Ngaashi sha kundafanwa moshitukulwa sha tetekela, Jesus okwa li a yandja elitulemo ‘kokuudifa onghundana iwa yOuhamba waKalunga.’ (Lukas 8:1) Okwa li ha ende eekilometa omafele medu alishe laIsrael opo a honge ovanhu kombinga yOuhamba waKalunga. Oukalele waJesus owa shangwa mOmavaengeli ane, omo mwa tumbulwa Ouhamba lwoikando i dule 100. Oikando aishe oyo otai hangwa meendjovo daJesus, ashike kai lile po eemhito adishe odo a popya kombinga yOuhamba. — Johannes 21:25.

Omolwashike Ouhamba wa li wa fimana neenghono kuJesus eshi a li kombada yedu? Oshinima shimwe oshosho kutya, Jesus okwa li e shii kutya okwa hoololwa a kale Omupangeli wao. (Jesaja 9:6; Lukas 22:28-30) Ashike Jesus kali ta yandje elitulemo mokumona eenghono, ile okulikongela etumbalo. (Mateus 11:29; Markus 10:17, 18) Kali ta xumifa komesho Ouhamba omolwouwa waye mwene. Ndele Jesus okwa li e na ohokwe mOuhamba waKalunga * omolwouwa oo tau ka ningila ovo e hole, Xe womeulu nosho yo ovashikuli vaye ovadiinini.

Jesus oku hole neenghono Xe yaye womeulu. (Omayeletumbulo 8:30; Johannes 14:31) Okwa lenga neenghono omaukwatya aXe mawa, ngaashi ohole yaYe, olukeno laYe nosho yo ouyuki waYe. (Deuteronomion 32:4; Jesaja 49:15; 1 Johannes 4:8) Onghee hano, Jesus oku na okukala e tonde oipupulu oyo tai tandavelifwa shi na sha naXe, oipupulu ngaashi oyo kutya Kalunga ke na ko nasha nokumona oixuna kwovanhu nokwa hala tu mone oixuna. Naasho oshi li etomheno limwe kutya omolwashike Jesus a li a halelela okuudifa “onghundana iwa yOuhamba,” molwaashi okwa li e shii kutya mokweendela ko kwefimbo Ouhamba otau ka yapulifa edina laXe. (Mateus 4:23; 6:9, 10) Otau ke shi ninga ngahelipi?

Okupitila mOuhamba, Jehova ota ka ninga omalunduluko oo taa ka etela ovanhu ouwa. “Ota ka feta po omahodi” momesho ovapiya vaye ovadiinini. Jehova ota ka hanauna po oinima aishe oyo hai etele ovanhu oluhodi, mokushilipaleka kutya ‘efyo itali ka kala po vali, ile oluhodi, okulila nouyahame itau ka kala po vali.’ (Ehololo 21:3, 4) Okupitila mOuhamba, Kalunga ota ka xulifa po oinima aishe oyo hai monifa ovanhu oixuna. *

Osho itashi tu kumwifa kutya omolwashike Jesus a li a halelela okulombwela ovanhu kombinga yOuhamba! Okwa li e shi shii kutya otau ka holola eenghono nosho yo olukeno laXe. (Jakob 5:11) Jesus okwa li yo e shii kutya Ouhamba otau ka etela ovanhu ovadiinini ouwa.

Fimbo Jesus a li ine uya kombada yedu, okwa kala meulu pamwe naXe. Xe okwa longifa Omona waye opo va shite oinima ngaashi, eulu likumwifi, li na eenyofi itadi dulu okuvalwa, ominghalavili, opulaneta yetu iwa nosho yo oifitukuti. (Ovakolossi 1:15, 16) Ashike Jesus okwa kala a “nyakukilwa” ile tu tye e hole ovanhu shi dulife oinima aishe oyo. — Omayeletumbulo 8:31.

Jesus okwa ulika kutya oku hole ovanhu eshi a li ta wanifa po oukalele waye. Okudja pehovelo, okwe shi yelifa nawa kutya okwa li e uya kombada yedu a ‘udifile eehepele onghundana iwa.’ (Lukas 4:18) Ashike Jesus kali ashike a popya kutya ota kwafele ovanhu, ndele ite shi ningi. Okwa ulika lwoikando noikando kutya oku hole ovanhu. Pashihopaenenwa, eshi ongudu yovanhu ya li ya ongala i pwilikine kuye, okwa li e i “uditile olukeno nokwa velula ovanaudu vavo.” (Mateus 14:14) Eshi omulumenhu umwe a li ta ehama omukifi tau udifa omwenyo munyenye a li a ulika eitavelo kutya Jesus ota dulu oku mu velula ngeenge okwa hala shili, Jesus okwa li e linyengifwa kohole. Okwa li a velula omulumenhu oo, nokwe mu lombwela pahole a ti: “Onda hala! Veluka.” (Lukas 5:12, 13) Eshi Jesus a mona kaume kaye Maria ta lili omolwefyo lomumwaina Lasarus, osha li sha ‘kuma Jesus komutima nokwa nyika oluhodi, ndele ta lili.’ (Johannes 11:32-36) Opo nee Jesus okwa li a longa oshinima shikumwifi, eshi a li a nyumuna Lasarus koufi nonande okwa hangwa a fya pa pita omafiku anhe. — Johannes 11:38-44.

Ashike Jesus okwa li e shii kutya ekwafo olo a li a yandja ola li ashike lopakafimbo. Okwa li e shii kutya ovanhu ovo a velula otava ka vela vali nonokutya ovo a nyumuna ova li tava ka fya vali. Ndele nande ongaho, Jesus okwa li yo e shii kutya Ouhamba waKalunga otau ka xulifa po filufilu omaupyakadi oo. Onghee kali ashike a longa oikumwifilonga, ndele okwa li yo a udifa nouladi “onghundana iwa yOuhamba.” (Mateus 9:35) Oikumwifilonga yaye oya ulika kanini osho Ouhamba waKalunga tau ka ninga mafiku kombada yedu alishe. Natu ka tale osho Ombiibeli ya udaneka shi na sha nefimbo olo.

• Ovanhu itava ka vela vali.

  “Omesho ovapofi otaa ka pashuka nomatwi ovafitamatwi otaa ka fituluka. Mefiku olo oshingudu otashi ka nhuka ngaashi omenye nelaka laau ha kokoma, otali imbi nokukuwilila.” — Jesaja 33:24; 35:5, 6.

• Ovanhu itava ka fya vali.

  ‘Ovayuki, vo otava ka fyuulula oshilongo, ndele tava kala mo alushe.’ — Epsalme 37:29.

  “Ota ka hanauna po efyo fiyo alushe, ndele Omwene, Kalunga ta ka feta po omahodi momesho aaveshe.” — Jesaja 25:8.

• Ovo va fya otava ka alukila momwenyo.

  “Aveshe ovo ve li meembiladimbuluko tava ka uda ondaka yaye, ndele tava di mo.” — Johannes 5:28, 29.

  “Otaku ka kala enyumuko.” — Oilonga 24:15.

• Itaku ka kala vali ovanhu vehe na omaumbo, ile vehe na oilonga.

  “Otava ka dika omaumbo ndele tava kala mo, ndele tava twike oikokola yomiviinyu, ndele tava li oiimati yayo itava ka tunga mu kale vamwe, ihava ka twika, vamwe ngeno va lye oiimati yavo, . . . Ovahoololwa vange ovo vene tava ka shambukilwa oilonga yomake avo.” — Jesaja 65:21, 22.

• Itaku ka kala vali oita.

  ‘Ota xulifa po oita fiyo okeengaba dedu.’ — Epsalme 46:9.

  ‘Oiwana itai ka lwifafana vali nongaashi itave lilongo vali oukwaita.’ — Jesaja 2:4.

• Itaku ka kala vali omhumbwe yoikulya.

  “Edu oli li po la menifa omumeno walo: fye ohatu ka punikwa kuKalunga, Kalunga ketu.” — Epsalme 67:6.

  “Moshilongo namu kale oshishipo shoilya, yo i mene fiyo okeexulo deemhunda.” — Epsalme 72:16.

• Itaku ka kala vali oluhepo.

  “Ohepele iha dimbuwa fiyo alushe.” — Epsalme 9:18.

  “Otai ka xupifa epongo eli tali kuu onghuwo li kwafwe, nomukwanaluhepo ou ehe na omukwafi. Otai ningile omuxupi nohepele olukeno, notai xupifa eemwenyo deehepele.” — Epsalme 72:12, 13.

Eshi to dilonga kombinga yomaudaneko oo e na sha nOuhamba waKalunga, mbela ou wete nghee wa li oshinima sha fimana kuJesus? Eshi a li kombada yedu, okwa li a halelela okupopya kombinga yOuhamba waKalunga mokuudifila keshe oo e na ehalo lokupwilikina, molwaashi oku shii kutya Ouhamba otau ka xulifa po omaupyakadi aeshe oo a wilila po ovanhu kunena.

Mbela omaxunganeko Ombiibeli e na sha nOuhamba omahokwifa ngoo kwoove? Ngeenge osho, ongahelipi to dulu okulihonga shihapu kombinga yOuhamba? Oshike to dulu okuninga po opo u ka mone ouwa momanangeko noupuna oo? Oshitukulwa shaxuuninwa shomoitukulwa ei otashi nyamukula omapulo oo.