ٶمىرىمىزدى نەلىكتەن ەحوباعا باعىشتايمىز؟
ٶمىرىمىزدى نەلىكتەن ەحوباعا باعىشتايمىز؟
«سونىڭ مەنشىگىمىن دەپ جۇرگەن قۇدايىمنىڭ ٴبىر پەرىشتەسى وتكەن ٴتۇنى جانىمدا پايدا بولدى» (ەل. ٸس. 27:23).
1. شومىلدىرۋ راسىمىنەن وتپەس بۇرىن قانداي قادامدار جاسالۋ كەرەك، وسىعان وراي قانداي سۇراقتار تۋىندايدى؟
«يسا ٴماسىحتىڭ قۇرباندىعىنىڭ نەگىزىندە ٶز كۇنالارىڭا وكىنىپ، ٵرى ەحوبانىڭ ەركىن ورىنداۋ ٷشىن وعان باعىشتالدىڭ با؟» بۇل — شومىلدىرۋ راسىمىنەن وتەتىندەرگە ارنالعان باياندامانىڭ سوڭىندا قويىلاتىن ەكى سۇراقتىڭ ٴبىرى. ٴماسىحشى ٶمىرىن نەلىكتەن ەحوباعا باعىشتاۋ كەرەك؟ قۇدايعا باعىشتالۋدىڭ قانداي پايداسى بار؟ باعىشتالماعان ادام نەگە قۇدايعا ۇنامدى تۇردە عيبادات ەتە المايدى؟ بۇل سۇراقتاردىڭ جاۋابىن بىلمەس بۇرىن، باعىشتالۋ دەگەننىڭ نە ەكەنىن قاراستىرىپ الايىق.
2. ٶمىردى ەحوباعا باعىشتاۋ دەگەن نە؟
2 ٶمىردى قۇدايعا باعىشتاۋ دەگەن نە؟ ەلشى پاۋىلدىڭ قۇدايمەن قارىم-قاتىناسى جايلى نە دەگەنىنە كوڭىل بولەيىكشى. ول داۋىلعا تاپ بولعان كەمەدەگى ادامدارعا ٶزىنىڭ ەحوبا ‹قۇدايدىڭ مەنشىگى› ەكەنىن ايتقان (ەلشىلەردىڭ ىستەرى 27:22—24 وقى). شىنايى ماسىحشىلەردىڭ ٴبارى دە ەحوبانىڭ مەنشىگى. ال وسى دۇنيە بولسا، جالپى العاندا، «شايتاننىڭ بيلىگىندە» (جوح. 1-ح. 5:19). ٴماسىحشى قۇدايدىڭ مەنشىگىنە اينالۋ ٷشىن، ٶمىرىن باعىشتايتىنىن دۇعادا ايتىپ، وعان ۋادە بەرەدى. قۇدايدىڭ ەركىنە ساي باعىشتالعان سوڭ، ادام شومىلدىرۋ راسىمىنەن وتەدى.
3. يسانىڭ شومىلدىرۋ راسىمىنەن ٶتۋى نەنىڭ بەلگىسى بولدى جانە ٸزباسارلارى وعان قالاي ەلىكتەيدى؟
3 يسا قۇدايدىڭ ەركىن ورىنداۋدى تاڭداۋىمەن بىزگە ۇلگى كورسەتتى. ول يسرايل حالقىنان شىققاندىقتان، قۇدايعا باعىشتالىپ قويعان ەدى. سوندىقتان يسا شومىلدىرۋ راسىمىنەن ٶمىرىن قۇدايعا ارناۋ ٷشىن وتكەن جوق. ول: «ۋا، قۇداي، سەنىڭ ەركىڭدى ورىنداۋ ٷشىن كەلە جاتىرمىن»،— دەگەن (ەۆر. 10:7؛ لۇقا 3:21). دەمەك، يسانىڭ شومىلدىرۋ راسىمىنەن ٶتۋى ٶزىن اكەسىنىڭ ەركىن ورىنداۋعا ۇسىنعانىنىڭ بەلگىسى بولدى. يساعا ەلىكتەپ ٸزباسارلارى دا شومىلدىرۋ راسىمىنەن وتەدى. ٴبىراق ولاردىڭ شومىلدىرۋ راسىمىنەن ٶتۋى دۇعادا ٶز ومىرلەرىن قۇدايعا باعىشتاعاندارىن كوپشىلىككە پاش ەتۋدى بىلدىرەدى.
باعىشتالۋدىڭ پايداسى
4. ٴداۋىت پەن جوناتاننىڭ دوستىعىنان مىندەت جايلى نە بىلەمىز؟
4 قۇدايعا باعىشتالۋ — اسا ماڭىزدى جايت. ويتكەنى بۇل قانداي دا ٴبىر مىندەتتى مويىنعا الۋدى بىلدىرەدى. دەگەنمەن مۇنىڭ پايداسى دا بار. الدىمەن، مىندەت الۋدىڭ ادامداردىڭ قارىم-قاتىناسىندا قانشالىقتى پايدالى ەكەنىن قاراستىرايىق. مىسال رەتىندە دوستىقتى الىپ كورەيىك. دوستىقتىڭ يگىلىگىن كورۋ ٷشىن، ونىڭ جۇكتەيتىن مىندەتىن دە موينىڭا الۋىڭ كەرەك. بۇل — دوسىڭنىڭ قامىن ويلاۋ مىندەتى. ٴداۋىت پەن جوناتاننىڭ دوستىعى — كيەلى كىتاپتاعى ەرەكشە دوستىق قارىم-قاتىناستاردىڭ ٴبىرى. ولار ٴتىپتى دوس بولۋعا ٴبىر-بىرىنە سەرت بەرگەن (پاتشالىقتار 1-جازبا 17:57؛ 18:1، 3 وقى). قازىرگى كەزدە مۇنداي دوستىق سيرەك كەزدەسەدى. دەگەنمەن ٴبىر-ٴبىرىنىڭ الدىنداعى مىندەتىن سەزىنگەن دوستاردىڭ قارىم-قاتىناسى ادەتتە بەرىك بولادى (ناق. س. 17:17؛ 18:24).
5. مەيىرىمدى قوجايىنىنىڭ قامقورلىعىن ٶمىر باقي كورۋ ٷشىن قۇل نە ىستەۋ كەرەك ەدى؟
5 قۇدايدىڭ يسرايلدىكتەرگە بەرگەن مۇسا زاڭىنان ادامداردىڭ تاعى ٴبىر قارىم-قاتىناسىندا مىندەتتىڭ پايدالى ەكەنىن كورەمىز. قۇل مەيىرىمدى قوجايىنىنىڭ قامقورلىعىندا ٶمىر باقي بولعىسى كەلسە، انت بەرىپ، ومىرلىك كەلىسىم جاساسۋى كەرەك ەدى. زاڭدا بۇل تۋرالى بىلاي دەلىنگەن: «قىزمەتشى: — قوجايىنىمدى، ايەلىم مەن بالالارىمدى سۇيەمىن، بوستاندىق المايمىن،— دەسە، قوجايىنى قىزمەتشىسىن تورەشىلەردىڭ الدىنا الىپ بارسىن. ونى ەسىكتىڭ نە جاقتاۋدىڭ قاسىنا قويىپ، قۇلاعىن بىزبەن تەسسىن. سوندا ول قوجايىنىنىڭ ومىرلىك باسىبايلى قىزمەتشىسى بولىپ قالادى» (مىس.ش. 21:5، 6).
6، 7. ا) مىندەت الۋدىڭ قانداي پايداسى بار؟ ٵ) مىندەتتىڭ ەحوبامەن قارىم-قاتىناسىمىزعا قانداي قاتىسى بار؟
6 نەكەلەسكەن جۇپ مويىندارىنا ۇلكەن مىندەت الادى. ولار بۇل مىندەتتى قاعاز جۇزىندە كەلىسىم جاساعاندىقتان ەمەس، ٴبىر-بىرىنە انت بەرگەندىكتەن سەزىنەدى. ەگەر ەركەك پەن ايەل نەكەلەسپەي، جاي عانا بىرگە تۇرىپ جاتسا، وندا وزدەرى دە، بالالارى دا قارىم-قاتىناستارىنىڭ بەرىك بولاتىنىنا سەنىمدى بولا المايدى. ال ٴبىر-بىرىنە انت بەرىپ، قۇدايعا ۇنامدى نەكە قۇرعاندار قارىم-قاتىناستارىنىڭ ساقتالاتىنىنا سەنىمدى. ويتكەنى كيەلى كىتاپتىڭ كەڭەسى بويىنشا، ولار تۋىنداعان قيىندىقتاردى سۇيىسپەنشىلىكپەن شەشۋگە تىرىسادى (مات. 19:5، 6؛ قور. 1-ح. 13:7، 8؛ ەۆر. 13:4).
7 ەرتەدە ادامدار جۇمىسشى جالداعاندا كەلىسىم جاساسۋدىڭ ٴتيىمدى ەكەنىن بىلگەن (مات. 20:1، 2، 8). قازىرگى كەزدە دە سولاي: قانداي دا ٴبىر ٸس باستاعاندا نە جۇمىسقا تۇرعاندا قاعاز جۇزىندە كەلىسىم جاساپ الۋ وتە ٴتيىمدى. سونىمەن موينىمىزعا مىندەت الۋ دوستىقتا، نەكەدە جانە بىرەۋمەن ىسكەرلىك بايلانىستا قارىم-قاتىناسىمىزدى نىعايتۋعا پايدالى ەكەنىن بايقادىق. ولاي بولسا، ٶمىرىمىزدى تولىعىمەن ەحوباعا باعىشتاعانىمىز ونىمەن قارىم-قاتىناسىمىزدى نىعايتۋعا قانشالىقتى پايدالى دەسەڭشى! ەندى ەجەلگى يسرايل حالقى ٶزىن ەحوبا قۇدايعا باعىشتاۋدىڭ قانداي پايداسىن كورگەنىن، سونداي-اق باعىشتالۋدىڭ جاۋاپكەرشىلىك الۋدان ٴمانى نەگە زور ەكەنىن قاراستىرايىق.
قۇدايعا باعىشتالعان يسرايل حالقى
8. قۇدايعا باعىشتالۋ يسرايلدىكتەر ٷشىن نەنى ٴبىلدىردى؟
8 يسرايلدىكتەر قۇدايعا انت بەرگەن كەزدەن باستاپ ونىڭ باعىشتالعان حالقى بولىپ ەسەپتەلدى. ەحوبا سيناي تاۋىنىڭ ەتەگىنە جينالعان جاماعاتقا: «ەگەر ايتقاندارىما قۇلاق اسىپ، مەنىڭ كەلىسىمىمدى ۇستانىپ جۇرسەڭدەر، بارلىق حالىقتاردىڭ ىشىندە سەندەر مەنىڭ ەرەكشە مەنشىگىم بولاسىڭدار»،— دەدى. سوندا بۇكىل حالىق ٴبىراۋىزدان: «جاراتقان يەنىڭ ايتقاندارىنىڭ ٴبارىن دە ورىندايمىز!»— دەدى (مىس.ش. 19:4—8). يسرايلدىكتەر ٷشىن باعىشتالۋدىڭ جاۋاپكەرشىلىك الۋدان دا ٴمانى زور ەدى: ولار ەندى ەحوبانىڭ حالقى بولدى، ال ەحوبا ولارعا «ەرەكشە مەنشىگىم» دەپ قارادى.
9. يسرايلدىكتەر ەحوباعا باعىشتالۋدىڭ قانداي پايداسىن كوردى؟
9 يسرايلدىكتەر ەحوبانىڭ مەنشىگى بولۋدىڭ كوپ يگىلىگىن كوردى. ەحوبا بالاسىنىڭ قامىن جەگەن مەيىرىمدى اتا-اناداي ولارعا ادال ٵرى قامقور بولدى. سوندىقتان ول يسرايلدىكتەرگە: «الدە ايەل ٶز ٴسابيىن ۇمىتا الا ما، قۇرساعىنان شىققان ۇلىن اياماي ما؟! اناسى ۇمىتىپ كەتكەن كۇندە دە مەن سەنى ەشقاشان ۇمىتپايمىن»،— دەدى (يشايا 49:15). قۇداي ولارعا زاڭ ارقىلى باسشىلىق بەردى، پايعامبارلارىن جىبەرىپ جىگەرلەندىردى جانە پەرىشتەلەرىمەن قورعادى. وسىعان وراي زابۋر جىرشىسى: «يەمىز جاقىپقا ٴبىلدىردى بۇيرىقتارىن، يسرايلگە زاڭدارى مەن جارلىقتارىن، باسقا ەشبىر حالىققا مۇنى ىستەمەدى»،— دەپ جىرلادى (زاب. 147:8، 9؛ زابۋر 33:8، 20؛ 47:15 وقى). كەزىندە ەحوبا مەنشىكتى حالقىنا قامقور بولسا، قازىرگى ۋاقىتتا دا وزىنە باعىشتالعان قىزمەتشىلەرىنىڭ قامىن ويلايدى.
نەگە ەحوباعا باعىشتالۋ كەرەك؟
10، 11. ٴبىز قۇدايدىڭ بۇكىلالىمدىك وتباسىندا تۋىلدىق پا؟ ٴتۇسىندىر.
10 باعىشتالۋ مەن شومىلدىرۋ ٴراسىمى جايلى ويلانعاندا كەيبىرەۋلەر: «قۇدايعا باعىشتالماي-اق عيبادات ەتە بەرۋىمە نەگە بولمايدى؟»— دەپ سۇرار. بۇل سۇراقتىڭ جاۋابى ادامزاتتىڭ قۇدايمەن قارىم-قاتىناسى قانداي كۇيدە ەكەنىن تۇسىنگەندە عانا انىق بولادى. ادام اتا جاساعان كۇنانىڭ كەسىرىنەن بارلىعىمىز قۇدايدىڭ وتباسىنان تىس قالدىق (ريم. 3:23؛ 5:12). ونىڭ بۇكىلالەمدىك وتباسىنا قابىلدانۋ ٷشىن ٶزىمىزدى قۇدايعا باعىشتاۋ وتە ماڭىزدى. نەگە؟
11 ەشقايسىمىز تۋعان اكەمىزدەن قۇدايدىڭ و باستا نيەت ەتكەن ماڭگىلىك ٶمىرىن مۇرا ەتپەدىك (ٴتىم. 1-ح. 6:19). العاشقى ادام جۇبى كۇنا جاساۋىمەن بۇكىل ادامزاتتى كوكتەگى ٴسۇيۋشى اكەمىزدەن الاستاتتى (زاڭدى قايتالاۋ 32:5 سالىستىر). سول كەزدەن بەرى ادامدار قۇدايدىڭ بۇكىلالەمدىك وتباسىنان تىس قالدى، ياعني تۋىلعاننان قۇدايدىڭ ۇلدارى بولا المايدى.
12. ا) كەمەلسىز ادام قۇدايدىڭ وتباسىنا قابىلدانۋ ٷشىن نە ىستەۋى قاجەت؟ ٵ) شومىلدىرۋ راسىمىنەن وتپەس بۇرىن قانداي قادامدار جاساۋ كەرەك؟
12 دەگەنمەن ٵربىر ادام قۇدايعا ٶتىنىش ٴبىلدىرىپ، ونىڭ ماقۇلداۋىنا يە بولعان قىزمەتشىلەردەن تۇراتىن وتباسىنا قابىلدانا الادى a. ٴبىز سياقتى كۇناكار پەندەلەر ٷشىن بۇل قالايشا مۇمكىن؟ ەلشى پاۋىل: ‹تاڭىرگە ٵلى دە قاس بولعان كەزدە ونىڭ رۋحاني ۇلىنىڭ ٶلىمى ارقىلى قۇدايمەن تاتۋلاستىق›،— دەپ جازدى (ريم. 5:10). ٴبىز شومىلدىرۋ راسىمىنەن وتۋىمىزبەن قۇدايدىڭ ىقىلاسىنا يە بولۋ ٷشىن تازا ار-ۇجدان سۇرايتىنىمىزدى كورسەتەمىز (پەت. 1-ح. 3:21 ٴسىلت.). ٴبىراق شومىلدىرۋ راسىمىنە دەيىن بىرنەشە قادام جاساۋ كەرەك: قۇداي تۋرالى ٴبىلىم الۋ، وعان سەنىم ارتۋدى ۇيرەنۋ جانە وكىنىپ، تەرىس جولدان قايتۋ (جوح. 17:3؛ ەل. ٸس. 3:19 جد؛ ەۆر. 11:6). قۇدايدىڭ وتباسىنا قابىلدانۋ ٷشىن تاعى ٴبىر ماڭىزدى قادام جاساۋ قاجەت. قانداي؟
13. نەگە قۇدايدىڭ وتباسىنا مۇشە بولۋ ٷشىن باعىشتالۋ انتىن بەرۋ ماڭىزدى؟
13 ادال قىزمەتشىلەردەن تۇراتىن قۇدايدىڭ وتباسىنا مۇشە بولعىسى كەلگەن اركىم، الدىمەن ەحوباعا شىن جۇرەكتەن ۋادە بەرۋى قاجەت. بۇعان ٴبىر مىسال كەلتىرەيىك. ٴبىر قامقور اكە جەتىم بالاعا كوڭىل ٴبولىپ، ونى اسىراپ العىسى كەلەدى. ٴبىراق ول الدىمەن بالانىڭ وزىنە ۋادە بەرگەنىن قالاپ، وعان: «سەنى ۇلىم ەتىپ اسىراپ الماس بۇرىن، مەنى اكە رەتىندە جاقسى كورىپ، سيلاۋعا دايىن ەكەنىڭدى بىلگىم كەلەدى»،— دەيدى. بالا ۋادە بەرگەندە عانا، قامقور اكەنىڭ وتباسىنا قابىلدانادى. بۇل ورىندى ەمەس پە؟ ەحوبا دا ٴبىزدى وتباسىنىڭ مۇشەسى ەتپەس بۇرىن، باعىشتالۋ انتىن بەرگەنىمىزدى قالايدى. كيەلى كىتاپتا: «ومىرلەرىڭ قۇدايعا ۇنامدى، تولىقتاي باعىشتالعان، ٴتىرى قۇرباندىقتاي بولسىن: وعان لايىقتى رۋحاني قىزمەت كورسەتۋلەرىڭ وسى بولادى»،— دەلىنگەن (ريم. 12:1).
سۇيىسپەنشىلىك پەن سەنىمنىڭ بەلگىسى
14. نەلىكتەن ٶمىردى قۇدايعا باعىشتاۋ سۇيىسپەنشىلىكتىڭ بەلگىسى بولىپ تابىلادى؟
14 ەحوباعا باعىشتالۋ انتىن بەرگەنىمىز — ونى شىن جۇرەكتەن جاقسى كورەتىندىگىمىزدىڭ بەلگىسى. بۇل نەكە انتىن بەرۋگە ۇقسايدى. ٴماسىحشى كۇيەۋ جىگىت قالىڭدىعىنىڭ سۇيەتىنىن وعان بارلىق جاعدايدا ادالدىق ساقتاۋدى انت ەتۋىمەن بىلدىرەدى. بۇل — جاي عانا ٴبىر نارسەنى ىستەۋ ۋادەسى ەمەس، ادامعا بەرىلەتىن سەرت. ٴماسىحشى كۇيەۋ جىگىت نەكە انتىن بەرمەسە، قالىڭدىعىمەن بىرگە ٶمىر سۇرە المايتىنىن جاقسى تۇسىنەدى. سول سياقتى، ٴبىز دە باعىشتالۋ انتىن بەرمەسەك، ەحوبانىڭ وتباسىنا قابىلدانا المايمىز. سونىمەن قۇدايعا باعىشتالۋ، كەمەلسىزدىگىمىزگە قاراماستان، ونىڭ مەنشىگى بولۋدى ٵرى باسىمىزعا قانداي كۇن تۋسا دا، وعان ادالدىق ساقتاۋدى قالايتىنىمىزدى بىلدىرەدى (مات. 22:37).
15. ٶمىرىمىزدى باعىشتاۋ نەگە سەنىمنىڭ دە بەلگىسى دەي الامىز؟
15 ەحوباعا ٶمىرىمىزدى باعىشتاۋ سەنىمنىڭ دە بەلگىسى بولىپ تابىلادى. نەگە؟ سەبەبى قۇدايعا جاقىنداۋدىڭ ٴبىز ٷشىن يگىلىكتى بولاتىنىنا سەنەمىز (زاب. 72:28). «قىڭىر، ازعىن ۇرپاقتىڭ اراسىندا» ٶمىر ٴسۇرىپ ەحوبانىڭ ەركىن ورىنداۋ قيىنعا سوعاتىندىقتان، ەحوبانىڭ ٴبىزدى قولدايتىنىنا كۇماندانبايمىز (ٴفىلىپ. 2:15؛ قور. 2-ح. 4:7). كەمەلسىزدىكتىڭ كەسىرىنەن ٴبىز شالىس قادام باسىپ قويۋىمىز مۇمكىن، ٴبىراق ەحوبانىڭ بىزگە راقىم ەتەتىنىنە سەنىمدىمىز (زابۋر 102:13، 14؛ ريمدىكتەرگە 7:21—25 وقى). سونداي-اق مىنسىزدىك ساقتاۋعا بەل بۋعانىمىز ٷشىن قۇداي ٴبىزدى جارىلقايتىنىنا سەنەمىز (ٵيۇپ 27:5).
ٶمىرىمىزدى قۇدايعا باعىشتاۋ باقىتتى ەتەدى
16، 17. نەگە ەحوباعا ٶمىرىمىزدى باعىشتاۋ ٴبىزدى باقىتتى ەتەدى؟
16 ەحوباعا ٶمىرىمىزدى باعىشتاۋ بەرۋمەن بايلانىستى، سوندىقتان ٴبىز باقىتتىمىز. ويتكەنى يسا: «العاننان گورى بەرگەن باقىتتى»،— دەپ ماڭىزدى ٴبىر شىندىقتى ايتقان (ەل. ٸس. 20:35). يسانىڭ ٶزى جەردە قىزمەت ەتكەن كەزدە بەرۋدەن كەلەتىن باقىتتى بارىنشا سەزىنگەن. سەبەبى ول، قاجەت بولعان جاعدايدا، ٴتىپتى اس-سۋسىز، دەمالىسسىز، قولايسىز جاعدايلارعا قاراماستان، ادامدارعا ٶمىر جولىن تابۋعا كومەكتەسكەن (جوح. 4:34). وسىلايشا اكەسىن قۋانتۋدان ٶزىن باقىتتى سەزىنگەن. ‹مەن ارقاشان وعان ۇنايتىندى ىستەيمىن›،— دەدى ول (جوح. 8:29؛ ناق. س. 27:11).
17 يسا ٸزباسارلارىنا باقىتتى ەتەتىن ٶمىر جولىن كورسەتىپ: «ماعان ەرىپ شاكىرتىم بولعىسى كەلگەن اركىم ٶز ەركى بويىنشا ٶمىر ٴسۇرۋىن قويسىن»،— دەگەن (مات. 16:24). مۇنداي ٶمىر جولى ٴبىزدى قامقور ەحوباعا جاقىنداتا تۇسەدى. ٶمىرىمىزدى قولىنا سەنىپ تاپسىرا الاتىن ودان ارتىق كىم بار؟!
18. ٶمىرىمىزدى ادامعا نە قانداي دا ٴبىر ىسكە ەمەس، ەحوباعا باعىشتاۋ نەگە ٴبىزدى الدەقايدا زور باقىتقا بولەيدى؟
18 ەحوباعا باعىشتالىپ، سوعان ساي ٶمىر ٴسۇرۋ ٴبىزدى زور باقىتقا بولەيدى. بۇل ٶمىرىمىزدى ادامعا نە قانداي دا ٴبىر ىسكە ارناۋمەن سالىستىرۋعا دا كەلمەيدى. مىسالى، ادامدار ومىرلەرىن بايلىق جيناۋعا ارناپ جاتادى، ٴبىراق بۇدان ناعىز باقىت پەن قاناعاتتى سەزىنە المايدى. ال وزدەرىن ەحوباعا باعىشتايتىن ادامدار بولسا باياندى باقىتتىڭ كوزىن تابادى (مات. 6:24). ولار «قۇدايمەن بىرگە ەڭبەكتەنۋشى» بولۋ مارتەبەسىنە قول جەتكىزەدى. الايدا بۇل ٶمىرىڭدى ەڭبەككە ەمەس، ريزاشىلىعى مول قۇدايعا باعىشتاۋدى بىلدىرەدى (قور. 1-ح. 3:9). ادامنىڭ جانقيارلىق رۋحىن ەشكىم قۇدايدان ارتىق باعالاي المايدى. ول ادال قىزمەتشىلەرىن ٴتىپتى جاستىق شاققا ورالتىپ، ماڭگىلىك بويى شاپاعاتىن توگەدى (ٵيۇپ 33:25؛ ەۆرەيلەرگە 6:10 وقى).
19. ەحوباعا ٶمىرىن باعىشتايتىندار قانداي مارتەبەگە يە بولادى؟
19 ٶمىرىڭدى ەحوباعا باعىشتاساڭ، ونىمەن تىعىز قارىم-قاتىناستا بولا الاسىڭ. كيەلى كىتاپتا: «قۇدايعا جاقىنداڭدار، سوندا ول دا سەندەرگە جاقىندايدى»،— دەلىنگەن (جاق. 4:8؛ زاب. 24:14). ەحوبانىڭ مەنشىگى بولۋ نەگە دۇرىس شەشىم ەكەنىن كەلەسى ماقالادا قاراستىرامىز.
[سىلتەمە]
a يسانىڭ «باسقا قويلارى» مىڭجىلدىق بيلىكتىڭ سوڭىنا دەيىن تولىق ماعىنادا قۇدايدىڭ ۇلدارى بولا المايدى. الايدا ولار وزدەرىن قۇدايعا باعىشتاعاندىقتان، ونى «اكە» دەي الادى جانە شىنايى قىزمەتشىلەرىنەن تۇراتىن وتباسىنىڭ مۇشەسى بولىپ ەسەپتەلەدى (جوح. 10:16؛ يشايا 64:8؛ مات. 6:9؛ ايان 20:5).
قالاي جاۋاپ بەرەر ەدىڭدەر؟
•ٶمىرىمىزدى قۇدايعا باعىشتاۋ دەگەن نەنى بىلدىرەدى؟
•قۇدايعا باعىشتالۋدىڭ قانداي پايداسى بار؟
•نەگە ٴماسىحشى ٶمىرىن ەحوباعا باعىشتاۋ كەرەك؟
[زەرتتەۋگە ارنالعان سۇراقتار]
[6-بەتتەگى سۋرەت]
باعىشتالعانىمىزعا ساي ٶمىر ٴسۇرۋدىڭ ارقاسىندا باياندى باقىتتىڭ كوزىن تابامىز