Мин Коста-Риканың іскеркі сариндағы Лимон тіп портовай городта тӧреем паза ӧскем. Іҷе-пабамның сигіс пала полған, мин читінҷі палазы полғам. Мағаа сигіс час полғанда, пабам ӱреп парған. Аннаңар пісті іҷем чалғысхан ӧскірген.

Мин спортнаң кічігдең ала айғасхам. Бейсбол ойнирға уғаа тың хынҷаң полғам. Улуғ класстарда любительскай лигада ойнап сыххам. Нинҷе-де чыл пазынаң пір кізі (бейсбольнай скаут) мині Никарагуаның профессиональнай командазында ойнирға хығырған. Ол туста іҷем тың ағырчатхан, мағаа аны кӧрерге кирек полған. Паза минің Никарагуазар парарым килбеен, аннаңар мин отказ полыбысхам. Соонаң пасха скаут мині Коста-Риканың национальнай бейсбольнай командазында ойнирға хығырған. Ол командада бейсбол ойнапчатхан любительлернің иң чахсыларын чыып алғаннар. Мин оларнаң хада ойнирға пӧгін алғам. Национальнай сборнайда мин 1949 чылдаң 1952 чылға читіре ойнаам. Кубадағы, Мексикадағы паза Никарагуадағы ойыннарда араласхам. Мин бейсмен алай база хадарчатхан кізі полғам. Позымның тоғызымны чахсы иткем. 17 ойын аразына мин пір алҷаас таа итпеем. Стадиондағы чон, минің адымны адап, хысхырчатханын истерге уғаа хынҷаң полғам.

Чоохтирға уйадыстығ, че мин сайбах чуртас апарғам. Минің пір хыс полған, че мин сыбыра пасха ипчілернең оралыс чӧрҷең полғам. Ағаа хоза, мин араға ісчең полғам. Пірсінде иртен позымның орғанымда усхун парғам, че хайди ибзер читкенімні сағысха кир полбаам. Ідӧк мин ахчаа домино паза лотерея ойнаҷаң полғам.

Ол туста іҷем Иегованың киречізі полып алған. Ол мағаа позының киртінізінеңер чоохтаҷаң, че минің прай сағыстарым спортта полғаннар, аннаңар ол чоохтаан нимелер мағаа хынығ полбаан. Мин пӱкӱлее спортха пирін салған полғам. Тренировка тузында астапчатханымны даа сизінмеҷең полғам! Бейсбол минің чуртазым полған!

Че мағаа 29 час полғанда, пір ойын тузында, мячты тудып аларға кӱстеніп, пиртін парғам. Аннаңар профессиональнай спортты артыс саларға киліскен. Че мин бейсболны тастабыспаам. Ибімнің хыринда ойнапчатхан бейсбольнай команданы тренировать пол сыххам.

1957 чылда мин Иегованың киречілерінің конгрезіне парғам. Ол конгресс мин хаҷан-да ойнаан стадионда полған. Трибунада одырып алып, Иегованың киречілері удур-тӧдір хайдағ улуғласнаң паза паарсаснаң хайчатханнарын кӧргем паза оларның тудынызын бейсбольнай матчтар тузында болельщиктер хайди алаахчатханнарынаң тиңнестіргем. Конгресс соонда мин Иегованың киречілерінең хада Библия ӱгрен сыххам паза оларның христианскай чыылығларына чӧр сыххам.

Библиядаң алған пілістернің кӧбізі мағаа хайхастығ полған. Кӧзідімге, Иисус Христос халғанҷы кӱннерде аның ӱгренҷілері Хан-ӱлгӱдеңер чахсы хабарны прай чир ӱстӱнде искірерлер тіп чоохтаан (Матфей 24:14). Ідӧк мин сын христианнар ахчаның ӱчӱн нимес, тикке нымысчыланарға кирек полчатханнарын піліп алғам. Иисус теен: «Тикке алған нимелерні тиккеӧк пирібіс турыңар» (Матфей 10:8).

Мин Библияда пазылған нимелерні Иегованың киречілерінің киректерінең тиңнестіргем. Олар, постарына айанмин, чирнің иң ыраххы пулуңнарында Хан-ӱлгӱдеңер чахсы хабарны искір чӧрчелер. Анзы мағаа уғаа хайхастығ полған. Иисус ӱгренҷілеріне постарына тартынмасха чоохтаан. Иегованың киречілері сах іди тудынчалар. Аннаңар мин Иисустың «соомҷа пар» тіп сӧстерін хығырып алғамда, Иегованың киречізі полып аларға пӧгін алғам (Марк 10:21).

Че чуртазымны алыстырып алар ӱчӱн, кӧп тус кирек полған. Мин кӧп чыллар неделя сай лотерея ойнаҷаң полғам. Мин лотереяда сыбыра позымның часкалығ санымны пас салҷаң полғам. Че Библиядаң мин піліп алғам: Худай «Талаан худайына» пазырчатхан паза чабды кізілерні хырт кӧрче (Исайя 65:11; Колосстағыларға 3:5). Аннаңар мин азартнай ойыннарны тастабызарға пӧгін алғам. Соңа позырахтох минің часкалығ саным утып алған! Ол неделяда ойнабааным ӱчӱн таныстарым мағаа кӱлгеннер паза сыбыра ойнап турарға кӱстееннер. Че мин алған пӧгінімні алыстырбаам. Ол тустаң сығара ахчаа пір ойын даа ойнабаам.

Иегованың киречілерінің конгрезінде кіреске тӱзіп алғам, че олох иирде пасха сынаға урунғам. Анзы минің «наа кізее» айлан парғанымны сыныхтабысхан (Ефестегілерге 4:24). Иирде гостиницазар айлан килгемде, ізігім хыринда мының алнында миннең чуртаан хыс турчаттыр. Ол мағаа теен: «Сэмми, пӱӱнгі иирні хада иртірібізеең, хынығ полар». Мин ағаа кӧні «чох» тіп нандыр пиргем паза мин Библия хоостыра чуртапчам тіп чоохтап пиргем (1 Коринфтегілерге 6:18). «Хайди?», — хайхап парған ол. Аннаң Библияның моральнай нормаларына кӱл сыххан. Ол мині аннаң хада хатап чуртирға кӱстеп сыххан. Че мин, номерімзер кір парыбызып, ізік чабысхам. 1958 чылда Иегованың киречізі полып алғанымнаң сығара мин христианскай принциптерні пір хати даа сайбабаам.

Библия чуртазымны хайди пайытханын прай пасхан ползам, пір кинде пол парарҷых. Минің киртістіг нанҷылар кӧп, чуртазымның смыслы пар паза мин сынап часкалығбын.

Мин бейсболға ам даа хынчам, че ол минің чуртазымда ӧӧн орында нимес. Спортнаң айғасхан туста минің ахча паза сабланыс полған. Че прай ол нимелер ирт парчалар. Мин Худайнаң пик палғалыстығбын паза прай чир ӱстӱндегі харындастарның пірігізіне кірчем — пу нимелер мӧгі тус турарлар. Библияда чоохталча: «Чир-чалбах паза аның хыҷыхтаныстары ирт парадыр, че Худайның кӧңнін толдырчатхан кізі хаҷан даа чуртидыр» (1 Иоанның 2:17). Ам Иегова Худай паза аның чоны минің чуртазымда ӧӧн орында турчалар!