio na kamũkwa ka rangi wa mburuu, kohererũo tũcũhĩ-inĩ twako na tũcũhĩ-inĩ twa ebodi. Gwĩka ũguo nĩ gũkũrũmia gakuo ga gĩthũri ebodi-inĩ, rũgongo rwa mũcibi* ũcio wa gũtumwo.
29 “Nake Haruni no mũhaka akuuage marĩĩtwa ma ariũ a Isiraeli gĩthũri-inĩ gĩake, gakuo-inĩ ga gĩthũri ga gũtua ciira rĩrĩa egũthiĩ Harĩa Hatheru, na ũndũ ũcio ũtuĩke kĩririkano hingo ciothe mbere ya Jehova.
30 Na wĩkĩre Urimu na Thumimu*+ gakuo-inĩ kau ga gĩthũri ga gũtua ciira, nacio no mũhaka ikoragwo gĩthũri-inĩ kĩa Haruni rĩrĩa arathiĩ mbere ya Jehova, nake Haruni no mũhaka akuuage indo icio cia gũtuaga maciira ma Aisiraeli gĩthũri-inĩ gĩake hingo ciothe mbere ya Jehova.
31 “Ningĩ ũtume kagooti gatarĩ moko ka ebodi ka ndigi cia rangi wa mburuu theri.+
32 Na gakorũo na irima igũrũ gatagatĩ rĩa gũtonyagĩria mũtwe. Na irima rĩu rĩthiũrũrũkĩrio ruuno nĩ mũtumi wa nguo. Rĩagĩrĩire gũkorũo rĩtariĩ ta irima rĩa kagooti ga cuma* nĩguo gatigatarũke.
33 Ningĩ ũthondeke makomamanga na ndigi cia rangi wa mburuu, cia rangi wa papũ, na cia rangi mũtune gũthiũrũrũka ruuno rwayo ruothe rwa magũrũ-inĩ, na wĩkĩre ngengere cia thahabu gatagatĩ-inĩ kamo.
34 Wagĩrĩirũo gwĩkĩra ngengere ya thahabu ĩrũmĩrĩirũo nĩ ikomamanga, o ngengere ĩkarũmĩrĩrũo nĩ ikomamanga, ruuno-inĩ ruothe rwa magũrũ-inĩ rwa kagooti kau gatarĩ moko.
35 Haruni no mũhaka ehumbage kagooti kau agĩtungata, naguo mũgambo wa ngengere icio ũkaiguĩkaga rĩrĩa aratonya na rĩrĩa aroima handũ harĩa hatheru mbere ya Jehova, nĩgetha ndagakue.+
36 “Ningĩ ũthondeke kabaati karahenia ga thahabu therie, na igũrũ rĩako ũconge ciugo ici o ta ũrĩa mũndũ angĩconga mũhũũri: ‘Ũtheru nĩ wa Jehova.’+
37 Na ũkoherere kĩremba-inĩ+ na kamũkanda ka rangi wa mburuu; kagĩrĩirũo gũikaraga mwena wa mbere wa kĩremba.
38 Karĩikaraga thiithi-inĩ wa Haruni, nake nĩwe ũrĩcokagĩrĩrũo nĩ mehia rĩrĩa kwagĩa na mũndũ ũkũhĩtia ũhoro-inĩ wĩgiĩ indo theru,+ iria Aisiraeli mamũraga makaruta irĩ iheo. Kagĩrĩire gũikaraga thiithi-inĩ wake hingo ciothe, nĩguo andũ metĩkĩrĩke mbere ya Jehova.
39 “Ningĩ ũtume kanjũ ya mathandũkũ ya gatani ĩrĩa njega, ũthondeke kĩremba gĩa gatani ĩrĩa njega na mũcibi wa gũtumwo.+
40 “Ningĩ ũthondekere ariũ a Haruni kanjũ, mĩcibi, na ngũbia*+ nĩguo magĩage na riri na makagema.+
41 Na ũhumbe Haruni mũrũ wa nyũkwa o hamwe na ariũ ake nguo icio, na ũmaitĩrĩrie maguta+ na ũmaamũre,*+ na ũmatherie, nao nĩ marĩndungatagĩra marĩ athĩnjĩri-Ngai.
42 Ningĩ ũmatumĩre inyatha* cia gatani nĩguo mahumbagĩre njaga ciao.+ Inyatha icio ciagĩrĩire kuuma njohero-inĩ nginya ciero-inĩ.
43 Haruni na ariũ ake no mũhaka maciĩhumbage rĩrĩa megũtonya hema-inĩ ya gũtũnganwo kana rĩrĩa megũthiĩ gũtungata kĩgongona-inĩ thĩinĩ wa harĩa hatheru, nĩguo matikonwo marĩ na mehia na makue. Ũcio nĩ watho wa gũtũũra ũrũmagĩrĩrũo nĩ Haruni o hamwe na njiarũa* ciake iria igooka thutha wake.
Tũũhoro twa magũrũ-inĩ
^ Ũkk., “ngoro ĩrĩ na ũũgĩ.”
^ Kana “Mũcibi wa njohero.”
^ Nĩ ta centimita 22.2 (inji 8.75). Rora Ũhoro Muongerere B14.
^ Nĩ kahiga ka goro gatoĩkaine, no kũhoteke nĩ kahiga ka amberi, hayacinithi, opali, kana tomalini.
^ Kana “mũcibi wa njohero.”
^ Kana “mũcibi wa njohero.”
^ Rora Ũthathaũri wa Ciugo.
^ Nĩ kagooti geekĩragwo ga kwĩgitĩra mbaara-inĩ.
^ Ngũbia icio ciarĩ cia gĩtambaya na ciohagwo mĩtwe-inĩ ya athĩnjĩri-Ngai arĩa angĩ. Ciarĩ ngũrani na kĩremba kĩa mũthĩnjĩri-Ngai ũrĩa mũnene.
^ Ũkk., “na ũiyũrie guoko kwao.”
^ Kana “nguo cia thĩinĩ.”
^ Ũkk., “mbeũ.”
