Hihi Ngai nĩ Ihũũra Aratũhũũra?

Thutha wa Japani kũgũmĩrũo nĩ sunami na gĩthingithia kĩa ũritũ wa Richter 9.0 mweri-inĩ wa Machi 2011, mũteti ũmwe ũrĩ gatũ wa bũrũri ũcio oigire ũũ: “O na gũtuĩka nĩ ndĩraiguĩra tha arĩa magũmĩirũo nĩ gĩcanjama kĩu, ngwĩciria nĩ tembatsu (ihũra rĩa Ngai).”

Hĩndĩ ĩrĩa andũ makĩria ma 220, 000 mooragirũo nĩ gĩthingithia kĩrĩa kĩagũmĩire Haiti mweri-inĩ wa Janũarĩ 2010, mũhunjia ũmwe ngũthi wa TV oigire ũndũ ũcio wekĩkire tondũ “maarĩ na mwĩhĩtwa na mũcukani” na kwoguo nĩ maabataraga “gũcokerera ngai.”

“Ngai arenda kwarahũra na kũriũkia thamiri ciitũ,” ũguo nĩguo mũhunjia ũmwe Mũgatoreki oigire rĩrĩa andũ 79 maakuire magĩtitimũrana gĩcigo-inĩ kĩa Manila bũrũri-inĩ wa Philippines. Ngathĩti ĩmwe ya bũrũri ũcio yoigire atĩ “gĩcunjĩ kĩa mĩrongo ĩrĩ na ĩmwe harĩ igana kĩa andũ agima metĩkĩtie atĩ Ngai aitũrũraga marakara make na njĩra ya kũrehe matuĩku, huho nene na icanjama ingĩ” iria igũmagĩra bũrũri ũcio.

 WĨTĨKIO wa atĩ Ngai nĩwe ũrehaga icanjama nĩguo aherithie andũ ti mũgeni. Mwaka wa 1755, thutha wa andũ makĩria ma 60,000 kũniinwo nĩ gĩthingithia, mwaki, na tsunami gĩcigo-inĩ kĩa Lisbon, bũrũri-inĩ wa Portugal, mũthomi ũrĩ igweta wĩtagwo Voltaire oririe ũũ: “Hihi nĩ kuuga arĩa maakuire thĩinĩ wa Lisbon maarĩ oru mũno gũkĩra andũ a Paris arĩa makoragwo na gĩkeno kĩnene?” Hatarĩ nganja, andũ milioni nyingĩ nĩ meyũragia kana Ngai ahũthagĩra icanjama cia ndũire kũherithia andũ. Thĩinĩ wa mabũrũri maingĩ icanjama ta icio kũna gũtuĩkaga nĩ mawĩko ma Ngai.

Tũgĩciria ũhoro wa maũndũ macio mothe-rĩ, harĩ bata twĩyũrie ũũ: Hihi kũna Ngai nĩ akoretwo akĩhũthĩra icanjama cia ndũire kũherithia andũ? Icanjama nyingĩ iria ikoretwo kuo ica ikuhĩ hihi nĩ mahũra kuuma kũrĩ Ngai?

Andũ amwe makĩhĩka gũcokereria Ngai mahĩtia, magwetaga maũndũ marĩ thĩinĩ wa Bibilia megiĩ hĩndĩ Ngai anahũthĩra mahinya ma ndũire kũniina andũ. (Kĩambĩrĩria 7:17-22; 18:20; 19:24, 25; Ndari 16:31-35) O na kũrĩ ũguo, gũthuthuria o ũmwe wa maũndũ macio magwetetwo thĩinĩ wa Bibilia, nĩ kuonanagia maũndũ matatũ manene ngũrani. Wa mbere, Ngai aambaga kũhe andũ mũkaana. Kerĩ, ngũrani na icanjama cia mahinda-inĩ maya iria ciũragaga andũ ega na oru, Ngai ndoragire andũ othe. No andũ arĩa aganu tu kana arĩa maaregire gũthikĩrĩria mĩkaana maaninirũo. Ũndũ wa gatatũ, nĩ atĩ Ngai nĩ aabangaga njĩra cia kũhonokeria arĩa maarĩ athingu.—Kĩambĩrĩria 7:1, 23; 19:15-17; Ndari 16:23-27.

Gũtirĩ ũira wonanagia atĩ icanjama nyingĩ iria ikoretwo ikĩgũmĩra mamilioni ma andũ mahinda-inĩ maya ciumanaga na Ngai. Gũkĩrĩ ũguo-rĩ, nĩ kĩĩ kĩratũma icanjama ta icio ciongerereke? Tũngĩhota atĩa kũhiũrania nacio? Na rĩrĩ, hihi nĩ kũrĩ hingo icanjama igaathira? Nĩ ũkuona macokio ma ciũria icio thĩinĩ wa icunjĩ iria irũmĩrĩire.