Чазых — Худайның нормазына киліспинчеткен прай ниме, кӧзідімге: аның кӧңніне тоғырланчатхан чувство, сағыс алай тудыныс. Анзына, Худайның чахығларын сайбапчатханы алай Худайның хараанда саба тудынчатханы кірче (1 Иоанның 3:4; 5:17). Ідӧк Библияда: «Чахсыны ит полар кізі аны итпинчетсе, ағаа ол чазыхха саналар», — тіп чоохталча (Иаковтың 4:17).

 Библия иң пастағызын пазылған тіллерде чазых тіп сӧс таңма чаза атханын таныхтапча. Пурунғы Израильде чааҷыларның піреелері уғаа ус полғаннар, пращанаң тасты таңмаа тастаза, пірдеезі чаза тастабаҷаң. Ідӧк пу сӧстер «чазых итпеенін» таныхтапчалар (Судей 20:16). Пістің кӧстиибіс Худайның толдыра нормаларынҷа тудынарға, чазых, тізең, ол кӧстеге чит полбаанын таныхтапча.

 Худай пісті чайап салған, аннаңар аның аймах-пасха нормалар турғызарға правозы пар (Азых чоох 4:11). Піс Худайның алнында иткен киректерібіс ӱчӱн нандырығ тударбыс (Римдегілерге 14:12).

Чазых итпин, чуртап полар ба?

 Чох. Библияда чоохталча: «Прайзы чазых иткен, прайзы Худайның сабланызы чох халған нооза» (Римдегілерге 3:23; 1 Царей 8:46; Экклезиаст 7:20; 1 Иоанның 1:8). Хайди анзы пол парған?

 Худай пастағы кізілерні, Адамнаң Еваны, позының омазына тӧӧй иде чайап салған, аннаңар олар чазых чох полғаннар (Бытие 1:27). Худайның чооғын испин, олар чазыхтығ пол парғаннар (Бытие 3:5, 6, 17—19). Хайди іҷе-пабазы ағырығ полза, палалары ағырығох тӧріпчелер, ідӧк Адамнаң Еваның палалары чазых ӱлӱске алғаннар (Римдегілерге 5:12). Аннаңар Израильнің ханы Давид піди теен: «Мин чазыхтығ тӧреем» (Псалом 51:5, Смысловой перевод).

Пірее чазыхтар пасха чазыхтардаң аар ба?

 Я. Кӧзідімге, Библияда чоохталча: «Содомда чуртаан кізілер уғаа ардап парған кізілер полғаннар паза Иеговадаң тоғыр аар чазыхтар иткеннер» оларның чазыхтары уғаа аар полған (Бытие 13:13; 18:20). Чазых нинҷе аар полчатханын кӧзітчеткен ӱс фактор кӧр кӧреелер.

1.   Чазыхтың сині. Библия пісті мындағ аар чазыхтардаң хыйа поларға чоохтапча: сайбах тудыныстаң, чой худайларға пазырғанынаң, оғырлаанынаң, араға иртіре іскенінең, ахча пыласханынаң, кізі ӧдіргенінең паза спиритизмнең (1 Коринфтегілерге 6:9—11; Азых чоох 21:8). Ол чазыхтар сағынмин иткен аар нимес чазыхтардаң, кӧзідімге, пасхаларына ӱрег ағылчатхан сӧстердең алай киректердең пасха (Притчи 12:18; Ефестегілерге 4:31, 32). Аар нимес чазыхтар аннаң даа аар чазыхтарға ағылчалар, аннаңар Библия ол чазыхтарны нимее салбин полбасха чӧп пирче (Матфей 5:27, 28).

2.   Кізінің сағызы. Пірее чазыхтар кізі Худайның нормаларын пілбееннеңер иділчелер (Илҷілернің 17:30; 1 Тимофейге 1:13). Библия кізіні андағ чазыхтардаң ахтабинчатса даа, ол чазыхтарны Худай чахығларын ӧнетін сайбаан чазыхтардаң оонаң турғысча (Числа 15:30, 31). Піле тура иділчеткен чазых кізінің «чабал чӱреенең» сыхча (Иеремия 16:12).

3.   Нинҷе удаа иділче. Библия пір хати иділген чазых ӱр тус иділчеткен чазыхтаң пасха полчатханын кӧзітче (1 Иоанның 3:4—8). Кізі саба тудынчатханын піліп алған соонда даа чазых идерін тохтатпинчатса, Худай аны пыролапча (Еврейлерге 10:26, 27).

 Аар чазых ит салған кізілерні чӱректері тың пыролапча. Кӧзідімге, Давид хан пас салған: «Минің чазыхтарым пазымнаң пӧзік кӧдіріл пардылар, хаап полбас чӱк осхастар. Мағаа оларны ал чӧрерге уғаа аар» (Псалом 38:4). Че Библия піске ізеніс пирче: «Чабал кізі позының чолын артыс салзын паза чазыхтығ кізі — позының чабал сағыстарын. Иеговазар айланзыннар, ол оларға айир, пістің Худайыбыссар айланзыннар, ол прай чӱрекнең пыроларын тастир» (Исаия 55:7).