ەحوبانىڭ ۇلى كۇنى جاقىنداپ قالعاندىقتان، رۋحاني جەتىلۋ ٷشىن العا باسىڭدار
ەحوبانىڭ ۇلى كۇنى جاقىنداپ قالعاندىقتان، رۋحاني جەتىلۋ ٷشىن العا باسىڭدار
«ودان بەتەر جەتىلۋ ٷشىن العا باسايىق» (ەۆر. 6:1).
1، 2. ٴبىرىنشى عاسىردا يەرۋساليم مەن ياھۋدەيا ايماعىندا تۇراتىن ماسىحشىلەرگە ‹تاۋلارعا قاشىپ قۇتىلۋعا› قانداي مۇمكىندىك تۋدى؟
يسا جەردە قىزمەت ەتكەن كەزىندە، شاكىرتتەرى قاسىنا كەلىپ: «ٴسىزدىڭ قايتا كەلۋىڭىز بەن اقىر زاماننىڭ جاقىنداپ قالعانىن قانداي بەلگى بىلدىرمەك؟»— دەپ سۇرادى (مات. 24:1—3، 15—22). يسانىڭ ولارعا جاۋاپ رەتىندە ايتقان پايعامبارلىعى العاش رەت ٴبىرىنشى عاسىردا ورىندالدى. وسى پايعامبارلىققا ساي، ياھۋدي جۇيەسى جويىلار الدىندا ەرەكشە وقيعا ورىن الۋ كەرەك ەدى. مۇنى كورگەندە ‹ياھۋدەيا ايماعىنداعىلار تاۋلارعا قاشىپ قۇتىلۋى› كەرەك بولدى (مات. 24:1—3، 15—22). يسانىڭ شاكىرتتەرى وسى بەلگىنى تانىپ-ٴبىلىپ، ونىڭ نۇسقاۋىنا ساي ارەكەت ەتەر مە ەكەن؟
2 شامامەن وتىز جىل وتكەن سوڭ، ب. ز. 61-جىلى ەلشى پاۋىل يەرۋساليمدە جانە ونىڭ اينالاسىندا تۇراتىن ماسىحشىلەرگە پارمەندى سوزدەرمەن حات جازدى. ول كەزدە ‹اۋىر ازاپتىڭ› باستالعانىن بىلدىرەتىن وقيعانىڭ ورىن الۋىنا بەس جىلداي عانا ۋاقىت قالعانى پاۋىلعا دا، وزگەلەرگە دە بەيمالىم ەدى (مات. 24:21 ٴسىلت.). ب. ز. 66-جىلى سەستيي گالل ريم اسكەرىن يەرۋساليمگە باستاپ الىپ كەلدى. ٴبىراق ولار اياق استىنان شەگىندى دە، ماسىحشىلەرگە قاۋىپسىز جەرگە قاشىپ كەتۋگە مۇمكىندىك تۋدى.
3. پاۋىل ەۆرەي ماسىحشىلەرىن نە ىستەۋگە شاقىردى جانە نەگە؟
3 يسا ايتىپ كەتكەن «بەلگىنى» تانىپ-ٴبىلىپ، قاشىپ قۇتىلۋ ٷشىن ماسىحشىلەر قىراعىلىق پەن رۋحاني كورەگەندىك تانىتۋلارى قاجەت ەدى. الايدا ولاردىڭ كەيبىرى ‹زەيىن قويىپ تىڭداماۋعا› ادەتتەنىپ كەتتى. ولار ‹جۇتاتىن ٴسۇتتى› قاجەت ەتەتىن رۋحاني ٴسابي سياقتى ەدى (ەۆرەيلەرگە 5:11—13 وقى). ٴتىپتى ونداعان جىل بويى شىندىق جولىندا جۇرگەن كەيبىر ماسىحشىلەردىڭ قۇدايدان الىستاپ بارا جاتقانى بايقالدى (ەۆر. 3:12). وزگە بىرەۋلەرى زۇلمات ‹كۇن تاياپ قالعان› كەزدە ماسىحشىلەر كەزدەسۋىنە بارماي قالۋدى «داعدىعا» اينالدىردى (ەۆر. 10:24، 25). پاۋىل ولاردى: «ٴماسىحتىڭ ىزگى حابارىنىڭ ەڭ باستاپقى ٴتالىمىن بىلاي قويىپ، ودان بەتەر جەتىلۋ ٷشىن العا باسايىق»،— دەپ شاقىردى. بۇل ۋاقتىلى ايتىلعان سوزدەر ەدى (ەۆر. 6:1).
4. رۋحاني سەرگەك بولۋ نەلىكتەن ماڭىزدى جانە بۇلاي ەتۋگە نە كومەكتەسەدى؟
4 ٴبىز يسانىڭ ايتىپ كەتكەن پايعامبارلىعى اقىرعى رەت ورىندالىپ جاتقان ۋاقىتتا ٶمىر سۇرۋدەمىز. شايتاننىڭ دۇنيەسى تۇپتامىرىمەن جويىلاتىن «جاراتۋشى يەنىڭ ۇلى كۇنى جاقىنداپ قالدى» (ساف. 1:14). سول سەبەپتى قازىر رۋحاني سەرگەك بولاتىن ۋاقىت (پەت. 1-ح. 5:8). ٴبىز سولاي ەتىپ ٴجۇرمىز بە؟ رۋحاني تولىسقان ادام بولعانىمىز قاي ۋاقىتتا ٶمىر ٴسۇرىپ جاتقانىمىزدى ٵردايىم ەستە ۇستاۋعا كومەكتەسەدى.
رۋحاني تولىسۋعا نە جاتادى؟
5، 6. ا) رۋحاني تولىسۋعا نە جاتادى؟ ٵ) رۋحاني تولىسۋ ٷشىن قانداي ەكى سالادا كۇش سالۋىمىز قاجەت؟
5 پاۋىل ٴبىرىنشى عاسىرداعى ەۆرەي ماسىحشىلەرىن رۋحاني تولىسۋعا شاقىرۋمەن قاتار، بۇعان نە جاتاتىنىن دا ٴتۇسىندىردى (ەۆرەيلەرگە 5:14 وقى a). «كەمەلىنە كەلگەندەر»، ياعني رۋحاني تولىسقاندار، ‹ٴسۇتتى› قاناعات تۇتپايدى. ولار ‹قاتتى تاعامدى› قابىلدايدى. سول سەبەپتى ولار «باستاپقى قاراپايىم ٴتالىمدى» دە، ‹قۇدايدىڭ تەرەڭ وي-ماقساتتارىن› دا بىلەدى (قور. 1-ح. 2:10). سونداي-اق ولاردىڭ ٴتۇيسىنۋ قابىلەتى بىلگەندەرىن ٸس جۇزىندە قولدانۋ ارقىلى ماشىقتانعان. وسىنىڭ ارقاسىندا ولار جاقسى مەن جاماندى ايىرا الادى ٵرى شەشىم قابىلداردا قاي ٴپرينسيپتى قالاي قولدانۋ كەرەكتىگىن بىلەدى.
6 پاۋىل: «بەتتەگەن باعىتىمىزدان اۋىتقىپ كەتپەۋىمىز ٷشىن ٴماسىح تۋرالى ەستىگەنىمىزگە مىقتاپ دەن قويۋىمىز كەرەك»،— دەپ جازدى (ەۆر. 2:1). ٴبىز سەنىمنەن اۋىتقىپ كەتكەنىمىزدى اڭعارماي دا قالۋىمىز مۇمكىن. بۇعان جول بەرمەۋ ٷشىن رۋحاني شىندىققا مىقتاپ دەن قويعانىمىز ماڭىزدى. سوندىقتان وزىمىزدەن بىلاي دەپ سۇراعانىمىز ابزال: «مەن باستاپقى قاراپايىم تالىممەن عانا شەكتەلەمىن بە؟ رۋحاني شىندىقتاردى ەش ويلانباستان، ۇيرەنشىكتى نارسە رەتىندە قابىلداپ جۇرگەن جوقپىن با؟ رۋحاني ٶسۋ ٷشىن نە ىستەۋىمە بولادى؟» رۋحاني تولىسۋ ٷشىن، كەم دەگەندە، ەكى سالادا بار كۇشىمىزدى سالۋىمىز قاجەت. ٴبىز قۇداي ٴسوزىن جەتىك ٴبىلۋىمىز جانە مويىنسۇنۋدى ۇيرەنۋىمىز كەرەك.
قۇداي ٴسوزىن جەتىك ٴبىل
7. قۇداي ٴسوزىن جەتىك بىلگەنىمىزدىڭ قانداي پايداسى بار؟
7 پاۋىل بىلاي دەپ جازدى: «سۇتپەن» قورەكتەنەتىندەر قۇداي الدىندا اقتالۋ تۋرالى ىزگى حاباردى ٵلى دە نە ۇقپايدى [نەمەسە بىلمەيدى]، نە دۇرىس قولدانا دا المايدى. ولار — رۋحاني سابيلەر» (ەۆر. 5:13). رۋحاني تولىسۋ ٷشىن ٴبىز قۇداي ٴسوزىن، ياعني ونىڭ بىزگە جولداعان حابارىن، جەتىك ٴبىلۋىمىز قاجەت. قۇدايدىڭ حابارى ونىڭ سوزىندە جازىلعاندىقتان، ٴبىز كيەلى كىتاپتى جانە «ادال دا اقىلدى قۇلدىڭ» باسىلىمدارىن مۇقيات زەرتتەۋىمىز كەرەك (مات. 24:45—47 جد). وسىنىڭ ارقاسىندا قۇدايدىڭ وي قالپىن تانىپ-بىلەمىز، ال بۇل ٴتۇيسىنۋ قابىلەتىمىزدى ماشىقتاندىرۋعا كومەكتەسەدى. ارحيد b ەسىمدى ٴماسىحشىنىڭ مىسالىن قاراستىرىپ كورەيىك. ول بىلاي دەيدى: «كيەلى كىتاپتى جۇيەلى تۇردە وقۋ تۋرالى كەڭەس مەنىڭ ومىرىمە قاتتى اسەر ەتتى. ونى تۇگەل وقىپ شىعۋ ٷشىن ەكى جىلعا جۋىق ۋاقىتىم كەتتى، الايدا مەن جاراتۋشىمەن ەندى عانا تانىسىپ جاتقانداي بولدىم. مەن ونىڭ جولدارىن، نەنى ۇناتىپ، نەنى ۇناتپايتىنىن، زور قۇدىرەتى مەن شەكسىز دانالىعىن ٴبىلدىم. كيەلى كىتاپتى كۇندەلىكتى وقىعانىم ومىردەگى ەڭ اۋىر قيىندىقتارعا توزۋگە كومەكتەستى».
8. قۇداي ٴسوزى بىزگە قالاي اسەر ەتە الادى؟
8 قۇداي ٴسوزىن كۇندەلىكتى وقيتىن بولساق، ونداعى حاباردىڭ بىزگە ‹اسەر› ەتۋىنە مۇمكىندىك بەرەمىز (ەۆرەيلەرگە 4:12 وقى). بۇل ٴبىزدىڭ بولمىسىمىزدى قالىپتاستىرادى ٵرى ەحوباعا ۇنامدى بولا تۇسۋگە كومەكتەسەدى. كيەلى كىتاپتى وقىپ، وقىعاندارىڭنىڭ ۇستىنەن وي جۇگىرتۋ ٷشىن ساعان كوبىرەك ۋاقىت ٴبولۋ كەرەك ەمەس پە ەكەن؟
9، 10. قۇداي ٴسوزىن جاقسى ٴبىلۋ ٷشىن نە قاجەت؟ مىسال كەلتىر.
9 كيەلى كىتاپتى جاقسى ٴبىلۋ ٷشىن ونداعى حابارمەن تانىس بولۋ جەتكىلىكسىز. پاۋىلدىڭ كۇندەرىندەگى رۋحاني سابيلەر قۇداي سوزىندە نە جازىلعانىن بىلگەن بولۋ كەرەك. ٴبىراق ولار ونداعى پرينسيپتەردى ومىرلەرىندە قولدانىپ، پايداسىن كورمەدى. شەشىم قابىلداعاندا قۇداي ٴسوزىن باسشىلىققا الماعاندىقتان ولار ونى بىلمەدى.
10 قۇداي ٴسوزىن ٴبىلۋ ٷشىن ونداعى حابارمەن تانىسىپ، بىلگەندەرىمىزدى ٸس جۇزىندە قولدانۋىمىز قاجەت. كەيل ەسىمدى باۋىرلاسىمىزبەن بولعان جاعدايدى قاراستىرايىق. بىردە ونىڭ ارىپتەسى ەكەۋىنىڭ اراسىندا كەلىسپەۋشىلىك تۋىنداعان ەدى. سوندا ول نە ىستەدى؟ كەيل بىلاي دەيدى: «بىردەن ريمدىكتەرگە 12:18 دەگى سوزدەر ەسىمە ٴتۇستى. وندا: «قولدارىڭنان كەلگەنشە، بارلىق ادامدارمەن تاتۋ بولىڭدار»،— دەلىنگەن. وسى كەڭەسكە ساي، مەن جۇمىستان كەيىن ارىپتەسىممەن سويلەسۋدى شەشتىم». بۇل اڭگىمە جاقسى ناتيجە اكەلدى: ولار تاتۋلاستى ٵرى ماسەلەنى وسىلاي شەشكەنى ٷشىن ارىپتەسى كەيلگە جىلى لەبىز ٴبىلدىردى. «كيەلى كىتاپ پرينسيپتەرىن قولدانار بولساق، قاتەلەسپەيتىنىمىزگە كوزىم جەتتى»،— دەيدى كەيل.
مويىنسۇنۋدى ۇيرەن
11. اۋىر جاعدايعا تاپ بولعاندا مويىنسۇنۋشىلىق تانىتۋ قيىن بولاتىنى نەدەن كورىنەدى؟
11 اۋىر جاعدايعا تاپ بولعاندا، كيەلى كىتاپتان العان بىلىمىمىزگە ساي ارەكەت ەتۋ اسىرەسە قيىن بولۋى مۇمكىن. مىسالى، ەحوبا يسرايل ۇلدارىن مىسىر قۇلدىعىنان بوساتقاننان كەيىن، كوپ ۇزاماي ولار ‹مۇساعا ۇرىستى› جانە ‹جاراتقان يەگە سەنبەۋشىلىك تانىتىپ، ونى ەركىنسىپ سىنادى›. نەلىكتەن؟ بۇعان اۋىز سۋدىڭ تاپشىلىعى سەبەپ بولدى (مىس.ش. 17:1—4). قۇدايمەن كەلىسىم جاساسىپ، ‹جاراتقان يەنىڭ ايتقاندارىنىڭ ٴبارىن ورىنداۋدى› ۋادە ەتكەننەن كەيىن، ەكى اي وتپەي جاتىپ يسرايلدىكتەر جالعان تاڭىرلەرگە تابىنباۋعا قاتىستى زاڭدى بۇزدى (مىس.ش. 24:3، 12—18؛ 32:1، 2، 7—9). نەگە؟ مۇسا حوريب تاۋىنا كوتەرىلىپ، ۇزاق ۋاقىت كەلمەي قويعاندىقتان، ولاردىڭ بويلارىن ۇرەي بيلەگەن بولار. بالكىم، ولار امالەكتىكتەر قايتادان شابۋىل جاساسا، قورعانا الماي قالامىز دەپ ويلاعان شىعار. الدىڭعى شايقاستا مۇسا قولدارىن كوتەرىپ تۇرعاندىقتان، ولار جەڭىسكە جەتكەن ەدى عوي (مىس.ش. 17:8—16). قالاي بولعان كۇندە دە، يسرايلدىكتەر مويىنسۇنعىش بولعىسى كەلمەدى (ەل. ٸس. 7:39—41). پاۋىل ماسىحشىلەردى ۋادە ەتىلگەن جەرگە كىرۋگە قورىققان يسرايلدىكتەر سياقتى ٴتىلازار بولىپ كەتپەۋ ٷشىن قولدان كەلگەننىڭ ٴبارىن ىستەۋگە شاقىرعان (ەۆر. 4:3، 11).
12. يسا مويىنسۇنۋدى قالاي ۇيرەندى جانە مۇنىڭ قانداي پايداسى بولدى؟
12 رۋحاني تولىسۋ ٷشىن ەحوباعا تولىق مويىنسۇنۋىمىز كەرەك. يسا ٴماسىحتىڭ ۇلگىسىنەن كورىنەتىندەي، ادام مويىنسۇنۋشىلىققا ٴجيى اۋىر ازاپتار شەگۋ ارقىلى ۇيرەنەدى (ەۆرەيلەرگە 5:8، 9 وقى). يسا كوكتە بولعان كەزىندە اكەسىنە مويىنسۇنعان. الايدا جەرگە كەلگەندە، اكەسىنىڭ ەركىن ورىنداۋ ٷشىن وعان ٴتان مەن جان ازابىن شەگۋگە تۋرا كەلدى. يسا اسا اۋىر جاعدايدا مويىنسۇنۋشىلىق تانىتتى. وسىلايشا ول «كەمەلدىلىككە جەتكىزىلىپ» (جد)، قۇدايدىڭ وزىنە دايىنداعان ورنىن يەلەنۋگە، ياعني پاتشا مەن باس ٴدىني قىزمەتكەر بولۋعا، لايىق بولدى.
13. مويىنسۇنۋدى ۇيرەنگەنىمىز نەدەن كورىنەدى؟
13 ٴبىز تۋرالى نە دەۋگە بولادى؟ قيىن جاعدايلاردا دا ەحوباعا مويىنسۇنۋعا دايىنبىز با؟ (پەتىردىڭ 1-حاتى 1:6، 7 وقى). قۇداي بىزگە قۇلىقتىلىق نورمالارىن ۇستانۋ، شىنشىل بولۋ، ٴتىلدى دۇرىس قولدانۋ، كيەلى كىتاپتى وقۋ مەن زەرتتەۋ، ماسىحشىلەردىڭ كەزدەسۋلەرىنە بارۋ جانە ۋاعىز ىسىنە اتسالىسۋعا قاتىستى انىق نۇسقاۋلار بەرگەن (ەشۋا 1:8؛ مات. 28:19، 20؛ ەفەس. 4:25، 28، 29؛ 5:3—5؛ ەۆر. 10:24، 25). بۇلاردى ٴتىپتى وڭاي بولماعان كەزدەرى دە ورىندايمىز با؟ ٴبىزدىڭ مويىنسۇنعىش بولعانىمىز رۋحاني تولىسىپ جاتقانىمىزدى كورسەتەدى.
رۋحاني تولىسۋدىڭ پايداسى
14. رۋحاني تولىسۋعا ۇمتىلۋ ٴبىز ٷشىن قورعانىش بولاتىنىن كورسەتەتىن مىسال كەلتىر.
14 جاقسى مەن جاماندى ايىرۋعا ابدەن ماشىقتانعان ٴتۇيسىنۋ قابىلەتى ‹ۇياتتان بەزگەن› وسى دۇنيەدە ٴماسىحشى ٷشىن ناعىز قورعانىش بولىپ تابىلادى (ەفەس. 4:19). جازبالارعا نەگىزدەلگەن باسىلىمداردى قاتتى باعالايتىن ٵرى ولاردى ۇنەمى وقىپ تۇراتىن دجەيمس ەسىمدى باۋىرلاستىڭ مىسالىن قاراستىرايىق. ونىڭ ارىپتەستەرىنىڭ ٴبارى ايەلدەر بولاتىن. دجەيمس بىلاي دەيدى: «ولاردىڭ كوپشىلىگىنىڭ ونەگەسىز ەكەنى انىق بايقالاتىن، الايدا ٴبىر ارىپتەسىم ادەپتى كورىندى ٵرى كيەلى كىتاپقا قىزىعۋشىلىق تانىتتى. الايدا ەكەۋىمىز جەكە قالىپ كەتكەندە، ول مەنى ازعىندىققا ازعىرا باستادى. مەن العاشىندا ونى ويناپ تۇر ەكەن دەپ ويلادىم. ٴبىراق بايقاسام، ول توقتار ەمەس. سول مەزەتتە جۇمىس ورنىندا ٴدال وسىنداي سىناققا كەزىككەن باۋىرلاستىڭ «كۇزەت مۇناراسىندا» جازىلعان مىسالى ەسىمە ٴتۇستى. ماقالادا پوتيفاردىڭ ايەلى ازعىرماق بولعان ٴجۇسىپتىڭ وقيعاسى كەلتىرىلگەن بولاتىن c. مەن بىردەن قىزدى يتەرىپ جىبەردىم دە، ول جۇگىرىپ شىعىپ كەتتى» (جار. 39:7—12). دجەيمس ٸستىڭ ناسىرعا شاپپاعانىنا ٵرى ار-ۇجدانىنىڭ تازا ساقتالعانىنا قۋانىشتى بولدى (ٴتىم. 1-ح. 1:5).
15. رۋحاني تولىسۋعا ۇمتىلعانىمىز بەينەلى جۇرەگىمىزدى قالاي نىعايتادى؟
15 سونداي-اق رۋحاني تولىسۋعا ۇمتىلعانىمىزدىڭ ارقاسىندا بەينەلى جۇرەگىمىز نىعايادى جانە ‹ٴتۇرلى بوتەن ىلىمدەرگە ىلەسىپ كەتۋدەن› اۋلاق بولامىز (ەۆرەيلەرگە 13:9 وقى). سونىمەن قاتار «ماڭىزدىراق» نارسەلەردى ٵردايىم نازاردا ۇستايمىز (ٴفىلىپ. 1:9، 10). ناتيجەسىندە ٴبىزدىڭ يگىلىگىمىزدى ويلاپ جاساعان بارلىق ىستەرى ٷشىن قۇدايعا دەگەن ريزاشىلىعىمىز ارتادى (ريم. 3:24). ٴيا، ‹ۇعىنۋعا كەلگەندە ەرەسەكتەي كەمەلدى بولعان› ٴماسىحشىنىڭ ريزاشىلىق سەزىمى ارتا بەرەدى ٵرى ەحوبامەن قارىم-قاتىناسى نىعايادى (قور. 1-ح. 14:20).
16. ٴبىر باۋىرلاسقا ‹مىزعىماس جۇرەككە› يە بولۋعا نە كومەكتەستى؟
16 لۋيزا ەسىمدى باۋىرلاس شومىلدىرۋ راسىمىنەن وتكەننەن كەيىن ٴبىراز ۋاقىت بويى باسقالاردىڭ كوڭىلىنەن شىعۋدى عانا ويلاعانىن ايتادى. «مەن جامان ەشتەڭە جاساپ جۇرگەن جوق ەدىم،— دەيدى لۋيزا.— الايدا مەندە ەحوباعا قىزمەت ەتۋگە دەگەن زور ىقىلاس بولمادى. ەحوباعا بارىمدى بەرىپ جاتقانىمدى سەزىنۋ ٷشىن قانداي دا ٴبىر وزگەرىستەر جاساۋىم كەرەكتىگىن ٴتۇسىندىم. مەن، ەڭ الدىمەن، ەحوباعا دەگەن قىزمەتىمدى جان-تانىممەن اتقارۋىم كەرەك بولدى». وسىلاي ەتكەننىڭ ارقاسىندا لۋيزا ‹مىزعىماس جۇرەككە› يە بولدى ٵرى بۇل وعان كەيىننەن اۋىر ناۋقاسقا توزۋگە كومەكتەستى (جاق. 5:8). لۋيزا بىلاي دەيدى: «ماعان كوپ كۇش جۇمساۋعا تۋرا كەلدى، ٴبىراق وسىنىڭ ارقاسىندا مەن ەحوباعا جاقىنداي ٴتۇستىم».
‹شىن جۇرەكتەن قۇلاق اس›
17. نەلىكتەن ٴبىرىنشى عاسىرداعى ماسىحشىلەردىڭ مويىنسۇنۋشىلىق تانىتۋى اسا ماڭىزدى بولدى؟
17 ٴبىرىنشى عاسىردا يەرۋساليم مەن ياھۋدەيا ايماعىندا تۇرعان ماسىحشىلەر پاۋىلدىڭ جەتىلۋ ٷشىن العا باسۋعا قاتىستى كەڭەسىنە قۇلاق اسقاننىڭ ارقاسىندا ومىرلەرىن امان ساقتاپ قالدى. ولار زور كورەگەندىك تانىتىپ، ‹تاۋلارعا قاشىپ قۇتىلاتىن› ۋاقىتتى بىلدىرەتىن يسا ايتىپ كەتكەن بەلگىنى تاني ٴبىلدى. ‹كيەلى ٷيدى بوس قالدىراتىن جەكسۇرىن نارسەنىڭ سول جەردە› تۇرعانىن، ياعني ريم اسكەرلەرىنىڭ يەرۋساليمدى قورشاپ، ىشىنە كىرۋگە تىرىسقانىن كورگەندە، ماسىحشىلەر قاشاتىن ۋاقىت كەلگەنىن ٴتۇسىندى (مات. 24:15، 16). يسانىڭ نۇسقاۋىنا قۇلاق اسقان ماسىحشىلەر يەرۋساليمنەن كەتىپ، ەۆسەۆيي دەگەن تاريحشىنىڭ ايتۋىنشا، «عالاقاتتىڭ تاۋلى ايماعىنداعى پەللا دەگەن قالاعا قونىستاندى». ٴسۇيتىپ، ولار يەرۋساليمدە بۇرىن-سوڭدى بولماعان الاپاتتان امان قالدى.
18، 19. ا) نەلىكتەن بۇگىندە مويىنسۇنعىش بولۋ اسا ماڭىزدى؟ ٵ) كەلەسى ماقالادا نە قاراستىرىلادى؟
18 بۇگىندە ٴبىز دە رۋحاني تولىسۋعا ۇمتىلىپ، مويىنسۇنۋدى ۇيرەنگەننىڭ ارقاسىندا «اۋىر ازاپتىڭ» بولاتىنى تۋرالى يسانىڭ پايعامبارلىعى كەڭ كولەمدە ورىندالعاندا، ٶمىرىمىزدى ساقتاپ قالا الامىز (مات. 24:21 ٴسىلت.). بولاشاقتا ‹ادال قىزمەتشىنىڭ› شۇعىل ارەكەتتى تالاپ ەتەتىن كەز كەلگەن باسشىلىعىنا قۇلاق اسۋعا دايىنبىز با؟ (لۇقا 12:42). ‹شىن جۇرەكتەن قۇلاق اسۋدى› ۇيرەنگەنىمىز قانداي ماڭىزدى دەسەڭشى! (ريم. 6:17 تاۋرات).
19 رۋحاني تولىسۋ ٷشىن ٴبىز ٴتۇيسىنۋ قابىلەتىمىزدى ماشىقتاندىرۋىمىز قاجەت. بۇل ٷشىن قۇداي ٴسوزىن جەتىك بىلۋگە جانە مويىنسۇنۋدى ۇيرەنۋگە تالپىنۋىمىز كەرەك. رۋحاني جەتىلۋگە ۇمتىلعان جاستار ٴبىراز قيىندىقتارعا كەزىگۋى مۇمكىن. كەلەسى ماقالادا ولاردى جەڭۋگە نە كومەكتەسەتىنى قاراستىرىلادى.
[سىلتەمەلەر]
a ەۆرەيلەرگە 5:14 (جد): «قاتتى تاعام» بولسا كەمەلىنە كەلىپ، ٸس جۇزىندە قولدانۋ ارقىلى ٴتۇيسىنۋ قابىلەتىن جاقسى مەن جاماندى ايىرۋعا ماشىقتاندىرعاندارعا ارنالعان».
b كەيبىر ەسىمدەر وزگەرتىلگەن.
c «كۇناعا قارسى تۇرۋعا كومەكتەسكەن باتىلدىق» دەگەن ماقالانى قارا («كۇزەت مۇناراسى» (حانزۇشا) 1-قازان 1999 جىل.).
نە بىلدىڭدەر؟
•رۋحاني تولىسۋعا نە جاتادى جانە بۇل ٷشىن نە ىستەۋىمىز قاجەت؟
•رۋحاني تولىسۋ ٷشىن قۇداي ٴسوزىن جەتىك بىلگەنىمىز نەگە ماڭىزدى؟
•مويىنسۇنۋدى قالاي ۇيرەنۋگە بولادى؟
•رۋحاني تولىسۋدىڭ قانداي پايداسى بار؟
[زەرتتەۋگە ارنالعان سۇراقتار]
[10-بەتتەگى سۋرەت]
قيىندىقتاردى كيەلى كىتاپ پرينسيپتەرىنىڭ كومەگىمەن شەشكەنىمىز رۋحاني تولىسۋعا تالپىناتىنىمىزدى كورسەتەدى
[12 ،13-بەتتەگى سۋرەت]
ەرتەدەگى ماسىحشىلەر يسانىڭ نۇسقاۋىنا قۇلاق اسقاننىڭ ارقاسىندا امان قالدى