Alona oigaga ũũ: “Rĩrĩa ndaigua kĩng’ora kĩagamba-rĩ, ngoro yakwa yambagĩrĩria kũhũra na ihenya na ngateng’era kwĩhitha tũnyũmba-inĩ tũrĩa twakagwo twa kũgirĩrĩria moimĩrĩro moru ma mbomu. No ona ndĩhithĩte hau no njiguaga ngĩtangĩka. Hakoragwo harĩ ũgwati makĩria rĩrĩa ndĩ nja, na hatirĩ handũ ingĩĩhitha. Hĩndĩ ĩmwe, ngĩthiĩ na njĩra, ndambĩrĩirie kũrĩra na ndiahotaga kũhuhia. Nĩ ndoire mathaa maingĩ mũno ingĩkahorera. Kĩng’ora gĩkĩgamba o rĩngĩ.”

Mbaara nĩ ĩmwe tu ya maũndũ marĩa marehaga ũgwati. Kwa ngerekano, rĩrĩa wamenya atĩ wee kana mũndũ ũngĩ wendete arĩ na mũrimũ mũũru mũno-rĩ, rĩkoragwo rĩrĩ igũtha inene mũno harĩ we. Nao andũ angĩ, matangĩkaga nĩ ũndũ wa gwĩtigĩra mahinda mokĩte. Meyũragia, ‘Hihi ciana citũ, kana ciana cia ciana citũ igũkũrĩra thĩ ĩrĩ na mbaara, wĩki naĩ, gũthũkio gwa thĩ, rĩera kũgarũrũka, na mĩrimũ?’ Tũngĩhiũrania atĩa na mĩtangĩko ta ĩno?

Gũkorũo oĩ atĩ maũndũ moru nĩ mekĩkaga-rĩ, “mũndũ mũbarĩrĩri [mũũgĩ] onaga gũkĩgĩa ũũru, akehitha.” (Thimo 27:12) Na o ta ũrĩa tũgeragia kũrũmbũiya ũgima witũ mwega wa mwĩrĩ, no tuoe ikinya rĩa kũgitĩra meciria maitũ o hamwe na ũrĩa tũiguaga. Maũndũ ma gwĩkenia ma ũhinya hamwe na riboti cia mohoro ciyũirũo nĩ mbica cia gwĩkĩra andũ guoya nĩ cituongagĩrĩra mĩtangĩko hamwe na ciana  citũ. Kwĩgirĩrĩria maũndũ ma ũhinya ti kuuga atĩ tũramahingĩra maitho tũgatua atĩ matirĩ kuo. Ngai ndombire meciria maitũ maikarage o magĩĩciragia maũndũ moru. Handũ ha ũguo, twagĩrĩirũo nĩ kũmaiyũria “maũndũ o marĩa ma ma, . . . ma kĩhooto, . . . marĩa matheru, . . . na marĩa mangĩendeka.” Tweka ũguo, “Ngai mwene thayũ” nĩ egũtũhe thayũ wa meciria na wa ngoro.—Afilipi 4:8, 9.

Wĩtĩkio wa ma nĩ ũtũteithagia kũhiũrania na mĩtangĩko. Bibilia ĩtwĩraga ‘tũkoragwo twĩiguĩte ũhoro-inĩ wa mahoya.’ (1 Petero 4:7, New World Translation) No tũhoe Ngai atũteithie na atũhe ũũgĩ na ũmĩrĩru ũndũ-inĩ ũrĩa tũngĩkorũo thĩinĩ waguo, tũrĩ na ma atĩ ‘twahoya ũndũ o ũrĩkũ no atũiguaga.’—1 Johana 5:15.

Bibilia ĩtaaragĩria atĩ “mũnene wa gũkũ thĩ” ti Ngai, no nĩ Shaitani, na atĩ “kĩrĩndĩ gĩa thĩ gĩothe nĩgĩtũire kĩnyitĩtwo nĩ ũcio mũũru.” (Johana 12:31; 1 Johana 5:19) Kwoguo-rĩ, Jesu ti kwaga aagĩte ũndũ wa kuuga rĩrĩa aatũrutire tũhoyage ũũ: “Ũtũhonokagie kuuma kũrĩ ũrĩa mũũru.” (Matthew 6:13, Holy Bible in Gĩkũyũ-Biblica) Alona oigaga, “Rĩrĩa kĩng’ora kĩambĩrĩria kũgamba-rĩ, hoyaga Jehova andeithie hote kwĩgirĩrĩria. Ningĩ mũthuri wakwa nĩ aahũragĩra thimũ tũkahoya hamwe. Kũhoya nĩ gũteithagia mũno.” No ta ũrĩa Bibilia yugĩte: “Jehova-rĩ, arĩa othe mamũkayagĩra, akoragwo hakuhĩ nao, o arĩa othe mamũkayagĩra nĩ kũmwĩhoka na ma.”—Thaburi 145:18.

Thĩinĩ wa Mahunjio ma Kĩrĩma-inĩ-rĩ, Jesu arutire arũmĩrĩri ake mahoyage ũũ: “Ũthamaki waku ũũke.” (Mathayo 6:10) Ũthamaki wa Ngai ũkeeheria kaimana mĩtangĩko yothe ĩrĩa mĩũru. Kũgerera kwĩ Jesu, “Mũnene-wa-Thayũ,” Ngai nĩ ‘akaanina mbaara nginya o gĩturi gĩa thĩ.’ (Isaia 9:6; Thaburi 46:9) “Nake [Ngai] nĩagatuithania ndũrĩrĩ nyingĩ macira . . . Gũtirĩ rũrĩrĩ rũgacoka gũcomorera rũrĩa rũngĩ rũhiũ rũa njora, o na kana icoke kwĩĩgithia mbaara rĩngĩ o na rĩ. . . . na gũtigĩe mũndũ wa kũmamakia.” (Mika 4:3, 4) Andũ a famĩlĩ marĩ na gĩkeno “nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo.” (Isaia 65:21) “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru.”—Isaia 33:24.

Mahinda-inĩ maya, o na andũ mageria kwĩmenyerera atĩa, kaingĩ gũtihotekaga kwĩgirĩrĩria ‘maũndũ materĩgĩrĩirũo’ kana gwĩthema gũkorũo handũ hataagĩrĩire ihinda rĩrĩa rĩtagĩrĩire. (Kohelethu 9:11, New World Translation) Ta ũrĩa gũkoretwo karine nyingĩ-rĩ, mbaara, wĩki naĩ, na mĩrimũ no ĩrathiĩ na mbere kũniina andũ ega. Andũ acio marĩ na kĩĩrĩgĩrĩro kĩrĩkũ?

Andũ milioni nyingĩ, arĩa mũigana wao no Ngai tu ũĩ, nĩ magaatũũra rĩngĩ. Ihinda-inĩ rĩrĩ, makomete, marĩ kĩririkano-inĩ kĩa Ngai, nginya rĩrĩa ‘arĩa othe me thĩinĩ wa mbĩrĩra . . . makoima kuo.’ (Johana 5:28, 29) Ĩkĩarĩrĩria ũhoro wĩgiĩ kũriũka kwa arĩa akuũ, Bibilia ĩtũũmagĩrĩria ũũ: “Na kĩĩrĩgĩrĩro kĩu-rĩ, twĩ nakĩo ta arĩ nanga ya roho, nakĩo nĩ gĩa kwĩhokeka, na nĩ kĩrũmu.” (Ahibirania 6:19) Nake Ngai “nĩamenyithĩtie andũ othe atĩ ũhoro ũcio nĩ wa ma nĩ ũrĩa aamũriũkirie [Jesu] oime kũrĩ arĩa akuũ.”—Atũmwo 17:31.

Ihinda-inĩ rĩrĩ, o na arĩa marageria gwĩka wendi wa Ngai nĩ marĩcemanagia na mĩtangĩko. Nĩ ũndũ wa kuoya makinya marĩa maagĩrĩire, gũkuhĩrĩria Ngai kũgerera mahoya, na gwaka wĩtĩkio witũ harĩ kĩĩrĩgĩrĩro kĩrĩa Bibilia ĩtũheaga-rĩ, Paul, Janet, na Alona nĩ mahotete kũhiũrania wega na mĩtangĩko. O ta ũrĩa amekĩire, “Ngai mwene kĩĩrĩgĩrĩro giitũ, arotũma mũiyũragwo o kũiyũrũo nĩ gĩkeno o na thayũ tondũ wa ũrĩa mwĩtĩkĩtie.”—Aroma 15:13.