«اركىم ٶز جۇگىن ٶزى كوتەرەدى»
«اركىم ٶز جۇگىن ٶزى كوتەرەدى»
«ٴارقايسىمىز قۇداي الدىندا ٶز ٸس-ارەكەتىمىز ٷشىن ەسەپ بەرەمىز» (ريمدىكتەرگە 14:12).
1. ٷش ەۆرەي جىگىتى قانداي جاۋاپكەرشىلىكتەن قورىقپادى؟
بابىل. ٷش جاس ەۆرەي جىگىتى ٶلى نە ٴتىرى قالاتىندارىنا اسەر ەتەتىن شەشىم قابىلداعالى تۇر. ولار سول جەردىڭ زاڭىن ورىنداپ الىپ مۇسىنگە باس يەر مە ەكەن، الدە وعان تابىنۋدان باس تارتىپ، لاپىلداپ جانىپ تۇرعان پەشكە لاقتىرىلار ما ەكەن؟ شيدراق، ميشاق جانە ابدەناگونىڭ وزگە بىرەۋمەن اقىلداسىپ جاتۋعا ۋاقىتتارى بولمادى، ٴتىپتى ولاي ەتۋ قاجەت ەمەس تە ەدى. ويلانىپ جاتپاستان ولار بىلاي دەيدى: «پاتشا، سەنىڭ قۇدايلارىڭا جانە ورناتقان التىن مۇسىنىڭە تابىنبايتىنىمىز ساعان ٴمالىم بولسىن» (دانيال 3:1—18). ٷش ەۆرەي جىگىتى قابىلداعان شەشىمدەرى ٷشىن جاۋاپكەرشىلىكتى ٶز مويىندارىنا العان ەدى.
2. يسا ماسىحكە قاتىستى شەشىمدى، تۇپتەپ كەلگەندە، پيلات ٷشىن كىم قابىلدادى جانە بۇل ريم ٵمىرشىسىن جاۋاپكەرشىلىكتەن بوساتتى ما؟
2 شامامەن التى عاسىر ٶتتى. ريم ٵمىرشىسى ٴبىر ەر كىسىگە تاعىلعان ايىپتاردى تىڭداپ وتىر. ٸستى قاراستىرا كەلە، ايىپتالۋشىنىڭ كىناراتسىز ەكەندىگىنە ونىڭ كوزى جەتەدى. الايدا جينالعان توبىر ونى جازالاۋدى تالاپ ەتۋدە. ٵمىرشى بۇل تالاپقا قارسىلىق بىلدىرۋگە تىرىسىپ، ودان تۇك شىقپاعان سوڭ، جاۋاپكەرشىلىكتىڭ جۇگىن ٶز موينىنا ارتقىسى كەلمەي، قىسىمعا بەرىلەدى. قولىن جۋىپ جاتىپ ول: «مىنا (ٵدىل) ادامنىڭ توگىلەتىن قانىنا مەن كىنالى ەمەسپىن»،— دەيدى. سوسىن الگى ەر كىسىنى بورەنەگە شەگەلەۋگە رۇقساتىن بەرەدى. ٴيا، پونتي پيلات يسا ماسىحكە قاتىستى شەشىم قابىلداۋدىڭ جاۋاپكەرشىلىگىن ٶز موينىنا الۋدىڭ ورنىنا باسقالاردىڭ ول ٷشىن شەشىم قابىلداۋىنا جول بەرەدى. سۋعا قولىن قانشا جۋسا دا، ول يساعا شىعارعان ادىلەتسىز ۇكىمى ٷشىن جاۋاپتى ەدى (ماتاي 27:11—26؛ لۇقا 23:13—25).
3. نە سەبەپتى باسقالاردىڭ ٴبىز ٷشىن شەشىم قابىلداۋىنا جول بەرمەۋىمىز كەرەك؟
3 سەن جونىندە نە دەۋگە بولار ەدى؟ شەشىم قابىلداۋ كەرەك بولعان كەزدە، ٷش ەۆرەي جىگىتى سياقتى ارەكەت ەتەسىڭ بە، الدە باسقالاردىڭ ونى سەن ٷشىن قابىلداۋىنا جول بەرەسىڭ بە؟ شەشىم قابىلداۋ — وڭاي نارسە ەمەس. دۇرىس تالعام جاساۋ ٷشىن ادام كەمەلىنە كەلىپ، جەتىلگەن بولۋ كەرەك. ماسەلەن، اتا-انالار وزدەرىنىڭ كامەلەتكە تولماعان بالالارى ٷشىن دۇرىس شەشىمدەر قابىلداپ وتىرۋلارى قاجەت. ارينە، ماسەلە كۇردەلى بولىپ، ٵر ٴتۇرلى فاكتورلار سالماقتاپ-سارالانۋ كەرەك بولعان كەزدەردە، شەشىم قابىلداۋ وتە قيىنعا سوعادى. الايدا شەشىم قابىلداۋ جاۋاپكەرشىلىگى — رۋحاني قابىلەتى بارلاردىڭ ونى ٴبىز ٷشىن كوتەرۋىن قاجەت ەتەتىندەي تىم ‹اۋىر جۇك› ەمەس (عالاتتىقتارعا 6:1، 2). كەرىسىنشە، بۇل جۇكتى ٶزىمىز الىپ ٴجۇرۋىمىز كەرەك، ويتكەنى «ٴارقايسىمىز قۇداي الدىندا ٶز ٸس-ارەكەتىمىز ٷشىن ەسەپ بەرەمىز» (ريمدىكتەرگە 14:12). كيەلى كىتاپتا بۇعان قاتىستى: «اركىم ٶز جۇگىن ٶزى كوتەرەدى»،— دەلىنگەن (عالاتتىقتارعا 6:5، جد). ولاي بولسا ومىرىمىزدە دانا شەشىمدەردى قالاي قابىلداي الامىز؟ ەڭ الدىمەن، السىزدىكتەرىمىز بار ەكەندىگىن مويىنداپ، ولاردىڭ ورنىن تولتىرۋ ٷشىن نە ىستەۋگە بولاتىنىن ٴبىلىپ الۋىمىز كەرەك.
ماڭىزدى تالاپ
4. العاشقى ادام جۇبىنىڭ بويسۇنباۋشىلىعىنان شەشىم قابىلداۋعا قاتىستى نە نارسەگە ۇيرەنەمىز؟
4 ادامزات تاريحىنىڭ باسىندا ەڭ العاشقى ادام جۇبى ناتيجەسى قايعىلى بولعان شەشىم قابىلدادى. ولار جاقسىلىق پەن جاماندىقتى تانىتاتىن اعاشتىڭ جەمىسىن الىپ جەۋدى شەشتى (جاراتىلىس 2:16، 17). ولاردىڭ وسىنداي شەشىم قابىلداۋلارىنا نە نارسە تۇرتكى بولدى؟ ‹ايەل اعاشتىڭ قاسىنا بارىپ، جەمىسىنىڭ جەۋگە جاقسى ٵرى كوز تارتارلىق ادەمى ەكەنىن جانە ٶزىن اقىلدى ەتۋگە قىزىقتىرىپ تۇرعانىن كوردى›،— دەپ مالىمدەيدى كيەلى كىتاپ. سودان سوڭ ول «...جەمٸستٴى الىپ، جەدى. ونى قاسىنداعى كۇيەۋىنە دە بەردى، ول دا جەدى» (جاراتىلىس 3:6). حاۋانىڭ وسىنداي تالعام جاساۋىنا وزىمشىلدىكتەن تۋعان قالاۋى تۇرتكى بولعان ەدى. ونىڭ بۇل ارەكەتى ادامنىڭ دا سولاي ەتۋىنە سەبەپشى بولدى. ناتيجەسىندە كۇنا مەن ٶلىم «ادامداردىڭ بارىنە» تارادى (ريمدىكتەرگە 5:12). ادام مەن حاۋانىڭ بويسۇنباۋشىلىعىنان ادامداردىڭ السىزدىكتەرىنە قاتىستى ماڭىزدى نارسەگە ۇيرەنەمىز: ەگەر ادام قۇدايدىڭ باسشىلىعىن بەرىك ۇستانباسا، وندا ول بۇرىس شەشىمدەر قابىلداۋعا بەيىم بولادى.
5. ەحوبا بىزگە قانداي باسشىلىق بەرىپ وتىر جانە ونىڭ پايداسىن كورۋىمىز ٷشىن نە ىستەۋىمىز كەرەك؟
5 ەحوبا قۇداي ٴبىزدى باسشىلىقسىز قالدىرماعانىنا قانشالىقتى ريزامىز دەسەڭشى! جازبالاردا بىلاي دەلىنگەن: «ەگەر وڭعا نەمەسە سولعا بۇرىلىپ كەتسەڭدەر قۇلاقتارىڭ: — مىنە جول، سونىمەن جۇرىڭدەر،— دەگەن ارتتارىڭنان ايتىلعان ٴسوزدى ەستيتىن بولادى» (يشايا 30:21). ەحوبا بىزگە كيەلى رۋحىنىڭ جەتەلەۋىمەن جازىلعان ٴسوزى كيەلى كىتاپ ارقىلى سويلەيدى. ٴبىز جازبالاردى زەرتتەپ، تۋرا ٴبىلىم الۋىمىز كەرەك. دۇرىس تالعام جاساۋىمىز ٷشىن، كەمەلىنە كەلگەندەرگە ارنالعان ‹قاتتى تاعامدى› جەۋىمىز قاجەت. ٴبىز سونداي-اق ٴتۇيسىنۋ قابىلەتىمىزدى قولدانۋ ارقىلى جاقسى مەن جاماندى ايىرۋعا ماشىقتاندىرامىز (ەۆرەيلەرگە 5:14، جد). ال ونى ماشىقتاندىرۋ ٷشىن قۇداي سوزىنەن ۇيرەنگەنىمىزدى ومىرىمىزدە قولدانۋىمىز كەرەك.
6. ٴبىزدىڭ ار-ۇجدانىمىز ٶز قىزمەتىن دۇرىس اتقارۋ ٷشىن نە ىستەۋ قاجەت؟
6 قۇداي دارىتقان ار-ۇجدانىمىز شەشىم قابىلداۋدا ماڭىزدى ٴرول اتقارادى. ول دۇرىس پەن بۇرىستى ايىرا الادى، سوندىقتان ٴبىزدى ‹قارالايدى نەمەسە اقتايدى› (ريمدىكتەرگە 2:14، 15). الايدا ار-ۇجدانىمىز ٶز قىزمەتىن دۇرىس اتقارۋ ٷشىن ونى قۇداي سوزىنە نەگىزدەپ تاربيەلەپ، سونداي-اق سول ٴسوزدى ومىردە قولدانۋ ارقىلى سەزىمتال ەتۋ كەرەك. ال ولاي بولماعان جاعدايدا ار-ۇجدانعا جەرگىلىكتى ادەت-عۇرىپتاردىڭ اسەر ەتىپ كەتۋى وپ-وڭاي. اينالامىزداعى ادامدار مەن ولاردىڭ پىكىرلەرى دە ٴبىزدى بۇرىس جولعا باعىتتاۋى مۇمكىن. ار-ۇجدانىمىزدىڭ بەرگەن بەلگىسىن ەلەمەي، قۇدايدىڭ تالاپتارىن بۇزا بەرەتىن بولساق، ونىمەن نە بولماق؟ ۋاقىت وتە كەلە ول جاۋىر بولىپ، «ىسسى تەمىرمەن كۇيدىرىلگەندە» پايدا بولاتىن تىرتىق ىسپەتتى سەزىمسىز ٵرى ەش نارسە اسەر ەتپەيتىندەي بولىپ كەتەدى (تىموتەگە 1-حات 4:2، سىلتەمەنى قارا). ال ەگەر ار-ۇجدانىمىز قۇداي سوزىمەن ماشىقتاندىرىلسا، ول سەنىمدى جول كورسەتۋشىگە اينالادى.
7. دانا شەشىم قابىلداي الۋ ٷشىن قويىلاتىن ماڭىزدى تالاپ قانداي؟
7 ولاي بولسا، جاۋاپكەرشىلىكتەن قورىقپاي دانا شەشىم قابىلداۋ ٷشىن قويىلاتىن نەگىزگى تالاپ — جازبالاردان تۋرا ٴبىلىم الىپ، ونى ومىردە قولدانا ٴبىلۋ. تالعام جاساۋ كەرەك بولعان كەزدە، اسىعىپ قانداي دا ٴبىر قورىتىندىعا كەلە سالۋدىڭ ورنىنا كيەلى كىتاپ پرينسيپتەرىن ىزدەستىرۋگە ۋاقىت ٴبولىپ، ولاردى قولدانۋ ٷشىن ويلاۋ قابىلەتىمىزدى ىسكە قوسۋىمىز كەرەك. ەگەر بىزدە كيەلى كىتاپتاعى تۋرا ٴبىلىم بار بولسا جانە ار-ۇجدانىمىز قۇداي سوزىنە ساي ماشىقتاندىرىلسا، ٴتىپتى شيدراق، ميشاق جانە ابدەناگو سياقتى تەز شەشىم قابىلداۋ كەرەك بولعان كۇندە دە، ٴبىز بۇعان دايىنبىز دەۋگە بولادى. وسىلايشا جەتىلە بەرۋ ٷشىن العا باسقانىمىز شەشىم قابىلداي الۋ قابىلەتىمىزدى قالايشا شىڭداي الاتىنىن ٴتۇسىنۋ ٷشىن ٶمىردىڭ ەكى سالاسىن قاراستىرايىق.
كىممەن ارالاسۋىمىزعا بولادى؟
8، 9. ا) جامان ورتادان اۋلاق بولۋىمىز كەرەكتىگى قانداي پرينسيپتەردەن كورىنەدى؟ ٵ) جامان ادامدارمەن ارالاسۋ دەگەنىمىز ونەگەسىز ادامدارمەن تىكەلەي ارالاسۋدى عانا بىلدىرەدى مە؟ ٴتۇسىندىر.
8 ‹الدانىپ قالماڭدار!— دەپ جازدى ەلشى پاۋىل.— اراممەن ارالاسقان جان ادال ادەتىنەن ايىرىلادى› (قورىنتتىقتارعا 1-حات 15:33). يسا ٴماسىح شاكىرتتەرىنە: ‹وسى دۇنيەلىك ەمەسسىڭدەر›،— دەگەن (جوحان 15:19). وسى پرينسيپتەردى بىلگەنىمىز ازعىندار، نەكە ادالدىعىن بۇزۋشىلار، ۇرىلار، ماسكۇنەمدەر جانە سول سياقتىلاردان اۋلاق بولۋىمىز كەرەكتىگىن تۇسىنۋىمىزگە كومەكتەسەدى (قورىنتتىقتارعا 1-حات 6:9، 10). الايدا كيەلى كىتاپتاعى شىندىق تۋرالى ٴبىلىمىمىز تەرەڭدەي تۇسكەن سايىن، مۇنداي ادامداردى كومپيۋتەردەن، تەلەديداردان نە فيلمدەردەن كورۋ، يا بولماسا سونداي ادامدار تۋرالى كىتاپتار وقۋ ارقىلى، بىلايشا ايتقاندا، ولارمەن بىرگە ۋاقىت وتكىزۋ دە قاۋىپتى ەكەنىن تۇسىنەمىز. ينتەرنەتتەگى اڭگىمەلەسۋ بولمەلەرىندە وزدەرىنىڭ كىم ەكەندىكتەرىن جاسىراتىن «زالىمدارمەن» ارالاسۋ جونىندە دە وسىلاي دەۋگە بولادى (زابۋر 25:4).
9 قۇلىقتىلىق جاعىنان تازا، ٴبىراق شىنايى قۇدايعا سەنبەيتىن ادامدارمەن ەتەنە ارالاسۋ جونىندە نە دەۋگە بولادى؟ جازبالاردا بىلاي دەلىنگەن: ‹بۇكىل دۇنيەگە شايتان بيلىگىن جۇرگىزىپ وتىر› (جوحاننىڭ 1-حاتى 5:19). بۇدان تۇسىنەتىنىمىز: جامان ورتاعا ٶز قالاۋلارىنىڭ جەتەگىندە جۇرەتىن نە ونەگەسىز ادامدار عانا جاتپايدى. سوندىقتان دا ەحوبانى جاقسى كورەتىن ادامدارمەن عانا تىعىز دوستىق قارىم-قاتىناس دامىتقانىمىز ٴجون.
10. وسى دۇنيەمەن ارالاسۋعا قاتىستى رۋحاني تولىسقاندارعا ٴتان شەشىمدەر قابىلداۋعا بىزگە نە كومەكتەسەدى؟
10 وسى دۇنيەلىك ادامدارمەن مۇلدەم ارالاسپاي ٴجۇرۋ مۇمكىن ەمەس، ولاي ەتۋ تالاپ ەتىلمەيدى دە (جوحان 17:15). ۋاعىزداۋ قىزمەتىندە، مەكتەپتە، جۇمىستا دا ٴبىز وسى دۇنيەلىك ادامدارمەن ارالاسامىز. ومىرلىك سەرىگى ٴماسىحشى ەمەس باۋىرلاس وسى دۇنيەمەن باسقالارعا قاراعاندا كوبىرەك بايلانىستا بولۋىنا تۋرا كەلەتىن شىعار. الايدا ٴتۇيسىنۋ قابىلەتىمىزدى قولدانساق، وسى دۇنيەمەن ەڭ قاجەت دەگەن شەكتەۋلى عانا قاتىناستا بولۋ مەن ونىمەن تىعىز قارىم-قاتىناس دامىتۋ ەكى بولەك نارسە ەكەنىن تۇسىنەمىز (جاقىپ 4:4). سوندىقتان ٴبىز ساباقتان تىس ىستەرمەن، مىسالى بي نە سپورتپەن، اينالىسۋ نەمەسە ارىپتەستەرىمىزبەن وتىرىستار مەن باسقوسۋلارعا بارۋ-بارماۋ سياقتى ماسەلەلەردە رۋحاني تولىسقاندارعا ٴتان شەشىمدەر قابىلداي الامىز.
جۇمىس تاڭداعاندا
11. جۇمىس تاڭداعاندا ەڭ ٴبىرىنشى نە نارسە قاراستىرىلۋى كەرەك؟
11 كيەلى كىتاپ پرينسيپتەرىن تولىسقان ادام رەتىندە قولدانعانىمىز ‹ٷي ٸشىنىڭ قامىن ويلاۋعا› قاتىستى مىندەتىمىزدى ورىنداي الۋىمىز ٷشىن دۇرىس شەشىمدەر قابىلداۋعا كومەكتەسەدى (تىموتەگە 1-حات 5:8). ٴبىرىنشى قاراستىراتىن نارسە — جۇمىستىڭ ٴتۇرى، ناقتىراق ايتساق، جۇمىستا بىزدەن نە ىستەۋ تالاپ ەتىلەتىندىگى. كيەلى كىتاپ تىكەلەي ايىپتايتىن نارسەلەردى قولدايتىن جۇمىس ٴتۇرىن تاڭداۋ دۇرىس ەمەس ەكەندىگى انىق. سوندىقتان دا شىنايى ماسىحشىلەر جالعان تاڭىرلەرگە تابىنۋ، ۇرلىق، قاندى دۇرىس قولدانباۋ نە كيەلى كىتاپقا قايشى كەلەتىن باسقا دا ىستەرمەن بايلانىسى بار جۇمىسقا ورنالاسپايدى. سونداي-اق ٴبىز ٴتىپتى باستىعىمىز تالاپ ەتسە دە، وتىرىككە نە الداۋعا بارمايمىز (ەلشىلەردىڭ ىستەرى 15:29؛ ايان 21:8).
12، 13. جۇمىسقا قاتىستى شەشىم قابىلداعاندا، جۇمىستىڭ تۇرىنەن باسقا قانداي ماڭىزدى جايتتار ەسكەرىلۋ كەرەك؟
12 ال ەگەر جۇمىستىڭ ٶزى قۇدايدىڭ پرينسيپتەرىنە تىكەلەي قايشى كەلمەيتىن بولسا شە؟ ٴبىزدىڭ شىندىق تۋرالى ٴبىلىمىمىز تەرەڭدەپ، ٴتۇيسىنۋ قابىلەتىمىز جاقسارا تۇسكەن سايىن، قاراستىرۋدى قاجەت ەتەتىن باسقا دا جايتتاردى ەسكەرەتىن بولامىز. ەگەر جۇمىسىمىزدىڭ قۇمار ويىندار وينالاتىن جەردە تەلەفونعا جاۋاپ بەرۋ سياقتى كيەلى كىتاپ ايىپتايتىن ىسپەن بايلانىسى بار بولسا شە؟ بۇنداي جاعدايدا كىرىستىڭ كەلەر كوزى مەن جۇمىس ورنىنىڭ قاي جەردە ەكەندىگى ەسكەرىلۋى كەرەك. ماسەلەن، جەكە كاسىپكەرلىكپەن اينالىساتىن كۋاگەر ماسىحشىلەر الەمىنىڭ شىركەۋلەرىن تولەماقىعا سىرلاپ بەرۋدى ۇسىنىپ، جالعان دىنگە قولداۋ كورسەتەر مە ەدى؟ (قورىنتتىقتارعا 2-حات 6:14—16)
13 ال ەگەر باستىعىمىز جالعان عيبادات ورنىن بەزەندىرۋ ٷشىن بىرەۋمەن كەلىسىمشارتقا وتىرسا شە؟ مۇندايدا جاعدايدى قانشالىقتى وزگەرتە الامىز جانە وعان قانشالىقتى قاتىسۋىمىزعا بولادى دەگەن سياقتى ماسەلەلەردى قاراستىرىپ كورۋىمىز كەرەك. بارلىق قوعامدىق ۇيىمدارعا، ونىڭ ىشىندە بۇرىس ارەكەتتەرمەن اينالىساتىن مەكەمەلەرگە دە، پوچتا جەتكىزۋ سياقتى پرينسيپتەرگە قايشى كەلمەيتىن جۇمىس جونىندە نە دەۋگە بولار ەدى؟ بۇل جاعدايدا ماتاي 5:45 تەگى پرينسيپكە سۇيەنۋىمىز كەرەك ەمەس پە؟ ايتا كەتەتىن تاعى ٴبىر جايت — سول جۇمىستا ۇزاق ىستەۋىمىز ار-ۇجدانىمىزعا قالاي اسەر ەتۋى مۇمكىن ەكەندىگى (ەۆرەيلەرگە 13:18). راسىندا دا، جۇمىسقا قاتىستى رۋحاني تولىسقاندارعا ٴتان شەشىم قابىلداۋ جاۋاپكەرشىلىگىنىڭ جۇگىن كوتەرۋ ٷشىن، ٴتۇيسىنۋ قابىلەتىمىزدى شىڭداپ، قۇداي دارىتقان ار-ۇجدانىمىزدى ماشىقتاندىرۋىمىز قاجەت.
«بار جاعدايدا دا مويىندا ٴتاڭىر يەڭدى»
14. شەشىم قابىلداۋ كەرەك بولعان جاعدايدا، نە نارسەنى قاراستىرعانىمىز ٴجون؟
14 وسى دۇنيەلىك ٴبىلىم الۋعا ۇمتىلۋ جانە بەلگىلى ٴبىر مەديسينالىق ەمدى قابىلداۋ نە ودان باس تارتۋ سياقتى ماسەلەلەرگە قاتىستى شەشىم قابىلداۋ جونىندە نە دەۋگە بولادى؟ كەز كەلگەن شەشىم قابىلدار كەزدە، سول جاعدايعا قاتىستى كيەلى كىتاپ پرينسيپتەرىن ايقىنداپ الىپ، ولاردى قولدانۋ ٷشىن ويلاۋ قابىلەتىمىزدى ىسكە قوسۋىمىز كەرەك. ەجەلگى يسرايلدە بيلىك ەتكەن دانا پاتشا سۇلەيمەن: «ٶز اقىل-ساناڭا سۇيەنىپ جۇرمە، سەنىم ارت شىن جۇرەكتەن جاراتقان يەڭە»،— دەگەن بولاتىن. ٴيا، «بار جاعدايدا دا مويىندا ٴتاڭىر يەڭدى، سوندا ول تۋرا جولمەن جەتەلەر» (ناقىل سوزدەر 3:5، 6).
15. ٴبىرىنشى عاسىرداعى ماسىحشىلەردەن شەشىم قابىلداۋعا قاتىستى نە نارسەگە ۇيرەنە الامىز؟
15 ٴبىزدىڭ تالعامدارىمىز ٴجيى باسقالارعا اسەر ەتىپ جاتاتىندىعىن ەسكەرۋىمىز كەرەك. مىسالى، ٴبىرىنشى عاسىرداعى ماسىحشىلەرگە مۇسا زاڭىنداعى تاعامعا قاتىستى قويىلعان شەكتەۋلەردى بۇدان بىلاي ۇستانۋدىڭ قاجەتى جوق ەدى. ەندى ولار زاڭ بويىنشا تازا ەمەس دەپ ەسەپتەلەتىن، ال باسقا جاعدايدا ەشكىمدە كۇمان تۋدىرمايتىن تاماقتاردى جەۋگە ەرىكتى بولاتىن. ٴبىراق ەلشى پاۋىل جالعان ٴتاڭىر عيباداتحاناسىمەن بايلانىسى بولۋى مۇمكىن مالدىڭ ەتى تۋرالى بىلاي دەپ جازعان: ‹ەگەر جەيتىن تاماعىم باۋىرلاسىمدى كۇناعا باتىرسا، ونى كۇنادان ساقتاۋ ٷشىن مەن بۇدان بىلاي ەشقاشان دا ەتتى جەمەيتىن بولامىن› (قورىنتتىقتارعا 1-حات 8:11—13). وسىلايشا ەرتەدەگى ماسىحشىلەر باسقالاردىڭ سەنىمدەرىنە نۇقسان كەلتىرمەۋ ٷشىن، ولاردىڭ ار-ۇجداندارىن ەسكەرۋگە تالپىندىرىلعان. ٴبىزدىڭ قابىلداعان شەشىمىمىزدىڭ كەسىرىنەن ەشكىمنىڭ ‹سەنىمىنە نۇقسان كەلمەۋ› كەرەك (قورىنتتىقتارعا 1-حات 10:29، 32).
قۇدايدان كەلەتىن دانالىقتى ىزدە
16. شەشىم قابىلداعاندا دۇعا بىزگە قالاي كومەكتەسە الادى؟
16 شەشىم قابىلداۋدا دۇعا قۇندى كومەك بولىپ تابىلادى. «ەگەر كەيبىرەۋلەرىڭ دانالىققا مۇقتاج بولساڭدار،— دەپ جازدى شاكىرت جاقىپ،— قۇدايدان سۇراڭدار، ول بەرەدى دە؛ ٴتاڭىرىمىز ەش جازعىرماي-اق بارىنە جومارتتىقپەن بەرە سالادى» (جاقىپ 1:5). ٴيا، ەحوباعا دۇعا ايتىپ، دۇرىس شەشىم قابىلداۋ ٷشىن دانالىق سۇراساق بولادى. شىنايى قۇدايعا ۋايىمىمىزدى ايتىپ، ودان باسشىلىق ىزدەگەن كەزدە، كيەلى رۋح ٴبىز قاراستىرىپ جاتقان جازبا ورىندارىن جاقسىراق تۇسىنۋگە جانە ەلەۋسىز قالعاندارىنا كوڭىل اۋدارۋىمىزعا كومەكتەسەدى.
17. باسقالار بىزگە شەشىم قابىلداۋعا قالاي كومەكتەسە الادى؟
17 باسقالار بىزگە شەشىم قابىلداۋعا كومەكتەسە الا ما؟ ٴيا، ەحوبا قاۋىمداردا رۋحاني تولىسقان ماسىحشىلەردىڭ بولۋى ٷشىن قام جاساعان (ەفەستىكتەرگە 4:11، 12). ٴبىز ولاردان كەڭەس سۇراي الامىز، اسىرەسە كۇردەلى شەشىم قابىلداعان كەزدە، ولارعا جولىققانىمىز دۇرىس. رۋحاني تۇسىنىكتەرى مەن ومىرلىك تاجىريبەلەرى مول وسى باۋىرلاستار ٴبىزدىڭ نازارىمىزدى كيەلى كىتاپتىڭ باسقا دا پرينسيپتەرىنە اۋدارۋى مۇمكىن، ال ولار شەشىمدەرىمىزگە اسەر ەتىپ، ‹نەنىڭ ىزگىلىكتى ەكەنىن اجىراتا بىلۋىمىزگە› كومەكتەسەدى (فىلىپىلىكتەرگە 1:9، 10). الايدا ەسكەرۋىمىز كەرەك ٴبىر نارسە بار: باسقالاردىڭ ٴبىز ٷشىن شەشىم قابىلداۋىنا جول بەرمەي، جاۋاپكەرشىلىك جۇگىن ٶزىمىز كوتەرۋگە ٴتيىسپىز.
ناتيجەسى ۇنەمى جاقسى بولا ما؟
18. دۇرىس شەشىمنىڭ ناتيجەسى جونىندە نە دەۋگە بولادى؟
18 كيەلى كىتاپ پرينسيپتەرىنە تولىعىمەن نەگىزدەلگەن جانە ار-ۇجدانمەن ساناسىپ قابىلدانعان شەشىمدەردىڭ ناتيجەسى ۇنەمى جاقسى بولا ما؟ ٴيا، تۇبىندە سولاي بولادى. الايدا كەيبىر جاعدايدا شەشىمىمىزدىڭ ناتيجەسى اۋەلگى كەزدە ٴبىز قالاعانداي بولماۋى مۇمكىن. شيدراق، ميشاق پەن ابدەناگو الىپ مۇسىنگە تابىنباۋدى شەشكەندە، ونىڭ ارتى ولىمگە الىپ كەلەتىنىن بىلگەن بولاتىن (دانيال 3:16—19). سول سياقتى ەلشىلەر ياھۋدي جوعارعى كەڭەسىنىڭ الدىندا ادامداردى ەمەس، قۇدايدى كوبىرەك تىڭداۋ كەرەكتىگىن ايتقاندا، بوساتىلماس بۇرىن ولارعا دۇرە سوعىلادى (ەلشىلەردىڭ ىستەرى 5:27—29، 40). سونىمەن قاتار كەز كەلگەن شەشىمىمىزدىڭ ناتيجەسىنە ‹ۋاقىت پەن كەزدەيسوقتىق› كەرى اسەر ەتۋى مۇمكىن (ەككلەسياست 9:11). ال دۇرىس شەشىم قابىلداپ، ٴبىراق ٴبارىبىر قانداي دا ٴبىر جاپا شەكسەك، ەحوبا بىزگە سول جاعدايعا توزۋگە كومەكتەسىپ، اقىرىندا باتاسىن بەرەتىندىگىنە سەنىمدى بولساق بولادى (قورىنتتىقتارعا 2-حات 4:7).
19. شەشىم قابىلداۋدىڭ جاۋاپكەرشىلىك جۇگىن قالايشا ٶزىمىز باتىلدىقپەن كوتەرە الامىز؟
19 سونىمەن شەشىم قابىلدار كەزدە، كيەلى كىتاپ پرينسيپتەرىن ىزدەستىرىپ، ولاردى قولدانۋ ٷشىن ويلاۋ قابىلەتىمىزدى ىسكە قوسۋىمىز كەرەك. ەحوبانىڭ ٶزىنىڭ كيەلى رۋحى جانە قاۋىمداعى رۋحاني تولىسقان ماسىحشىلەر ارقىلى كومەكتەسەتىنىنە قالايشا ريزامىز دەسەڭشى! وسىنداي باسشىلىق پەن ٴبىز ٷشىن جاسالعان باسقا دا شارالاردىڭ ارقاسىندا دانا شەشىمدەر قابىلداۋدىڭ جاۋاپكەرشىلىك جۇگىن باتىلدىقپەن ٶزىمىز كوتەرەلىك!
نە ۇيرەنىڭدەر؟
•دۇرىس شەشىم قابىلداۋ ٷشىن قويىلاتىن باستى تالاپ قانداي؟
•رۋحاني تولىسا تۇسكەنىمىز ارالاساتىن ورتا تاڭداۋىمىزعا قالاي اسەر ەتەدى؟
•جۇمىسقا قاتىستى شەشىم قابىلداعاندا، قانداي ماڭىزدى فاكتورلاردى قاراستىرۋىمىز كەرەك؟
•شەشىم قابىلداعاندا قانداي كومەككە جۇگىنە الامىز؟
[زەرتتەۋگە ارنالعان سۇراقتار]
[9-بەتتەگى سۋرەت]
ادام مەن حاۋانىڭ بويسۇنباۋشىلىعى ٴبىز ٷشىن ساباق بولۋ كەرەك
[10-بەتتەگى سۋرەت]
ماڭىزدى شەشىم قابىلداماس بۇرىن، كيەلى كىتاپ پرينسيپتەرىن ىزدەستىر