Ombiibeli ohai lundulula onghalamwenyo yovanhu

OSHIKE sha kwafela omunhu oo a li omunashibofa a kale e hole ovanhu noku va kwafela? Oshike sha kwafela omulumenhu wokoMexico a efe po onghedi yokukalamwenyo inai koshoka? Omolwashike omulumenhu umwe wokoJapan, oo a li ha kufa ombinga mefiyafanepo leembashikela, e shi efa po nokuninga eenghendabala a longele Kalunga? Natu ka tale osho ovanhu ovo va popya.

“Onda li omuhayavala, ndi na ounhwa nomukwanyanya.” — DENNIS O’BEIRNE

ODULA OMO A DALWA: 1958

OSHILONGO OMO A DALELWA: ENGLAND

ONAKUDIWA: OMUNASHIBOFA

ONGHALAMWENYO YANGE YONALE: Epata lootate Ovairish, onghee onda putuka ndi li Omuirish wOkatolika. Luhapu onda li handi i kongeleka kwaame mwene, nonande kandi hole okuya ko. Ashike nande ongaho, onda li ndi na ondjala yopamhepo. Onda li handi ilikana pandjikilile eilikano lOmwene, noufiku umwe onda li nda nangala handi lipula neityo lalo. Onda tukula oitya yeilikano, ame handi dilonga nee kutya okatwa keshe oka hala okutya ngahelipi.

Eshi nda wanifa omido omulongo nasha, onda hovela okweendafana nongudu yEerasta. Onda kala yo ndi na ohokwe mopolotika. Ndele onda kala unene handi kufa ombinga momakangha ounashibofa. Onda kala handi longifa oingangamifi, unene tuu epangwe, olo nda li handi shili hanga efiku keshe. Onda tambula ko oikala “yokuhe na ko nasha,” handi nu sha pitilila, handi ningi oinima oyo tai tula omwenyo wange moshiponga nokandi na ko nasha novanhu. Onda li omunashibofa nosha li shidjuu kovanhu okupopya naame. Onda li ashike handi popi navo, ngeenge ndi wete sha pumbiwa. Kanda li nokuli ndi hole okufanekwa. Okutala konakudiwa, onda mona kutya onda li omuhayavala, ndi na ounhwa nomukwanyanya. Ashike paife hasho vali ndi li ngaho, paife ondi na onghenda nohandi yandje.

Eshi nda li pokuwanifa omido 20, onda li ndi na ohokwe mOmbiibeli. Otwa li twa hovela okulesha Ombiibeli eshi twa li modolongo nomulumenhu, oo a li ha landifa oingangamifi notwa kundafana oule wefimbo kombinga yelongelokalunga, Ongeleka nosho yo onghandangala oyo Satana ta dana mounyuni. Onda li nda landa Ombiibeli, ndele handi hovele oku i konakona ame mwene. Fye nakaume kange oo, otwa li hatu lesha oitukulwa yonhumba mOmbiibeli, fye hatu kundafana osho twe lihonga mo nokufika pexulifodiladilo. Otwa kala hatu ningi ngaho oule weemwedi.

Konima eshi twa lesha, otwa dula okufika pexulifodiladilo moinima imwe: ngaashi kutya otu li momafiku axuuninwa ounyuni ou; Ovakriste ove na okuudifa onghundana iwa yOuhamba waKalunga; kave na okukala oshitukulwa shounyuni ou, mwa kwatelwa eepolotika; nosho yo kutya Ombiibeli otai hongo ovanhu va kale ve na eenghedi. Otwa mona filufilu kutya Ombiibeli oi li paushili nosho yo kutya ope na okukala pe na elongelokalunga lashili. Ndele mbela olilipi? Otwa li twa mona kutya oilyo yeengeleka odo di shiivike nosho yo ovakwateli komesho vado ohava kufa ombinga meepolotika, ashike Jesus ka li ha ningi ngaho. Otwa li twa mona kutya itava longifwa kuKalunga. Onghee otwa li twa konakona omalongelokalunga oo ehe shivike naanaa, opo tu mone kutya ohaa hongo shike.

Otwa li twa pula ovanhu, ovo hava i keengeleka odo, omapulo a pambafana. Otu shii kutya Ombiibeli otai ti ngahelipi kepulo keshe, onghee otwa li hatu dulu okumona kutya osho tave tu lombwele oshi li ngoo metwokumwe nEendjovo daKalunga. Alushe konima yeenghundafana odo, onda li handi ilikana kuKalunga handi ti: ‘Ngeenge ovanhu ava ove lile po elongelokalunga lashili, kwafele nge ndi kale ndi na ehalo lokukundafana vali navo.’ Ashike oule weemwedi adishe odo twa kala hatu kundafana novanhu, inandi mona ongudu oyo ya nyamukula omapulo etu tava longifa Ombiibeli; noinandi dja po ndi na ehalo lokukundafana vali navo.

Xuuninwa, fye nakaume kange osho twa ka monafana nEendombwedi daJehova. Otwe di pula omapulo a faafana ngaashi hatu ningi shito, ashike oda li de a nyamukula tadi longifa Ombiibeli. Osho da popya otashi tu kumwe filufilu naasho twe lihonga. Onghee hano, otwa li twe di pula omapulo oo twa li inatu monena omanyamukulo okudja mOmbiibeli, ngaashi kutya Kalunga okwa tala ko ngahelipi omakaya noingangamifi. Natango, oda li da nyamukula tadi longifa Eendjovo daKalunga. Otwa li twa dimina okuya kokwoongala kOlupale lOuhamba.

Osha li shidjuu kwaame okuya kokwoongala. Onda li handi kala nda handuka omolwovanhu aveshe ovo hava popifa nge ve na oukaume nova djala nawa. Onda li handi diladila kutya ovanhu vamwe otashi dulika have uya kwaame nomalinyengotomheno a puka, onghee kanda li vali nda hala okuya kokwoongala. Ndele ngaashi shito, onda li handi ilikana kuKalunga ndi kale ndi na ehalo lokukundafana vali novanhu ovo, ngeenge ove li lile po elongelokalunga lashili. Onghee hano, onda li nda kwatwa kehalo lokukonakona Ombiibeli nEendombwedi.

NGHEE OMBIIBELI YA LUNDULULA ONGHALAMWENYO YANGE: Onda mona kutya onda li ndi na okweefa po okulongifa oingangamifi, nonda li nda dula okuninga ngaho diva. Ashike einda ola li pokushila omakaya. Onda kendabala lwoikando okweefa po okushila omakaya, ashike onda nyengwa. Eshi nda uda kombinga yavamwe ovo va kupulashi omakaya avo, ndele tava efa po filufilu okushila, onda li nda popya naJehova kombinga yoshinima osho. Okudja opo, onda li nda efa po okushila omakaya kekwafo laJehova. Onde lihonga nghee sha fimana okupopya oshili nonda li handi popi naJehova meilikano nda manguluka.

Oupyakadi umwe wa kula, oo nda li ndi na, owa li u na sha nokudjala nokuliwapeka. Oshikando shotete nda ya kokwoongala, onda li nda ya ko neexwiki dimwe dimbulau. Lwanima, onde ke di ninga dishunga. Onda li nda djala odjiina nokandjafa koshipa ka shangwa. Onda li ndi wete kutya inandi pumbwa okulundulula onghedi yange yokudjala, nonande Eendombwedi oda li hadi tomhafana naame nonghenda. Opo nee onda ka diladila ku 1 Johannes 2:15-17, oo ta ti: “Inamu kala mu hole ounyuni nakeshe eshi shi li mo. Ngeenge ope na ou e hole ounyuni, ke hole Tate.” Onda li nda fika pexulifodiladilo kutya eholokepo lange otali ulike kutya ondi hole ounyuni ou. Onghee hano, opo ndi ulike kutya ondi hole Kalunga, onda pumbwa okulundulula. Opo nee onde shi tula moilonga.

Mokweendela ko kwefimbo, onda ka mona kutya Eendombwedi hado ashike da hala ndi kale handi i kokwoongala kwopaKriste. Onda ka mona mOvaheberi 10:24, 25 kutya Kalunga osho a teelela ndi ninge. Konima eshi nda kala handi i alushe kokwoongala nokweenda handi shiiva ovanhu, onda tokola okuliyapulila Jehova nokuninginifwa.

OUWA OO NDA MONA: Onda kuminwa neenghono onghedi omo Jehova a hala tu pange oukaume naye. Oshe linyengifa nge neenghono ndi mu hopaenene omolwolukeno nosho yo eshi e na ko nasha novanhu. Oshe linyengifa nge yo ndi hopaenene Omona waye, Jesus Kristus, oo nda hala okuhopaenena monghalamwenyo yange. (1 Petrus 2:21) Onde lihonga kutya otapa ka kala yo omaukwatya amwe opaKriste, oo nda pumbwa okukulika. Onde lihonga okukala omunahole nokukala ndi na ko nasha novanhu. Onde lihonga okukala nda fa Kristus monghedi omo handi ungaunga nomukulukadi nomonamati wange. Ondi na ko nasha neenghono novamwatate novamwameme meitavelo. Okushikula oshihopaenenwa shaKristus osha kwafela nge ndi kale ndi liuditile etumba, nde lifimaneka nondi ulikile ovanhu vakwetu ohole.

“Ova ungaunga naame nefimaneko.” — GUADALUPE VILLARREAL

ODULA OMO A DALWA: 1964

OSHILONGO OMO A DALELWA: MEXICO

ONAKUDIWA: OKWA LI E NA ONGHEDI YOKUKALAMWENYO INAI KOSHOKA

ONGHALAMWENYO YANGE YONALE: Otwa dalwa tu li vaheyali, twa putukila moHermosillo, moSonora, moMexico, moshitukulwa osho sha dengwa neenghono koluhepo. Tate okwa fya, ofimbo nda li okaana. Meme okwa li e na okulonga, opo e tu file oshisho. Luhapu onda li handi kala eemhadi kombada, molwaashi katwa li tu na oimaliwa yokulanda eenghaku. Onda hovela okulonga eshi nda li ndi munini, opo ndi dule okuyambidida oukwaneumbo. Meumbo letu omwa li mu yadi, ngaashi ashike omaukwaneumbo mahapu.

Meme ka li ha kala nafye omafiku mahapu, opo a dule oku tu amena. Eshi nda li ndi na omido 6, onda li nda ninga oshihakanwa shomulumenhu womido 15, oo a li ha hepeke nge pamilele. Okwa kala ha hepeke nge oule wefimbo. Osho osha ningifa nge ndi kala nda ngwangwana, ngeenge tashi uya pomilele. Onda li handi diladila kutya oshi li paushitwe okukala u na ohokwe movalumenhu vakweni. Eshi nda ka konga ekwafo keendokotola, ile kovafita, ohava shilipaleke nge ashike kutya ondi li nawa, noshi li paushitwe okukala u udite ngaho.

Eshi nda wanifa omido 14, onda tokola okulininga eshenge. Onda kala monghalo ya tya ngaho oule womido 11, handi nangala nokuli novalumenhu va yoolokafana. Mokweendela ko kwefimbo onda ka ninga okoosa yokuninga eexwiki nokutota po okafitola koku di landifa. Ashike nande ongaho, inandi kala nda hafa. Onghalamwenyo yange oya kala moudjuu nonda li ndi udite nda kengelelwa. Onda li ndi shii kutya osho handi ningi kashi li mondjila. Onda hovela okulipula kutya: ‘Mbela ope na ngoo ovanhu ve li nawa nove shii okulineekelwa?’

Onda li nda diladila omumwamemekadona wange. Okwa li a hovela okukonakona Ombiibeli nEendombwedi daJehova, nolwanima okwa ka ninginifwa. Okwa li ha lombwele nge osho te lihongo, ashike kanda li handi yandje elitulemo. Ndele nande ongaho, onda li nde mu fimaneke nosho yo ohombo yavo. Onda li handi mono kutya ye nomushamane waye ove holafane shili nova fimanekafana. Ova li hava ungaungafana pahole. Mokweendela ko kwefimbo, omukainhu umwe wOndombwedi yaJehova okwa li a hovela okukonakona naame Ombiibeli. Pehovelo, onda li ashike handi konakona, ndele kanda li ndi na omukumo. Opo nee oinima oya ka lunduluka.

NGHEE OMBIIBELI YA LUNDULULA ONGHALAMWENYO YANGE: Eendombwedi oda li da shiva nge kokwoongala kwado, nonda li nda ya. Osha li oshimoniwa shihokwifa osho inandi shakeneka nande onale. Ovanhu vakwalukeshe ova li hava yolo nge, kakele kEendombwedi. Oda li hadi ungaunga naame pahole nosho yo nefimaneko. Osho osha li she linyengifa omutima wange.

Oshinima shimwe osho sha li sha kumwifa nge neenghono, osheshi nda li nda ya koshoongalele shoshikandjo shEendombwedi. Onda li nda mona kutya nokuli nonande odi li ongudu inene, onda fa ashike omumwainakadona wange. Oda ungaunga naame pahole nosho yo nonghenda. Onda hovela okulipula, ngeenge Eendombwedi odo ovanhu vawa nove shii okulineekelwa ovo nda kala handi kongo. Onda li nda kuminwa ohole noukumwe wavo nosho yo eshi hadi nyamukula epulo keshe tadi longifa Ombiibeli. Onda ka didilika kutya Ombiibeli oyo ye va kwafela va kale nonghalamwenyo iwa. Onda ka mona yo kutya naame onda pumbwa okuninga omalunduluko manene, opo ndi kale umwe womudo.

Onda li ndi na okulundulula filufilu onghedi yange yokukalamwenyo, molwaashi onda li ashike nda fa omukainhu. Onda li ndi na okulundulula onghedi yange yokupopya, elihumbato, okudjala, eexwiki nosho yo ookaume. Ookaume kange vakulu ova kala hava yolo nge, tava ti: “Omolwashike to ningile ngaho? Owa li u li nawa. Ino konakona vali Ombiibeli. Ou na keshe shimwe.” Oshinima sha kwata moiti osho nda li ndi na okulundulula, okweefa po oushenge.

Onda li ndi shii kutya ohandi dulu okuninga omalunduluko manene. Eendjovo dOmbiibeli odo di li mo 1 Ovakorinto 6:9-11 oda li da kuma omutima wange. Oda ti: “Mbela kamu shi shii kutya ovo vehe fi ovayuki itava ka fyuulula Ouhamba waKalunga? Inamu lifufya. Ovahaeli, ovalongeli voikalunga, ovanyoni vohombo, omashenge, ovahaeli vomashenge, . . . itava ka fyuulula Ouhamba waKalunga. Vamwe vomunye osho mwa li ngaho. Ndele paife omwa kosholwa.” Jehova okwa li a kwafela ovanhu vonale va ninge omalunduluko, naame yo okwa kwafela nge. Onda kala handi kondjo oule womido, ashike onda ka pondola kekwafo lEendombwedi nohole oyo da ulikila nge.

OUWA OO NDA MONA: Paife, ondi na onghedi yokukalamwenyo ya koshoka. Onda hombola. Fye nomukulukadi wange ohatu hongo omonamati wetu a kale metwokumwe nomafinamhango Ombiibeli. Onda efa po filufilu onghedi yokukalamwenyo yonale, nohandi hafele omanangeko noupuna nosho yo omaufembanghenda mahapu opamhepo. Ondi li omukulunhuongalo nohandi kwafele ovanhu ve lihonge oshili yEendjovo daKalunga. Omalunduluko oo nda ninga okwa hafifa meme neenghono nokwe mu linyengifa a hovele okukonakona Ombiibeli nokuninginifwa. Omumwamemekadona umwe, oo a li e na onghedi yokukalamwenyo inai koshoka, naye okwa ninga Ondombwedi yaJehova.

Nokuli novanhu ovo va li ve shii onghalamwenyo yange yonale, paife ove shii kutya onda ninga omunhu muwa. Ashike kasha li shipu okuninga omalunduluko. Monakudiwa, onda li handi ka konga ekwafo kovanawino, ndele ohandi pewa ashike omayele mai. Mepingafano naasho, Jehova okwa kwafela nge neenghono. Nonande onda li handi kala ndi udite ndihe na oshilonga, Jehova okwe shi didilika nokwa ungaunga naame pahole nosho yo nelididimiko. Onghee hano, Kalunga oo a denga mbada kuhe na vali, omunaendunge nomunahole oku shii nge nokwa hala ndi kale nonghalamwenyo iwa.

“Onda li ndi udite owike, ndihe na oshilonga noinandi wanenwa.” — KAZUHIRO KUNIMOCHI

ODULA OMO A DALWA: 1951

OSHILONGO OMO A DALELWA: JAPAN

ONAKUDIWA: OKWA LI HA KUFA OMBINGA MEFIYAFANEPO LEEMBASHIKELA

ONGHALAMWENYO YANGE YONALE: Onda putukila modoolopa i li petuliloshikepa moShizuoka Prefecture, muJapan, meumbo linini, hatu di mo vahetatu. Tate okwa li e na ofitola yeembashikela. Okudja eshi nda li ndi munini, okwa li ha twala nge ndi ka kufe ombinga momafiyafanepo eembashikela, naasho osha ningifa nge ndi kale ndi hole oudano oo. Opo nee tate okwa hovela okuninga eemhangela, ndi dule okukala omushingi wombashikela kapyoko. Nokuli naashi nda li mofikola, okwa kala ha deula nge. Eshi nda li keengudu odo da kula, onda li nda findana lwoikando itatu mefiyafano lokutondoka lomoshilongo. Onda li nda lombwelwa ndi ka fikole kouniversiti, ashike onda li nda tokola okuya kofikola yomaudano. Eshi nda li ndi na omido 19, onda li nda ninga omushingi a pyokoka.

Onda li nde litulila po elalakano lokukala aame wotete kapyoko mokushinga eembashikela moJapan. Onda li nda ninga eemhangela dokumona oimaliwa ihapu, opo ndi amene oukwaneumbo wange nou kale u na sha. Onda li nde litula mo filufilu medeulo lange. Onghee hano, ngeenge nda kwatwa koumbada eshi handi deulwa, ile eshi tu li mefiyafano handi shingi poima pa kitakana, ohandi lilombwele lwoikando handi ti kutya onda dalwa ndi shinge eembashikela. Osho ohashi kwafele nge ndiha shune omutwe moipeta nondi pondole. Onda hovela okulya oiimati yoilonga yange. Odula yange yotete, aame nde va fiya po aveshe ava vape. Modula yange onhivali, onda dula okuya mefiyafano laavo tava ka kondjela onomola yotete moJapan ashishe. Oikando aishe ihamano ya yoolokafana mefiyafano olo, onde uya ndi mutivali.

Eshi nda kala handi vena, onda ka kala ndi shiivike nawa moTokai, moshitukulwa shaJapan. Onda li ndi na omhepo yefiyafanepo. Mokweendela ko kwefimbo, onda ka kala nda tila, molwaashi ngeenge tu li mefiyafanepo kanda li handi yavelele vakwetu. Oyuuyemo yange oya li tai ende tai hapupala, nonda li handi dulu okulanda keshe osho nda hala. Onda li nda landa eumbo, olo li na onduda i na omashina a denga mbada okuninga omadeulo. Onda li nda landa otuwa kondje yoshilongo, oyo ya li i na oimaliwa hanga i fike pwaayo nda landa eumbo. Oimaliwa yange onda kala nde i tula momahangano, oo haa landifa omaumbo, nosho yo meengeshefa, opo ndi mone ko oishoshela.

Ashike nande ongaho, onda li ndi udite owike, ndihe na oshilonga noinandi wanenwa. Pefimbo opo, onda li nda hombola nondi na ounona. Ashike luhapu kanda li handi lididimikile oukwaneumbo wange. Onda li handi tetwa ko kehandu omolwoinima inini, ngeenge handi popi nomukulukadi wange, ile nounona. Ova hovela okukala hava tila nge, nova li hava tale omalinyengo ange okoshipala, opo va shiive kutya ondi li monghalo ya tya ngahelipi.

Mokweendela ko kwefimbo, omukulukadi wange okwa hovela okukonakona Ombiibeli nEendombwedi daJehova. Osho osha li sha etifa omalunduluko mahapu. Okwa li a lombwela nge kutya okwa hala okukala ha i kokwoongala kwEendombwedi, nonda li nda tokola tu ye tu li oukwaneumbo. Kandi na efiku ndi dimbwe onguloshi imwe, eshi omukulunhuongalo a li e uya peumbo letu, ndele hatu hovele okukonakona naye Ombiibeli. Onda li nda kumwa neenghono kwaasho nda li handi lihongo.

NGHEE OMBIIBELI YA LUNDULULA ONGHALAMWENYO YANGE: Ovaefeso 5:5 ova li va kuma nge neenghono eshi twe va lesha. Otava ti: “Ovahaeli, ovalongi vowii ile ovanalwisho ovo ve li onga ovalongeli voikalunga, itava ka fyuulula Ouhamba waKristus naKalunga.” Onda li nda mona kutya okushinga eembashikela kaku li dule nokundobola, noudano oo ohau xumifa komesho olwisho. Eliudo lange ola hovela okukala tali nyenyetele nge. Onda mona kutya ngeenge onda hala okuhafifa Jehova Kalunga, ondi na okweefa po okukufa ombinga moudano oo. Ashike osha li etoloko la kwata moiti.

Onda kala omushingi kapyoko weembashikela nonda kala nda hala shihapu. Onda mona kutya okukonakona Ombiibeli okwa etela nge ombili yopamadiladilo, shi dulife osho nda li handi lalakanene mefiyafanepo. Onda li ashike mefiyafanepo oikando itatu okudja eshi nda hovela okukonakona, ndele kanda li naanaa nda hala oku shi efa po. Onda li yo handi lipula kutya ohandi ka fila oshisho ngahelipi oukwaneumbo wange. Onda kala ashike nda ngwangwana, kutya ngoo itandi shuna monima, ame itandi i komesho. Ovapambele vange ova li tava naipike onghalo shi na sha neitavelo lange lipe. Osha li sha udifa tate nai neenghono. Lwanima, onda ka kala nda polimana neenghono, ndele handi ningi noshipute.

Okutwikila okukonakona Ombiibeli nokuya kokwoongala kwEendombwedi daJehova osho sha li sha kwafela nge pefimbo olo la li lidjuu neenghono. Mokweendela ko kwefimbo, eitavelo lange ola enda tali pame. Onda ilikana kuJehova a kwafele nge nondi kale handi tale ko oinima ngaashi ye. Onghalo yange oya ka xwepopala vali, eshi omukulukadi wange a lombwela nge kutya ina pumbwa okukala ha di meumbo la kula, opo a kale a hafa. Onda enda handi ningi exumo komesho kanini nakanini.

OUWA OO NDA MONA: Onda mona kutya eendjovo daJesus odo tadi hangwa muMateus 6:33 odoshili. Okwa ti: “Kaleni tamu kongo tete Ouhamba nouyuki waye, noinima aishe ikwao otamu ke i wedelwa ko.” Kape na nande efiku limwe twa li twa kambela ‘oinima ikwao’ oyo Jesus a popya, oipumbiwa yakeshe fiku. Nonande ohandi mono ashike oimaliwa inini okuyelekanifa naayo nda li handi mono nale, eshi nda li mefiyafano, ame noukwaneumbo wange inatu kambela sha oule womido 20 odo da pita po.

Onghee hano, ngeenge handi kufa ombinga momalipyakidilo opamhepo pamwe nOvakriste vakwetu, onda wanenwa nonda hafa shi dulife nale. Efimbo otali endelele neenghono. Oukwaneumbo wetu owa xwepopala neenghono. Ovanamati vetu vatatu novakulukadi vavo aveshe ove li ovapiya vaJehova ovadiinini.