OMAHEPEKAFANO OMOMAUMBO NEKWATONGHONGA: Olaporta imwe mOiwana ya Hangana oya ti: “Omukainhu umwe womovakainhu vatatu okwa longelwa omunyonena palutu ile pamilele kukaume kaye kopofingo monghalamwenyo yaye.” Shi nyikifa oluhodi, “otaku tengenekwa kutya mounyuni aushe, omukainhu umwe womovakainhu vatano ota ka ninga oshihakanwa shekwatonghonga ile a ningilwe eenghendabala dekwatonghonga.”

OMINYONENA DOMOMAPANDAVADA: Moilongo ya Hangana otamu popiwa kutya omu na eengudu dovanhu ovo hava longo ominyonena di dule po 30 000. MuAmerika lokOlukadi, konyala omunhu umwe womovanhu vatatu otaku popiwa kutya oku li oshihakanwa shomunyonena.

OMADIPAO: Ovanhu omayovi omafele atano lwaapo ova dipawa omudo wa dja ko, ve dule ovo va dipawa moita. MuAfrika lOkoumbuwanhu nosho yo muAmerika lOpokati omadipao okwa londa pombada, e dule oo haa ningwa mounyuni aushe lwoikando ine. MuLatin Amerika omwa dipawa ovanhu ve dulife po 100 000 momudo umwe, ofimbo muBrazil ovanhu 50 000 lwaapo. Mbela openi hatu dulu okumona ekandulepo filufilu lominyonena?

Omolwashike ominyonena di li keshe pamwe? Oinima ihapu oyo hai etifa ominyonena ongaashi omafininiko onghalo nawa nouxupilo uhe fike pamwe, elihumbato lii lovakulunhu olo hali nwefa mo ounona, okunyona po onghalamwenyo yavamwe, elongifo nai loikunwa yoalkoholi noloingangamifi nosho yo ovalongi vominyonena ovo hava ningile oinima owina molwaashi ihava katukilwa onghatu ya kwata moiti.

Opa ningwa omalunduluko mokuninipika ominyonena moitukulwa imwe younyuni. Modoolopa oyo i yadi ovanhu yaSão Paulo, moBrazil, okwa lopotwa kutya moule womido omulongo da pita omadipao okwa ninipala neepersenda 80 lwaapo. Ashike ominyonena onghee ngoo tadi hapupala modoolopa oyo, novanhu 10 vomovakalimo 100 000 ohava dipawa. Oshike tashi dulu okuxulifa po ominyonena filufilu?

Opo ominyonena di xulifwe po filufilu, ovanhu ova pumbwa okukala ve na elihumbato noikala iwa. Ovalongi vominyonena opo va lundulule oikala yavo, ove na okweefa po omaukwatya mai ngaashi ounhwa, olwisho nokuliholamwene. Ponhele yaasho, ova pumbwa okukala ve na ohole, efimaneko nove na ko nasha novanhu vakwao.

Oshike tashi dulu okulinyengifa omunhu a ninge omalunduluko oo meendelelo? Diladila kwaasho Ombiibeli tai hongo:

• “Ohole yokuhola Kalunga oyo tuu ei nokutya, tu diinine oipango yaye.” — 1 Johannes 5:3.

• “Etilo lokutila Omwene olo okutonda osho shii.” — Omayeletumbulo 8:13.

Ohole yokuhola Kalunga netilo loku mu handukifa otai dulu okulinyengifa nokukwafela ovalongi vominyonena va lundulule onghalamwenyo yavo, sha hala kutya  okulundulula ounhu wavo womeni filufilu. Mbela osho otashi dulu ngoo okuningwa shili?

Natu ka taleni kuAlex, * oo a li a panga omido 19 modolongo moBrazil omolwokulonga oilonga yominyonena. Okwa ka ninga umwe womEendombwedi daJehova mo 2000 konima eshi a konakona Ombiibeli nEendombwedi. Mbela Alex okwa efa po ngoo filufilu elihumbato laye lokulonga ominyonena? Heeno, nomolwaasho a li e lipa oushima neenghono omolwoilonga ii aishe oyo a li a longa. Okwa ti: “Paife ondi hole Kalunga eshi a ningifa nge ndi kale ndi udite kutya okwa dimina nge po filufilu. Olupandu nohole yokuhola Jehova oya kwafela nge ndi efe po eenghedi dange dii.”

Omulumenhu wedina César naye womoBrazil, okwa li umwe womeembudi odo hadi teya omatungo da homata. Okwa kala ha ningi ngaho oule womido 15. Oshike mbela sha lundulula onghalamwenyo yaye? Eshi a li modolongo, okwa li a talelwa po kEendombwedi daJehova, ndele naye ta konakona Ombiibeli. César okwa ti: “Eshi nda konakona Ombiibeli, onda li nda mona elalakano longhalamwenyo. Onda li nde lihonga okukala ndi hole Jehova noku mu tila, oumbada wa yuka wokutila okulonga vali owii noku mu nyemateka. Onda li nda hala okuulika olupandu omolwonghenda yaye. Ohole noumbada wa tya ngaho, oye linyengifa nge ndi efe po elihumbato lii.”

Oshike hatu lihongo moimoniwa oyo? Otai tu hongo kutya Ombiibeli oi na eenghono dokulundulula onghalamwenyo yovanhu filufilu, tai dulu okulundulula onghedi yavo yokudiladila. (Ovaefeso 4:23) Alex oo a popiwa metetekelo okwa ti: “Osho nde lihonga mOmbiibeli okwa li ashike sha fa omeva a yela a tilwa kwaame, oo kanini nakanini a enda taa kosho nge omadiladilo mai meityo lopafaneko. Kanda li handi diladila ngeenge fiku limwe onandi ka efe po ngoo elihumbato lii.” Onghee hano, ngeenge otwa yadifa omadiladilo etu netumwalaka la koshoka lOmbiibeli, otali ka kosha mo owii mufye. Eendjovo daKalunga odi na eenghono dokukoshola owii keshe. (Ovaefeso 5:26) Otadi dulu yo okukwafela ovakolokoshi nosho yo ovo ve lihole vovene va lundulule elihumbato lavo lii, nokuninga ovananghenda novanambili. (Ovaroma 12:18) Ohava kala ve na ombili eshi tava tula moilonga omafinamhango Ombiibeli. — Jesaja 48:18.

Eendombwedi daJehova di dulife pomamiliyona ahetatu di li moilongo 240 oda mona oshinima sha fimana osho tashi dulu okuxulifa po ominyonena. Oda dja momihoko adishe, di na eendodo da yoolokafana moulikumwe wovanhu, da dja momaputuko e lili noku lili, de lihonga okukala di hole Kalunga noku mu tila nokuholafana. Odi li yo oukwaneumbo womounyuni aushe u na ombili. (1 Petrus 4:8) Onghedi yado yokukalamwenyo otai yandje oumbangi wa yela kutya mounyuni otamu dulu okukala muhe na elongifo leenghono.

Ombiibeli oya udaneka kutya mafiku Kalunga ota ka xulifa po ominyonena kombada yedu. Ounyuni ou woukolokoshi owa teelela ‘efiku letokolo nolekano lovahenakalunga.’ (2 Petrus 3:5-7) Ovo hava longele ovanhu vakwao ominyonena itava ka kala po vali. Ongahelipi hatu dulu okukala noushili kutya Kalunga ota ka katuka onghatu shili a xulife po ominyonena?

Ombiibeli otai ti kutya Kalunga oku tonde ‘ou e hole owii.’ (Epsalme 11:5) Omushiti oku hole ombili nosho yo ouyuki. (Epsalme 33:5; 37:28) Nomolwaasho ite ke lididimikila nande ovakolokoshi fiyo alushe.

Onghee hano, ounyuni mupe wombili ou li popepi. (Epsalme 37:11; 72:14) Lihonga shihapu shi na sha nanghee to dulu okukala wa wana opo u ka kale mounyuni oo uhe na ominyonena.