OMBIIBELI OHAI LUNDULULA ONGHALAMWENYO YOVANHU

ONGAHELIPI omukainhu omunyasha oo a pita meenghalo dinyikifa oluhodi eshi a li okaana a mona onghalamwenyo tai ti sha? Oshike she linyengifa olebele yopapolotika i ninge omuudifi wonghundana iwa omunambili? Lesha omahokololo aa taa shikula u mone omanyamukulo.

“Onda li nda halelela okuulikilwa ohole nohamu.” — INNA LEZHNINA

ODULA OMO A DALWA: 1981

OSHILONGO OMO A DALELWA: RUSSIA

ONAKUDIWA: A PITA MEENGHALO DINYIKIFA OLUHODI ESHI A LI OKAANA

ONGHALAMWENYO YANGE YONALE: Onda dalwa ombolo kovadali veembolo. Omido hamano dokuputuka kwange dopehovelo oda enda nawa. Opo nee ovadali vange ova ka teya ohombo. Nonande onda li okaana, onda li ndi shii kutya eteyohombo oshike, naasho osha yahameka nge neenghono. Konima yeteyohombo, tate nomukulu wange womumati ova kala mo-Troitsk, ofimbo meme a tembukila ko-Chelya­binsk, nokwa ya naame. Lwanima, okwa ka hombolululwa. Tate oo a hombola meme okwa li ongholwe, naluhapu okwa kala ha denge meme nosho yo ame.

Mo 1993, omukulu wange womumati okwa fila momeva. Oshiningwanima osho osha li sha halukifa neenghono oukwaneumbo wetu. Meme okwa li a hovela okunwa nokwa hovela okuninga nge nai ngaashi ashike tate oo e mu hombola. Opo nee onda li nda hovela okukonga onghalamwenyo i li xwepo. Onda li nda halelela okuulikilwa ohole nohamu. Opo nee onda li nda hovela okuya keengeleka da yoolokafana, handi kongo ehekeleko, ashike inandi li mona.

NGHEE OMBIIBELI YA LUNDULULA ONGHALAMWENYO YANGE: Eshi nda li ndi na omido 13, omunafikola mukwetu, oo a li Ondombwedi yaJehova, okwa li a lombwela nge kombinga yomahokololo onhumba mOmbiibeli. Onda li handi hafele okulihonga kombinga yovanhu ovo va popiwa mOmbiibeli ngaashi Noa naJob, ovo va longela Kalunga nonande ova li meenghalo didjuu. Diva onda ka hovela okukonakona Ombiibeli nEendombwedi daJehova nokuya kokwoongala kwado.

Okukonakona Ombiibeli okwa kwafela nge ndi shiive eeshili dihapu. Eshi nde lihonga kutya Kalunga oku na edina osha kuma nge neenghono. (Epsalme 83:18) Onda li nda kumwa okumona nghee Ombiibeli ya xunganeka eenghalo odo tadi ka kala po “momafiku axuuninwa.” (2 Timoteus 3:​1-5) Onda li yo nda tunhukwa eshi nde lihonga kombinga yeteelelo lenyumuko. Ohandi ka dula okumona vali omukulu wange! — Johannes 5:28, 29.

Ashike havanhu aveshe va li tava tu kumwe naame kutya onda mona oshinima shiwa. Meme natate oo e mu hombola ova li ve tonde Eendombwedi daJehova. Ova li hava fininike nge ndi efe po okukonakona Ombiibeli. Ndele molwaashi onda li ndi hole eshi handi lihongo, onda li nda tokola toko ndihe li efe po.

Kasha li shipu okuungaunga nomapataneko oukwaneumbo wetu. Opa ka holoka vali oupyakadi eshi ondenge yange yomumati oo twa li twa ya naye kokwoongala kwEendombwedi daJehova a fila vali momeva. Ashike Eendombwedi oda kala tadi yambidida nge. Mokati kado onda ulikilwa mo hole nohamu oyo nda kala handi kongo monghalamwenyo yange aishe. Onda li nda mona kutya eli oli na okukala elongelokalunga lashili. Mo 1996, onda li nda ninginifwa ndi li umwe womEendombwedi daJehova.

OUWA OO NDA MONA: Onda kala nda hombolwa paife oule womido hamano da pita, komulumenhu e na omaukwatya mawa wedina Dmitry. Atushe ohatu longo koshitaimbelewa shEendombwedi daJehova mo-St. Petersburg. Mokweendela ko kwefimbo, etaleko lovadali vange li na sha neitavelo lange ola ka xwepopala.

Onda pandula neenghono eshi nda shiiva Jehova! Paife onghalamwenyo yange oi na eityo eshi handi mu longele.

“Onda li ndi na omapulo mahapu e na sha nonghalamwenyo.”

— RAUDEL RODRÍGUEZ RODRÍGUEZ

ODULA OMO A DALWA: 1959

OSHILONGO OMO A DALELWA: CUBA

ONAKUDIWA: OLEBELE YOPAPOLITIKA

ONGHALAMWENYO YANGE YONALE: Onda dalelwa moHavana, sha-Cuba, nonda kulila momudingonoko wa hepa, omo momapandavanda amo mwa li hamu kala eenhamanana luhapu. Eshi handi kulu, onda li ndi hole omaudano ondjudo naao a nyika omalwoodi.

Onda li handi lihongo nawa, novadali vange ova li va ladipika nge ndi ye kounivesiti. Eshi nda li kounivesiti, onda hovela okukala ndi udite kutya onghalo yopapolitika yoshilongo shetu oya pumbwa okulundululwa. Onda li nda tokola okuninga olebele. Ame nomunafikola mukwetu umwe otwa li twa ponokela omupolifi umwe twa hala okunyeka ko ondjebo yaye. Okukondja naye okwa li kwa ehameka neenghono omupolifi oo momutwe. Ame nomunafikola mukwetu otwa li twa tulwa modolongo omolweponokelo olo, notwa li twa tokolelwa efyo tu dipawe kovakwaita ovo hava yashe ovo va tokolwa. Onda li ashike ndi na omido 20, ashike onda li ndi li pokufya.

Eshi nda li mokanduda kange kodolongo aame andike, onda li handi liendifa po nghee hadi ke lihumbata komesho yovakwaita ovo hava yashe ovanhu ovo va tokolwa. Kanda li nda hala okuulika oumbada washa. Ashike pefimbo opo tuu opo, onda li ndi na omalipulo mahapu. Onda li handi lipula kutya: ‘Omolwashike mounyuni mu yadi okuhenouyuki? Mbela onghalamwenyo ei oyo aike i li ko?’

NGHEE OMBIIBELI YA LUNDULULA ONGHALAMWENYO YANGE: Lwanima, ponhele yokudipawa ngaashi twa li twa tokolelwa, otwa ka tokolelwa ngoo nee odolongo yomido 30. Opo nee onda ka shakena navamwe vomEendombwedi daJehova odo da li da tulwa modolongo omolweitavelo lado. Onda li nda fuulwa kelihumbato lEendombwedi lokukala nouladi, ndele odi na ombili. Nonande oda tulwa modolongo shihe li pauyuki, kada li da handuka, ile da fula onya.

Eendombwedi oda honga nge kutya Kalunga oku na elalakano li na sha novanhu. Oda ulikila nge mOmbiibeli kutya ota ka lundulula edu eli li ninge oparadisa omo itamu ka kala ominyonena nokuhenouyuki. Oda honga nge kutya kedu otaku ka kala ashike ovanhu vawa, ovo tava ka kala ko fiyo alushe ve li monghalo ihe na mbudi. — Epsalme 37:29.

Onda li handi hafele osho handi lihongo, ashike omaukwatya ange kaali taa tu kumwe naao avo. Onda li handi diladila kutya itandi dulu okukala ndihe na ombinga mopolotika, ile okuninga omaliyambo. Opo nee onda li nda tokola ndi leshe Ombiibeli kwaame mwene. Eshi nda mana oku i lesha, onda mona kutya Eendombwedi daJehova odo ashike hadi lihumbata ngaashi Ovakriste vopefimbo lonale.

Eshi nda konakona Ombiibeli, onda li nda mona kutya onda pumbwa okuninga omalunduluko manene monghalamwenyo yange. Pashihopaenenwa, onda li ndi na okulundulula onghedi omo handi popi molwaashi onda li nda ika okutukana. Natango onda li ndi na okweefa po okushila omakaya. Onda li yo ndi na okweefa po okukala nombinga moinima yopapolitika. Kasha li shipu okuninga omalunduluko a tya ngaho, ashike onda ka enda handi shi pondola kekwafo laJehova.

Elunduluko limwe linene olo nda li ndi na okuninga olo okulihonga okupangela ehandu. Fiyo onena ohandi twikile okwiilikana ndi kale ndi na elipangelo moshinima osho. Onda kala handi kwafelwa unene keevelishe dOmbiibeli ngaashi, Omayeletumbulo 16:32, oo taa ti: “Omutalonheni e dule omuladi. Ndele ou te lipangele, e dule ou a teya oshilando.”

Mo 1991, onda ninginifwa ndele handi ningi umwe womEendombwedi daJehova. Eninginifo ola li la ningilwa mombaali modolongo. Omudo wa ka shikula ko, ovanadolongo vamwe vomufye osho twa ka mangululwa nokutuminwa ko-Spain molwaashi otu na ko ovapambele. Eshi nda fika mo-Spain, onda li nda hovela diva okuya kokwoongala kwEendombwedi daJehova. Eendombwedi moSpain oda li da tambula nge ko nawa, da fa ashike di shii nge nale, noda li da kwafela nge ndi hovele onghalamwenyo yange ipe.

OUWA OO NDA MONA: Paife onda hafa, nohandi longele Kalunga pamwe nomukulukadi wange novanakadona vetu. Ondi na oufembanghenda molwaashi efimbo lange lihapu ohandi li longifa mokukwafela ovanhu ve lihonge Ombiibeli. Omafimbo amwe ohandi diladila eshi nda li ndi li pokufya ndi li omunyasha, nopaife onda pandula eshi nda mona ouwa muhapu okudja kefimbo olo. Inandi xupa ashike, ndele ondi na yo eteelelo. Onda teelela Oparadisa oyo ya udanekwa, eshi ita pa ka kala vali okuhenouyuki ndele “nefyo itali ka kala po vali.” — Ehololo 21:3, 4.

[Blurb on page 19]

“Eshi nde lihonga kutya Kalunga oku na edina osha kuma nge neenghono”

 [Picture on page 20]

Ame nomushamane wange otu hole okuyandja oishangomwa yelaka lokuudika keembolo