Tu lombwela onakudiwa yoye.

Onda dalelwa moUnited States, mo 1979. Eshi nda li ndi na eedula nhatu, ovadali vange ova teya ohombo. Meme okwa honga nge omifyuululwakalo dOshijuda nokwa li a tuma nge ko-jeshiva, ile kofikola yOshijuda. Eshi nda li ndi na eedula heyali, otwa tembukila koIsrael oule wodula, nonda li handi i kofikola i li momudingonoko woilonga hai ifanwa kibbutz. Opo nee fye nameme otwa tembukila koMexico.

Nonande moshitukulwa kamwa li oshinagoga, onda li nda diinina eenghedindjikilile dange dOshijuda. Onda li handi tema omalixita mEshabata, handi lesha oTorah, nonda li handi ilikana omailikano oo e li membo lomailikano. Kofikola, luhapu onda li handi lombwele ovanafikola vomongudu yetu kutya elongelokalunga letu olo lotete komalongelokalunga aeshe. Nghi na efiku nda leshele osho haku tiwa Etestamenti Lipe, olo tali yandje elitulemo koukalele nokomahongo aJesus Kristus. Ashike meme okwa li a londwela nge kutya inandi li lesha, molwaashi okwa li a tila kutya ohandi nwefwa mo nai komahongo alo.

Oshike she ku linyengifa u tokole okulesha Etestamenti Lipe?

Eshi nda wanifa eedula 17, onda tembukila koUnited States opo ndi ka manife ehongo lange. Fimbo nda li oko, omushiivikile umwe oo a ti kutya Omukriste, okwa li a lombwela nge kutya onghalamwenyo yange itai kala i na eityo ngeenge inandi itavela muJesus.

Onde mu nyamukula nda ti: “Ovanhu ovo va itavela muJesus ova pofipala.”

Okwa pula nge a ti: “Owa lesha ngoo nale Etestamenti Lipe?”

Onda nyamukula nda ti: “Ahowe.”

Okwa ti: “Kungaho, ku na eshi u shii, ongahelipi to dulu okuninga etyekosha loshinima osho uhe shii?”

Eendjovo daye oda li da kuma nge neenghono, molwaashi onda kala alushe handi diladila kutya osha nyika oulai okuninga etyekosha kombinga yoshinima osho uhe shii. Molwaashi onda li nda fya ohoni, onda li nda ya nOmbiibeli yaye keumbo ndele handi hovele okulesha Etestamenti Lipe.

Owa kumwa ngahelipi kwaasho wa lesha?

Onda li nda kumwa eshi nda shiiva kutya Etestamenti Lipe ola shangwa kOvajuda. Kakele kaasho, eshi nda kala handi lesha shihapu, onda didilika kutya Jesus omunanghenda, Omujuda omulininipiki, oo a li a hala okukwafela ovanhu, ndele haku va hepeka. Onda li nokuli nda ya kongulu yomambo, ndele handi ehela ko omambo oo taa popi kombinga yaye. Ashike kape nande olimwe la li la tomha nge kutya oye Messias. Amwe okwa li nokuli taa ti kutya oye Kalunga, naasho kasha li shi na eityo la sha kwaame. Mbela Jesus okwa li ha ilikana kulyelye, okuye mwene? Kakele kaasho, Jesus okwa file, ashike Ombiibeli otai ti kutya Kalunga ‘iha fi.’ *

Oshike she ku kwafela u mone omanyamukulo?

Oshili ihai lipataneke, nonda li nda tokola okumona oshili. Onghee onda li nda ilikana kuKalunga tashi di komutima nohandi lili, nopomhito oyo kanda li nda kwafelwa kembo lomailikano. Eshi ngoo opo nda mane, pomuvelo opa li pa kongholwa. Opa li pe uya Eendombwedi daJehova mbali. Oda li da pa nge shimwe shomoishangomwa yado shokukonakona Ombiibeli. Oshishangomwa osho nosho yo eenghundafana odo nda kala handi ningi nEendombwedi, oya tomha nge kutya eitavelo lado ola kanghamena kOmbiibeli. Pashihopaenenwa, Eendombwedi oda itavela kutya Jesus “Omona waKalunga,” * noye a ‘shitwa tete kuKalunga.’ *

Diva konima yaasho, onda shuna koMexico, oko nda ka twikila okukonakona omaxunganeko e na sha naMessias nEendombwedi. Onda li nda kumwa okushiiva kutya ope na omaxunganeko mahapu. Ashike kanda li naanaa nda tomhwa. Onda li nde lipula kutya: ‘Mbela Jesus oye aeke a dula okudana onghandangala oyo? Ongahelipi ngeenge okwa li ashike omunhu e na eendunge oo ta dulu okuliningifa a fa oye ta dana onghandangala oyo?’

Oshike she ku tomha u itavele?

Eendombwedi oda ulikila nge omaxunganeko oo itaa dulu okuhopaenenwa komunhu te liningifa. Pashihopaenenwa, omido 700 komesho yefimbo, omuprofeti Mika okwa li a xunganeka kutya Messias okwa li ta ka dalelwa muBetlehem, shaJudea *. Kapa li oo ta dulu okuya moshipala opo e na okudalelwa. Jesaja okwa shanga kutya Messias okwa li ta ka dipawa a fa omukaulinyanga, ashike okwa li ta ka pakwa opo hapa pakwa oipuna. * Omaxunganeko aeshe oo okwa li a wanifilwa Jesus.

Oumbangi waxuuninwa owa kwatela mo epata omo mwa dja Jesus. Ombiibeli oya popya kutya Messias okwa li ta ka dja mepata lohamba David. * Molwaashi Ovajuda vonale ova li hava diinine omikanda daaveshe nodopaumwene domisholondodo domapata, onghee hano ngeno Jesus ka li a dja mepata laDavid, ngeno ovatondi vaye ova kala tave shi popi keshe pamwe. Ashike kava li va dula oku shi ninga, molwaashi kava li tava dulu okutwa eemhata kutya Jesus naDavid inave li pamba. Eengudu dovanhu oda li nokuli hadi mu ula kutya “Omona waDavid.” *

Mo 70 O.P., eshi pa pita eedula 37 konima yefyo laJesus, etangakwaita laRoma ola li la hanauna po Jerusalem, nomisholondodo domapata oda li da kana ile da hanaunwa po. Onghee opo ku didilikwe kutya okwa dja mepata lalyelye, Messias okwa li e na okuuya komesho yo 70 O.P.

Osho oshe ku kuma ngahelipi?

MuDeuteronomion 18:18, 19 omwa xunganekwa kutya Kalunga okwa li ta ka pendula omuprofeti muIsrael a fa Moses. Kalunga okwa ti kutya keshe “ou ita dulika keendjovo dange, odo Ye te di tongo medina lange, Ame mwene ohandi ke mu twifa eemhata.” Okukonakona kwange Ombiibeli aishe moule osha tomha nge ndi itavele kutya Jesus Omunasaret oye a li omuprofeti oo.