ITHOMO RĨA 15

Jesu Nũũ?

THAAKA

Jesu Nũũ?

Jesu nĩ ũmwe wa andũ arĩa moĩkaine mũno thĩinĩ wa historĩ. O na kũrĩ ũguo, andũ aingĩ mamũũĩ o rĩĩtwa, no matiũĩ maũndũ maingĩ mamwĩgiĩ. Nao angĩ makoragwo na mawoni matiganĩte megiĩ Jesu nũũ. Hihi Bibilia yugaga atĩa ũhoro wĩgiĩ Jesu?

1. Jesu nũũ?

Jesu nĩ kĩũmbe kĩa roho kĩrĩ hinya na aikaraga igũrũ. Oombirũo nĩ Jehova Ngai mbere ya indo iria ingĩ ciothe ciũmbĩtwo. Nĩkĩo etagwo “irigithathi harĩ ũũmbi wothe.” (Akolosai 1:15) Bibilia ĩtaga Jesu “Mũrũ . . . wa mũmwe” wa Ngai tondũ no Jesu wiki wombirũo ĩmwe kwa ĩmwe nĩ Jehova. (Johana 3:16) Jesu nĩ aarutithanirie wĩra na Ithe, Jehova, akĩmũteithĩrĩria harĩ kũũmba indo iria ingĩ ciothe. (Thoma Thimo 8:30.) O na rĩu Jesu no akoragwo na ũrata wa hakuhĩ na Jehova. Atungataga na wĩhokeku arĩ mwaria wa Ngai, akaheana ndũmĩrĩri na ũtongoria wa Ngai, na nĩwe “Kiugo.”—Johana 1:14.

2. Jesu ookire gũkũ thĩ nĩkĩ?

Kĩndũ mĩaka 2,000 mĩhĩtũku, Jehova nĩ aaringire kĩama kũgerera roho wake mũtheru, agĩthaamia muoyo wa Jesu kuuma igũrũ akĩwĩkĩra thĩinĩ wa nda ya mũirĩtu gathirange wetagwo Mariamu. Ũguo nĩguo Jesu aaciarirũo gũkũ thĩ arĩ mũndũ. (Thoma Luka 1:34, 35.) Jesu ookire gũkũ thĩ nĩguo atuĩke Mesia ũrĩa weranĩirũo, kana Kristo, na ahonokie andũ. a Nĩ aahingirie morathi mothe maarathĩtwo Bibilia-inĩ megiĩ Mesia, ũndũ ũrĩa wahotithirie andũ kũmenya atĩ Jesu nĩwe “Kristo, Mũrũ wa Ngai ũrĩa ũtũũraga muoyo.”—Mathayo 16:16.

3. Jesu arĩ kũ ũmũthĩ?

Rĩrĩa Jesu aakuire, Ngai nĩ aamũriũkirie arĩ na mwĩrĩ wa roho, na agĩcoka igũrũ. Arĩ kũu, “Ngai nĩ aamũtũũgĩririe akĩmũnenehia makĩria.” (Afilipi 2:9) Rĩu Jesu akoragwo arĩ mũraika ũrĩ na hinya mũingĩ, arĩ wa kerĩ kuuma harĩ Jehova.

THUTHURIA MAKĨRIA

Reke tũtuĩrie makĩria Jesu nũũ, na nĩkĩ nĩ ũndũ wa bata mũno kwĩruta ũhoro wake.

4. Jesu ti Ngai Mwene-Hinya-Wothe

Bibilia ĩrutanaga atĩ o na gũtuĩka Jesu nĩ kĩũmbe kĩa roho kĩrĩ hinya igũrũ, nĩ athĩkagĩra Jehova, o we Ithe na Ngai wake. Tũngiuga ũguo nĩkĩ? Mwĩrorerei VIDEO ĩno nĩguo muone ũrĩa Bibilia ĩrutanaga igũrũ rĩgiĩ ngũrani ya Jesu na Ngai.

VIDEO: Hihi Jesu Kristo nĩ Ngai? (3:22)

Maandĩko maya marũmĩrĩire nĩ matũteithagia gũtaũkĩrũo ũrĩa Jehova na Jesu metainwo. Thomai o rĩandĩko na mwarĩrĩrie ciũria iria irũmĩrĩire.

Thomai Luka 1:30-32.

Mũraika ũcio oonanirie Jesu etainwo atĩa na Jehova, Ngai “Ũrĩa ũrĩ Igũrũ Mũno”?

Thomai Mathayo 3:16, 17.

Mũgambo ũrĩa woimire igũrũ rĩrĩa Jesu aabatithirio woigire atĩa?
Ũgwĩciria mũgambo ũcio warĩ wa ũ?

Thomai Johana 14:28.

Gatagatĩ ka mũriũ na ithe-rĩ, nũũ mũkũrũ na ũkoragwo na ũnene makĩria?
Jesu eetire Jehova Ithe. Ũndũ ũcio ũratũruta atĩa?

Thomai Johana 12:49.

Hihi Jesu nĩ onaga ta we na Ithe marĩ mũndũ ũmwe? Ũndũ ũcio ũrakũruta atĩa?

5. Nĩ kĩĩ kĩonanagia atĩ Jesu nĩwe warĩ Mesia?

Bibilia nĩ ĩkoragwo na morathi maingĩ marĩa mangĩateithirie andũ gũkũũrana Mesia, ũrĩa wathuurĩtwo nĩ Ngai akũũre andũ. Mwĩrorerei VIDEO ĩno nĩguo muone morathi mamwe marĩa Jesu aahingirie rĩrĩa ookire gũkũ thĩ.

VIDEO: Ũrĩa Jesu Aahingirie Ũrathi (3:03)

Thomai morathi maya ma Bibilia, na mwarĩrĩrie ciũria iria irũmĩrĩire:

Thomai Mika 5:2 nĩguo muone kũrĩa Mesia angĩaciarĩirũo. b

Hihi ũrathi ũcio nĩ wahingirio rĩrĩa Jesu aaciarirũo?—Mathayo 2:1.

Thomai Thaburi 34:20 na Zekaria 12:10 muone maũndũ marĩa maarathĩtwo megiĩ ũrĩa Mesia angĩoragirũo.

Hihi morathi macio nĩ maahingire?—Johana 19:33-37.
Hihi nĩ ũkuona ta Jesu aabangire maũndũ kabere nĩguo morathi macio mahinge o ũrĩa maarathĩtwo?
Ũndũ ũcio ũrakũruta atĩa igũrũ rĩgiĩ Jesu?

6. Nĩ tũgunĩkaga tweruta ũhoro wĩgiĩ Jesu

Bibilia nĩ ĩtĩtĩrithagia bata wa kwĩruta ũhoro wĩgiĩ Jesu na itemi rĩrĩa aheetwo nĩ Ngai. Thomai Johana 14:6 na 17:3, mũcoke mwarĩrĩrie kĩũria gĩkĩ:

Twagĩrĩirũo kwĩruta ũhoro wĩgiĩ Jesu nĩkĩ?

Jesu nĩ aatũhingũrĩire njĩra ya gũtuĩka arata a Ngai. Aarutanire ũhoro ũrĩa wa ma wĩgiĩ Jehova, na kũgerera harĩ we, no tũgĩe na muoyo wa tene na tene

ANDŨ AMWE MOIGAGA: “Aira a Jehova matiĩtĩkĩtie Jesu.”