KUUMA NGOTHI-INĨ: MĨNYAMARO ĨINGIHITE ŨGUO NIKI? ĨGATHIRA RĨ?
Andũ Aingĩ Matarĩ na Ũũru nĩ Makuaga!
Kairĩtu geetagwo Noelle nĩ kendete andũ mũno na nĩ gaakenagĩra gũcora. Mũthenya ũmwe hwaĩ-inĩ rĩrĩa gaathakaga thutha wa nyũmba yao, nĩ kaagũire maĩ-inĩ handũ harĩa maatubagĩra, na gagĩkua gatigĩtie ciumia igĩrĩ tu gakinyie mĩaka ĩna.
Nao Charlotte, Daniel, Olivia na Josephine, maarĩ gatagatĩ-inĩ ka arutwo 20 a ũkũrũ wa mĩaka 6 kana 7 arĩa moragirũo rĩrĩa mũndũ ũmwe aarathire andũ 26 cukuru-inĩ ũmwe itũũra rĩa Connecticut, bũrũri-inĩ wa Amerika, tarĩki 14, Dicemba 2012. Akĩaria hĩndĩ ya mathiko ma ciana icio, Obama, Mũtongoria wa bũrũri ũcio nĩ aagwetire marĩtwa ma ciana icio na akĩra andũ ũũ: “Wĩki-naĩ ta ũyũ no mũhaka ũniinwo kaimana.”
Bano, wa ũkũrũ wa mĩaka 18 aathamire Iraq me hamwe na famĩlĩ yao na magĩthiĩ bũrũri wa Norway. Aatuĩtwo Riũa nĩ arata ake a kũu. No ũndũ wa kĩeha nĩ atĩ, aarĩ ũmwe wa andũ 77 arĩa moragirũo nĩ gĩtoi kĩmwe tarĩki 22, Julaĩ 2011, kĩrĩa kĩeganire gĩkiuga ũũ: “Na arĩ korũo nĩ hotire . . . kũũraga andũ aingĩ o na makĩria.”
Maũndũ ta macio ma gũtua nda nĩ maiguĩkaga kũndũ kũingĩ thĩinĩ wa thĩ. Ta wĩcirie ruo rũrĩa ruumanaga na aksidenti, wĩki-naĩ, mbaara, ũtoi, icanjama cia ndũire, na maũndũ ta macio. Andũ aingĩ mũno matarĩ na ũũru nĩ makuaga na angĩ makanyarirĩka o na matarĩ na kaũru mekĩte!
Andũ amwe nĩ macokagĩrĩria Ngai mahĩtia, makoiga atĩ Mũũmbi witũ ndatindanagĩra na andũ. Angĩ nao moigaga atĩ Ngai nĩ onaga tũkĩnyamarĩka no akarega kuoya ikinya. Na no kũrĩ angĩ moigaga atĩ maũndũ ta macio nĩ wendi wa Ngai. Kũroneka andũ nĩ makoragwo na mawoni maingĩ megiĩ ũndũ ũcio. Tũngĩruta kũ macokio ma ma na ma kwĩhokeka megiĩ maũndũ macio? Icunjĩ-inĩ iria ikũrũmĩrĩra, nĩ tũgũthuthuria ũrĩa Kiugo kĩa Ngai, Bibilia kiugaga ũhoro-inĩ wĩgiĩ kĩrĩa gĩtũmaga andũ manyamarĩke, na ũrĩa mĩnyamaro ĩkaaniinwo.
