ITHOMO RĨA 47
Hihi nĩ Wĩhaarĩirie Kũbatithio?
Nĩ wĩrutĩte maũndũ maingĩ megiĩ Jehova kũgerera wĩruti waku wa Bibilia. No kũhoteke nĩ wĩkĩte mogarũrũku mamwe nĩ ũndũ wa kũhũthĩra maũndũ marĩa wĩrutĩte. Ĩndĩ no gũkorũo harĩ ũndũ ũrakũgirĩrĩria kwĩyamũrĩra Jehova na kũbatithio. Ithomo rĩrĩ rĩarĩrĩirie moritũ mamwe marĩa magiragĩrĩria andũ kũbatithio na ũrĩa ũngĩmatooria.
1. Ũrabatara gũkorũo na ũmenyo ũigana atĩa ũtanabatithio?
Nĩguo ũbatithio, ũrabatara kũgĩa na “ũmenyo wa ma wĩgiĩ ũhoro wa ma.” (1 Timotheo 2:4) Ũguo ti kuuga atĩ ũtanabatithio no mũhaka ũmenye macokio ma kĩũria o gĩothe mũndũ angĩũria kĩgiĩ Bibilia. O na Akristiano arĩa maabatithirio tene no mathiaga na mbere kwĩruta. (Akolosai 1:9, 10) No nĩ ũrabatara gũtaũkĩrũo nĩ morutani ma mũthingi ma Bibilia. Athuri a kĩũngano no magũteithie kũmenya kana ũrĩ na ũmenyo wa kũigana.
2. Nĩ makinya marĩkũ mamwe ũrabatara kuoya ũtanabatithio?
Ũtanabatithio, no mũhaka ‘wĩrire, na ũgarũrũke.’ (Thoma Atũmwo 3:19.) Ũguo nĩ kuuga gwĩcokera nĩ ũndũ wa mehia o mothe ũngĩkorũo waneka na kũhoya Jehova akuohere. Ũgacoka ũkaregana biũ na mĩtugo mĩũru, na ũgatua itua rĩa gũtũũra kũringana na wendi wa Ngai. Makĩria ma ũguo, ũkambĩrĩria kũnyitanĩra na kĩũngano maũndũ-inĩ ta gũthiĩ mĩcemanio, na kũhunjia ũrĩ mũhunjia ũtarĩ mũbatithie.
3. Nĩkĩ ndwagĩrĩirũo gwĩtĩkĩria guoya ũkũgirĩrĩrie kũbatithio?
Andũ amwe metigagĩra atĩ matikũhota kũhingia maũndũ marĩa merĩra Jehova. Rĩmwe na rĩmwe nĩ ũrĩhĩtagia, o ta arũme na atumia ehokeku arĩa magwetetwo Bibilia-inĩ. No Jehova nderĩgagĩrĩra athathaiya ake makorũo marĩ akinyanĩru. (Thoma Thaburi 103:13, 14.) Nĩ akenaga rĩrĩa weka ũrĩa wothe ũngĩhota. Nĩ arĩgũteithagia. O na atwĩrĩire atĩ gũtirĩ kĩndũ “kĩngĩhota gũtũtigithũkania na wendo [wake].”—Thoma Aroma 8:38, 39.
THUTHURIA MAKĨRIA
Reke tuone ũrĩa ũngĩtooria moritũ marĩa mangĩkũgirĩrĩria kũbatithio na njĩra ya kũmenya Jehova wega na gwĩtĩkĩra ũteithio wake.
4. Menya Jehova wega
Ũrabatara kũmenya Jehova na gĩkĩro kĩigana atĩa ũtanabatithio? Ũrabatara kũmũmenya wega ũndũ ũngĩmwenda na wende kũmũkenia. Mwĩrorerei VIDEO ĩno muone ũrĩa arutwo a Bibilia kuuma kũndũ gũtiganĩte thĩinĩ wa thĩ mahotete gwĩka ũguo, mũcoke mwarĩrĩrie kĩũria kĩrĩa kĩrũmĩrĩire.
-
Kũringana na video ĩyo-rĩ, nĩ kĩĩ gĩateithirie andũ amwe kwĩhaarĩria kũbatithio?
Thomai Aroma 12:2, mũcoke mwarĩrĩrie ciũria ici:
-
Hihi ũrĩ na nganja o ciothe ciĩgiĩ ũrĩa Bibilia ĩrutanaga, na kana Aira a Jehova marutanaga ũhoro wa ma?
-
Angĩkorũo ũrĩ nacio-rĩ, ũngĩka atĩa?
5. Ũrĩa ũngĩtooria moritũ marĩa mangĩkũgirĩrĩria kũbatithio
Rĩrĩa twatua itua rĩa kwĩyamũrĩra Jehova na kũbatithio, ithuothe nĩ tũcemanagia na moritũ. Nĩguo muone ngerekano ĩmwe, mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Kũringana na video ĩyo-rĩ, Narangerel aatooririe moritũ marĩkũ nĩguo ahote gũtungatĩra Jehova?
-
Kwenda Jehova kwamũteithirie atĩa gũtooria moritũ macio?
Thomai Thimo 29:25 na 2 Timotheo 1:7, mũcoke mwarĩrĩrie kĩũria gĩkĩ:
-
Nĩ kĩĩ gĩtũheaga ũmĩrĩru wa gũtooria moritũ?
6. Wĩhokage ũteithio wa Jehova
Jehova nĩ arĩgũteithagia gwĩka wendi wake. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Kũringana na video ĩyo-rĩ, nĩ kĩĩ gĩatũmaga mũrutwo ũcio wa Bibilia age gũtua itua rĩa kũbatithio?
-
Nĩ ũndũ ũrĩkũ eerutire ũkĩmũteithia kwĩhoka Jehova makĩria?
Thomai Isaia 41:10, 13, mũcoke mwarĩrĩrie kĩũria gĩkĩ:
-
Nĩ kĩĩ kĩngĩtũma ũkorũo na ma atĩ no ũhote kũhingia kĩĩranĩro kĩrĩa ũkwĩrĩra Jehova ũkĩmwĩyamũrĩra?
7. Wĩrutanĩrie kũgĩa na ngatho makĩria nĩ ũndũ wa wendo wa Jehova
O ũrĩa ũgwĩcũrania makĩria igũrũ rĩgiĩ ũrĩa Jehova akwendete, noguo ũkũgĩa na ngatho makĩria na noguo ũkwenda kũmũtungatĩra tene na tene. Thomai Thaburi 40:5, mũcoke mwarĩrĩrie kĩũria gĩkĩ:
-
Nĩ irathimo irĩkũ kuuma kũrĩ Jehova ũkenagĩra mũno?
Mũnabii Jeremia nĩ eendete Jehova na kiugo gĩake, na nĩ oonanagia ngatho nĩ ũndũ wa gĩtĩo gĩa gwĩtanio na rĩĩtwa rĩa Jehova. Ooigire ũũ: “Kiugo gĩaku gĩatuĩkire gĩkeno harĩ niĩ na gĩgĩtũma ngoro yakwa ĩcanjamũke, tondũ niĩ njĩtanĩtio na rĩĩtwa rĩaku, wee Jehova Ngai.” (Jeremia 15:16) Arĩrĩriai ciũria ici:
-
Nĩ kĩĩ kĩngĩtũma tuuge atĩ nĩ gĩtĩo kĩnene gũtuĩka Mũira wa Jehova?
-
Hihi no wende kũbatithio ũtuĩke Mũira wa Jehova?
-
Hihi nĩ harĩ ũndũ ũkũgiragĩrĩria kuoya ikinya rĩu?
-
Ũrona ta ũrabatara gwĩka atĩa nĩguo ũkinyĩre muoroto wa kũbatithio?
ANDŨ AMWE MOIGAGA: “Ndirona ta ingĩhota kũhingia maũndũ marĩa mũndũ mũbatithie erĩgagĩrĩrũo kũhingia.”
-
Hihi ũguo nĩguo ũiguaga?
ŨRĨA TWERUTA
Jehova no agũteithie gũtooria moritũ o mothe mangĩkũgirĩrĩria kũbatithio.
Ciũria cia gũcokera
-
Ũrabatara gũkorũo na ũmenyo ũigana atĩa wa Bibilia nĩguo ũbatithio?
-
Nĩ mogarũrũku marĩkũ ũngĩbatara gwĩka ũtanabatithio?
-
Nĩkĩ ndwagĩrĩirũo gwĩtĩkĩria guoya ũkũgirĩrĩrie kũbatithio?
RIKĨRA
Thoma wone itua rĩaku rĩa kũbatithio rĩagĩrĩirũo gũkorũo rĩĩhocetie harĩ kĩĩ.
Wĩrute ũrĩa ũngĩtooria moritũ mamwe marĩa mangĩkũgirĩrĩria kũbatithio.
Rora wone ũrĩa mũndũ ũmwe aatooririe moritũ mamwe marĩa maamũgiragĩrĩria kũbatithio.
Kĩambĩrĩria-inĩ, mũthuri wĩtagwo Ataa nĩ aagaga kuoya ikinya rĩa kũbatithio. Rora wone kĩrĩa kĩamũteithirie kuoya ikinya rĩu rĩa bata.
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
