ITHOMO RĨA 06
Indo Iria irĩ Muoyo Cioimire Kũ?
“[Ngai] nĩwe kĩhumo kĩa muoyo.” (Thaburi 36:9) Wee nĩ wĩtĩkĩtie ũguo? Andũ amwe moigaga atĩ indo iria irĩ muoyo ti kũũmbwo ciombirũo. Angĩkorũo nĩguo, ũtũũro witũ ndũngĩkorũo na muoroto. No angĩkorũo Jehova Ngai nĩwe wombire indo iria irĩ muoyo, nĩ kuuga atĩ irĩ na muoroto. a Ta wĩcirie ũrĩa Bibilia yugaga igũrũ rĩgiĩ kĩhumo kĩa muoyo, na nĩ kĩĩ kĩngĩtũma tuuge atĩ tũrĩ na itũmi njega cia gwĩtĩkia ũhoro ũcio.
1. Igũrũ na thĩ cioimire kũ?
Bibilia yugaga ũũ: “Kĩambĩrĩria-inĩ Ngai nĩ oombire igũrũ na thĩ.” (Kĩambĩrĩria 1:1) Athomi aingĩ a sayansi nĩ metĩkĩtie atĩ igũrũ na thĩ nĩ ciarĩ na kĩambĩrĩria. Hihi Ngai aaciũmbire atĩa? Aahũthĩrire “hinya [wake] wa gwĩka maũndũ,” nĩguo roho mũtheru, kũũmba igũrũ na thĩ, o hamwe na ngalaksĩ, njata, na thĩ iria ingĩ.—Kĩambĩrĩria 1:2.
2. Ngai oombire thĩ nĩkĩ?
Jehova “[ndoombire thĩ] hatarĩ gĩtũmi, ĩndĩ aamĩũmbire nĩguo ĩtũũragwo.” (Isaia 45:18) Oombire thĩ ĩno itũ ĩrĩ kũndũ kwega gwa gũtũũrũo nĩ andũ tene na tene. (Thoma Isaia 40:28; 42:5.) Athomi a sayansi moigaga atĩ thĩ ĩno itũ ĩkoragwo ĩrĩ ya mwanya mũno na ĩrĩ ngũrani mũno na thĩ iria ingĩ. Noyo thĩ ĩrĩa yũĩkaine ĩkoragwo na kĩrĩa gĩothe andũ mabataraga nĩguo matũũre muoyo.
3. Andũ makoragwo na ngũrani ĩrĩkũ na nyamũ?
Jehova omba thĩ, aacokire akĩũmba indo iria irĩ muoyo thĩinĩ wayo. Aambire akĩũmba mĩmera na nyamũ. Thutha ũcio, “Ngai [akĩũmba] mũndũ na mũhianĩre wake.” (Thoma Kĩambĩrĩria 1:27.) Nĩ ũndũ ũrĩkũ ũtũmaga andũ makorũo marĩ a mwanya? Tondũ tũũmbĩtwo na mũhianĩre wa Ngai, no tũhote kuonania ngumo ciake, ta wendo na kĩhooto. Ningĩ aatũmbire tũrĩ na ũhoti wa kwĩruta thiomi itiganĩte, gũkenera indo thaka, o na nyĩmbo. Na ngũrani na nyamũ o yothe, no tũhote gũthathaiya Mũũmbi witũ.
THUTHURIA MAKĨRIA
Reke tũthuthurie ũira wa atĩ indo iria irĩ muoyo nĩ kũũmbwo ciombirũo na atĩ tũrĩ na itũmi njega cia gwĩtĩkia rũgano rwa Bibilia rwĩgiĩ ũũmbi. Ningĩ nĩ tũkuona ũrĩa ngumo iria andũ makoragwo nacio itũrutaga igũrũ rĩgiĩ Ngai.
4. Indo iria irĩ muoyo nĩ kũũmbwo ciombirũo
Andũ nĩ magaathagĩrĩrio nĩ ũndũ wa gũthondeka indo makobetie ũũmbi. Nũũ ũkĩagĩrĩire kũgaathĩrĩrio nĩ ũndũ wa ũũmbi guo mwene? Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Nĩ maũndũ marĩkũ andũ makobetie kuuma kũrĩ ũũmbi?
Nyũmba o yothe nĩ ĩrĩ ũrĩa wamĩakire. No nũũ wombire indo iria ciothe irĩ kuo? Thomai Ahibirania 3:4, mũcoke mwarĩrĩrie ciũria ici:
-
Harĩ indo iria ciothe ciombirũo-rĩ, nĩ kĩĩ gĩkũguucagĩrĩria makĩria?
-
Hihi tũrĩ na itũmi cia gwĩtĩkia atĩ igũrũ na thĩ na indo iria ciothe irĩ thĩinĩ wacio nĩ kũũmbwo ciombirũo? Ũngiuga ũguo nĩkĩ?
Hihi nĩ ũĩ?
No wone video na icunjĩ irarĩrĩria ũhoro ũcio thĩinĩ wa jw.org/ki rungu rwa gĩcunjĩ kĩa “Hihi nĩ Kũũmbwo Ciombirũo?” na kĩa “Mawoni Megiĩ Kĩhumo kĩa Muoyo.”
“Ma nĩ atĩ, nyũmba o yothe nĩ ĩrĩ ũrĩa wamĩakire, no ũrĩa waakire indo ciothe nĩ Ngai”
5. Tũrĩ na itũmi njega cia gwĩtĩkia rũgano rwa Bibilia rwĩgiĩ ũũmbi
Thĩinĩ wa Kĩambĩrĩria mũrango wa 1, Bibilia nĩ ĩtaaragĩria kĩhumo gĩa thĩ na indo iria irĩ muoyo thĩinĩ wayo. Hihi no twĩtĩkie ũhoro ũcio kana no rũgano rwa gũtungwo tu? Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Hihi Bibilia ĩrutanaga atĩ thĩ na indo iria irĩ muoyo thĩinĩ wayo ciombirũo na thikũ ithathatũ cia mathaa 24?
-
Hihi nĩ ũkuona ta kũrĩ na itũmi cia kwĩhokeka cia gwĩtĩkia rũgano rwa Bibilia rwĩgiĩ ũũmbi? Ũngiuga ũguo nĩkĩ?
Thomai Kĩambĩrĩria 1:1, mũcoke mwarĩrĩrie kĩũria gĩkĩ:
-
Athomi a sayansi moigaga atĩ igũrũ na thĩ nĩ ciarĩ na kĩambĩrĩria. Ũndũ ũcio ũraringana atĩa na ũhoro ũrĩa wathoma thĩinĩ wa Bibilia?
Andũ amwe marigagwo kana hihi Ngai oombire kĩndũ kĩmwe gĩgĩcoka gĩkĩambĩrĩria kũgarũrũka na gũtuĩka indo ingĩ. Thomai Kĩambĩrĩria 1:21, 25, 27, mũcoke mwarĩrĩrie ciũria ici:
-
Hihi Bibilia ĩrutanaga atĩ Ngai oombire kĩndũ kĩmwe agĩcoka agĩtũma kĩambĩrĩrie kũgarũrũka gĩtuĩke nyamũ na andũ? Kana hihi oombire indo cia “mĩthemba” yothe iria irĩ muoyo? b
6. Ngai oombire andũ na njĩra ya mwanya
Jehova nĩwe wombire andũ o hamwe na nyamũ. O na kũrĩ ũguo, kũrĩ maũndũ matũmaga andũ makorũo marĩ ngũrani na nyamũ. Thomai Kĩambĩrĩria 1:26, mũcoke mwarĩrĩrie kĩũria gĩkĩ:
-
Tondũ tũũmbĩtwo na mũhianĩre wa Ngai-rĩ, ũhoti witũ wa kuonania wendo na ũcayanĩri wonanagia atĩa igũrũ rĩgiĩ ũrĩa Ngai atariĩ?
ANDŨ AMWE MOIGAGA: “Rũgano rwa Bibilia rwĩgiĩ ũũmbi nĩ rwa gũtungwo.”
-
Wee ũngiuga atĩa? Ũngiuga ũguo nĩkĩ?
ŨRĨA TWERUTA
Jehova nĩwe wombire igũrũ na thĩ na indo iria ciothe irĩ muoyo.
Ciũria cia gũcokera
-
Bibilia ĩrutanaga atĩa igũrũ rĩgiĩ kũrĩa igũrũ na thĩ cioimire?
-
Hihi Ngai oombire kĩndũ kĩmwe agĩcoka agĩtũma kĩgarũrũrũke gĩtuĩke indo cia mĩthemba ngũrani iria irĩ muoyo, kana hihi nĩ kũũmba oombire indo icio ciothe?
-
Nĩ ũndũ ũrĩkũ wa mwanya wĩgiĩ andũ?
RIKĨRA
Thoma wone ngerekano cia ũũmbi iria ironania atĩ indo nĩ kũũmbwo ciombirũo.
Wĩrorere wone ũrĩa mũciari angĩtaarĩria mwana wake rũgano rwa Bibilia rwĩgiĩ ũũmbi.
Thoma wone kana ũrutani wĩgiĩ indo kũgarũrũka nĩ ũtwaranaga na ũhoro ũrĩa ũrĩ thĩinĩ wa Bibilia.
a Ithomo rĩa 25 nĩ rĩkaarĩrĩria muoroto wa Ngai harĩ andũ nĩ ũrĩkũ.
b Thĩinĩ wa Bibilia, kiugo “mũthemba” kĩrũgamĩrĩire gĩkundi kĩnene kĩa indo irĩ muoyo.
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
