ITHOMO RĨA 21

Wĩra wa Kũhunjia Ũhoro Ũrĩa Mwega Ũrutagwo Atĩa?

THAAKA

Ica ikuhĩ, Jehova nĩ ekũhũthĩra Ũthamaki wake gũtwehereria mathĩna mothe. Ũcio nĩ ũhoro mwega mũno na andũ othe nĩ marabatara kũũmenya. Jesu eerire arũmĩrĩri ake makinyĩrie andũ othe ndũmĩrĩri ĩyo! (Mathayo 28:19, 20) Aira a Jehova mahingagia atĩa rĩathani rĩu rĩa Jesu?

1. Rĩandĩko rĩa Mathayo 24:14 rĩrahingio atĩa ũmũthĩ?

Jesu aarathire ũũ: “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo.” (Mathayo 24:14) Aira a Jehova nĩ makenagĩra kũruta wĩra ũcio wa bata. Tũhunjagia ũhoro ũcio mwega thĩinĩ wa thĩ yothe na makĩria ma thiomi 1,000! Wĩra ũcio mũnene ũguo nĩ ũbataraga kĩyo kĩnene na mĩbango mĩega. Tũtingĩhota kũruta wĩra ũcio tũtarĩ na ũteithio wa Jehova.

2. Twĩrutanagĩria atĩa gũkinyĩra andũ?

Tũhunjagia kũrĩa guothe andũ mangĩoneka. O ta Akristiano a karine ya mbere, tũhunjagia “nyũmba kwa nyũmba.” (Atũmwo 5:42) Njĩra ĩyo nĩ ĩtũteithagia gũkinyĩra andũ milioni nyingĩ o mwaka. Ningĩ tondũ ti hĩndĩ ciothe andũ makoragwo mĩciĩ, nĩ tũhunjagia kũndũ kũingĩ kwa mũingĩ. Hingo ciothe nĩ tũcaragia mĩeke ya kwĩra andũ arĩa angĩ ũhoro wĩgiĩ Jehova na mĩoroto yake.

3. Nĩa magĩrĩirũo kũhunjia ũhoro ũrĩa mwega?

Akristiano othe a ma nĩ magĩrĩirũo kũhunjĩria andũ arĩa angĩ ũhoro ũrĩa mwega. Nĩ tuoyaga wĩra ũcio na ũritũ. Tũhunjagia ũrĩa wothe tũngĩhota tondũ nĩ tũmenyaga atĩ ũndũ ũcio no ũhonokie mĩoyo ya andũ. (Thoma 1 Timotheo 4:16.) Tũtirĩhagwo twaruta wĩra ũcio tondũ Bibilia yugaga ũũ: “Mũheetwo tũhũ, heanagai tũhũ.” (Mathayo 10:7, 8) Ti andũ othe mathikagĩrĩria ndũmĩrĩri itũ. O na kũrĩ ũguo, no tũthiaga na mbere kũhunjia tondũ rĩrĩa tũreka ũguo tũkoragwo tũgĩathĩkĩra Jehova na tũgatũma akene.

THUTHURIA MAKĨRIA

Reke tũthuthurie tuone ũrĩa Aira a Jehova merutanagĩria kũhunjia thĩinĩ wa thĩ yothe, na tuone ũrĩa Jehova atũteithagia.

Kũhunjia kũndũ gũtiganĩte thĩinĩ wa thĩ: (A) Costa Rica, (B) Amerika (US), (C) Benin, (D) Thailand, (E) Yap, (F) Sweden

4. Nĩ twĩrutanagĩria kũhunjĩria andũ othe

Aira a Jehova nĩ merutanagĩria biũ kũhunjĩria andũ ũhoro ũrĩa mwega kũndũ guothe. Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.

VIDEO: Kũhunjia “Nginya Ituri Ciothe cia Thĩ” (7:33)

Nĩ ũndũ ũrĩkũ wagũkenia wĩgiĩ ũrĩa Aira a Jehova merutanagĩria kũhunjia?

Thomai Mathayo 22:39 na Aroma 10:13-15, mũcoke mwarĩrĩrie ciũria ici:

Wĩra witũ wa kũhunjia wonanagia atĩa atĩ nĩ twendete andũ arĩa angĩ?
Jehova onaga atĩa andũ arĩa mahunjagia ũhoro ũrĩa mwega?—Rora mũhari wa 15.

5. Tũrĩ arutithania wĩra hamwe na Ngai

Maũndũ maingĩ marĩa monetwo monanagia atĩ Jehova nĩ atongoragia wĩra witũ wa kũhunjia. Kwa ngerekano, thĩinĩ wa bũrũri wa New Zealand, mũrũ wa Ithe witũ ũmwe wĩtagwo Paul akĩhunjia nyũmba kwa nyũmba mathaa-inĩ ma mĩaraho, nĩ aakorire mũtumia ũmwe. Mũthenya ũcio rũcinĩ, mũtumia ũcio nĩ aahoete Ngai akĩhũthĩra rĩĩtwa rĩake, Jehova, akamũũria atũme mũndũ amũceerere. Paul ooigire ũũ: “Ndathiire gwake mathaa matatũ thutha wake kũhoya.”

Thomai 1 Akorintho 3:9, mũcoke mwarĩrĩrie kĩũria gĩkĩ:

Maũndũ monetwo, ta ũhoro ũcio wa kuuma New Zealand, monanagia atĩa atĩ Jehova nĩ atongoragia wĩra wa kũhunjia?

Thomai Atũmwo 1:8, mũcoke mwarĩrĩrie kĩũria gĩkĩ:

Tũrabatara ũteithio wa Jehova nĩkĩ nĩguo tũhote kũhunjia?

Hihi nĩ ũĩ?

O kiumia mũcemanio-inĩ wa gatagatĩ-inĩ ga kiumia, nĩ tũkoragwo na icunjĩ cia gũtũmenyeria kũhunjia. Angĩkorũo nĩ ũrĩ wathiĩ mũcemanio ũcio-rĩ, woonire atĩa icunjĩ icio cia gũtũmenyeria kũhunjia?

6. Nĩ twathĩkagĩra rĩathani rĩa Ngai rĩa kũhunjia

Hĩndĩ ya karine ya mbere, akararia nĩ maageragia kũgiria arũmĩrĩri a Jesu kũhunjia. Akristiano a hĩndĩ ĩyo nĩ maarũĩrĩire kĩhooto kĩao gĩa kũhunjia na njĩra ya “kũrũmia ũhoro ũrĩa mwega kĩĩwatho.” (Afilipi 1:7) O na Aira a Jehova noguo mekaga ũmũthĩ. a

Mwĩrorerei VIDEO ĩno.