49-زەرتتەۋ ماقالاسى
ەحوبا دۇعالارىما جاۋاپ بەرە مە؟
«سەندەر مەنى شاقىراسىڭدار، ماعان كەلىپ، دۇعا ەتەسىڭدەر، سوندا تىڭدايتىن بولامىن» (ەرم. 29:12).
41-ٵن ەستي كور مەنى دەپ وتىنەم
اڭداتپا a
1، 2. نەگە ەحوبا دۇعالارىمىزعا جاۋاپ بەرمەي جاتقانداي كورىنۋى مۇمكىن؟
«ەحوبادان زور قۋانىش تاپ، سوندا ول جۇرەك قالاۋىڭدى ورىندايدى» (ٴزاب. 37:4). نەتكەن تاماشا سوزدەر! ٴبىراق بۇل ەحوبادان نە سۇراساق تا، سۇراعانىمىزدى بىردەن الامىز دەگەندى بىلدىرە مە؟ بۇل سۇراقتىڭ جاۋابىن بىلگەنىمىز وتە ماڭىزدى. نەلىكتەن؟ مىنا ٴبىر جاعدايلاردى قاراستىرىپ كەتەيىكشى. ٴبىر سالتباستى قىز باۋىرلاس پاتشالىقتى جاريالاۋشىلارعا ارنالعان مەكتەپتە وقيىنشى دەپ سۇرايدى، ٴبىراق ەش شاقىرىلمايدى. ال جاس ەر باۋىرلاس قاۋىمدا كوبىرەك قىزمەت ەتە الۋ ٷشىن اۋىر سىرقاتىمنان ارىلايىنشى دەپ دۇعا ەتەدى، ٴبىراق ايىقپايدى. ٴماسىحشى اتا-انا بالامىز شىندىق جولىندا قالسىنشى دەپ قانشا سۇراسا دا، ول ەحوباعا قىزمەت ەتپەيمىن دەپ شەشەدى.
2 بالكىم، ٴسىز دە ەحوبادان سۇراعانىڭىزدى الا الماعان شىعارسىز. سوندايدا سىزگە «ەحوبا باسقالاردىڭ دۇعاسىنا جاۋاپ بەرەدى، ٴبىراق مەنىكىنە جاۋاپ بەرمەيدى» دەگەن وي كەلگەن بولار. «مەن ٴبىر نارسەنى دۇرىس جاسامادىم با ەكەن» دەپ تە ويلاۋىڭىز مۇمكىن. دجانيس b باۋىرلاسىمىز تۋرا وسىلاي سەزىنگەن. ولار كۇيەۋى ەكەۋى بەتەلدە قاتتى قىزمەت ەتكىلەرى كەلەتىنىن ايتىپ، ەحوباعا دۇعا ەتەدى. «ٴبىزدى انە-مىنە شاقىرىپ قالاتىنىنا سەنىمدى بوپ ٴجۇردىم»،— دەيدى ول. ارادا ايلار، ٴتىپتى جىلدار وتسە دە، ولاردى بەتەلگە شاقىرمادى. دجانيس سول كەزدە قالاي سەزىنگەنىن ايتىپ بىلاي دەدى: «نەگە بۇلاي بولعانىن تۇسىنە الماي قويدىم. «ەحوبانى رەنجىتىپ قويدىم با ەكەن؟ بەتەل تۋرالى قانشاما رەت دۇعا ەتتىم عوي، ول نەگە جاۋاپ بەرمەيدى؟» دەپ دال بولدىم».
3. قانداي سۇراقتاردى تالقىلايمىز؟
3 كەيدە ەحوبا مەنىڭ دۇعالارىمدى تىڭداي ما ٶزى دەپ كۇماندانۋىمىز مۇمكىن. ەحوبانىڭ ەجەلدەگى ادال قىزمەتشىلەرىنىڭ دە وسىنداي سەزىمدەرى بولعان (ٵيۇپ 30:20؛ ٴزاب. 22:2؛ ابق. 1:2). ٴبىراق ەحوبا ٴسىزدىڭ دۇعالارىڭىزدى دەن قويىپ تىڭدايدى. بۇعان نەگە سەنىمدى بولا الاسىز؟ (ٴزاب. 65:2). بۇل ٷشىن الدىمەن مىنا جايتتاردى انىقتاپ الايىق: 1) ەحوبادان نە كۇتۋىمىزگە بولادى؟ 2) ەحوبا بىزدەن نە كۇتەدى؟ 3) نەگە وتىنىشتەرىمىزدى وزگەرتۋ كەرەك بولۋى مۇمكىن؟
ەحوبادان نە كۇتۋىمىزگە بولادى؟
4. ەرەميا 29:12 دە ەحوبا نە دەپ ۋادە ەتكەن؟
4 ەحوبا دۇعامىزدى تىڭدايتىنىن ۋادە ەتكەن (ەرەميا 29:12 وقىڭىز). كوكتەگى اكەمىز ادال قىزمەتشىلەرىن سۇيەدى، سوندىقتان ولاردىڭ دۇعالارىنا ارقاشان دا قۇلاق تۇرەدى (ٴزاب. 10:17؛ 37:28). ٴبىراق بۇل سۇراعانىمىزدىڭ ٴبارىن ورىنداي بەرەدى دەگەن ٴسوز ەمەس. كەيبىر ٶتىنىشىمىزدىڭ جاۋابىن ٴبىز تەك جاڭا دۇنيەدە الامىز، سوعان دەيىن كۇتۋگە تۋرا كەلەدى.
5. ەحوبا دۇعالارىمىزدى تىڭداعاندا نەنى ەسكەرەدى؟ ٴتۇسىندىرىڭىز.
5 دۇعالارىمىزدى تىڭداعاندا، ەحوبا ٶز نيەتىن ويدا ۇستايدى (يشايا 55:8، 9). ەحوبا بۇكىل جەر بەتىن ونى بيلەۋشى رەتىندە مويىنداپ، ٴبىر كىسىدەي باعىناتىن ادامدارعا تولتىرۋدى قالايدى. ال شايتان ادامزات باقىتتى بولۋ ٷشىن ٶزى بي، ٶزى قوجا بولۋ كەرەك دەيدى (مۇس. 1-ج. 3:1—5). ونىڭ وتىرىكشى ەكەنىن دالەلدەۋ ٷشىن ەحوبا ادامدارعا ٶز-وزدەرىنە بيلىك ەتۋگە جول بەردى. كورىپ وتىرعانىمىزداي، ادامنىڭ ادامعا بيلىك ەتۋى كوپ قاسىرەت اكەلدى (ۋاع. 8:9). ٴبىراق ەحوبا ادامزاتتىڭ قيىنشىلىقتارىن ٴدال قازىر شەشىپ بەرمەيدى. ايتپەسە، كەيبىرەۋلەر ادامدار جاقسى بيلىك ەتىپ جاتىر، دۇنيەنىڭ پروبلەمالارىن شەشۋ قولدارىنان كەلەدى دەپ تۇجىرىمداۋى مۇمكىن.
6. ەحوبا ارقاشان دا ٵدىل ٵرى سۇيىسپەنشىلىكپەن جاۋاپ بەرەتىنىنە نەلىكتەن سەنىمدى بولۋىمىز كەرەك؟
6 ەحوبا بىردەي وتىنىشتەرگە ٵرتۇرلى جاۋاپ بەرۋى مۇمكىن. مىسالى، ەزەكيا پاتشا ناۋقاستانىپ، حال ۇستىندە جاتقاندا، ەحوبادان جالبارىنىپ كومەك سۇرايدى. ەحوبا ونىڭ ٶتىنىشىن ورىنداپ، ساۋىقتىرادى (پات. 2-ج. 20:1—6). ال ەلشى پاۋىل «تانىمە قادالىپ تۇراتىن تىكەندى» الىپ تاستاشى دەپ جالىنعاندا (بۇل دەنساۋلىق ماسەلەسى بولۋى مۇمكىن)، ەحوبا ونى بۇل قيىندىقتان قۇتقارمادى (قور. 2-ح. 12:7—9). ەلشى پەتىر مەن جاقىپتى الساق، يرود پاتشا ەكەۋىن دە ولتىرەمىن دەپ شەشىپ قويعان ەدى. سول كەزدە قاۋىم جاپپاي پەتىر ٷشىن دۇعا ەتتى، ولار جاقىپ ٷشىن دە دۇعا ايتقان بولسا كەرەك. ٴبىراق جاقىپ ولىمگە كەسىلدى دە، پەتىر عاجايىپ تۇردە امان قالدى (ەل. ٸس. 12:1—11). ٴبىز «ەحوبا نەگە پەتىردى قۇتقارىپ قالدى دا، جاقىپتى قۇتقارمادى؟» دەپ ويلاۋىمىز مۇمكىن. بۇنىڭ سەبەبى كيەلى كىتاپتا ايتىلماعان c. ٴبىراق ٴبىز ەحوبانىڭ «ەش ادىلەتسىزدىك جاسامايتىنىنا» كامىل سەنىمدىمىز (مۇس. 5-ج. 32:4). سونداي-اق ونىڭ پەتىرگە دە، جاقىپقا دا رازى بولعانىن بىلەمىز (ايان 21:14). كەيدە ەحوبا بىزگە دە ٶزىمىز كۇتكەندەي جاۋاپ بەرمەۋى مۇمكىن. ٴبىراق قالاي جاۋاپ بەرسە دە، ٴبىز ونى ەش داۋعا سالمايمىز. سەبەبى ونىڭ ارقاشان دۇعالارىمىزعا سۇيىسپەنشىلىكپەن ٵرى ٵدىل جاۋاپ بەرەتىنىنە نىق سەنىمدىمىز (ٵيۇپ 33:13).
7. نەدەن اۋلاق بولعانىمىز ٴجون جانە نەگە؟
7 ٶزىمىزدىڭ جاعدايىمىزدى باسقالاردىكىمەن سالىستىرۋدان اۋلاق بولعان جاقسى. ماسەلەن، ٴبىز ەحوبادان ناقتى ٴبىر كومەگىن سۇراپ دۇعا ايتامىز، ٴبىراق ول ٶتىنىشىمىز ورىندالمايتىن شىعار. ال كەيىن قاراساق، تۋرا سولاي دۇعا ەتكەن باسقا ٴبىر باۋىرلاستىڭ وتىنىشىنە ەحوبا جاۋاپ بەرگەن سىڭايلى بولادى. اننانىڭ باسىنان وسىنداي جاعداي وتكەن. ول ەحوبادان كۇيەۋىم مەتيۋ قاتەرلى ىسىكتەن ايىعىپ كەتسىنشى دەپ سۇراپ جۇرەدى. تۋرا سول ارادا ول قارت ەكى ايەل باۋىرلاستىڭ دا قاتەرلى ىسىككە شالدىققانىن ەستىپ، ولار ٷشىن دە ىستىق دۇعا ەتەدى. ٴسۇيتىپ، بۇل ەكى باۋىرلاسىمىز جازىلىپ كەتەدى دە، اننانىڭ كۇيەۋى، وكىنىشكە قاراي، قايتىس بولادى. سوندا اننا: «بۇل ەكى باۋىرلاس ەحوبانىڭ ارقاسىندا ايىعىپ كەتتى مە؟ وندا نەگە ول كۇيەۋىم ٷشىن ايتقان دۇعاما جاۋاپ بەرىپ، ونى ساۋىقتىرمادى؟»— دەپ ويلادى. ارينە، بۇل ەكى ايەل باۋىرلاستىڭ نە سەبەپتى ساۋىعىپ كەتكەنىن ٴبىز بىلمەيمىز. ٴبىراق ٴبىر بىلەرىمىز، ەحوبا بولاشاقتا بۇكىل قايعى-قاسىرەتىمىزدى ٴبىرجولا جويادى، ٵرى ول دۇنيەدەن وتكەن دوستارىن قايتا تىرىلتۋگە اسىق (ٵيۇپ 14:15).
8. ا) يشايا 43:2 دە ايتىلعانداي، ەحوبا ٴبىزدى قالاي دەمەيدى؟ ٵ) اۋىر قيىندىقتار كەزىندە دۇعانىڭ قانداي كومەگى بار؟ («دۇعا قيىندىققا مويىماۋعا كومەكتەسەدى» دەگەن بەينەروليكتى كورىڭىز.)
8 ەحوبا ۇنەمى ٴبىزدى قولداپ-دەمەيدى. مەيىرىمى مول اكەمىز ەحوبا ٴبىزدىڭ قاسىرەت شەگىپ، قينالعانىمىزدى قالامايدى (يشايا 63:9). ٴبىراق ول قيىندىقتىڭ ٴبارىن جولىمىزدان الىپ تاستامايدى. دەسە دە ول وسىنداي بەينەلى وزەن مەن جالىننان «وتۋگە» كومەكتەسەمىن دەپ ۋادە ەتكەن (يشايا 43:2 وقىڭىز). ول ەشقانداي سىناقتىڭ ٴبىزدى ودان اجىراتۋىنا جول بەرمەيدى. سونداي-اق اۋىرتپالىعىمىزدى كوتەرۋگە كومەكتەسۋ ٷشىن بىزگە كيەلى رۋحىن بەرەدى (لۇقا 11:13؛ ٴفىلىپ. 4:13). ەندەشە، ەحوبا ٵردايىم بىزگە تاباندى بولۋعا ٵرى ادالدىق ساقتاۋعا قاجەتتىنىڭ ٴبارىن بەرەتىنىنە نىق سەنىمدى بولايىق d.
ەحوبا بىزدەن نە كۇتەدى؟
9. جاقىپ 1:6، 7 دە ايتىلعانداي، ەحوبانىڭ كومەكتەسەتىنىنە نەلىكتەن سەنىم ارتۋىمىز كەرەك؟
9 ەحوبا ٴبىزدىڭ وعان سەنىم ارتقانىمىزدى قالايدى (ەۆر. 11:6). كەيدە باسىمىزعا تۇسكەن قيىندىقتار باعىنباس بيىك بەلەستەي كورىنەدى. سوندايدا ەحوبانىڭ بىزگە قول ۇشىن سوزاتىنىنا كۇماندانا باستاۋىمىز مۇمكىن. ٴبىراق كيەلى كىتاپتا ٴبىز قۇدايدىڭ كۇشىمەن «دۋالعا دا شىعا الاتىنىمىز» ايتىلعان (ٴزاب. 18:29). سوندىقتان ەحوبانىڭ دۇعامىزعا جاۋاپ بەرىپ، كومەكتەسەتىنىنە ەش كۇماندانباي، وعان تولىق سەنىممەن دۇعا ەتۋىمىز قاجەت (جاقىپ 1:6، 7 وقىڭىز).
10. قالاي ٴبىز دۇعامىزعا ساي ارەكەت ەتە الامىز؟ مىسال كەلتىرىڭىز.
10 ەحوبا بىزدەن دۇعامىزعا ساي ارەكەت ەتۋدى كۇتەدى. ٴبىر ەر باۋىرلاس ايماقتىق كونگرەسكە بارۋ ٷشىن باستىعىمنان سۇرانۋعا كومەكتەسشى دەپ دۇعا ەتەدى دەلىك. ەحوبا وعان قالاي جاۋاپ بەرۋى مۇمكىن؟ ول باۋىرلاسىمىزعا باستىعىمەن سويلەسۋگە باتىلدىق بەرە الادى. ٴبىراق ول ٶزى دە دۇعاسىنا ساي ارەكەت ەتىپ، باستىعىنان سۇرانۋى قاجەت. وعان ٴتىپتى باستىعىنىڭ الدىنا ٴبىر ەمەس، بىرنەشە رەت كىرۋ كەرەك بولار. سول كۇندەرگە باسقا جۇمىسشىمەن اۋىسۋدى دا ۇسىنىپ كورەتىن شىعار. ٴتىپتى بولماي جاتسا، جالاقى تولەنبەيتىن دەمالىس الايىنشى دەپ وتىنە الادى.
11. نەگە ٴبىز قايتا-قايتا دۇعا ەتە بەرۋىمىز كەرەك؟
11 ەحوبا مازالايتىن ماسەلەمىز جايلى قايتا-قايتا دۇعا ەتكەنىمىزدى قالايدى (سال. 1-ح. 5:17). يسانىڭ سوزدەرىنەن ٴبىزدىڭ ٶتىنىشىمىز سۇراعان بويدا ورىندالا قويمايتىنىن تۇسىنەمىز (لۇقا 11:9). ولاي بولسا، ەش مويىماي، ەحوباعا بار ىنتى-شىنتىڭىزبەن دۇعا ەتىپ، قايتا-قايتا سۇراڭىز (لۇقا 18:1—7). سوندا ٴسىزدىڭ سۇراپ جاتقانىڭىز انشەيىن وتكىنشى قالاۋ ەمەس ەكەنىن كورسەتەسىز. سونداي-اق ەحوبانىڭ سىزگە كومەكتەسە الاتىنىنا سەنەتىنىڭىز دە كورىنەدى.
نەگە وتىنىشتەرىمىزدى وزگەرتۋ كەرەك بولۋى مۇمكىن؟
12. ا) دۇعامىزدى قانداي سۇراقپەن تەكسەرسەك بولادى جانە نەگە؟ ٵ) دۇعامىزدان ەحوباعا دەگەن قۇرمەت سەزىلۋ ٷشىن نە ىستەسەك بولادى؟ (« ەحوباعا ايتاتىن وتىنىشتەرىمنەن قۇرمەت سەزىلە مە؟» دەگەن قورشاۋدى قاراڭىز.)
12 دۇعامىزعا جاۋاپ الماي جاتساق، ٶزىمىزدى ٷش سۇراقپەن تەكسەرە الامىز. بىرىنشىدەن، «مەنىڭ وسىلاي دەپ سۇراعانىم دۇرىس پا؟» دەپ ويلانساق بولادى. ادەتتە ٴبىز وزىمە نە كەرەك ەكەنىن جاقسى بىلەمىن دەپ ويلايمىز. ٴبىراق بىزگە ەڭ دۇرىسى نە ەكەنىن ەحوبا جاقسىراق بىلەدى. مىسالى، ٴبىز «مىنا ماسەلە بىلاي شەشىلسىنشى» دەپ سۇراۋىمىز مۇمكىن. ٴبىراق ونىڭ ودان دا كەرەمەت شەشىمى بار شىعار. ال كەيدە ٴبىزدىڭ ٶتىنىشىمىز ەحوبانىڭ ەركىنە ساي كەلمەۋى مۇمكىن (جوح. 1-ح. 5:14). ٴبىرىنشى ابزاستا ايتىلىپ كەتكەن اتا-انانى الساق، ولار ەحوبادان بالامىز شىندىقتا قالسىنشى دەپ سۇرايدى. ٴبىر قاراعاندا، بۇل ورىندى ٶتىنىش سياقتى. ٴبىراق ەحوبا ەشكىمدى وزىنە قىزمەت ەتۋگە ماجبۇرلەمەيدى عوي. ول ٴبىزدىڭ دە، بالالارىمىزدىڭ دا وعان ٶز ەركىمەن عيبادات ەتكەنىن قالايدى (مۇس. 5-ج. 10:12، 13؛ 30:19، 20). سوندىقتان اتا-انانىڭ ەحوباعا «بالامىز سەنى ٴسۇيىپ، سەنىڭ دوسىڭ بولعىسى كەلۋى ٷشىن ونىڭ جۇرەگىنە جول تابا الايىقشى» دەپ سۇراعانى دۇرىسىراق بولادى (ناق. س. 22:6؛ ەفەس. 6:4).
13. ەۆرەيلەرگە 4:16 عا ساي، ەحوبا بىزگە قاشان كومەكتەسەدى؟ ٴتۇسىندىرىڭىز.
13 ەكىنشى سۇراق: «قازىر ەحوبانىڭ بۇل وتىنىشىمە جاۋاپ بەرەتىن ۋاقىتى ما؟» ٴبىز دۇعامىزدىڭ جاۋابىن بىردەن العىمىز كەلەتىن شىعار. الايدا ٴبىزدىڭ ٶتىنىشىمىزدى ورىندايتىن ەڭ دۇرىس ۋاقىتتى ەحوبا بىلەدى (ەۆرەيلەرگە 4:16 وقىڭىز). جاۋابىن بىردەن الماعاندا، ەحوبا بىزگە «جوق» دەپ جاتقانداي بولار. ٴبىراق ول «قازىر ەمەس» دەپ جاتقان بولۋى مۇمكىن. مىسالى، اۋرۋىنان ايىعۋدى سۇراعان ەر باۋىرلاستى ەسكە الايىقشى. ەحوبا ونى كەرەمەت تۇردە ايىقتىرىپ جىبەرسە، شايتان ونى ەحوبا ساۋىقتىرىپ جىبەرگەنى ٷشىن عانا قىزمەت ەتىپ ٴجۇر دەپ ايىپتار ەدى (ٵيۇپ 1:9—11؛ 2:4). ونىڭ ۇستىنە، ەحوبا بۇكىل اۋرۋ-سىرقاۋدى جوق قىلاتىن ۋاقىتتى بەلگىلەپ قويعان (يشايا 33:24؛ ايان 21:3، 4). دەمەك، سول كەزگە دەيىن ٴبىز عاجايىپ تۇردە قۇلانتازا جازىلىپ كەتەمىز دەپ كۇتپەيمىز. سوندىقتان الگى ەر باۋىرلاس ەحوبادان «وسى دەرتىمە ٴتوزۋ ٷشىن جانتىنىشتىعى مەن كۇش بەرە كورشى، ساعان ٵرى قاراي دا ادال قىزمەت ەتە الايىنشى» دەپ سۇراسا بولادى (ٴزاب. 29:11).
14. ٴدجانيستىڭ وقيعاسىنان نە ٴتۇيدىڭىز؟
14 بەتەلدە قىزمەت ەتۋدى سۇراپ دۇعا ەتكەن دجانيس باۋىرلاستى ەسكە الايىق. بەس جىل دەگەندە عانا ول ەحوبانىڭ وعان قالاي جاۋاپ بەرگەنىن تۇسىنگەن ەكەن. «ەحوبا سول ارالىقتا مەنى كوپ نارسەگە ۇيرەتىپ، تۇزەتتى. مەن وعان كوبىرەك سەنىم ارتۋىم كەرەكتىگىن، جەكە زەرتتەۋ جاعىنان جاقسارۋىم كەرەكتىگىن ٴتۇسىندىم. مەنىڭ قۋانىشىم سىرتقى جاعدايلارعا تاۋەلدى بولماۋ كەرەكتىگىن دە ۇقتىم»،— دەيدى ول. كەيىنىرەك دجانيس پەن كۇيەۋى اۋداندىق قىزمەتكە تاعايىندالدى. دجانيس بىلاي دەيدى: «قازىر ويلاسام، مەن كۇتكەندەي بولماسا دا، ەحوبا دۇعامدى جاۋاپسىز قالدىرماپتى. ونىڭ جاۋابى قانشالىقتى كەرەمەت بولعانىن مەن كەيىننەن بارىپ ٴتۇسىندىم. وسى ۋاقىتقا دەيىن مەن ونىڭ سۇيىسپەنشىلىگى مەن مەيىرىمدىلىگىنە بولەنگەنىمە شەكسىز ريزامىن».
ەحوبا دۇعاڭىزعا جاۋاپ بەرمەي جاتقانداي كورىنسە، باسقا نارسە جايلى دۇعا ايتىپ كورىڭىز (15-ابزاستى قاراڭىز) f
15. نەلىكتەن ناقتى ٴبىر وتىنىشپەن شەكتەلمەگەنىمىز جاقسى؟ (سۋرەتتى دە قاراڭىز.)
15 ٷشىنشى سۇراعىمىز: «مەن باسقا نارسە سۇراۋىم كەرەك شىعار؟» دۇعادا ٶتىنىشىمىزدى ناقتى بىلدىرگەنىمىز جاقسى، ارينە. ٴبىراق كەيدە ەحوبانىڭ بىزگە قاتىستى ەركىن ٴتۇسىنىپ الۋ ٷشىن ناقتى ٴبىر وتىنىشپەن شەكتەلىپ قالماعان دا دۇرىس. وسىعان قاتىستى پاتشالىقتى جاريالاۋشىلارعا ارنالعان مەكتەپ تۋرالى دۇعا ەتىپ جۇرگەن سالتباستى قىز باۋىرلاستىڭ مىسالىن قاراستىرايىق. ونىڭ وسى مەكتەپكە بارعىسى كەلەتىنىنىڭ سەبەبى — قاجەتتىلىك كوبىرەك جەردە قىزمەت ەتۋ. مەكتەپ جايلى دۇعا ەتە ٴجۇرىپ، ول ەحوبادان قىزمەت اياسىن كەڭەيتۋدىڭ باسقا دا جولدارىن كورسەتشى دەپ دۇعا ايتا الادى (ەل. ٸس. 16:9، 10). كەيىن سول دۇعاسىنا ساي ارەكەت ەتىپ، اۋداندىق باقىلاۋشىدان جاقىن ماڭداعى قاي قاۋىمعا ٸزاشارلار قاجەت ەكەنىن سۇراسا بولادى. نەمەسە فيليالعا حات جازىپ، قاي جاقتا قاجەتتىلىك بار ەكەنىن بىلە الادى e.
16. ٴبىز نە نارسەگە سەنىمدىمىز؟
16 سونىمەن، بۇل ماقالادان نە تۇيدىك؟ ەحوبا دۇعالارىمىزعا سۇيىسپەنشىلىكپەن ٵرى ادىلەتتى تۇردە جاۋاپ بەرەتىنىنە نىق سەنىمدى بولايىق (ٴزاب. 4:3؛ يشايا 30:18). ول كەيدە ٴبىز ويلاعانداي جاۋاپ بەرمەۋى مۇمكىن. ٴبىراق ول ەشقاشان دۇعامىزدى ەلەۋسىز قالدىرمايدى. ول ٴبىزدى قاتتى جاقسى كورەدى ٵرى ەشقاشان تاستامايدى (ٴزاب. 9:10). سوندىقتان وعان «ٵردايىم سەنىم ارتىپ»، دۇعادا جۇرەك سىرلارىمىزدى اقتارا بەرەيىك (ٴزاب. 62:8).
43-ٵن ريزاشىلىق دۇعاسى
a بۇل ماقالادا ەحوبا دۇعالارىمىزعا سۇيىسپەنشىلىكپەن ٵرى ادىلەتتى تۇردە جاۋاپ بەرەتىنىنە نەگە سەنىمدى بولا الاتىنىمىزدى بىلەمىز.
b كەيبىر ەسىمدەر وزگەرتىلگەن.
c 2022-جىلعى «كۇزەت مۇناراسىنىڭ» اقپان ايىنداعى سانىنان «ەحوبا ۇنەمى دۇرىس ارەكەت ەتەتىنىنە سەنەسىز بە؟» دەگەن ماقالانىڭ 3—6 ابزاستارىن قاراڭىز.
d اۋىر سىناقتارعا توزۋگە ەحوبا قالاي كومەكتەسەتىنى جايلى ٴبىلۋ ٷشىن jw.org تور بەكەتىنەن «دۇعا قيىندىققا مويىماۋعا كومەكتەسەدى» دەگەن بەينەروليكتى كورىڭىز.
e باسقا فيليالعا قاراستى اۋماقتا قىزمەت ەتكىڭىز كەلسە، «ەحوبانىڭ ەركىن ورىنداۋ ٷشىن ۇيىمداسقانبىز» كىتابىنىڭ 10-تاراۋ، 6—9 ابزاستارىن قاراڭىز.
f سۋرەت سيپاتتاماسى: ەكى قىز باۋىرلاس پاتشالىقتى جاريالاۋشىلارعا ارنالعان مەكتەپكە ٶتىنىش تولتىرماس بۇرىن دۇعا ەتەدى. ولاردىڭ بىرەۋى شاقىرىلىپ، ەكىنشىسى شاقىرىلمايدى. شاقىرىلماعان قىز باۋىرلاس قاتتى كوڭىلىن تۇسىرمەي، قىزمەت اياسىن كەڭەيتۋدىڭ باسقا دا جولدارىن ىزدەپ، تاعى دا دۇعا ەتەدى. كەيىن قاي جەردە قاجەتتىلىك بار ەكەنىن ٴبىلۋ ٷشىن فيليالعا حات جازادى.
