Andũ aingĩ meciragia atĩ Aira a Jehova nĩ rĩĩtwa rĩa ndini njerũ. O na kũrĩ ũguo, mĩaka makĩria ma 2,700 mĩhĩtũku, ndungata cia Ngai ũrĩa ũmwe wa ma cietagwo “aira” ake. (Isaia 43:​10-12) Gũkinyĩria mwaka wa 1931, twetagwo Arutwo a Bibilia. Nĩ kĩĩ gĩatũmire twambĩrĩrie kũhũthĩra rĩĩtwa Aira a Jehova?

Nĩ rĩmenyithanagia Ngai witũ. Kũringana na maandĩko ma tene, rĩĩtwa rĩa Ngai, Jehova, rĩonekaga maita ngiri nyingĩ thĩinĩ wa Bibilia. Thĩinĩ wa Bibilia nyingĩ rĩĩtwa rĩu nĩ rĩeheretio hagekĩrũo marĩĩtwa ma ũnene ta Mwathani kana Ngai. Ĩndĩ, Ngai wa ma rĩrĩa eeguũrĩirie Musa na rĩĩtwa rĩake, Jehova, aamwĩrire ũũ: “Rĩu nĩrĩo rĩĩtwa rĩakwa tene na tene.” (Thama 3:15) Na njĩra ĩyo, akĩĩyonania atĩ we nĩ ngũrani na ngai ciothe cia maheeni. Nĩ twĩrahagĩra gwĩtanio na rĩĩtwa itheru rĩa Ngai.

Nĩ rĩonanagia wĩra ũrĩa tũrutaga. Andũ aingĩ a tene, nĩ maarutaga ũira wĩgiĩ wĩtĩkio wao harĩ Jehova, na wa mbere gwĩka ũguo arĩ Habili, mũndũ warĩ mũthingu. Mĩaka-inĩ ĩrĩa yarũmĩrĩire, Nuhu, Iburahimu, Sara, Musa, Daudi, hamwe na angĩ, nĩ moongererekire harĩ ‘itu rĩu inene rĩa aira.’ (Ahibirania 11:4–12:⁠1) O ta ũrĩa mũndũ angĩruta ũira igooti-inĩ nĩ ũndũ wa mũndũ ũtehĩtie-rĩ, nĩ twĩhotorete kũmenyithania ũhoro wa ma wĩgiĩ Ngai witũ.

Twĩgerekanagia na Jesu. Bibilia ĩmwĩtaga “mũira ũrĩa mwĩhokeku na wa ma.” (Kũguũrĩrio 3:14) Jesu we mwene ooigire atĩ nĩ ‘aamenyithirie andũ rĩĩtwa rĩa Ngai’ o akĩrutaga “ũira wĩgiĩ ũhoro ũrĩa wa ma” ũkoniĩ Ngai. (Johana 17:26; 18:37) Kwoguo, arũmĩrĩri a ma a Jesu no mũhaka metanio na rĩĩtwa rĩa Jehova na marĩmenyithanie. Ũguo ­nĩguo Aira a Jehova merutanagĩria gwĩka.

• Arutwo a Bibilia maambĩrĩirie kũhũthĩra rĩĩtwa Aira a Jehova nĩkĩ?

• Jehova akoretwo na aira thĩinĩ wa thĩ ihinda rĩigana atĩa?

• Nũũ Mũira ũrĩa mũnene wa Jehova?