Мин Саксония чирінде кічиҷек аалда тӧреем. Ол туста Саксония Германскай Демократическай Республиканың (ГДР) чардығы полған. Пістің сӧбіребіс ынағ полған. Іҷе-пабам пісті пӧзік нравственнай нормаларға ӱгреткен. Ол туста ГДР коммунистическай хазна полған, аннаңар кӧбізі религияа хайығ салбаҷаңнар. Мин позым даа Худайға киртінмеҷем. 18 часха читіре мин атеизмнің паза коммунизмнің ӱгредіглерінең пасха ӱгредіглер кӧрбеем.

Коммунисттер прай кізілер тиңнер тіп ӱгретчіңнер. Анзы минің кӧңніме тың кірген. Ис-пайны прай кізілерге ӱлебіссе, пай паза чох-чоос кізілер чох полар тіп санаҷам, аннаңар мин чииттірнің коммунистическай организациязынзар кіріп алғам. Мағаа 14 час полғанда, макулатура перерабатывать полҷаң экологическай проектте араласхам. Ауэ городтың пастыхтары мағаа «почетный гражданин города» тіп званиені пиргеннер. Чиит полғам полза даа, ГДР-ның саблығ политиктерінең таныс полғам, аннаңар кӧстіглерім орта тіп сағынғам паза алнынзархы чуртазым ізестіг пілдірчеткен.

Кинетін чуртазым саңай алыс парған. 1989 чылда Берлинскай стенаны иңзерібіскеннер. Аның соонҷа Іскеркі Европадағы коммунистическай хазналарның блогы иңзеріл парған. Ағаа хоза, мин піліп алғам: коммунисттер сыны чох тудынғаннар. Коммунизмге киртінмеен кізілерні ікінҷі сорт кізілері тіп санаҷаңнар. Хайди андағ ниме полар? Коммунисттер прай кізілер тиң тіп киртінмееннер ме алай коммунизм иллюзия ла полған ма? Аннаң андар хайди чуртирға пілбинібіскем.

Анаң мин чуртазымны музыкаа паза искусстваа пир саларға сағыныбысхам. Музыкальнай училище тоосхан соонда мағаа университетке кіріп аларға оңдай полған. Мин художник паза музыкант поларға сағыныбысхам. Іҷе-пабам ӱгреткен нравственнай принциптер ундудыл сыхханнар. Прай пос тузымны мин ӱтертініске ле пирҷең полғам. Кӧзідімге, пір туста нинҷе-де хыснаң тоғасчаң полғам. Че музыка, искусство паза ӱтертіністер минің чуртазымны истіг итпеҷеңнер. Минің хоостарымда даа хорыхчатханым паза алнынзархы чуртасха ізенминчеткенім кӧрінчеткен. Сыбыра сағынҷаң полғам: «Ниме пісті сағыпча? Ноға мин чуртапчам?»

Ӱр ниместең мағаа истіг чуртирға пирбинчеткен сурығларыма нандырығлар таап алғам. Пірсінде иирде студенттернең хада училищеде алнынзархы чуртастаңар чоохтазып одырғабыс. Студенттернің пірсі, Манди *, Иегованың киречізі полған. Ол мағаа уғаа чахсы чӧп пирген. Ол теен: «Андреас, сурығларыңа нандырығлар таап аларға хынчатсаң, Библияны хығыр кӧр».

Пір хыринаң, мағаа піліп аларға хынығ пілдірген, пір хыринаң, тізең, киртінминчеткем. Че андағ даа полза, піліп аларға мағаа уғаа хынығ полған. Манди Даниилнің ікінҷі пастаана хайиимны айландырған, мин уғаа тың хайхап парғам. Анда, амғы тусха читіре соон сӱрістіре алысхан, мировой державалардаңар пазылча паза Манди алнынзархы чуртастаңар ухаанҷыластар кӧзіт пирген. Мин сурығларыма хайда нандырығлар таап аларын піліп алғам. Че кем іди хап-орта ухаанҷылап полар? Худай сынап пар ба?

Манди мині Хорстнаң паза Ангеликанаң, Иегованың киречілерінең, таныстыр салған. Олар миннең Библия ӱгрен сыхханнар. Иегованың киречілері ле Иегованың адынаң тузаланҷаңнар паза ол аттаңар пасхаларына чоохтаҷаңнар (Псалом 83:18; Матфей 6:9). Ідӧк Иегова Худай кізілерге мӧге чуртас пирерін піліп алғам. Псалом 37:9-та чоохталча: «Иеговаа ізенчеткеннерге, тізең, чир ӱлӱске пирілер». Иегованың нормаларынҷа чуртирға кӱстенчеткен полған на кізее Иегова мӧгі чуртирға оңдай пирчеткеніне мин уғаа тың ӧрінгем.

Че чуртазымны алыстырарға аар полған. Музыкада паза искусствода маңнаныстығ полған ӱчӱн, мин уғаа поғдархаас пол парғам. Аннаңар мағаа пазымнығ поларға ӱгренерге кирек полған. Паза сайбах чуртазымны артыс саларға оой полбаан. Иегова библейскай принциптернең чуртирға кӱстенчеткеннерге тыстаныснаң паза паарсаснаң хайчатхан ӱчӱн, мин уғаа алғыстығбын!

Чуртазымның пастағы 18 чыл мин коммунизмнің паза аттеизмнің идеяларынҷа чуртаам. Ам, тізең, мин Библия хоостыра чуртапчам. Ам мин алнынзархы чуртастаң хорыхпинчам паза чуртазымның смыслын таап алғам. 1993 чылда, кіреске тӱзіп, мин Иегованың киречізі пол парғам, 2000 чылда мин Табитаны ал салғам, ол ідӧк Иеговаа нымысчыланчатхан христианка полған. Ам піс хада кӧп тус Иеговаа прай чӱрекнең нымысчыланчабыс. Нымысчыланыста, минӧк чіли, коммунистическай паза аттеистическай режимде чуртаан кізілерге тоғасчабыс. Оларны Иегованаң таныстырзам, мин уғаа ӧрінчем.

Мин Библия ӱгрен сыххамда, анзы іҷе-пабамның кӧңніне кірбеен. Че Библияны ӱгренгені хайди минің чуртазымны алыстырчатханын кӧр салғанда, олар паза сағыссырабин сыхханнар. Ам, тізең, олар постары Библияны ӱгренчелер паза Иегованың киречілерінің чыылығларына чӧрчелер. Анзына мин уғаа тың ӧрінчем.

Піс Табитанаң Библияның принциптері хоостыра чуртапчабыс, аннаңар хоныхта часкалығбыс. Кӧзідімге, удур-тӧдір киртістіг поларға тіп принцип хоныхты тыытча (Еврейлерге 13:4).

Ам мин алнынзархы чуртасха ізеніснең кӧрчем. Прай чир-ӱстӱндегі харындас-пиҷелернің пірігізінің чардығы полчам. Анда прайзы ынағлар паза пір чӧптіглер, прай кізілерге пір тиң хайчалар. Мин хаҷан даа андағ кізілер аразында поларға хынғам.