Мин Гватемаланың кидеркі тағлығ чирлеріндегі кічиҷек Акуль городта тӧреем. Пістің сӧбіребіс майя чоннаң сыххан ишиль чонға кірче. Мин испанскай тілдең пасха позымның чонымның тілін пілчем. Минің кічіг тузымда Гватемалада гражданскай чаа полған. Ол 36 чыл полған чаада минің чонымнаң кӧп кізі хырыл парған.

Мағаа тӧрт час полғанда, минің читі частығ харындазым гранатанаң ойнаан. Кинетін ол граната чара чачырап парған. Харындазым ӧл парған, мин, тізең, харах чох халғам. Аннаңар Гватемала городта харах чох палаларның интернадында ӧскем. Анда мин Брайль шрифтіне ӱгреніп алғам. Ноға-да ӱгретчілер мағаа пасха палаларнаң чоохтазарға чаратпаҷаңнар, аннаңар прайзы миннең хыйа тудын сыхханнар. Мин саңай чалғысхан халғам, аннаңар ибзер парар тусты чидікпин сахтаҷаң полғам. Мағаа пір чылда ікі ай ибде іҷемнең хада поларға чарадылҷаң. Іҷем уғаа паарсах полған паза мағаа тың айаҷаң. Че мағаа он час полғанда, іҷем ӱреп парған. Мағаа чуртирға хай-хай аар полыбысхан, іҷемнең пасха мағаа пірдеезі хынмаан нооза.

Он пір час полғанда, мин тӧреен городымзар айлан килгем. Пабамның ипчізінің оолғының сӧбірезінде чуртап сыххам. Минің кип-азах паза чиис полған полза даа, мағаа пірдеезі паарсабаан паза хынмаан. Пірееде мин ылғап ала, Худайдаң сурҷаң полғам: «Ноға минің іҷем ӱреп парған? Ноға мин харах чох халғам?» Кізілер ол прай ниме Худайның кӧңнінҷе полған тіҷеңнер. Аннаңар Худай кізілерге айабинча паза сыны чох тудынча тіп сағынғам. Позыма хол салыныбызарға оңдай таппаам, аннаңар ла тіріг халғам.

Харахтарым кӧрбинчеткен ӱчӱн мині хайди ла полза итчеңнер. Кічіг туста мағаа нинҷе-де хати кӱл салғаннар. Мағаа пірдеезінің кирегі халбинча тіп сағынғам, аннаңар іди иттірчеткенімнеңер пір дее кізее чоохтабаам. Кізілер миннең асхынах чоохтасчаңнар, мин дее пірдеезінең чоохтаспаҷам. Мин туюх, мӧгіс паза пірдеезіне киртінмеҷең кізі полғам.

Пірсінде школада перемена тузында минзер Иегованың киречілері пастыр килгеннер. Пір ӱгретчі мағаа айаан, аннаңар ол ирепчіні минзер килерге сурынып алған. Олар мағаа Библияда ӧліглер тірілерлер паза харах чохтар хатап кӧрерлер тіп пазылча тіп чоохтап пиргеннер (Исаия 35:5; Иоанн 5:28, 29). Олар чоохтаан ниме минің кӧңніме кірген, че мин кізілернең ӱр чоохтаспаам, аннаңар оларнаң чоохтазарға аар полған. Андағ даа полза, олар минзер киліп, Библияның сынына ӱгретчеңнер. Ол ирепчі паарсах паза тыстаныстығ полған. Минзер чидіп алар ӱчӱн, оларға тағлар азыра 10 километр азыра чазағ чӧрерге килісчең.

Минің харындазым ол ирепчідеңер иптіг тонаных, че пай нимес кізілер тіп чоохтаан. Олар прай чӱрекнең мағаа полысчаңнар, пірееде кічиҷек сыйыхтар ағыл килҷеңнер. Мин ікінҷілебеем: сын на христианнар іди тудынчалар.

Мин Библияны Брайль шрифтінең пазылған публикацияларнаң ӱгренгем. Библиядағы ӱгредіглерні піліп ал турҷаңмын, че оларның піреелерін чӱреемнең ал полбаҷаңмын. Кӧзідімге, Худай паза пасхалары мағаа хын поларларына киртінмеем. Ноға чир-чалбахта анҷа кӧп ирее полчатханын пілҷеңмін, че Худайны хынчатхан Паба тіп санирға аар полған *.

Библиядаң алған пілістер чуртасха кӧрізімні кӧместең алыстырғаннар. Кӧзідімге, Худай ирееленчеткеннерге айапчатханын піліп алғам. Аның ирееленчеткен нымысчыларынаңар ол піди теен: «Чонымның ирееленчеткенін кӧр салғам... Оларның хайди ирееленчеткеннерін мин пілчем» (Исход 3:7). Иегова паарсастығ Худай, мин аны піліп алғамда, чуртазымны ағаа пазырыста пирібізерге пӧгін алғам. Анаң 1998 чылда, кіреске тӱзіп алып, Иегованың киречізі пол парғам.

Кіреске тӱскен соонда, пір чыл пазынаң Эскуинтла тіп городтаң ырах нимес харах чох кізілерге ӧнетін тимнелген ӱгредіг ирткем. Андағы ах сағал мағаа христианскай чыылығларға чӧрерге хайди аар полчатханын піліп алған. Мағаа Библия ӱгренерге полысхан Киречілер тағлар азыра чазағ килҷеңнер. Иң чағын чыылыға мағаа даа ол тағларҷа парарға килісчең. Ол чолларҷа харах чох кізее чӧрерге уламох сидік. Ол ах сағал Эскуинтлада сӧбіре таап алған. Олар мині постарынзар алып алғаннар паза чыылығларға чӧрерге полыс сыхханнар. Ол тустаң сығара олар мағаа, чағын кізее чіли, полысчалар.

Хайди харындас-пиҷелер мағаа хыныснаң хайғаннарын мин кӧп хати кӧргем. Прай ол киректер мағаа сын христианнарға хозыл парғанымны кӧзітчелер (Иоанн 13:34, 35).

Мин паза позымны нимее чарабаан кізее санабинчам. Ам минің чуртазымның смыслы пар. Мин кізілерні, прай тузым пиріп, Библияа ӱгретчем. Позымның сидіктерімнеңер сағынып одырар орнына, пасхаларын Библияның аарлығ сыннарынаң таныстырчам. Ӧмеде, ах сағал полып, нымысчыланчатханыма паза кӧп чон алнында чоохтар чоохтап полчатханыма тың ӧрінчем. Нинҷе-де муң кізі алнында региональнай конгрессте дее чоох чоохтаам.

2010 чылда Сальвадорда Школа усовершенствования служения тіп школада ӱгренгем (ам ол школа Хан-ӱлгӱнің искірігҷілернің школазы тіп адалча). Ол школа мині ӧмеде пирілген тоғысты чахсы арах идерге ӱгрет салған. Анда ӱгренчеткемде, Иегова мағаа хынчатханын паза мині аарлыға санапчатханын іле кӧргем. Паза ол полған на кізіні ағаа нымысчыланарға турыстығ ит полчатханын піліп алғам.

Иисус теен: «Пирчеткені алчатханынаң часкалығ» (Илҷілернің 20:35). Ам мин ікінҷілебин чоохтап полам: «Мин часкалығзым. Мының алнында мин нимее чарабаан кізізім тіп сананғам, ам, тізең, пасхаларына полысчам».