Osha li omokati koufiku, novapristeri ova li va dimina okupa Judas oisilveri 30 opo a kengelele Jesus. Judas okwa li a kwatela komesho ongudu inene yovapristeri ovakulunhu nOvafarisai opo va ka konge Jesus. Ova li va ya pamwe novakwaita vetangakwaita laRoma va homata nosho yo omukulunhu wetangakwaita.

Eshi Judas a lekelwa kuJesus pouvalelo wOpaasa, okwa li a ya meendelelo kovapristeri ovakulunhu. (Johannes 13:27) Ova li va ongela ovakwaita nosho yo etangakwaita lavo. Potete, otashi dulika Judas a li e va twala konduda oko Jesus novayapostoli vaye va li va danena Opaasa. Opo nee ova li va tauluka efilu laKidron va yuka koshikunino. Kakele koilwifo, ova li va humbata eelamba neenyika tava kongo Jesus.

Eshi va li va finda kOmhunda yEemono, Judas okwa li e na elineekelo laapo tava ka hanga Jesus. Momukokomoko woivike oyo ya dja ko, eshi Jesus novayapostoli vaye va kala nokutavakana pokati kaBetania naJerusalem, luhapu ova li hava tula moshikunino shaGetsemane. Osha li oufiku, na Jesus otashi dulika a li e li momididimbe domiti deemono odo da li moshikunino. Ongahelipi ovakwaita, ovo tashi dulika inava mona nale Jesus, tava ka dula oku mu didilika mo? Judas okwa li ta ka yandja edidiliko opo e va kwafele. Okwa ti: “Ou handi xupita, oye ngaho; mu kwatei po, indeni naye, inamu mu efa.” — Markus 14:44.

Ndele eshi va fika moshikunino, Judas okwa li a mona Jesus e li novayapostoli vaye nokwa li a ya ko kuye meendelelo. Judas okwa ti: “Muhongi, wa tokelwa po!” Ndele ta xupita Jesus. Jesus okwa tya kuye: “Kaume, owe uya okuninga shike apa?” (Mateus 26:49, 50) Jesus okwa li e linyamukula ye mwene a ti: “Judas, oto kengelele Omona womunhu moku mu xupita?” (Lukas 22:48) Ashike ka li vali te lipula shi na sha naJudas.

Jesus okwa li a ya pouyelele wolamba, ndele ta pula ta ti: “Olyelye tamu kongo?” Ova ti: “OJesus Omunasaret.” Jesus okwa nyamukula nouladi a ti: “Aame ou.” (Johannes 18:4, 5) Molwaashi ovalumenhu ovo kava li ve shi teelela, ove lidenga pedu.

Ponhele yoku mu kwata po pefimbo opo, Jesus okwa li e va pula natango kutya otava kongo lyelye. Eshi va nyamukula vali kutya “OJesus Omunasaret,” Jesus okwa nyamukula a ti: “Onde mu lombwela kutya aame ou. Ngeenge aame tamu kongo, efeni ovalumenhu ava va ye.” Nonande Jesus okwa li moudjuu, okwa li a dimbuluka osho a li popya metetekelo kutya ina hala a kanife nande oumwe womovashikuli waye. (Johannes 6:39; 17:12) Jesus okwa li a amena ovayapostoli vaye ovadiinini opo paha kane nande oumwe, “kakele komona wehanauno,” Judas. (Johannes 18:7-9) Okwa li a pula ovashikuli vaye ovadiinini va efiwe va ye.

Eshi ovakwaita va fikama va yuka kuJesus, ovayapostoli ova li va mona osho sha li tashi ningwa po. Ova pula va ti: “Omwene, natu va ponokele nomaongamukonda?” (Lukas 22:49) Fimbo Jesus ina nyamukula, Petrus okwa li a nyeka ko eongamukonda limwe kovayapostoli. Okwa li a ponokela Malkus, omupiya womupristeri munene, nokuteta ko okutwi kwaye kwokolulyo.

Jesus okwa li a kwata okutwi kwaMalkus noku ka velula. Okwa li a honga oshilihongomwa sha fimana eshi a lombwela Petrus a ti: “Shunifa mo eongamukonda loye moshilaleko, osheshi aveshe ava tava longifa eongamukonda otava ka fya keongamukonda.” Jesus okwa li a halelela okukwatwa po, nomolwaasho a yelifa a ti: “Omishangwa  otadi ka wanifwa ngahelipi odo tadi ti kutya osho shi na okuningwa ngaho?” (Mateus 26:52, 54) Okwa weda ko a ti: “Mbela nghi na okunwa eholo olo Tate a pa nge?” (Johannes 18:11) Jesus okwa li a hala okulonga ehalo laKalunga, fiyo nokuli omefyo.

Ndele Jesus okwa pula ongudu yovanhu, a ti: “Omwe uya okukwata nge po mu na omaongamukonda needibo mwa fa mwe uya okukwata po ombudi? Efiku nefiku onda li handi kala omutumba motembeli handi hongo, ashike inamu kwata nge po. Ndele aishe oyo oya ningwa, opo osho sha shangwa kovaprofeti shi wanifwe.” — Mateus 26:55, 56.

Ongudu yovakwaita, omukulunhu wetangakwaita nosho yo Ovajuda ova li va kwata po Jesus noku mu manga. Eshi ovayapostoli ve shi mona, ova li va faduka po. Ashike “omulumenhu umwe omunyasha,” tashi dulika omuhongwa Markus, okwa li a fyaala mokati kongudu opo a shikule Jesus. (Markus 14:51) Omulumenhu oo omunyasha okwa li a dimbulukiwa nova li tava kendabala oku mu kwata po, naasho osha li she mu ningifa opo a fiye po elapi laye liwa loliina eshi a li ta i onhapo.