Omido omilongo da pita, ovadali ova li ve na omhito iwa yokupopya nounona vavo voumati, ile oukadona kombinga yomilele. Ova li yo tava dulu oku va yelifila kanini nakanini, she likolelela keedula nokeemhumbwe davo.

Ashike eenghalo paife oda lunduluka. Embo ledina The Lolita Effect ola ti: “Ounona paife ohava mono omatumwalaka oinima ya nyika omilele shi dulife nale okudja peedula dopedu, naimwe ohai pitile moikundaneki.” Mbela onghedi ya tya ngaho ohai kwafele ngoo shili ounona, ile ohai va etele oshiponga?

Ouyelele ou li keshe pamwe. Deborah Hoffman okwa popya membo laye ledina Talk to me first, a ti kutya “eenghundafana, omashiivifo oipindi, eemuvi, omambo, omaimbilo, eeprograma doko-TV, oishangomwa, omashiivifo nosho yo eengodi dopeke neekombiyuta, oiyadi omafano oipala, eendjovo nosho yo oinima ya futama oyo [ovanyasha nounona] tashi dulika va fike pexulifodiladilo kutya omilele . . . oda fimanenena.”

Omashiivifo oipindi nao oku na ombedi. Ovashiivifi voipindi novalandifi ohava landifa oikutu younona tai pendula omahalo opamilele, tave va deula okudja peedula dinini va kale tava yandje elitulemo lihapu keholokepo lavo. Embo ledina So sexy so soon ola ti: “Ovalandifi ove shii kutya ounona ove na eshiivo la ngabekwa, nomolwaasho ohava longifa onghedi ya tya ngaho opo ve va pukife. Omafano aeshe oo omilele noinima aishe ya kwatelwa mo, oya longwa nelalakano opo ounona va kale va hala oinima ipe.”

Kape na ouyelele wa wana. Ngaashi ashike pe na eyooloko pokati kokushiiva nghee ohauto hai longo nosho yo okukala omushingi a pyokoka, ope na yo eyooloko pokati kokukala u na eshiivo lomilele nokulongifa eshiivo la tya ngaho u ninge etokolo li li pandunge.

Oushili oyoo kutya: Kunena, owa pumbwa okukwafela ounona voye shi dulife nale, opo va deule “eendunge davo dokuyoolola” va kale ve shii “okutongola ouwa nowii.” — Ovaheberi 5:14.

Kala ho popi nounona voye. Nonande oshikale shidjuu kwoove, okupopya nounona voye kombinga yomilele oshi li oshinakuwanifwa shoye. Shi tambula ko. — Efinamhango lOmbiibeli: Omayeletumbulo 22:6.

Kala ho kundafana navo pauxupi. Ponhele yokupopya oinima ihapu kombinga yomilele, longifa omhito keshe u kundafane nokaana koye, tashi dulika ofimbo mu li onye amuke vavali molweendo, ile mwe lipyakidila noilonga yomeumbo. Opo u kwafele ounona va kale va manguluka okupopya, va pula omapulo. Pashihopaenenwa, ponhele yokutya: “Ou hole efano olo li na oinima ya nyika omilele?” oto dulu okutya, “Ou shii mbela kutya omolwashike ovashiivifi voipindi hava longifa onghedi oyo opo va shiivife oilandomwa?” Ngeenge okaana ka nyamukula, oto dulu okupula kutya “Ou udite ngahelipi kombinga yaasho?” — Efinamhango lOmbiibeli: Deuteronomion 6:6, 7.

Popya nako she likolelela keedula dako. Ounona ovo ve li moshikunino otava dulu okuhongwa omadina oilyo yoludalo, nonghee ve na okuliamena kovanhu ovo hava hepeke ounona pamilele. Eshi tava ende tava kulu, otava dulu okuhongwa kutya oshike hashi ningwa po opo okaana ka dalwe. Eshi tava fiki peedula omulongo nasha, ove na okukala ve na etaleko la yuka li na sha noilyo yoludalo nosho yo omilele.

Va honga eenghedi. Hovela okuhonga ounona voye okudja peedula dopedu shi na sha nokukala ovanashili, ovadiinini nosho yo okukala nefimaneko. Opo nee ngeenge tamu kundafana kombinga yomilele, ou na nale ekanghameno oko to tungile. Va yelifila yo nawa kombinga yeenghedi. Pashihopaenenwa, ngeenge owa tala ko omilele komesho yohombo inadi koshoka, va lombwela. Va yelifila yo kutya omolwashike sha puka nosha nyika oshiponga. Embo ledina Beyond the Big Talk ola ti: “Ounona veedula omulongo nasha ovo hava ti kutya ovadali vavo ove li omhinge novanyasha tava i momilele, oshi na oupu vaha ye momilele.”

Tula po oshihopaenenwa. Kala metwokumwe naasho ho hongo ounona. Pashihopaenenwa, mbela oho yolo omashendjo inaa koshoka? ile oho djala oikutu tai pendula omilele? ile ou na oikala tai kokele vamwe momilele? Eenghatu da tya ngaho otadi dulu okungushulula eenghedi odo to kendabala okuhonga ounona voye. — Efinamhango lOmbiibeli: Ovaroma 2:21.

Kala u na etaleko liwa. Omilele odi li oshali ya dja kuKalunga, notadi dulu okweetela ovalihomboli ehafo. (Omayeletumbulo 5:18,19) Lombwela ounona voye kutya otava ka dula okuhafela oshali oyo monakwiiwa nopehe na oilanduliko nomaupyakadi oo haa etifwa kokuya momilele komesho yohombo. — 1 Timoteus 1:18,19.