ITHOMO RĨA 08
No Ũtuĩke Mũrata wa Jehova
Jehova nĩ endaga ũmũmenye wega. Nĩkĩ? Erĩgagĩrĩra atĩ o ũrĩa ũgũthiĩ na mbere kũmenya ũrĩa atariĩ, ũrĩa ekaga maũndũ, na muoroto wake, noguo ũkwenda gũtuĩka mũrata wake. Hihi nĩ wĩtĩkĩtie atĩ no ũtuĩke mũrata wa Ngai? (Thoma Thaburi 25:14.) Ũngĩka atĩa nĩguo ũtuĩke mũrata wake? Bibilia nĩ ĩcokagia ciũria icio na ĩkonania kĩrĩa gĩtũmaga ũrata hamwe na Jehova ũkorũo ũrĩ ũrata ũrĩa wa bata makĩria ũngĩkorũo naguo.
1. Jehova akwĩrĩte wĩke atĩa?
‘Kuhĩrĩria Ngai, nake nĩ egũgũkuhĩrĩria.’ (Jakubu 4:8) Ũndũ ũcio ũronania atĩa? Jehova arenda ũtuĩke mũrata wake. Andũ amwe nĩ maremagwo gwĩtĩkia atĩ no matuĩke arata a Ngai, tondũ matingĩhota kũmuona. No Jehova nĩ onanĩtie thĩinĩ wa Kiugo gĩake, Bibilia, maũndũ mothe marĩa tũrabatara kũmenya megiĩ ũrĩa atariĩ nĩguo tũhote kũmũkuhĩrĩria. Rĩrĩa twathoma ndũmĩrĩri ya Ngai thĩinĩ wa Bibilia, ũrata witũ hamwe na Jehova nĩ ũkũraga o na gũtuĩka tũtirĩ twamuona.
2. Nĩ kĩĩ gĩtũmaga Jehova akorũo arĩ we Mũrata ũrĩa mwega biũ ũngĩgĩa nake?
Gũtirĩ mũndũ ũngĩ ũkwendete ta ũrĩa Jehova akwendete. Endaga ũkorũo na gĩkeno, na ũkamũhoyaga ũteithio rĩrĩa rĩothe ũrabatara. No ‘ũmũikagĩrie mĩtangĩko yaku yothe, tondũ nĩ akũrũmbũyagia.’ (1 Petero 5:7) Hingo ciothe Jehova akoragwo ehaarĩirie gũteithia arata ake, kũmomĩrĩria, na kũmathikĩrĩria.—Thoma Thaburi 94:18, 19.
3. Jehova erĩgagĩrĩra arata ake meke atĩa?
Jehova endete andũ othe, “no nĩ agĩaga ũrata wa hakuhĩ na arĩa arũngĩrĩru.” (Thimo 3:32) Jehova erĩgagĩrĩra arata ake merutanĩrie gwĩka maũndũ marĩa onaga marĩ mega na metheme maũndũ marĩa onaga marĩ moru. Andũ amwe no mone ta matangĩhota gũtũũra kũringana na ithimi cia Jehova ciĩgiĩ wega na ũũru. O na kũrĩ ũguo, Jehova nĩ arĩ tha. Nĩ etĩkagĩra mũndũ o wothe ũrĩa ũmwendete kuuma ngoro na wĩrutanagĩria biũ kũmũkenia.—Thaburi 147:11; Atũmwo 10:34, 35.
THUTHURIA MAKĨRIA
Reke twĩrute makĩria ũrĩa tũngĩtuĩka arata a Jehova, na tũmenye kĩrĩa gĩtũmaga akorũo arĩ we Mũrata ũrĩa mwega biũ tũngĩgĩa nake.
4. Iburahimu aarĩ mũrata wa Jehova
Rũgano rwa Bibilia rwĩgiĩ Iburahimu (o we wĩtagwo Aburamu) nĩ rũtũteithagia gũtaũkĩrũo ũrĩa gũtuĩka mũrata wa Ngai kuugĩte. Thomai ũhoro wĩgiĩ Iburahimu thĩinĩ wa Kĩambĩrĩria 12:1-4, mũcoke mwarĩrĩrie ciũria ici:
-
Jehova eerire Iburahimu eke atĩa?
-
Jehova eerĩire Iburahimu ũndũ ũrĩkũ?
-
Iburahimu eekire atĩa?
5. Maũndũ marĩa Jehova endaga arata ake meke
Nĩ harĩ maũndũ twĩrĩgagĩrĩra kuuma kũrĩ arata aitũ.
-
Nĩ maũndũ ta marĩkũ wendaga arata aku magwĩkĩre?
Thomai 1 Johana 5:3, mũcoke mwarĩrĩrie kĩũria gĩkĩ:
-
Jehova erĩgagĩrĩra arata ake meke atĩa?
Nĩguo twathĩkĩre Jehova, no tũbatare gũcenjia mĩthiĩre itũ kana ũmũndũ witũ. Thomai Isaia 48:17, 18, mũcoke mwarĩrĩrie kĩũria gĩkĩ:
-
Jehova endaga arata ake meke mogarũrũku nĩkĩ?
6. Ũrĩa Jehova ateithagia arata ake
Jehova nĩ ateithagia arata ake kũhiũrania na mathĩna. Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Kũringana na video ĩyo-rĩ, Jehova ateithĩtie mũtumia ũcio atĩa kũhiũrania na meciria moru na gũtangĩka?
Thomai Isaia 41:10, 13, mũcoke mwarĩrĩrie ciũria ici:
-
Nĩ maũndũ marĩkũ Jehova erĩire arata ake othe?
-
Nĩ ũkuona ta Jehova angĩkorũo arĩ Mũrata mwega? Ũngiuga ũguo nĩkĩ?
7. Nĩ tũrabatara kwaranagĩria na Jehova nĩguo tũtuĩke arata ake
Kwaranĩria nĩ gwĩkĩraga ũrata hinya. Thomai Thaburi 86:6, 11, mũcoke mwarĩrĩrie ciũria ici:
-
Twaragĩria Jehova na njĩra ĩrĩkũ?
-
Jehova atwaragĩria na njĩra ĩrĩkũ?
ANDŨ AMWE MOIGAGA: “Gũtingĩhoteka mũndũ atuĩke mũrata wa Ngai.”
-
Nĩ rĩandĩko rĩrĩkũ ũngĩhũthĩra kuonania atĩ no tũtuĩke arata a Jehova?
ŨRĨA TWERUTA
Jehova nĩ endaga gũtuĩka Mũrata waku, na nĩ arĩgũteithagia ũmũkuhĩrĩrie.
Ciũria cia gũcokera
-
Jehova ateithagia arata ake atĩa?
-
Jehova endaga arata ake meke mogarũrũku nĩkĩ?
-
Hihi nĩ ũkuona ta arĩ ũndũ mũritũ mũno gũtuĩka mũrata wa Jehova? Ũngiuga ũguo nĩkĩ?
RIKĨRA
Kũgĩa ũrata na Ngai kũngĩgũteithia atĩa ũtũũro-inĩ?
Wĩrute ũrĩa ũngĩtuĩka mũrata wa Ngai.
“Ingĩka Atĩa Nĩguo Nduĩke Mũrata wa Ngai?” (yp2 gĩcunjĩ kĩa 35)
Thoma wone kĩrĩa gĩtũmaga mũtumia ũmwe oige atĩ kũgĩa ũrata na Jehova nĩ kwamũhonokirie.
Thikĩrĩria andũ ethĩ magĩtaarĩria ũrĩa maiguaga igũrũ rĩgiĩ Jehova.