Osho ombiibeli tai ti

“Omaudano a nyika oshiponga”—Mbela oto ke litula moshiponga?

OSHIFO SHO-THE WILLOW GLEN RESIDENT NEWSPAPER OSHA TI: “KUNENA, VAHAPU INATU HALA VALI OKUKALA HATU TALE, NDELE OFYE VENE TWA HALA OKUWA MEEDILA, OKULONDA EEMHUNDA, OKUKUNGULUKA PEWO LOMEVA NOKUYOWA NEESHI DEESHAAKA.”

OSHO sha popiwa koshifo osho otashi holola kutya omaudano paife ohaa danwa meenghedi tadi eta oshiponga. Osho oshi liwetikile momaudano oo haa danwa paife kuvahapu ngaashi, okunhuka modila, okulonda oikangwameva, okuwa mombada nomaparashute, nokunuka poule, * otai ulike kutya ounyuni ou kau na ko nasha noinima ya nyika oshiponga. Okudanauka kombada yoikangwameva, okweenda kombada yondau, okushinga eembashikela keemhunda, okulishinga noupilangi ve na oulola nokulishinga neenghaku doulola ohaku ningwa fiyo omunhu ta fiki poshitwa sha koyelela okudula kwaye, ngaashi mokuya koxulo yomhunda, okuya mefilu lile nokunuka poima pale unene. Ngaashi oshifo sho-Time sha popya, eshi paife omaudano oo a ‘nyika oshiponga’ e holike kuvahapu, omaudano omo ovakufimbinga hava dana monghedi tai va etele oshiponga neenghono, otashi ulike kutya ovanhu omamiliyona ova halelela okukufa ombinga “fiyo oposhitwa shaxuuninwa opo omapenda oo haa dana momaxuliloshivike, ovatondoki dingi, have limete kutya ohava dana fiyo oposhitwa shilipi.”

Ashike molwaashi omaudano oo oku holike kuvahapu, paife ohaa pula ovanhu oshimaliwa shihapu. Ovanhu vahapu ohava mono oiponga ngeenge ova dana sha pitilila omaudano oo inaa nyika oshiponga. Mo-United States mo 1997, omuvalu wovanhu va mona oiponga ovo have uya kounduda omo hamu hakulilwa ya etifwa koubolota vokeemhadi ve na oulola, wa hapupala neepelesenda 33, oyo ya etifa kokulishinga kombada yoikangwameva eepelesenda 31, kokulonda eemhunda eepelesenda 20. Omaudano amwe vali ohaa etifa oidjemo ii unene, ngaashi shi liwetikile mokuhapupala kwomafyo oo haa etifwa komaudano a nyika oshiponga. Ovanhu ovo va kufa ombinga momaudano a tya ngaho ove shii kutya okwa nyika oshiponga. Omukainhu umwe oo a kufa ombinga mokufenunuka koikangwameva, okwa ti: “Momadiladilo ange ohandi kala alushe nda fa ndi wete handi fi.” Umwe oo ha shingi okabolota kombada yoikangwameva okwa ti kutya, ngeenge ino mona oshiponga, shapo ino kendabala sha wana.”

Okutala koumauyelele oo, Omukriste oku na okukala e na etaleko la tya ngahelipi li na sha nokukufa ombinga moinima ya tya ngaho? Ongahelipi Ombiibeli tai dulu oku tu kwafela tu tokole kutya natu kufe ombinga momaudano a nyika oshiponga, ile hasho? Okukonakona shi na sha nanghee Kalunga ha tale ko ouyapuki womwenyo otaku ke tu kwafela tu nyamukule omapulo oo.

Etaleko laKalunga li na sha nomwenyo

Ombiibeli oya ti kutya Jehova oye “ofifiya yomwenyo.” (Epsalme 36:9) Kalunga ine tu shita ashike, ndele okwa fya yo oshisho opo tu kale tu na osho twa pumbwa opo tu hafele onghalamwenyo. (Epsalme 139:14; Oilonga 14:16, 17; 17:24-28) Onghee hano, oshi li pandunge okufika pexulifodiladilo kutya okwa teelela tu kale tu na ko nasha naasho e tu pa. Eemhango nomafinamhango oo a li a pewa Ovaisrael otae tu kwafele tu ulike kutya otwa pandula oushili oo.

Omhango yaMoses oya li tai pula omunhu a katuke eenghatu donhumba opo a amene eemwenyo davamwe. Ngeenge osho osha kala inashi ningwa ndele tapa kana omwenyo, oo a li ta dulu okukelela oshiponga okwa li e na etimba lohonde. Pashihopaenenwa, mwene weumbo okwa li a lombwelwa a tungile keumbo ekuma lixupi, ile einda la dingilila pombada yoipeleki. Ngeenge hasho, eumbo otali ka kala li na etimba lohonde ngeenge umwe okwa u ko ndele ta fi. (Deuteronomion 22:8) Ngeenge ongobe ya li ya twa omunhu ombadilila ndele ta fi, mwene wongobe ka li e na etimba. Mepingafano naasho, ngeenge ongobe oya shiivika kutya oya nyika oshiponga namwene wayo okwa londwelwa shi na sha nayo, ndele ine i pashukila, ndele tai tu omunhu ndele ta fi, mwene wongobe okwa li e na etimba nokwa li e na okudipawa. (Exodus 21:28, 29) Molwaashi omwenyo ou na ondilo kuJehova, omhango yaye otai ulike kutya okwa lenga omwenyo nokwa hala oku u amena.

Ovapiya vaKalunga ovadiinini ove udite ko kutya omafinamhango oo otaa longo yo nongeenge tashi uya pokulietela oshiponga ove mwene. Mehokololo limwe lOmbiibeli, David okwa li a popya kutya okwa hala a nwe “omeva omondungu oyo i li poshivelo shaBetlehem.” Pefimbo opo Betlehem osha li mepangelo lOvafilisti. Eshi ovakwaita ve shi uda, vatatu vomuvo ove livakela mokamba yOvafilisti, tava teke mo omeva mondungu, ndele tave a etele David. Mbela David okwa li e linyenga ngahelipi? Ka li a nwa omeva oo, ndele ponhele yaasho okwe a tilashi pedu. Okwa ti: “Itandi dulu ndi nwe omeva aa, osheshi onda fa handi nu ohonde yovalumenhu ava, ve ke a talele mokweekelashi eemwenyo davo.” (1 Omafimbo 11:17-19) David ka li a hala omwenyo u ye moshiponga opo a mone osho a hala.

Jesus okwa li a ninga sha faafana eshi a li a yelekwa tashi dulika okupitila memoniko, e liumbe kombada yotembeli a tale ngeenge ovaengeli otave mu amene aha mone oshiponga. Jesus okwa li a nyamukula ta ti: “Ino yeleka Jehova Kalunga.” (Mateus 4:5-7) Osha yela kutya David naJesus ova li ve wete kutya osha puka momesho aKalunga okutula omwenyo womunhu moshiponga.

Okudiladila koihopaenenwa oyo, otashi dulika tu lipule kutya, ‘Ongahelipi hatu dulu okumona kutya onaini oudano tau i fiyo oposhitwa sha nyika oshiponga? Molwaashi nokuli nomalihafifo oo inaa nyika oshiponga otaa dulu okudanwa fiyo oposhitwa sha nyika oshiponga, onaini hatu dulu okumona kutya natu xulile peni?’

Mbela owa hala okulimonifa oshiponga?

Okutala nawa osho twa hala okuninga otaku tu kwafele tu mone enyamukulo. Pashihopaenenwa, otashi dulika tu lipule kutya, ‘Mbela moudano omu ohamu di oiponga i fike peni? Mbela onda deulwa ngoo, ile ondi na ngoo oyaamenifi yokukelela oshiponga? Mbela otapa ka kala oilanduliko ya tya ngahelipi ngeenge onda u ko, ile nda nuka nai, ile pamwe ngeenge oyaamenifi yange inai longa nawa? Mbela otashi ka kala oshiponga shinini, ile osha kwata moiti?’

Okulietela oshiponga omolwomalihafifo otashi dulu okukuma ekwatafano lOmukriste naJehova nosho yo omhito oyo a li e na yokukala nomaufembanghenda e likalekelwa meongalo. (1 Timoteus 3:2, 8-10; 4:12; Titus 2:6-8) Osha yela kutya, kutya nee Omukriste ota kufa ombinga momalihafifo, oku na okudiladila kunghee Omushiti ha tale ko ouyapuki womwenyo.

[Eshangelo lopedu]