Hihi nĩ ũrĩ wakuĩrũo nĩ mũndũ wendete? Ihinda-inĩ rĩu rĩa kĩeha no wĩyũrie: ‘Gũthiaga atĩa harĩ mũndũ rĩrĩa akua? Hihi nĩ tũkona endwa acio aitũ rĩngĩ?’ Ithomo-inĩ rĩrĩ na rĩrĩa rĩrũmĩrĩire, nĩ ũkwĩruta macokio ma kũũmĩrĩria kuuma Bibilia-inĩ.

1. Gũthiaga atĩa harĩ mũndũ rĩrĩa akua?

Jesu aaringithanirie gĩkuũ na toro mũritũ. Mũndũ ũrĩ toro biũ ndamenyaga maũndũ marĩa marekĩka. Gĩkuũ kĩhaanaine na toro atĩa? Mũndũ ũkuĩte ndaiguaga ruo. Ndaiguaga atiganĩirio o na angĩkorũo nĩ arendete arata ake na andũ ao mũno. Bibilia yugaga ũũ: “Arĩa makuĩte gũtirĩ ũndũ moĩ.”—Thoma Kohelethu 9:5.

2. Kũmenya ũhoro wa ma wĩgiĩ gĩkuũ kũngĩtũguna atĩa?

Andũ aingĩ nĩ metigĩrĩte gĩkuũ na magetigĩra nginya andũ arĩa makuĩte. No kũmenya ũrĩa Bibilia yugaga igũrũ rĩgiĩ gĩkuũ no gũkũũmĩrĩrie. Jesu ooigire ũũ: “Nĩ mũkũmenya ũhoro ũrĩa wa ma, naguo ũhoro ũrĩa wa ma ũmũkũũre ũkombo-inĩ.” (Johana 8:32) Ngũrani na ũrĩa ndini imwe irutanaga, Bibilia ndiugaga atĩ nĩ harĩ kĩndũ thĩinĩ wa mũndũ gĩthiaga na mbere gũtũũra thutha wake gũkua. Kwoguo gũtirĩ mũndũ ũthĩnĩkaga thutha wa gũkua. Ningĩ tondũ arĩa makuĩte gũtirĩ ũndũ moĩ, matingĩtwĩka maũndũ moru. Kwoguo hatirĩ bata wa kũgeria gwĩka maũndũ ma gũkenia arĩa makuĩte kana kũmathathaiya, na hatirĩ bata wa kũmahoera.

Andũ amwe moigaga atĩ no mahote kwaranĩria na arĩa makuĩte. No ũndũ ũcio ndũngĩhoteka. O ta ũrĩa tweruta, arĩa makuĩte “gũtirĩ ũndũ moĩ.” Arĩa meciragia atĩ mararanĩria na endwa ao arĩa maakuire no makorũo makĩaranĩria na ndaimono iria ciĩtuaga andũ arĩa makuĩte. Nĩ ũndũ ũcio, kũmenya ũhoro wa ma wĩgiĩ gĩkuũ nĩ gũtũgitagĩra kuumana na ndaimono. Jehova nĩ atũkaanĩtie kũgeria kwaranĩria na arĩa makuĩte tondũ nĩ oĩ atĩ kwĩingĩrania na maũndũ ma ndaimono no gũtũrehere moimĩrĩro moru.—Thoma Gũcokerithia Maathani 18:10-12.

3. Wĩrute ũrĩa andũ arĩa makuĩte matariĩ

Thĩinĩ wa thĩ andũ makoragwo na mawĩtĩkio matiganĩte megiĩ ũrĩa gũthiaga harĩ mũndũ rĩrĩa akua. Hatarĩ nganja, mawĩtĩkio macio mothe matingĩkorũo marĩ ma ma.

• Andũ a gĩcigo kĩanyu makoragwo na mawĩtĩkio marĩkũ megiĩ ũrĩa andũ arĩa makuĩte matariĩ?

 4. Kũmenya ũhoro wa ma wĩgiĩ gĩkuũ nĩ gũtũgunaga

Kũmenya ũhoro wa ma wĩgiĩ gĩkuũ nĩ gũtũteithagia kwaga gwĩtigĩra arĩa makuĩte. Thomai Kohelethu 9:10, mũcoke mwarĩrĩrie kĩũria gĩkĩ:

• Hihi arĩa makuĩte no matwĩke maũndũ moru?

Ningĩ kũmenya ũhoro wa ma ũrĩa ũrĩ thĩinĩ wa Bibilia nĩ gũtũgitagĩra kuumana na wĩtĩkio wa atĩ nĩ twagĩrĩirũo gwĩka maũndũ ma gũkenia arĩa makuĩte kana o na kũmathathaiya. Thomai Isaia 8:19 na Kũguũrĩrio 4:11, mũcoke mwarĩrĩrie kĩũria gĩkĩ:

• Ũgwĩciria Jehova aiguaga atĩa igũrũ rĩgiĩ mũndũ ũrathathaiya mũndũ ũkuĩte kana ũrahoya ũteithio kũrĩ mũndũ ũkuĩte?

5. Kũmenya ũhoro wa ma wĩgiĩ gĩkuũ nĩ gũtũũmagĩrĩria

Andũ aingĩ marutĩtwo atĩ makua nĩ makaaherithio nĩ ũndũ wa mehia marĩa meekĩte. No nĩ tũũmagĩrĩrio nĩ kũmenya atĩ gũtirĩ mũndũ ũthĩnĩkaga thutha wa gũkua, o na angĩkorũo nĩ mũndũ wĩkĩte maũndũ moru atĩa. Thomai Aroma 6:7, mũcoke mwarĩrĩrie kĩũria gĩkĩ:

• Angĩkorũo Bibilia yonania atĩ mũndũ ũkuĩte nĩ ehereirio kana akarekererio kuuma harĩ mehia make-rĩ, nĩ ũkuona ta kũrĩ mũndũ ũthĩnĩkaga nĩ ũndũ wa mehia make thutha wa gũkua?

O ũrĩa tũreruta makĩria ũhoro wĩgiĩ Jehova, noguo tũtaũkagĩrũo wega atĩ gũtirĩ hĩndĩ angĩtĩkĩra kũherithia arĩa makuĩte. Thomai Gũcokerithia Maathani 32:4 na 1 Johana 4:8, mũcoke mwarĩrĩrie ciũria ici:

• Hihi Ngai ũtariĩ ũguo mĩhari ĩyo yonania no etĩkĩrie andũ arĩa makuĩte maherithio?

• Hihi kũmenya ũhoro wa ma wĩgiĩ gĩkuũ nĩ kũrakũũmĩrĩria? Ũngiuga ũguo nĩkĩ?

 ŨRĨA TWERUTA

Mũndũ akua ũtũũro wake no gũthira ũthiraga. Andũ arĩa makuĩte matithĩnĩkaga, na matingĩka arĩa marĩ muoyo maũndũ moru.

Ciũria cia gũcokera

• Gũthiaga atĩa harĩ mũndũ rĩrĩa akua?

• Kũmenya ũhoro wa ma wĩgiĩ gĩkuũ gũtũgunaga atĩa?

• Kũmenya ũhoro wa ma wĩgiĩ gĩkuũ gũtũũmagĩrĩria atĩa?