Мин кічіг полғамда, пістің сӧбіре Іскеркі Германияда Лейпцигтең ырах нимес, Чехияның паза Польшаның границаларының хыринда чуртаан. Мағаа 6 час полғанда, пабам пасха хазнада тоғын сыххан, аннаңар піс пастап Бразилиязар, анаң Эквадорзар кӧс парыбысхабыс.

Мағаа 14 час тол парғанда, мині Германиязар школа-интернатсар ызыбысханнар. Іҷе-пабам ыраххы Ӱстӱнзархы Америкада чуртааннар, аннаңар мағаа пос алынҷа чуртирға киліскен. Мин уғаа поғдархаас кізі пол парғам. Пасха кізілернің кӧрістерін санға албаҷаң полғам.

Мағаа 17 час полғанда, іҷе-пабам Германиязар айлан киліп, мині постарынзар алып алғаннар. Че поғдархаас хылығымның ӱчӱн, мин оларнаң хада чуртап полбаам. 18 частығда ибдең парыбысхам.

Мин чуртастың смыслын сыбыра тілеем. Аймах-пасха обществоларда паза организацияларда полып алып, мин сағын сыххам: «Кізілер чирні саңай тонап салғанҷа, чуртазым тооза чирні істессем, мағаа иң чахсы полар».

Мин Германиядаң парыбысхам. Мотоцикл алып алып, Африказар пар сыххам. Ӱр ниместең мотоциклім одыл парған, аннаңар Европазар нандыра айланғам. Нинҷе-де тус пазынаң Португалияда талай хазында полғам. Анда мин талайҷа чӧрерге сағынып алғам.

Мин чииттернің группазына хозылып алғам, олар Атлантическай океан кис парыбызарға тимненчеткеннер. Оларның аразында Лори полған. Соонаң піс аннаң хоных хон салғабыс. Піс Кариб олтырыхтарынзар чидіп алғабыс. Пуэрто-Рикода ӱр нимес полып алып, Европазар нандыра айланғабыс. Піс Лоринең хада, парустығ киме таап алып, аны талайҷа чӧрерге килістіре идіп аларға хынғабыс. Че ӱс ай пазынаң мині аримияа апарыбысханнар, аннаңар сағынған сағызыбысты толдыр полбаабыс.

Мин германскай флотта 15 ай служить полғам. Ол туста, піс Лоринең хоных хон салып, наа чорых тимнеп сыххабыс. Мин армияа парар алнында піс спасательнай шлюпканың корпузын алып алғабыс. Мин армияда полған туста, піс кӧместең ол шлюпкадаң парустығ киме пӱдіргебіс. Анда чуртап, пістің сіліг чирібісті істезерге сағынғабыс. Мин армиядаң айланған соонда, піс Иегованың киречілерінең Библия ӱгрен сыххабыс. Ол туста парусникті читіре пӱдіргелек полғабыс.

Пастап мин чуртазымны алыстырарға кирек тее чоғыл тіп сағынғам: тамкы тартарын тастабысхам, хонығым зарегистрированнай полған (Ефестегілерге 5:5). Худайның хайхастығ чайаахтарын істезіп, чир ӱстӱнҷе чорых чӧргені иң чахсы чуртас тіп санаам.

Сынында мағаа хылығымны алыстырарға кирек полған. Мин уғаа поғдархаас паза позыма иртіре ізенчеткен кізі полғам. Позымның чидіглерімнеңер ле, позымнаңар ла сағынып чуртаам.

Пірсінде мин Иисустың Тағдағы ӱгредиин хығырғам (Матфей, 5—7 пастағлар). Иисус ӧзӧкчеткеннерні паза сухсапчатханнарны часкалығлар тіп чоохтапча (Матфей 5:6). Анзын піліп аларға мағаа уғаа сидік полған. Ӧзӧккені паза сухсааны кізіні хайди часкалығ ит полар? Библияны аннаң андар ӱгреніп, полған на кізінің духовнай кирексіністері парын піліп алғам, че пазымнығ ла кізілер ол кирексіністер парын пілінчелер паза оларны толдырчалар. Иисус теен: «Духовнай ӧзӧгістерін толдырарға кӱстенчеткеннер часкалығлар» (Матфей 5:3, НТ).

Піс Лоринең хада Библияны ӱгренерін Германияда пастаабыс, анаң Франциязар, соонаң Италиязар парыбысхабыс. Хайдар даа парзабыс, піс Иегованың киречілерін таап алҷаң полғабыс. Оларның пір чӧптіг паза сын хыныстығ полғаннары мағаа уғаа хайхастығ полған. Іди мин Иегованың киречілері прай чир ӱстӱндегі харындастар пірігізі полчатханын кӧр салғам (Иоанн 13:34, 35). Нинҷе-де тус пазынаң піс Лоринең, кіреске тӱзіп алып, Иегованың киречізі полып алғабыс.

Кіреске тӱскен соонда даа хылығымны алыстырғам. Піс Лоринең Африканың хыринҷа чӱс парыбызып, Піріккен Штаттарзар чидіп алар ӱчӱн, Атлантическай океан кис парыбызарға сағынып алғабыс. Океан ортызында, чирдең муң азыра миль ырах, кічиҷек кимеде, піс ікӧлең не полғабыс. Анда, мин піліп алғам: пістің илбек Чайаачыбыстың хыринда мин кічиҷек, нимее чарабаан кізізім. Океан ортызында итчең ниме чох полған, аннаңар мин кӱн тооза Библия хығырҷаң полғам. Иисустың чуртазынаңар чоохтар минің чӱрееме уғаа тың теңен. Ол чазых чох, толдыра кізі полған. Ол ит полған нимелерге минің сағызым даа читпесчік, че ол хаҷан даа, позынаңар ла сағынып, чуртабаан. Ол тигірдегі Пабазының кӧңнін толдырар ӱчӱн чуртаан.

Иисустаңар сағынып, Худайның Хан-ӱлгӱзін, мин идерге хынчатхан киректернің аразына нимес, че чуртазымның пастағы орнына турғызарға кирек полчатханын піліп алғам (Матфей 6:33). Піріккен Штаттарзар чидіп алғанда, піс Лоринең анда чуртирға паза Худайға нымысчыланысты ӧӧн орынға турғызарға пӧгін алғабыс.

Мының алнында, позымнаңар ла сағынып чуртапчатхамда, ікінҷілестер толдыра полған. Ам, тізең, минің хыйға сағыстар паза устағлар алҷаң ізестіг орын пар (Исаия 48:17, 18). Ідӧк чуртазымда турыстығ кӧстег пар: Худайға нымысчыланарға паза пасхаларын аннаң таныстырарға.

Библиядағы принциптернең тузаланған ӱчӱн пістің хонығыбыс пик пол парған. Пістің Иегованы пілчеткен паза ағаа хынчатхан сіліг хызыбыс пар.

Пістің чуртазыбыс сыбыра амыр ла полбаан. Че Иегованың полызиинаң піс хол тӱзірбеске паза ағаа сыбыра ізенерге пӧгін тутчабыс (Притчи 3:5, 6).