Ithuothe nĩ tũkoragwo na wĩyathi wa gũthuura ũrĩa tũkwĩhumba na ũrĩa tũkwĩgemia. Tũngĩrũmĩrĩra motaaro ma Bibilia, no tũhote kwĩhumba na njĩra tũrakenera na ĩrakenia Jehova. Reke tũthuthurie motaaro mamwe harĩ macio.

1. Nĩ motaaro marĩkũ magĩrĩirũo gũtũtongoria tũgĩthuura ũrĩa tũkwĩhumba na kwĩgemia?

Twagĩrĩirũo gũthuuraga ‘nguo njega, tũtegũkĩria njano, na tũrĩ na meciria mega’ na tũgaikaraga tũrĩ atheru nĩguo andũ arĩa angĩ mone atĩ nĩ “[twĩyamũrĩire] Ngai.” (1 Timotheo 2:9, 10) Wĩcũranie ũhoro wa motaaro maya mana: (1) Twagĩrĩirũo kwĩhumba nguo “njega.” O ta ũrĩa wonete mĩcemanio-inĩ ya kĩũngano, andũ a Jehova mehumbaga na njĩra itiganĩte, no mwĩhumbĩre wao na ũrĩa mathondekaga njuĩrĩ nĩ wonanagia atĩ nĩ matĩĩte Ngai. (2) Rĩrĩa twehumba na njĩra ‘ĩtegũkĩria njano’ nĩ twĩthemaga kwĩhumba nguo iratũma arĩa angĩ makorũo na meciria moru, kana ĩratũma andũ magucĩrĩrio nĩ ithuĩ na njĩra ĩtarĩ njega. (3) Nĩ tuonanagia atĩ tũrĩ na “meciria mega” tũngĩĩthema gũtengʼerania na mwĩhumbĩre kana mwĩgemerie o wothe ũrĩa woimĩra. (4) Hingo ciothe mwĩhumbĩre witũ wagĩrĩirũo kuonania atĩ nĩ ‘twĩyamũrĩire Ngai’ na atĩ tũthathayagia Ngai ũrĩa wa ma.—1 Akorintho 10:31.

2. Mwĩhumbĩre witũ ũngĩhutia atĩa aarĩ na ariũ a Ithe witũ?

O na gũtuĩka tũrĩ na wĩyathi wa gũthuura nguo ĩrĩa tũgwĩkĩra, nĩ twagĩrĩirũo gwĩciria ũrĩa mwĩhumbĩre witũ ũngĩhutia arĩa angĩ. Twĩrutanagĩria kwaga kũrakaria mũndũ o na ũmwe, handũ ha ũguo, twendaga ‘gũkenia arĩa angĩ na tũkameka maũndũ mega, nĩguo tũmaake.’—Thoma Aroma 15:1, 2.

3. Mwĩhumbĩre witũ ũngĩgucĩrĩria andũ atĩa harĩ ũthathaiya wa ma?

O na gũtuĩka nĩ twĩrutanagĩria kwĩhumba wega mahinda-inĩ mothe, nĩ twĩkaga ũguo o na makĩria rĩrĩa tũrathiĩ mĩcemanio-inĩ ya kĩũngano kana rĩrĩa tũrathiĩ kũhunjia. Tũtiendaga kweheria meciria ma andũ kuuma harĩ ndũmĩrĩri ĩrĩa tũramahe. Handũ ha ũguo, twendaga mwĩhumbĩre witũ ũtũme arĩa angĩ magucĩrĩrio nĩ ũhoro ũrĩa wa ma na ũgoocithie “ũrutani wa Ngai, o we Mũhonokia witũ.”—Tito 2:10.

 THUTHURIA MAKĨRIA

4. Mwĩhumbĩre mwega nĩ ũtĩithagia Jehova

Gĩtũmi kĩrĩa kĩnene gĩa gũtigĩrĩra atĩ nĩ tũrehumba wega nĩ kĩrĩkũ? Thomai Kũguũrĩrio 4:11, mũcoke mwarĩrĩrie ciũria ici:

• Kũmenya atĩ nĩ twĩtanĩtio na rĩĩtwa rĩa Jehova kwagĩrĩirũo kũhutia atĩa matua maitũ megiĩ kwĩhumba?

• Hihi nĩ ũkuona ta arĩ ũndũ wa bata gwĩciria ũrĩa tũkwĩhumba rĩrĩa tũrathiĩ mĩcemanio-inĩ kana rĩrĩa tũrathiĩ kũhunjia? Ũngiuga ũguo nĩkĩ?

 5. Ũrĩa tũngĩtua matua mega megiĩ kwĩhumba na kwĩgemia

Mwĩrorerei VIDEO ĩno.

Gũtekũmakania kana nguo citũ nĩ cia goro kana ti cia goro, ciagĩrĩirũo gũkorũo irĩ theru na ciaganĩrĩirũo na ũrĩa tũreka. Thomai 1 Akorintho 10:24 na 1 Timotheo 2:9, 10, mũcoke mwarĩrĩrie kĩrĩa kĩngĩtũma twĩtheme kwĩhumba nguo . . .

• itarĩ theru na itarĩ na kĩharĩro kĩega.

• itũnyitĩte, ironania mwĩrĩ, kana ingĩarahũra merirĩria ma ngomanio.

O na gũtuĩka Akristiano matirĩ rungu rwa Watho wa Musa, Watho ũcio nĩ wonanagia mwĩcirĩrie wa Jehova. Thomai Gũcokerithia Maathani 22:5, mũcoke mwarĩrĩrie kĩũria gĩkĩ:

• Nĩkĩ Mũkristiano nĩ agĩrĩirũo gwĩthema kwĩhumba kana kwĩgemia na njĩra ĩngĩtũma mũndũrũme ahaane mũtumia kana mũtumia ahaane mũndũrũme?

Thomai 1 Akorintho 10:32, 33 na 1 Johana 2:15, 16, mũcoke mwarĩrĩrie ciũria ici:

• Nĩkĩ nĩ twagĩrĩirũo gwĩciria kana mwĩhumbĩre witũ nĩ ũrakaragia andũ kũrĩa tũikaraga kana kĩũngano-inĩ?

• Kũrĩa ũikaraga andũ aingĩ mehumbaga na makegemia na njĩra ta irĩkũ?

• Nĩ ũkuona ta njĩra imwe andũ mehumbaga na makegemia nacio ingĩkorũo itagĩrĩire harĩ Mũkristiano? Ũngiuga ũguo nĩkĩ?

 ŨRĨA TWERUTA

Rĩrĩa twatua matua mega megiĩ kwĩhumba na kwĩgemia, nĩ tuonanagia gĩtĩo harĩ Jehova na harĩ andũ arĩa angĩ.

Ciũria cia gũcokera

• Nĩkĩ mwĩhumbĩre na mwĩgemerie witũ nĩ wa bata harĩ Jehova?

• Nĩ motaaro ta marĩkũ magĩrĩirũo gũtũtongoria tũgĩtua matua megiĩ ũrĩa tũkwĩhumba na kwĩgemia?

• Mwĩhumbĩre witũ ũngĩhutia atĩa mawoni ma andũ megiĩ ũthathaiya wa ma?