Ombiibeli ohai lundulula onghalamwenyo yovanhu

OSHIKE sha kwafela umwe oo a li a pikwa kokundobola nokoumbudi a manguluke ko noku lundulule onghedi yaye yokukalamwenyo? Lesha u ude eshi te tu kufile ko.

“Onda li ndi hole unene omafiyafano eenghambe.”​—RICHARD STEWART

ODULA OMO A DALWA: 1965

OSHILONGO OMO A DALELWA: JAMAICA

ONAKUDIWA: OMUNDOBOLI NOMBUDI

ONGHALAMWENYO YANGE YONALE: Onda kulila moshitukulwa sha hepa noshi yadi ovanhu moKingston, oshilandopangelo shaJamaica. Ovanhu vahapu kava li ve na oilonga, nominyonena oda li dihapu. Ovalongi vominyonena ova li va ningifa ovanhu va kale moumbada. Hanga efiku keshe onda handi udu ondjebo tai topa.

Meme okwa li ha longo noudiinini omolwange nomumwaina wange womumati nokakadona. Okwa li a shilipaleka kutya otwa mona ehongo liwa. Kanda li naanaa ndi hole ofikola, ashike pomafiyafano eenghambe ito kufa nge po. Onda li handi dulu okufaula ofikola, ndele handi i kefiyafano leenghambe. Nokeenghambe onda li handi londo ko.

Noinapa kalwa, onda li nda hovela okundobola oko kwa kwatelwa momafiyafano eenghambe. Onda li ndi na elihumbato inali koshoka, nonda li ndi na ovakainhu vahapu. Onda li handi shili epangwe nohandi nyeke nokuteya opo ndi longife oshimaliwa monghalamwenyo yange oyo. Onda li ndi na eendjebo dihapu, ashike paife ohandi pandula eshi inamu dipaelwa nande omunhu momateyo nomomanye ko omo nda kufa ombinga.

Lwanima, osho nda ka kwatwa kopolifi, ndele handi tulwa modolongo omolwominyonena dange. Konima eshi nda mangululwa, natango onda li nda hovela onghedi yokukalamwenyo yange yonale. Ashike oshikando eshi onda li nda pimbila shi dulife nale. Nonande oshipala shange kasha li shi tilifa, onda li handi ningi osho nda hala, nda kenyanana, ndi na onyanya nokanda li ndi na ko nasha nomunhu.

NGHEE OMBIIBELI YA LUNDULULA ONGHALAMWENYO YANGE: Pefimbo opo nda li ndi na onghalamwenyo ya dundakana, meme okwa li ha konakona Ombiibeli nEendombwedi daJehova nokwa ninga Ondombwedi yaJehova. Onda li nda mona kutya ota ningi omalunduluko momaukwatya aye nosha ningifa nge ndi kale ndi na ohokwe. Onda li nda hala okumona kutya oshike sha ningifa meme a lunduluke, opo nee onda li nda hovela okukundafana Ombiibeli nEendombwedi.

Onda li nda mona kutya omahongo Eendombwedi daJehova okwa yooloka ko kwaao omalongelokalunga amwe, nonda mona kutya Eendombwedi ohadi koleke osho tadi popi okudja mOmbiibeli. Odo ashike ndi shii hadi udifa eumbo neumbo, ngaashi Ovakriste vonale va li hava ningi. (Mateus 28:19; Oilonga 20:20) Eshi nda mona ohole oyo hadi ulikilafana, osha li sha tomha nge kutya onda mona elongelokalunga lashili. — Johannes 13:35.

She likolelela kwaasho nde lihonga mOmbiibeli, onda li nda mona kutya onda pumbwa okuninga omalunduluko manene monghalamwenyo yange. Onda li nda mona kutya Jehova Kalunga oku tonde oluhaelo, nongeenge onda hala oku mu hafifa, ondi na okweefa po eenghedi odo tadi nyateke olutu lange. (2 Ovakorinto 7:1; Ovaheberi 13:4) Eshi nda shiiva kutya Jehova oku na omaliudo nonokutya eenghatu dange otadi dulu oku mu udifa nai, ile oku mu hafifa, osha kuma nge komutima. (Omayeletumbulo 27:11) Onghee hano, onda li nda efa po okushila epangwe, okukala ndihe na vali eendjebo nokuxwepopaleka omaukwatya ange. Imwe yomoinima idjuu oyo nda li ndi na okweefa po, ongaashi elihumbato inali koshoka nokundobola.

Pehovelo, kanda li nda hala ookaume kange va shiive kutya ohandi konakona Ombiibeli nEendombwedi daJehova. Ashike onda ka lundulula eshi nda lesha Eendjovo daJesus odo di li muMateus 10:33, tadi ti: “Ou te lidimbike nge moipafi yovanhu, naame ohandi ke mu lidimbika yo moipafi yaTate oo e li meulu.” Eendjovo odo oda ladipika nge ndi lombwele ookaume kange kutya ohandi konakona Ombiibeli nEendombwedi. Ova li ve shi kuminwa. Kava li tave shi itavele kutya omunhu ngaashi ame ota dulu okukala a hala okuninga Omukriste. Onda li nde va lombwela kutya, kanda li vali nda hala okukala nonghedi yange yokukalamwenyo ikulu.

OUWA OO NDA MONA: Meme okwa li a hafa neenghono eshi a mona handi ende handi dulika komafinamhango Ombiibeli. Paife iha kala vali te lipula kutya pamwe ohandi ka ninga oinima ii yonhumba. Paife ohatu popi ashike kombinga yekwatafano olo tu na atushe, ohole yetu yokuhola Jehova. Omafimbo amwe, ohandi tale konima kunghee nda li, noihandi hale okwiitavela omalunduluko oo nda ninga handi kwafelwa kuKalunga. Ihandi kala vali nda hala elihumbato inali koshoka nosho yo oinima yopamaliko oyo nda li ndi hole.

Ngeno kanda li nda dulika kwaasho Ombiibeli tai ti, ngeno paife onda fya, ile ndi li modolongo. Ashike paife ondi na oukwaneumbo muwa nowa hafa. Ohashi hafifa nge eshi handi longele Jehova Kalunga pamwe nomukulukadi wange oo ha yambidida nge, nokaana ketu oko haka dulika. Onda pandula Jehova eshi a pitika nge ndi kale umwe womoumwainafana wopaKriste u holafane. Onda pandula neenghono eshi pa li umwe oo a ninga eenghendabala a honge nge oshili yOmbiibeli. Onda lenga yo omhito oyo ndi na yokukwafela vakwetu ve lihonge osho Ombiibeli tai hongo. Onda pandula unene omolwefilonghenda laJehova Kalunga eshi a nanena nge kuye.

 [Ouyelele u li pepandja 11]

“Onde lihonga kutya Jehova oku na omaliudo nonokutya eenghatu dange otadi dulu oku mu udifa nai, ile oku mu hafifa”

[Efano pepandja 11]

Ndi li nomukulukadi wange nokaana ketu

[Efano pepandja 11]

Onda li nda mona meme ta ningi omalunduluko mawa monghalamwenyo yaye